Mɛni Hewɔ Esa akɛ Akase Biblia Lɛ?

BILL ji oblanyo, ekpɔiaŋ wa, ele woloŋ, ni eyɛ shika waa. Ni kɛlɛ, etsui enyɔɔɔ emli. Yiŋtoo ko bɛ eshihilɛ he, ni no gbá enaa waa. Akɛni eebɔ mɔdɛŋ koni ená yiŋtoo ko yɛ shihilɛ mli hewɔ lɛ, epɛi jamɔi srɔtoi babaoo mli, shi enine shɛɛɛ nɔ ni etaoɔ lɛ nɔ. Yɛ afi 1991 mli lɛ, ekɛ Yehowa Odasefoi lɛ ateŋ mɔ ko kpe, ni eshi wolo ko ni susuɔ nɔ ni Biblia lɛ kɛɔ yɛ shishinumɔ ni yɔɔ shihilɛ he lɛ he eha lɛ. Ato gbɛjianɔ kɛha Biblia mli nikasemɔ bɔni afee ni Bill anyɛ agbala ejwɛŋmɔ kɛya sane nɛɛ kɛ ekrokomɛi hu nɔ.

Bill kaiɔ akɛ: “Wɔfee wɔ klɛŋklɛŋ nikasemɔ, ni akɛni wɔkane Biblia lɛ shii abɔ hewɔ lɛ, mile akɛ enɛ ji nɔ ni mitaoɔ lɛ. Hetooi ni yɔɔ Biblia lɛ mli lɛ yɛ miishɛɛ waa. Yɛ nakai nikasemɔ lɛ sɛɛ lɛ, mi kudɔ tsɔne kɛtee gɔji lɛ anɔ, ni mije kpo kɛjɛ mitsɔne lɛ mli, ni mibo waa kɛ miishɛɛ. Miná miishɛɛ waa diɛŋtsɛ akɛ yɛ naagbee mli kwraa lɛ miina misanebimɔi lɛ ahetoo.”

Yɛ anɔkwale mli lɛ, jeee mɔ fɛɛ mɔ ni naa Biblia mli anɔkwale lɛ boɔ diɛŋtsɛ kɛ miishɛɛ. Shi  kɛlɛ, hetooi kɛha shihilɛ mli sanebimɔi ni he hiaa waa lɛ ni abaakase lɛ ji niiashikpamɔ ni miishɛɛ yɔɔ mli kɛha mɛi babaoo. Amɛnuɔ he tamɔ nuu ni yɔɔ Yesu abɛbua lɛ mli ní yana jwetri ko ni aŋɔtee yɛ abɔɔ ko mli lɛ. Yesu kɛɛ akɛ: “No he miishɛɛ ni ená hewɔ lɛ etee ni eyahɔ̃ɔ nii fɛɛ ni eyɔɔ lɛ, ni ekɛhé nakai abɔɔ lɛ.”—Mateo 13:44.

Nɔ Titri ni Haa Anáa Shihilɛ ni Shishinumɔ Yɔɔ He

Bill esusu shishijee sanebimɔ ko he, Mɛni ji yiŋtoo ni yɔɔ shihilɛ sɛɛ? Mɛi ni kaseɔ jeŋ nilee, Biblia mli nilelɔi, kɛ jeŋ nilelɔi kɛ nyɛmɔ babaoo ewo nakai sane lɛ mli taomɔ mli afii abɔ. Aŋkroaŋkroi eka akɛ amɛaaŋmala woji kpoi babaoo ni amɛkɛha hetoo. Amɛmɔdɛŋbɔi lɛ efee efolo, ni mɛi babaoo emu sane naa akɛ anyɛŋ ahã sanebimɔ lɛ hetoo. Ni kɛlɛ, hetoo yɛ. Eyɛ mli akɛ ebɛ mlɛo akɛ aaanu hetoo lɛ shishi moŋ, shi ebɛ hwanyaŋŋ. Atsɔɔ mli yɛ Biblia lɛ mli. Nɔ titri ni kɛ miishɛɛ shihilɛ ni shishinumɔ yɔɔ mli baa ji enɛ: Esa akɛ wɔná wɔkɛ Yehowa, wɔ-Bɔlɔ kɛ ŋwɛi Tsɛ lɛ teŋ wekukpaa kpakpa. Te wɔɔfee tɛŋŋ wɔnine ashɛ nakai feemɔ nɔ?

Gbɛ̀i enyɔ ni abaatsɔ nɔ atsi abɛŋkɛ Nyɔŋmɔ lɛ he nibii komɛi yɛ ni tamɔ nɔ ni teɔ shi woɔ ehe. Mɛi ni tsiɔ bɛŋkɛɔ lɛ lɛ sheɔ lɛ gbeyei ni amɛsumɔɔ lɛ hu. Nyɛhaa wɔsusua ŋmalɛi enyɔ komɛi ni fiɔ nakai sane lɛ sɛɛ lɛ he. Be ko ni eho lɛ, nilelɔ Maŋtsɛ Salomo kase adesa he nii jogbaŋŋ ni eŋmala nibii ni ena lɛ yɛ Biblia mli wolo ni ji Jajelɔ lɛ mli. Beni emuɔ nibii ni ena lɛ anaa lɛ eŋma akɛ: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitai lɛ anɔ! shi enɛ ji gbɔmɛi fɛɛ agbɛnaa.” (Jajelɔ 12:13, wɔma efã ko nɔ mi.) Afii ohai abɔ sɛɛ, beni abi ni Yesu atsɔɔ nɔ ni ji kita wulu yɛ Mla ni akɛha Mose lɛ mli lɛ, eha hetoo akɛ: “Suɔmɔ Nuntsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” (Mateo 22:37, wɔma efã ko nɔ mi.) Ani etamɔ nɔ ko ni yɔɔ naakpɛɛ kɛha bo akɛ esa akɛ wɔshe Nyɔŋmɔ gbeyei ni wɔsumɔ lɛ fɛɛ? Nyɛhaa wɔpɛia sɛɛnamɔi ni yɔɔ gbeyeishemɔ kɛ suɔmɔ mli lɛ wɔkwɛa kɛ bɔ ni amɛtsuɔ nii yɛ ekomefeemɔ mli kɛyeɔ buaa koni aná akɛ Nyɔŋmɔ teŋ wekukpaa ni haa mɔ tsui nyɔɔ emli.

Nɔ ni Nyɔŋmɔ Gbeyeishemɔ lɛ Tsɔɔ

Gbeyeishemɔ ni bulɛ yɔɔ mli he miihia kɛji wɔbaanyɛ wɔjá Nyɔŋmɔ yɛ gbɛ ni akpɛlɛɔ nɔ lɛ nɔ. Biblia lɛ kɛɔ akɛ: “Yehowa gbeyeishemɔ ji nilee shishijee.” (Lala 111:10) Bɔfo Paulo ŋma akɛ: “Nyɛhaa wɔdaa shi, ní wɔkɛsɔmɔ Nyɔŋmɔ bɔ ni sa ehiɛ kɛ woo kɛ gbeyeishemɔ.” (Hebribii 12:28) Nakai nɔŋŋ bɔfo ko ni bɔfo Yohane na yɛ ŋwɛi teŋ yɛ eninaa lɛ mli je sanekpakpa ni ejajeɔ lɛ shishi kɛ wiemɔi akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ.”—Kpojiemɔ 14:6, 7.

Nɛkɛ Nyɔŋmɔ gbeyeishemɔ nɛɛ, ni he hiaa waa diɛŋtsɛ kɛha shihilɛ ni shishinumɔ yɔɔ mli lɛ, tamɔɔɔ ŋmiŋmi ni ehiii ni mɔɔ mɔ ko lɛ. Ekolɛ ŋmiŋmi baamɔ wɔ kɛji awuiyelɔ ko ni yitsoŋ wa ni he yɔɔ gbeyei wo wɔhe gbeyei. Shi Nyɔŋmɔ gbeyeishemɔ—lɛ ji bulɛ kɛ woo kpakpa kɛha Bɔlɔ lɛ. Nɔ ni hu fata he ji gbeyeishemɔ kpakpa akɛ wɔbaafee nɔ ko ni esaaa Nyɔŋmɔ hiɛ ejaakɛ lɛ ji Kojolɔ ni Fe Fɛɛ kɛ Ofe, mɔ ni yɔɔ hewalɛ kɛ hegbɛ ni ekɛaagbala mɛi ni efeee toiboo lɛ atoi.

Gbeyeishemɔ kɛ Suɔmɔ Tsuɔ Nii yɛ Ekomefeemɔ Mli

Shi kɛlɛ, Yehowa sumɔɔɔ ni gbɔmɛi asɔmɔ lɛ akɛni amɛkɛ gbeyeishemɔ kɛ woo haa lɛ kɛkɛ hewɔ. Yehowa ji Nyɔŋmɔ ni yɔɔ suɔmɔ ni ekaaa. Etsirɛ bɔfo Yohane ni eŋma akɛ: “Nyɔŋmɔ lɛ, suɔmɔ ji lɛ.” (1 Yohane 4:8) Yehowa Nyɔŋmɔ kɛ adesa eye yɛ gbɛ ni suɔmɔ yɔɔ mli waa nɔ, ni eesumɔ ni gbɔmɛi akpɛlɛ nɔ kɛtsɔ suɔmɔ ni amɛ hu amɛaasumɔ lɛ lɛ nɔ. Shi kɛlɛ, mɛɛ gbɛ suɔmɔ ni tamɔ nɛkɛ kɛ Nyɔŋmɔ gbeyeishemɔ  yɔɔ gbeekpamɔ yɛ? Yɛ anɔkwale mli lɛ enyɔ lɛ yɛ tsakpãa ni bɛŋkɛ kpaakpa. Lalatsɛ lɛ ŋma akɛ: “Yehowa jieɔ eyitsoŋ sane etsɔɔ mɛi ní sheɔ lɛ lɛ.”—Lala 25:14.

Susumɔ bulɛ henumɔ kɛ woo ni gbekɛ ko yɔɔ kɛha tsɛ ko ni yɔɔ nilee kɛ gbɔmɔtsoŋ hewalɛ lɛ he okwɛ. Yɛ nakai beaŋ nɔŋŋ lɛ, gbekɛ ni tamɔ nɛkɛ lɛ kpɛlɛɔ etsɛ suɔmɔ lɛ nɔ. Gbekɛ lɛ kɛ ehe baafɔ etsɛ lɛ nɔ ni ebaakwɛ lɛ gbɛ kɛha gbɛtsɔɔmɔ, kɛ hekɛnɔfɔɔ akɛ gbɛtsɔɔmɔ nɛɛ kɛ sɛɛnamɔi baaba. Nakai nɔŋŋ, kɛji wɔsumɔɔ Yehowa ni wɔsheɔ lɛ gbeyei lɛ, wɔbaafee toiboo wɔha egbɛtsɔɔmɔ, ni wɔbaaná enɛ he sɛɛ. Kadimɔ nɔ ni Yehowa kɛɛ ni kɔɔ Israelbii lɛ ahe akɛ: “Miná ni kulɛ amɛná nɛkɛ tsui dã, ní amɛkɛshe mi gbeyei, ní amɛye mikitai lɛ fɛɛ nɔ, koni ahi aha amɛ kɛ amɛbii kɛya naanɔ!”—5 Mose 5:29.

Hɛɛ, Nyɔŋmɔ gbeyeishemɔ kɛ mɔ eyaaa nomŋɔɔ mli shi moŋ heyeli mli, ekɛ mɔ eyaaa awerɛhoyeli mli shi moŋ miishɛɛ mli. Yesaia gba yɛ Yesu he akɛ: “Eeená Yehowa gbeyeishemɔ lɛ he miishɛɛ.” (Yesaia 11:3) Ni lalatsɛ lɛ ŋma akɛ: “Ajɔɔ gbɔmɔ ni sheɔ Yehowa gbeyei, ni enáa ekitãi lɛ ahe tsui jogbaŋŋ lɛ!”—Lala 112:1.

Eka shi faŋŋ akɛ, wɔnyɛŋ wɔshe Nyɔŋmɔ gbeyei loo wɔsumɔ lɛ kɛji wɔleee lɛ. No hewɔ ni Biblia lɛ kasemɔ he hiaa waa lɛ. Nakai nikasemɔ lɛ yeɔ buaa wɔ koni wɔnu Nyɔŋmɔ su kɛ baŋ lɛ shishi ni wɔkɛ hiɛsɔɔ ayoo nilee ni yɔɔ egbɛtsɔɔmɔ sɛɛ ni wɔɔnyiɛ lɛ he. Be mli ni wɔtsiɔ kɛbɛŋkɛɔ Nyɔŋmɔ lɛ, wɔsumɔɔ ni wɔfee esuɔmɔnaa nii ni awoɔ wɔ hewalɛ koni wɔye ekitai lɛ anɔ, akɛni wɔle akɛ amɛhe baaba sɛɛnamɔ kɛha wɔ lɛ hewɔ.—1 Yohane 5:3.

Eji nɔ ni miishɛɛ yɔɔ mli akɛ mɔ ko aaale akɛ eehi shi yɛ gbɛ ni ja nɔ. Enɛ ji anɔkwale yɛ Bill, mɔ ni atsĩ etã kɛjɛ shishijee lɛ he. Ekɛɛ nyɛsɛɛ nɛɛ akɛ: “Yɛ afii nɛɛhu ni eho lɛ mli kɛjɛ mi klɛŋklɛŋ Biblia kasemɔ lɛ nɔ lɛ, mikɛ Yehowa teŋ wekukpaa lɛ eda. Shishijee miishɛɛ bolɔmɔ ni minu he lɛ ebatsɔ miishɛɛ shihilɛ gbɛ yɛ anɔkwale mli. Miyɛ jwɛŋmɔ kpakpa yɛ shihilɛ mli be fɛɛ be. Nifeemɔi ni shishinumɔ yɔɔ mli eyi mi gbii lɛ amli obɔ, jeee kɛ miishɛɛ ni ataoɔ ni yiŋtoo ko bɛ sɛɛ. Yehowa ebatsɔ mɔ ko ni yɔɔ diɛŋtsɛ kɛha mi, ni mile akɛ eyɛ mi hilɛ-kɛhamɔ he miishɛɛ diɛŋtsɛ.”

Wɔbaaya nɔ wɔsusu bɔ ni Yehowa he nilee ní aaaná kɛ miishɛɛ kɛ sɛɛnamɔi bahaa mɛi ni kɛtsuɔ nii yɛ amɛshihilɛ mli lɛ he yɛ sane ni nyiɛ sɛɛ lɛ mli.

[Wiemɔ ni akɔ ni akɛmiitsu nii ni yɔɔ baafa 5]

Nyɔŋmɔ Ni Wɔbaatsi Wɔbɛŋkɛ Lɛ Lɛ Tsɔɔ Akɛ, Wɔsumɔɔ Lɛ Ni Wɔyɛ Gbeyeishemɔ Kɛha Lɛ

[Mfoniri ni yɔɔ baafa 6]

Yesu ná miishɛɛ yɛ Yehowa gbeyeishemɔ mli