‘Ehiɛ Mli Kɛyawula Shi’
‘Ehiɛ Mli Kɛyawula Shi’
LYMAN ALEXANDER SWINGLE tsɔɔ bɔ ni ehenumɔi ji yɛ Yehowa sɔɔmɔ he yɛ afi 1993 vidio mli nifeemɔ ni ajie atsɔɔ Yehowa Odasefoi anitsumɔhe yitso lɛ mli nitsulɔi heei lɛ akɛ: “Gbó beni ospaaterei lɛ yɔɔ onaji!” *
Nyɛminuu Swingle ni eye afii 90 lɛ fee nakai pɛpɛɛpɛ taakɛ ewo mɛi krokomɛi hewalɛ ni amɛfee lɛ. ‘Ehiɛ mli kɛyawula shi.’ (Mateo 24:13) Eyɛ mli akɛ eepiŋ yɛ gbɔmɔtsoŋ moŋ, shi etee Yehowa Odasefoi a-Nɔyeli Kuu ni eji emlinyo lɛ kpee ni afee yɛ Shɔ, March 7 lɛ. Enɔ Jufɔ lɛ, ehela lɛ mli bawo wu, ni yɛ leebi ŋmɛji 4:26 yɛ March 14 lɛ, edatrɛfonyo lɛ ha ale akɛ egbo.
Lyman Swingle je esɔɔmɔ yɛ Yehowa Odasefoi ajeŋ fɛɛ nitsumɔhe yitso ni yɔɔ Brooklyn, New York lɛ shishi yɛ April 5, 1930. Esɔmɔ yɛ jɛmɛ nɔ ni miihe ashɛ afii 71. Klɛŋklɛŋ lɛ aha Lyman nitsumɔ yɛ wojiafeemɔhe lɛ, kɛkɛ ni akɛ lɛ tee woji akalamɔhe lɛ, ni eye ebua hu kɛ nikalamɔ inki feemɔ. Yɛ anɔkwale mli lɛ, Nyɛminuu Swingle ye aaafee afii 25 yɛ inki feemɔhe lɛ. Ekɛ aaafee afii 20 sɔmɔ hu akɛ niŋmaa nitsumɔhe ni yɔɔ nitsumɔhe yitso lɛ mlinyo. Yɛ ewala shihilɛ mli naagbee afii 17 lɛ mli lɛ, etsu nii yɛ Shikatoo Nitsumɔhe lɛ.
Lyman ji Nyɔŋmɔ Maŋtsɛyeli lɛ jajelɔ ni yɔɔ ekãa. Yɛ emra be afii ni ekɛyɔɔ Brooklyn lɛ mli lɛ, lɛ kɛ mɔ ni ekɛyɔɔ tsũ mli, Arthur Worsley táa Odasefoi alɛji lɛ ekome mli kɛyaa Hudson River. Beni amɛkɛ tsɔne ni ahaa egbɛɛɔ waa lɛ tsuɔ nii lɛ, amɛkɛ otsii anaagbee babaoo tsuɔ nii kɛtswaa Maŋtsɛyeli shɛɛ sane lɛ he adafi amɛtsɔɔ mɛi ni yɔɔ ŋshɔnaa gbɛ lɛ.
Afɔ́ Nyɛminuu Swingle yɛ November 6, 1910 yɛ Lincoln, Nebraska, shi no sɛɛ lɛ, etsɛɛɛ ni weku lɛ shi kɛtee Salt Lake City yɛ Utah. Jɛmɛ ji he ni efɔlɔi lɛ batsɔ Biblia Kaselɔi yɛ taakɛ atsɛɔ Yehowa Odasefoi yɛ nakai beaŋ lɛ yɛ afi 1913. Yɛ afii ni ho lɛ mli lɛ, Swingle shiabii lɛ here wielɔi babaoo ni basara amɛ ni jɛ Odasefoi lɛ Brooklyn nitsumɔhe yitso lɛ ahiɛmɛɛ, ni nɛkɛ hii nɛɛ ná Lyman nɔ hewalɛ yɛ gbɛ kpakpa nɔ. Yɛ afi 1923 beni eye afii 12 lɛ, abaptisi lɛ ni ekɛfee ehenɔjɔɔmɔ kɛha Nyɔŋmɔ lɛ he okadi.
Beni Lyman esɔmɔ nɔ ni fe afii 26 yɛ Brooklyn ákɛ oshijafonyo lɛ, ewala shihilɛ bafee miishɛɛ waa diɛŋtsɛ beni ekɛ Crystal Zircher bote gbalashihilɛ mli yɛ June 8, 1956 lɛ. Ekomefeemɔ yɛ amɛteŋ waa diɛŋtsɛ, ni amɛkɛ amɛhe woɔ shiɛmɔ nitsumɔ lɛ mli kutuu kɛyashi beni Crystal gbo yɛ afi 1998. Aaafee afii etɛ kɛtsɔ hiɛ lɛ, Crystal ye kuumɔ hela ni no ha egbɔjɔ kwraa diɛŋtsɛ. Lyman ni kɛ ehe wo ekwɛmɔ mli daa gbi lɛ ji hetuu-kɛhamɔ he nɔkwɛmɔnɔ ni feɔ hewalɛwoo kɛhaa mɛi fɛɛ, titri lɛ, mɛi ni na akɛ Lyman kɛ suɔmɔ tsiɔ helatsɛmɛi ashwiili yɛ akutso lɛŋ nyiɛmɔhei be mli ni Crystal kɛ Buu-Mɔɔ kɛ Awake! lɛ haa mɛi ni hoɔ kɛyaa lɛ.
Nyɛminuu Swingle kɛ nɔ ko eteee, eji nuu ni sumɔɔ mɔ sane ni no ha mɛi fɛɛ ni bale lɛ lɛ sumɔɔ esane. Taakɛ etsɛ kɛ enyɛ fɛɛ ji lɛ, ehé hiɛnɔkamɔ ni damɔ Biblia nɔ lɛ ni tsɔɔ Yesu Kristo ni akɛ lɛ aaahi ŋwɛi Maŋtsɛyeli lɛ mli lɛ eye, nɔ ni ji hiɛnɔkamɔ ni wɔyɔɔ nɔmimaa akɛ amrɔ nɛɛ enine eshɛ nɔ lɛ.—1 Tesalonikabii 4:15-18; Kpojiemɔ 14:13.
[Shishigbɛ niŋmaa]
^ kk. 2 Enɛ tsɔɔ akɛ ní mɔ ko aaagbo beni ekã he etsuɔ nii waa lolo.
[Mfoniri ni yɔɔ baafa 31]
Nyɛminuu Swingle kɛ aaafee afii 25 sɔmɔ yɛ inki feemɔhe lɛ
[Mfoniri ni yɔɔ baafa 31]
Ekomefeemɔ yɛ Lyman kɛ Crystal teŋ waa diɛŋtsɛ