Yelikɛbuamɔ Kɛha Biblia Shishinumɔ

BIBLIA lɛ ji wolo ko ni esoro lɛ kwraa. Mɛi ni ŋma lɛ kɛɔ akɛ Nyɔŋmɔ kɛ emumɔ lɛ tsirɛ amɛ ni amɛŋma, ni emli saji lɛ kɛ odaseyeli babaoo haa akɛ nɔ ni amɛkɛɔ lɛ ji anɔkwale. (2 Timoteo 3:16) Nibii krokomɛi ni fata Biblia lɛ he ji, etsɔɔ he ni wɔjɛ, nɔ hewɔ ni wɔyɔɔ biɛ, kɛ he ni wɔyaa. Yɛ anɔkwale mli lɛ, eji wolo ko ni sa akɛ wɔsusu he!

Ekolɛ obɔ mɔdɛŋ akɛ obaakane Biblia lɛ shi ewa kɛha bo akɛ obaanu shishi. Ekolɛ olé he ni obaakwɛ koni okɛtao osanebimɔi lɛ ahetoo. Kɛji nakai ji sane lɛ, jeee okome pɛ okɛ naagba ni tamɔ nɛkɛ ekpe. Oshihilɛ lɛ tamɔ nuu ko ni hi shi yɛ klɛŋklɛŋ afii oha lɛ mli lɛ nɔ̃. Eefã gbɛ yɛ shwiili mli, kɛjɛ Yerusalem kɛmiiya emaŋ, Etiopia. Nɛkɛ Etiopia piafonyo nɛɛ kɛ gbee walɛ miikane Biblia mli gbalɛ wolo ni ji Yesaia, ni aŋma afɔ̃ shi nɔ ni fe afii ohai kpawo kɛtsɔ hiɛ lɛ.

Trukaa lɛ, nuu ko ni miijo foi kɛnyiɛ shwiili lɛ masɛi lɛ ŋa lɛ. Nuu lɛ ji Filipo, Yesu kaselɔ ni, ni ebi Etiopianyo lɛ akɛ: “Ani oonu nɔ ni okaneɔ lɛ shishi lo?” Etiopianyo lɛ hã hetoo akɛ: “Te mafee tɛŋŋ ni manyɛŋ, akɛ ja mɔ ko tsɔɔ mi?” Kɛkɛ ni efɔ̃ nine etsɛ Filipo kɛba shwiili lɛ mli. Filipo tsɔɔ sane ni nuu lɛ kaneɔ lɛ shishi ni etee nɔ ejaje “sanekpakpa ni kɔɔ Yesu he lɛ” etsɔɔ lɛ.—Bɔfoi lɛ Asaji 8:30-35.

 Taakɛ bɔ ni Filipo ye bua Etiopianyo lɛ ni enu Nyɔŋmɔ Wiemɔ lɛ shishi be babaoo ni eho nɛ lɛ, Yehowa Odasefoi yeɔ buaa gbɔmɛi koni amɛnu Biblia lɛ shishi ŋmɛnɛ. Amɛbaaná he miishɛɛ akɛ amɛaaye amɛbua bo hu. Bei pii lɛ, eji nɔ ni hi fe fɛɛ akɛ abaakase Biblia lɛ fiofio, ni aje shishi kɛ Ŋmalɛ mli shishijee tsɔɔmɔi lɛ. (Hebribii 6:1) Be mli ni oyaa ohiɛ lɛ, obaanyɛ oye nɔ ni bɔfo Paulo tsɛ lɛ akɛ “niyenii kpakpa”—no ji, anɔkwalei ni mli kwɔlɔ lɛ. (Hebribii 5:14) Eyɛ mli akɛ Biblia lɛ ji nɔ ni okaseɔ lɛ moŋ, shi woji krokomɛi—Biblia kasemɔ woji—baanyɛ aye abua bo koni ona ni onu Biblia mli saji ashishi yɛ saji srɔtoi babaoo he.

Bei pii lɛ abaanyɛ ato nikasemɔ he gbɛjianɔ yɛ be kɛ he ko ni hi kɛha bo. Mɛi komɛi po kaseɔ nii kɛtsɔ tɛlifoŋ nɔ. Afeee nikasemɔ lɛ tamɔ bɔ ni akaseɔ nii yɛ skultsu mli; eji gbɛjianɔ ni atoɔ ni baasa bɔ ni oshihilɛ yɔɔ ha akɛ mɔ aŋkro lɛ he, ni nɔ ni fata he ji bɔ ni ogbɛjianɔtoo yɔɔ kɛ woloŋlee. Ehe ehiaaa ni owoɔ Biblia kasemɔ ni tamɔ enɛ he nyɔmɔ. (Mateo 10:8) Afeee ehe kaa ko, ni ahaŋ onu he akɛ oshwie ohiɛ shi. Abaaha osanebimɔi lɛ ahetoo, ni obaakase bɔ ni ooofee otsi obɛŋkɛ Nyɔŋmɔ. Shi, mɛni hewɔ ni esa akɛ okase Biblia lɛ? Susumɔ yiŋtoi komɛi ahewɔ ni Biblia lɛ kasemɔ baanyɛ eha oná miishɛɛ lɛ he.