Biblia Kasemɔ—Ani Ehe yɛ Sɛɛnamɔ Kɛha Bo?

“ESAAA akɛ akaneɔ kɛji osɔfo ko bɛ jɛmɛ.” Kɔkɔbɔɔ wiemɔ nɛɛ jeɔ kpo yɛ Bibliai komɛi ni Katolikbii yɔɔ lɛ amli. Kay Murdy ni yɔɔ Catholic Bible Institute yɛ Los Angeles lɛ wie akɛ: “Ákɛ Katolikbii lɛ, wɔnáaa hegbɛ kɛkane Biblia lɛ be fɛɛ be, shi nakai shihilɛ lɛ miitsake.” Ekɛɛ akɛ, kɛji Katolikbii baná amɛle bɔ ni Ŋmalɛ Krɔŋkrɔŋi lɛ baanyɛ aná hewalɛ yɛ amɛshihilɛ nɔ nɔŋŋ pɛ lɛ, “amɛ diɛŋtsɛ amɛhaa Biblia lɛ he hɔmɔ kɛ kumai yeɔ amɛ.”

Yɛ nɔ ni kɔɔ tsakemɔ nɛɛ he lɛ, adafitswaa wolo ni ji U.S. Catholic lɛ tsɛ́ jamɔŋ nitsɔɔmɔ sɛinɔtalɔ ko wiemɔ yisɛɛ, mɔ ni kɛɛ akɛ Katolikbii ni kɛ amɛhe bɔɔ Biblia kasemɔ gbɛjianɔtoi lɛ nu he akɛ “ahã nɔ ko ŋmɛɛ amɛ akɛ Katolikbii, ni akɛ nibii kpakpai babaoo yɛ Biblia lɛ mli. Amɛmiitao ni amɛnine ashɛ nakai nibii kpakpai ni amɛnu he akɛ amɛŋmɛɛ lɛ ekomɛi anɔ.”

Bɔ fɛɛ bɔ ni sane lɛ ji lɛ, mɛɛ “nibii kpakpai” yɔɔ kɛha Biblia kaselɔ ko ni ebaana? Susumɔ he okwɛ: Ani obaasumɔ ni ole bɔ ni ooofee otsu daa gbi shihilɛ mli yeyeeyefeemɔ he nii yɛ omanyeyeli mli? Te ooofee tɛŋŋ oha toiŋjɔlɛ ahi weku kɔkɔrɔɔ lɛ mli? Mɛni hewɔ sakasakafeemɔ kɛ su ni teɔ shi woɔ shihilɛ kpakpa namɔ efa babaoo nakai? Mɛni ji nɔ ni haa oblahii kɛ oblayei kɛ amɛhe woɔ basabasafeemɔ mli ŋmɛnɛ? Abaanyɛ ana hetooi ni anyɛɔ akɛ he fɔ̃ɔ nɔ kɛha enɛɛmɛi kɛ sanebimɔi krokomɛi ni futuɔ mɔ yiŋ lɛ yɛ Nyɔŋmɔ Wiemɔ, Biblia lɛ mli, ni amɛbaafee “nibii kpakpai,” yɛ anɔkwale mli lɛ, jeee kɛha Katolikbii loo Protestantbii pɛ kɛkɛ shi moŋ kɛha Buddhabii, Hindubii, Muslimbii, Shintobii, kɛ mɛi ni heee yeee akɛ Nyɔŋmɔ yɛ kɛ mɛi ni heee Nyɔŋmɔ nɔ amɛyeee lɛ tete po. Taakɛ lalatsɛ lɛ wie lɛ, ‘Nyɔŋmɔ wiemɔ lɛ ji kane ha enane kɛ la hu yɛ etempɔŋ lɛ nɔ.’ Ebaanyɛ etsɔ nakai nɔŋŋ kɛha bo.—Lala 119:105.