Sanebimɔi ni Jɛ Kanelɔi Adɛŋ

Taakɛ agba afɔ̃ shi yɛ Daniel 9:24 lɛ, mɛɛ be afɔ “Hekrɔŋkrɔŋ Fe Fɛɛ” lɛ mu?

Daniel 9:24-27 lɛ ji gbalɛ ni kɔɔ Kristo “mɔ ni afɔ lɛ mu ni ji lumɔ”—lɛ puemɔ he. Belɛ, “Hekrɔŋkrɔŋ Fe Fɛɛ” lɛ mu fɔɔ ni agba afɔ̃ shi lɛ kɔɔɔ Hekrɔŋkrɔŋ Fe Fɛɛ tsũ ni yɔɔ Yerusalem sɔlemɔwe lɛ he. Shi moŋ, wiemɔ ni ji “Hekrɔŋkrɔŋ Fe Fɛɛ” lɛ kɔɔ Nyɔŋmɔ sɔlemɔwe ni yɔɔ ŋwɛi lɛ he—ŋwɛi Hekrɔŋkrɔŋ Fe Fɛɛ—ni yɔɔ Yehowa mumɔŋ sɔlemɔwe kpeteŋkpele lɛ mli lɛ. *—Hebribii 8:1-5; 9:2-10, 23.

Mɛɛ be Nyɔŋmɔ mumɔŋ sɔlemɔwe lɛ je shishi? Ojogbaŋŋ, susumɔ nɔ ni ba beni Yesu kɛ ehe ha koni abaptisi lɛ yɛ afi 29 Ŋ.B. lɛ he okwɛ. Kɛjɛ nakai beaŋ kɛbaa yɛ eshihilɛ mli lɛ, Yesu ha wiemɔi ni yɔɔ Lala 40:7-9 lɛ ba mli. Sɛɛ mli lɛ, bɔfo Paulo tsɔɔ mli akɛ, Yesu sɔle eha Nyɔŋmɔ akɛ: “Afɔle kɛ nikeenii lɛ osumɔɔɔ, shi gbɔmɔtso osaa oha mi.” (Hebribii 10:5) Yesu le akɛ Nyɔŋmɔ ‘sumɔɔɔ’ ni aya nɔ akɛ kooloi ashã afɔlei yɛ Yerusalem sɔlemɔwe lɛ. Yɛ no najiaŋ lɛ, Yehowa esaa adesa gbɔmɔtso ni yeɔ emuu kɛha Yesu, koni ekɛ no ashã afɔle lɛ. Beni Yesu tsɔɔ bɔ ni eyɔɔ enɛ he tsui lɛ, etee nɔ ekɛɛ akɛ: “Naa, miba, aŋma mihe sane yɛ wolokpo lɛ mli, ní mibafee bo, Nyɔŋmɔ, osuɔmɔnaa nii lɛ.” (Hebribii 10:7) Ni te Yehowa here nɔ eha tɛŋŋ? Mateo sanekpakpa lɛ jaje akɛ: “Ni beni abaptisi Yesu lɛ, ejɛ nu lɛ mli amrɔ eje kpo; ni naa, agbele ŋwɛi naa aha lɛ, ni ena Nyɔŋmɔ Mumɔ lɛ miikpeleke shi tamɔ okpo kɛmiiba enɔ. Ni naa, gbee ko jɛ ŋwɛi kɛɛ: Mɔ nɛ ji misuɔmɔ bi ni mináa ehe tsui lɛ.”—Mateo 3:16, 17.

Yesu gbɔmɔtso ni ekɛshã afɔle ni Yehowa Nyɔŋmɔ kpɛlɛ nɔ lɛ tsɔɔ akɛ, afɔleshaa latɛ ni da fe afɔleshaa latɛ diɛŋtsɛ ni yɔɔ Yerusalem sɔlemɔwe lɛ eba shihilɛ mli. Eji Nyɔŋmɔ “suɔmɔnaa nii” afɔleshaa latɛ, aloo gbɛjianɔtoo kɛha Yesu adesa shihilɛ akɛ afɔleshaa nɔ̃ lɛ nɔkpɛlɛmɔ. (Hebribii 10:10) Mumɔ krɔŋkrɔŋ ni akɛfɔ Yesu mu lɛ tsɔɔ akɛ, agbɛnɛ, Nyɔŋmɔ kɛ emumɔŋ sɔlemɔwe he gbɛjianɔtoo lɛ fɛɛ eba shihilɛ mli. * Enɛ hewɔ lɛ, beni abaptisi Yesu lɛ, afɔ Nyɔŋmɔ ŋwɛi shihilɛhe lɛ mu, aloo ebafee srɔto ákɛ “hekrɔŋkrɔŋ fe fɛɛ” yɛ mumɔŋ sɔlemɔwe kpeteŋkpele lɛ gbɛjianɔtoo lɛ mli.

[Shishigbɛ niŋmai]

[Mfoniri ni yɔɔ baafa 27]

Afɔ “Hekrɔŋkrɔŋ Fe Fɛɛ” lɛ mu beni abaptisi Yesu lɛ