Maŋtsɛyeli Jajelɔi Bɔ Amaniɛ

Atsu Emumɔŋ Hiamɔ Nii Ahe Nii

KIPRO ji ŋshɔkpɔ ko ni yɔɔ Mediteranea Ŋshɔ lɛ kooyi-bokagbɛ. Yɛ Biblia beaŋ lɛ, ale Kipro waa yɛ akɔɔble kɛ tsei fɛfɛji ni yɔɔ jɛmɛ lɛ hewɔ. Paulo kɛ Barnaba shiɛ Maŋtsɛyeli sanekpakpa lɛ he sane yɛ jɛmɛ yɛ amɛ klɛŋklɛŋ maŋsɛɛ sanekpakpa shiɛmɔ nitsumɔ lɛ mli. (Bɔfoi lɛ Asaji 13:4-12) Ŋmɛnɛ, sanekpakpa lɛ miiná Kiprobii pii ashihilɛ nɔ hewalɛ lolo. Enɛ ji anɔkwale yɛ Lucas, ni ji nuu ko ni eye afii 40 kɛyaa lɛ gbɛfaŋ. Egba akɛ:

“Afɔ́ mi awo weku ni mli bii lɛ ayifalɛ ji kpawo ni lɛɔ tsinai lɛ mli. Misumɔɔ wolo kanemɔ kɛjɛ migbekɛbiiashi. Wolo ni misumɔɔ kanemɔ waa ji Kristofoi a-Hela Ŋmalɛ wolo bibioo ni anyɛɔ akɛwoɔ atade kotoku mli lɛ. Beni miye afii nyɔŋma lɛ, mi kɛ minanemɛi komɛi to Biblia kasemɔ kuu bibioo ko shishi. Shi, etsɛɛɛ ni agu, ejaakɛ onukpai lɛ ekomɛi ni yɔɔ akrowa lɛ kɛɔ akɛ jamɔŋ atuatselɔi ji wɔ.

“Sɛɛ mli beni miyaa skul yɛ United States lɛ, mikɛ mɛi ni jɛ jamɔi srɔtoi amli kpe. Enɛ tsɛ̃ɛ shwelɛ ni miyɔɔ kɛha mumɔŋ nibii lɛ hiɛ ekoŋŋ. Mikɛ bei babaoo kaseɔ jamɔi srɔtoi ahe nii yɛ univɛsiti lɛ wojiatoohe lɛ. Agbɛnɛ hu mitee sɔlemɔi srɔtoi amli, shi yɛ mɔdɛŋ ni mibɔ lɛ fɛɛ sɛɛ lɛ, mitsui enyɔɔɔ mimli yɛ mumɔŋ nibii agbɛfaŋ.

“Beni migbe minikasemɔ lɛ naa lɛ, miyatsu nii yɛ Kipro akɛ nitsumɔhe ko ní akwɛɔ lá kɛ wamɔ mli lɛ nɔkwɛlɔ nukpa. Nuu onukpa ko ni atsɛɔ lɛ Antonis, ni eji Yehowa Odasefoi lɛ ateŋ mɔ kome lɛ fɔɔ mi saramɔ yɛ nitsumɔhe lɛ. Shi, Hela Ɔrtodɔks Sɔlemɔ lɛ yɔse bɔ ni esaraa mi lɛ.

“Etsɛɛɛ tsɔ̃ ni Nyɔŋmɔ jamɔ he nikaselɔ ko bana mi ni eje minijiaŋ wui, bɔni afee ni mikɛ Yehowa Odasefoi lɛ akpa sanegbaa. Akɛni atsɔɔ mi kɛjɛ migbekɛbiiashi akɛ Hela Ɔrtodɔks Sɔlemɔ lɛ ji anɔkwa jamɔ lɛ hewɔ lɛ, mikpɛlɛ ni miha Antonis kpa mi saramɔ, ni mikɛ Nyɔŋmɔ jamɔ he nikaselɔ lɛ bɔi Biblia lɛ mli sanegbaa. Miyasara mɔ kome shihilɔi ashihilɛhei pii yɛ Kipro hu. Mifã gbɛ kɛtee Greece kooyigbɛ po, ni miyasara Athos Gɔŋ lɛ, he ni mɛi susuɔ akɛ eji gɔŋ krɔŋkrɔŋ ni fe fɛɛ ni yɔɔ Ɔrtodɔks Kristofoi aje lɛ mli lɛ. Shi loloolo lɛ, ahako mi Biblia mli sanebimɔi lɛ ahetoo.

“Kɛkɛ ni misɔle mibi Nyɔŋmɔ koni eha mana anɔkwale lɛ. No sɛɛ etsɛɛɛ lɛ, Antonis basara mi ekoŋŋ yɛ minitsumɔhe lɛ, ni minu he akɛ aha misɔlemɔ lɛ hetoo. No hewɔ lɛ, mikpa Nyɔŋmɔ jamɔ he nikaselɔ lɛ ŋɔɔ yaa, ni mikɛ Antonis je Biblia lɛ kasemɔ shishi. Mitee hiɛ babaoo, ni yɛ October 1997 mli lɛ, mikɛ nu mli baptisimɔ fee mihenɔjɔɔmɔ kɛha Yehowa lɛ he okadi.

“Yɛ shishijee mli lɛ, miŋa kɛ wɔbiyei onukpai enyɔ ni amɛye afii 14 kɛ 10 yɛ nakai beaŋ lɛ te shi amɛwo. Shi yɛ jeŋba kpakpa kpo ni mijie hewɔ lɛ, miŋa kpɛ eyiŋ akɛ ebaaya wɔkpee lɛ eko yɛ Maŋtsɛyeli Asa lɛ nɔ. Bɔ ni Odasefoi lɛ kɛ mlihilɛ here lɛ, kɛ mɔ hesusumɔ kpo ni amɛjie amɛtsɔɔ lɛ lɛ ná enɔ hewalɛ waa diɛŋtsɛ. Agbɛnɛ hu, bɔ ni amɛkɛ Biblia lɛ tsuɔ nii lɛ titri hu ná enɔ hewalɛ. Nɔ ni jɛ mli ba ji akɛ, miŋa kɛ wɔbiyei enyɔ lɛ kpɛlɛ koni Yehowa Odasefoi lɛ kɛ amɛ akase Biblia lɛ. Kwɛ bɔ ni miná miishɛɛ miha beni abaptisi amɛyi etɛ lɛ fɛɛ yɛ “Nyɔŋmɔ Gbalɛ Wiemɔ” Kpokpaa Wulu nɔ Kpee ni afee yɛ afi 1999 mli lɛ shishi lɛ!

“Hɛɛ, atsu anɔkwale ni mitao lɛ he nii. Amrɔ nɛɛ lɛ, wɔweku muu lɛ fɛɛ, ni miŋa kɛ wɔbii ejwɛ lɛ fata he lɛ, efee ekome yɛ jamɔ krɔŋŋ kɛha Yehowa mli.”