Namɔ Mlai Obaanyɛ Okɛ Ohe Afɔ̃ Nɔ?

Nuu ko ni ekpã emli jaŋŋ kɛdamɔ gbɛjegbɛ lɛ masɛi lɛ nifeemɔ gbala mɔ ko ni enɛ ji klɛŋklɛŋ kwraa ni ebasara Afrika lɛ jwɛŋmɔ. Eyɔse akɛ yɛ minitii fioo fɛɛ minitii fioo ko mli lɛ, nuu lɛ shɔɔ enaji lɛ ashi kɛyaa kɛbaa, ni etsiɔ ehe fioo ko pɛ kɛyaa afãgbɛ yɛ be mli ni ekpã emli kɛdamɔ shi lolo. Sɛɛ mli kwraa ni saralɔ lɛ yɔse nɔ hewɔ ni nuu lɛ tsiɔ ehe taakɛ efeɔ lɛ. Yɛ anɔkwale mli lɛ, eebɔ mɔdɛŋ koni ehi tɛligraf tso shishi hɔɔŋ lɛ mli. Nuu lɛ susuma miitsi ehe fiofio beni hulu lɛ shĩɔ egbɛhe lɛ.

TAAKƐ nakai susuma ni hulu lɛ kɛba lɛ yɔɔ lɛ, adesai anifeemɔi kɛ mlai miitsake waa be fɛɛ be. Nɔ ni tamɔɔɔ enɛ lɛ, Yehowa Nyɔŋmɔ ni ji “lai atsɛ lɛ” tsakeee. Kaselɔ Yakobo ŋma akɛ: “Mɔ mli ni su tsakemɔ kɛ tsɔ̃mɔ susuma ko bɛ lɛ.” (Yakobo 1:17) Hebri gbalɔ Maleaki ŋma Nyɔŋmɔ diɛŋtsɛ sane jajemɔ lɛ akɛ: “Mi Yehowa lɛ, mitsakeee.” (Maleaki 3:6) Nyɔŋmɔ kɛɛ Israel maŋ lɛ yɛ Yesaia gbii lɛ amli akɛ: “Ni kɛyashi gbɔlɛ mli lɛ, mi nɔŋŋ ni, ni kɛyashi waŋjee mli hu mi nɔŋŋ matere: mi mifee.” (Yesaia 46:4) No hewɔ lɛ, be ni hoɔ kɛyaa lɛ tsakeee hekɛnɔfɔɔ ni wɔbaanyɛ wɔná yɛ Ofe lɛ shiwoi amli lɛ.

Nɔ ni Wɔkaseɔ Kɛjɛɔ Mla lɛ Mli

Taakɛ bɔ ni anyɛɔ akɛ he fɔ̃ɔ Yehowa shiwoi anɔ ní etsakeee lɛ, nakai nɔŋŋ eji yɛ emlai ni tsɔɔ nɔ ni ja kɛ nɔ ni ejaaa lɛ he. Ani obaahe jarayelɔ ko ni kɛ niŋmɛɛ  nibii srɔtoi enyɔ tsuɔ nii, ní ekome pɛ ja lɛ oye? Eka shi faŋŋ akɛ dabi. Nakai nɔŋŋ “shishiumɔ nsɛni lɛ, Yehowa miihĩ; shi nsɛnitɛ shishiishi lɛ, enáa he miishɛɛ.” (Abɛi 11:1; 20:10) Yehowa kɛ kitã nɛɛ fata Mla ni ekɛha Israelbii lɛ ahe akɛ: “Nyɛkayea kutumpɔo yɛ kojomɔ mli, yɛ nisusumɔ kɛ niŋmɛɛ kɛ nikaa gbɛfaŋ. Nyɛhiɛa nsɛnii ni ja, tɛi ni ja, efa ni ja kɛ hin ni ja; miji Yehowa, nyɛ-Nyɔŋmɔ lɛ, ni jie nyɛ kɛjɛ Mizraim shikpɔŋ lɛ nɔ lɛ.”—3 Mose 19:35, 36.

Nakai kitã lɛ toiboo lɛ ha Israelbii lɛ ná Nyɔŋmɔ hiɛ duromɔ kɛ heloonaa nibii babaoo. Nakai nɔŋŋ Yehowa mlai ni tsakeee ni akɛ he kpɛtɛɔ he ni jeee yɛ niŋmɛɛi kɛ nisusumɔi amli pɛ kɛkɛ, shi yɛ shihilɛ mli nibii srɔtoi fɛɛ mli lɛ kɛ jɔɔmɔi babaoo bahaa Yehowa jálɔ ni kɛ ehiɛ fɔ̃ɔ enɔ lɛ. Nyɔŋmɔ jaje akɛ: “Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.”—Yesaia 48:17.

Mɛni Hewɔ Tɛi ni Afolɔ Ashwie Shi Fiteɔ Ŋmɛnɛ Lɛ?

Biblia lɛ tsɔɔ nɔ hewɔ ni tɛi ni afolɔ ashwie shi lɛ fiteɔ ŋmɛnɛ lɛ. Biblia lɛ naagbee wolo ni ji Kpojiemɔ lɛ wieɔ ŋwɛi ta ko he, ta ni nɔ ni jɛ mli ba lɛ esa adesai fɛɛ ahe kɛbashi ŋmɛnɛŋmɛnɛ. Bɔfo Yohane ŋma akɛ: “Ta te shi yɛ ŋwɛi: Mikael kɛ ebɔfoi lɛ fã drako lɛ nɔ ta. Ni drako lɛ bɔfoi lɛ fata ehe kɛwu, ni amɛnyɛɛɛ, ni asaŋ amɛnaaa gbɛ dɔŋŋ yɛ ŋwɛi. Ni ashɛ́ drako kpeteŋkpele lɛ afɔ̃, mɔ ni ji blema onufu lɛ ní atsɛɔ lɛ diabolo [naafolɔlɔ loo abonsam] lɛ kɛ satan [henyɛlɔ] lɛ ní shishiuɔ jeŋ muu lɛ fɛɛ lɛ, ashɛ́ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.”—Kpojiemɔ 12:7-9.

Mɛni jɛ nakai ta lɛ mli ba amrɔ nɔŋŋ? Yohane tsa nɔ akɛ: “No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi nyɛnáa tsuijurɔ! Kpóo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”—Kpojiemɔ 12:12.

‘Kpóo ni ba shikpɔŋ lɛ nɔ’ lɛ ba beni Jeŋ Ta I lɛ fɛ yɛ afi 1914, ni ekɛ mlai ayinɔ ko ni esoro no kwraa yɛ ŋmɛnɛŋmɛnɛ nɔ̃ lɛ he lɛ ba naagbee lɛ. Yinɔsaneŋmalɔ Barbara Tuchman kɛɛ akɛ: “Ta Kpeteŋkpele ni ba yɛ afi 1914 kɛyashi afi 1918 lɛ efee tamɔ shikpɔŋ ko ni afite lɛ ni kã he ko ni foɔ nakai be lɛ kɛjɛɔ wɔnɔ lɛ he. Yɛ be mli ni agbeɔ mɛi ni fa babaoo ni kulɛ amɛhe baaba sɛɛnamɔ yɛ afii ni baa lɛ amli, ní afiteɔ hemɔkɛyelii lɛ, ní atsakeɔ susumɔi lɛ, ní ahaa lakamɔ he pilamɔi ni ehiii tsamɔ shwɛɔ yɛ no sɛɛ lɛ, eha gbɛ wulu diɛŋtsɛ kɛ jwɛŋmɔŋ gbɛ wulu hu ebakã yinɔi srɔtoi enyɔ teŋ.” Naanyo yinɔsaneŋmalɔ Eric Hobsbawm kpɛlɛ nɔ akɛ: “Kɛjɛ afi 1914 kɛbaa lɛ, nifitemɔ ni sa kadimɔ waa eba yɛ mlai ni yɛ no beaŋ lɛ abuɔ nomɛi akɛ nɔ ni tɔmɔ ko bɛ he yɛ maji ni etee hiɛ lɛ amli lɛ mli . . . Ebɛ mlɛo akɛ aaaná shishinumɔ yɛ bɔ ni wɔkuɔ wɔ sɛɛ oyayaayai trukaa kɛyaa nɔ ni kulɛ wɔ blematsɛmɛi ni hi shi yɛ afii ohai nyɔŋma kɛ nɛɛhu lɛ aaatsɛ lɛ akɛ shihilɛ gbonyo he mlai anɔ lɛ he.”

 Woloŋmalɔ Jonathan Glover wie yɛ ewolo ni ji Humanity—A Moral History of the Twentieth Century lɛ mli akɛ: “Nɔ kome ni kadiɔ wɔbe nɛɛ ji jeŋba he mla ni akɛtsuuu nii dɔŋŋ.” Eyɛ mli akɛ eyiŋ feɔ lɛ kɔshikɔshi yɛ jeŋba he mla ni jɛ he kroko yɛ bɔ ni jamɔ ni yaa nɔ yɛ Anaigbɛbii ateŋ lɛ eba shi eha lɛ hewɔ moŋ, shi ewo ŋaa akɛ: “Esa akɛ wɔteŋ mɛi ni heee jamɔŋ jeŋba he mla amɛyeee lɛ aha bɔ ni akɛtsuuu nii dɔŋŋ lɛ afee naagba kɛha amɛ lolo.”

Ŋmɛnɛŋmɛnɛ hekɛnɔfɔɔ ni afite—kɛ́ yɛ jarayeli, maŋkwramɔ, loo jamɔ mli jio loo yɛ mɔ diɛŋtsɛ kɛ weku gbɛjianɔtoi amli po—kɛ naagbai ni ehiii ni jɛɔ mli baa lɛ jio, amɛji Abonsam gbɛjianɔtoo lɛ fã ni etsɔɔ nɔ ekɛ amanehulu baa shikpɔŋ nɔ bii anɔ. Satan etswa efai shi akɛ eeewu eta lɛ kɛyashi naagbee kɛ lɛ kɛ mɛi fɛɛ ni bɔɔ mɔdɛŋ koni amɛhi shi yɛ Nyɔŋmɔ mlai anaa lɛ ahiɛkpatamɔ.—Kpojiemɔ 12:17.

Ani abaanyɛ he nɔ ko afee, ni ji tsabaa kɛha hekɛnɔfɔɔ ni afite lɛ lɛ? Bɔfo Petro ha hetoo akɛ: “Yɛ [Nyɔŋmɔ] eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Wɔbaanyɛ ni wɔkɛ wɔhe afɔ̃ nakai shiwoo lɛ nɔ ejaakɛ jeee akɛ Nyɔŋmɔ yɛ hewalɛ ni ekɛaatsu eyiŋtoo he nii kɛgbe naa kɛkɛ shi ekɛ nɔmimaa haa hu akɛ ebaaba mli anɔkwale. Yɛ ‘wiemɔ’ fɛɛ ‘wiemɔ ni jɛɔ edaaŋ’ lɛ gbɛfaŋ lɛ, Yehowa jaje akɛ: “Ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!” Shiwoo ni akɛ he fɔ̃ɔ nɔ lɛɛlɛŋ nɛ!—Yesaia 55:11; Kpojiemɔ 21:4, 5.

Nyɔŋmɔ Mlai ni Aaahi Shi yɛ Naa

Yɛ jeŋ ni mlai tsakeɔ ni efiteɔ yɛ mli lɛ mli lɛ, Yehowa Odasefoi bɔɔ mɔdɛŋ ni amɛhi shi yɛ jeŋba he mlai ni Biblia lɛ kɛhaa lɛ naa. No hewɔ lɛ, esoro amɛ yɛ mɛi babaoo lɛ ahe, ni bei pii lɛ enɛ gbalaa—mɛi krokomɛi—ajwɛŋmɔ ni ayeɔ amɛhe fɛo.

Yɛ kpee ko ni Yehowa Odasefoi fee lɛ shishi yɛ London lɛ, TV amaniɛbɔlɔ ko bi naawielɔ ko sane ni tsɔɔ kɛji Yehowa Odasefoi ji Kristofoi lɛɛlɛŋ. Eha hetoo akɛ: “Hɛɛ, nakai eji diɛŋtsɛ ejaakɛ Yesu ji wɔ nɔkwɛmɔnɔ. Pɛsɛmkunya efa babaoo yɛ je lɛ mli, ni wɔgbalaa jwɛŋmɔ kɛyaa Yesu Kristo nɔ akɛ gbɛ lɛ, anɔkwale lɛ, kɛ wala lɛ. Wɔheɔ wɔyeɔ akɛ lɛ ji Nyɔŋmɔ Bi lɛ, jeee Triniti fã ko, no hewɔ lɛ esoro shishinumɔ ni wɔyɔɔ yɛ Biblia lɛ he lɛ yɛ jamɔ ni ato shishi etsɛ jogbaŋŋ lɛ nɔ̃ lɛ he.”

Beni abi saji lɛ yɛ BBC tɛlivishiŋ lɛ nɔ lɛ, amaniɛbɔlɔ lɛ kɛ nifeemɔ lɛ ba naagbee kɛtsɔ kɛɛmɔ ni ekɛɛ akɛ: “Mikase nibii babaoo ni tsɔɔ nɔ hewɔ ni Yehowa Odasefoi bashiɔ wɔshinaa lɛ. Ni misusuuu akɛ mína mɛi 25,000 pɛŋ ni esaa amɛhe jogbaŋŋ ni amɛbaa amɛjeŋ jogbaŋŋ ni amɛ fɛɛ amɛfee ekome yɛ hekome yɛ be kome too lɛ nɔŋŋ mli dã.” Enɛ ji odaseyeli kpakpa lɛɛlɛŋ ni jɛ mɔ kroko ni naa nilee ni yɔɔ Nyɔŋmɔ mlai ni tsakeee lɛ ni ahiɔ shi yɛ naa lɛ dɛŋ!

Yɛ be mli ni ekolɛ jwɛŋmɔ ni tsɔɔ akɛ abaahi shi yɛ mlai ni jeee mɛi lɛ diɛŋtsɛ fee lɛ anaa lɛ baaje mɛi komɛi anijiaŋ wui lɛ, wɔmiiwo bo hewalɛ ni okwɛ o-Biblia lɛ mli ni okase nɔ ni Nyɔŋmɔ mlai ji. Shi kaaha otsui nyɔ omli yɛ niiamlipɛimɔ fioo ko pɛ hewɔ. Okɛ ŋaawoo ni bɔfo Paulo kɛha lɛ atsu nii, nɔ ni kɛɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) Yaa Maŋtsɛyeli Asa ni yɔɔ okutso lɛ mli lɛ nɔ, ni oná ole Odasefoi ni yɔɔ jɛmɛ lɛ. Obaana akɛ gbɔmɛi foji kɛkɛ ji amɛ, ní ji mɛi ni kɛ amɛhiɛ fɔ̃ɔ Biblia shiwoi lɛ anɔ, ní jieɔ hekɛnɔfɔɔ ni amɛyɔɔ yɛ Nyɔŋmɔ mli lɛ kpo amɛtsɔɔ kɛtsɔ emlai ni amɛbɔɔ mɔdɛŋ amɛhiɔ shi yɛ naa lɛ nɔ.

Nyɔŋmɔ mlai ni tsakeee ni anyɛɔ akɛ he fɔ̃ɔ nɔ ni okɛ ohe aaakpɛtɛ he yɛ oshihilɛ mli lɛ kɛ jɔɔmɔi baaba abaha bo lɛɛlɛŋ. Bó ninefɔɔ ni Nyɔŋmɔ diɛŋtsɛ kɛhaa lɛ toi, akɛ: “Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.”—Yesaia 48:18.

[Mfonirii ni yɔɔ baafa 5]

Ŋmɛnɛ, afiteɔ hekɛnɔfɔɔ ni ayɔɔ yɛ jarayeli, maŋkwramɔ, jamɔ, kɛ weku gbɛjianɔtoi amli