Nyɛfea Nikpamɔ Nitsulɔi ni Yɔɔ Miishɛɛ!
Nyɛfea Nikpamɔ Nitsulɔi ni Yɔɔ Miishɛɛ!
“Nikpamɔ lɛ fá moŋ, shi nitsulɔi lɛ faaa. No hewɔ lɛ nyɛkpaa nikpamɔ nuntsɔ lɛ fai, koni ewo nitsulɔi agbɛ kɛba enikpamɔ lɛ mli!”—MATEO 9:37, 38.
1. Mɛni yeɔ ebuaa wɔ ni wɔyaa nɔ wɔfeɔ Nyɔŋmɔ suɔmɔnaa nii lɛ?
KƐJI akɛ wɔkai be mli ni abaptisi wɔ ákɛ Yehowa tsuji lɛ ateŋ mɔ kome, ni enɛ ba yɛ afii fioo ni eho nɛ mli aloo afii pii nɛ lɛ, ekolɛ enyɛɔ efeɔ tamɔ nɔ ni nyɛ kpaakpa nyɛ eba mli. Yijiemɔ ni wɔkɛhaa Yehowa lɛ bafee wɔ henɔjɔɔmɔ shihilɛ lɛ mli nɔ̃ titri. Beni wɔhé be ni sa koni wɔye wɔbua mɛi krokomɛi koni amɛnu ni amɛkpɛlɛ Maŋtsɛyeli shɛɛ sane lɛ nɔ lɛ, no mli lɛ miishɛɛ sɔɔmɔ kɛha Yehowa ji wɔ hiamɔ nii titri. (Efesobii 5:15, 16) Wɔnaa kɛbashi ŋmɛnɛ akɛ be hoɔ oyayaayai beni wɔbɛ dekã ni ‘wɔyɔɔ babaoo feemɔ yɛ Nuntsɔ lɛ nitsumɔ lɛ mli lɛ.’ (1 Korintobii 15:58) Eyɛ mli akɛ wɔkɛ naagbai kpeɔ moŋ, shi Yehowa suɔmɔnaa nifeemɔ he miishɛɛ ni wɔyɔɔ lɛ kanyaa wɔ ni wɔya nɔ.—Nehemia 8:10.
2. Mɛni haa wɔnáa miishɛɛ yɛ mfonirifeemɔŋ nikpamɔ nitsumɔ lɛ mli?
2 Ákɛ Kristofoi lɛ, wɔkɛ wɔhe ewo mfonirifeemɔŋ nikpamɔ nitsumɔ ko mli. Yesu Kristo kɛ aŋkroaŋkroi ni abuaa amɛnaa kɛha naanɔ wala lɛ to nikpamɔ he. (Yohane 4:35-38) Akɛni wɔkɛ wɔhe ewo nikpamɔ nitsumɔ ni tamɔ nɛkɛ mli hewɔ lɛ, ebaafee nɔ ni woɔ mɔ hewalɛ akɛ wɔɔpɛi miishɛɛ ni mra be mli nikpalɔi Kristofoi lɛ ná lɛ mli wɔkwɛ. Wɔbaatĩ nibii etɛ ni haa wɔnáa ŋmɛnɛŋmɛnɛ nikpamɔ lɛ mli miishɛɛ lɛ mli. Enɛɛmɛi ji (1) wɔ shɛɛ sane ni haa hiɛnɔkamɔ lɛ, (2) omanye ni wɔye yɛ mɛi ataomɔ lɛ mli, kɛ (3) wɔ subaŋ ákɛ nikpamɔ nitsulɔi ni taoɔ toiŋjɔlɛ lɛ.
Atsu Amɛ ákɛ Nikpamɔ Nitsulɔi
3. Yesu mra be mli sɛɛnyiɛlɔi lɛ ná miishɛɛ yɛ mɛni mli?
3 Kwɛ bɔ ni mra be mli nikpamɔ nitsulɔi lɛ—titri lɛ Yesu bɔfoi anɔkwafoi 11 lɛ—ashihilɛ tsake ha yɛ nakai gbi lɛ nɔ, yɛ afi 33 Ŋ.B., beni amɛtee gɔŋ ko nɔ yɛ Galilea koni amɛkɛ Kristo ni átee lɛ shi lɛ ayakpe lɛ! (Mateo 28:16) Ekolɛ “aaafee nyɛmimɛi ohai enumɔ loo nɔ̃” yɛ jɛmɛ yɛ nakai be lɛ mli. (1 Korintobii 15:6) Nitsumɔ ni Yesu kɛha amɛ lɛ tee nɔ ejije yɛ amɛtoiiaŋ. Ekɛɛ amɛ akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Yɛ yiwaa ni naa wa lɛ fɛɛ sɛɛ lɛ, amɛná miishɛɛ babaoo yɛ nikpamɔ nitsumɔ lɛ mli, beni amɛna bɔ ni atoɔ Kristo sɛɛnyiɛlɔi asafoi yɛ hei srɔtoi babaoo lɛ. Beni be shwieɔ mli lɛ, ‘aashiɛ sanekpakpa lɛ aatsɔɔ bɔɔ nii ni yɔɔ ŋwɛi shishi nɛɛ fɛɛ.’—Kolosebii 1:23; Bɔfoi lɛ Asaji 1:8; 16:5.
4. Mɛɛ shihilɛi amli atsu Kristo kaselɔi lɛ yɛ?
4 Yɛ esɔɔmɔ nitsumɔ yɛ Galilea lɛ shishijee mli be ko lɛ, Yesu bua bɔfoi 12 lɛ anaa ni etsu amɛ ni amɛyajaje akɛ: “Ŋwɛi maŋtsɛyeli lɛ eshɛ shi etã.” (Mateo 10:1-7) No mli lɛ, lɛ diɛŋtsɛ “[ekpa Galilea] maji lɛ kɛ akrowai lɛ fɛɛ nɔ, ni etsɔ̃ɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ, ni etsáa hela fɛɛ hela kɛ hejaramɔ fɛɛ hejaramɔ yɛ maŋ lɛŋ.” Mɛi babaoo lɛ anii fee Yesu mɔbɔ “akɛni etɔ amɛ ni amɛfee yuyaa tamɔ tooi ni bɛ kwɛlɔ lɛ.” (Mateo 9:35, 36) Akɛni enɛ ná enɔ hewalɛ waa hewɔ lɛ, ekɛɛ ekaselɔi lɛ akɛ: “Nikpamɔ lɛ fá moŋ, shi nitsulɔi lɛ faaa. No hewɔ lɛ nyɛkpaa nikpamɔ nuntsɔ [Yehowa Nyɔŋmɔ] fai, koni ewo nitsulɔi agbɛ kɛba enikpamɔ lɛ mli!” (Mateo 9:37, 38) Bɔ ni Yesu bu bɔ ni nikpamɔ nitsulɔi lɛ ahe hiaa ha lɛ naa eha lɛ tamɔ bɔ ni eji yɛ Yudea lɛ pɛpɛɛpɛ, beni eshwɛ nyɔji ekpaa pɛ ni ebaagbe eshikpɔŋ nɔ sɔɔmɔ nitsumɔ lɛ naa lɛ. (Luka 10:2) Etsu esɛɛnyiɛlɔi lɛ yɛ nakai bei enyɔ lɛ fɛɛ mli ákɛ nikpamɔ nitsulɔi.—Mateo 10:5; Luka 10:3.
Wɔ Shɛɛ Sane ni Hiɛnɔkamɔ Yɔɔ Mli Lɛ
5. Mɛɛ shɛɛ sane nɛkɛ wɔjajeɔ wɔtsɔɔ?
5 Ákɛ ŋmɛnɛŋmɛnɛ beaŋ Yehowa tsuji lɛ, wɔkɛ miishɛɛ hereɔ tsɛmɔ kɛha nikpamɔ nitsulɔi lɛ nɔ. Nɔ kome ni yeɔ ebuaa wɔmiishɛɛ namɔ babaoo ji akɛ, wɔkɛ hiɛnɔkamɔ shɛɛ sane yahaa mɛi ni amɛtsuii ekumɔ ni amɛhao lɛ. Taakɛ Yesu klɛŋklɛŋ afii oha lɛ mli kaselɔi lɛ ji lɛ, mɛɛ hegbɛ wɔná nɛkɛ akɛ wɔjaje sanekpakpa lɛ—shɛɛ sane ni hiɛnɔkamɔ diɛŋtsɛ yɔɔ mli lɛ—wɔha mɛi ni “etɔ amɛ ni amɛfee yuyaa tamɔ tooi ni bɛ kwɛlɔ lɛ”!
6. Mɛɛ nitsumɔ bɔfoi lɛ kɛ amɛhe wo mli yɛ klɛŋklɛŋ afii oha lɛ mli?
6 Beni shɛɔ klɛŋklɛŋ afii oha lɛ teŋgbɛ lɛ, bɔfo Paulo miishiɛ sanekpakpa lɛ ni dekã bɛ mli kwraa. Ni enikpamɔ nitsumɔ lɛ hu mɔɔ shi diɛŋtsɛ, ejaakɛ beni eŋmaa wolo eyaha Kristofoi ni yɔɔ Korinto aaafee afi 55 Ŋ.B. lɛ, ekɛɛ akɛ: “Anyɛmimɛi, miiha nyɛle akɛ sanekpakpa lɛ ni mijaje mitsɔɔ nyɛ, ni nyɛmɔ mli hu, ni nyɛhiɛ mli hu lɛ.” (1 Korintobii 15:1) Bɔfoi lɛ kɛ mra be mli Kristofoi krokomɛi lɛ ji nikpamɔ nitsulɔi ni yɔɔ ekãa waa. Eyɛ mli akɛ Biblia lɛ ekɛɛɛ wɔ bɔfoi abɔ ni hi shi kɛtsɔ nakai be ni sa kadimɔ ni ba naagbee kɛ Yerusalem hiɛkpatamɔ yɛ afi 70 Ŋ.B. lɛ mli moŋ, shi wɔle akɛ bɔfo Yohane tee nɔ eshiɛ yɛ no sɛɛ aaafee afii 25.—Kpojiemɔ 1:9.
7, 8. Mɛɛ shɛɛ sane ni hiɛnɔkamɔ yɔɔ mli Yehowa tsuji kɛ hehiamɔ shiɛɔ no babaoo fe bei fɛɛ ni eho bianɛ?
7 Kɛkɛ ni afii ohai abɔ ni Kristendom osɔfoi, “esha gbɔmɔ lɛ” ni ekwa hemɔkɛyeli lɛ kɛye nɔ lɛ ba. (2 Tesalonikabii 2:3) Shi, kɛmiiba afii ohai 19 lɛ naagbee gbɛ lɛ, mɛi ni tao akɛ amɛaahi shi yɛ blema Kristojamɔ naa lɛ mɔ shɛɛ sane ni hiɛnɔkamɔ yɔɔ mli lɛ mli, ni amɛtswa Maŋtsɛyeli lɛ he adafi. Yɛ anɔkwale mli lɛ, kɛjɛ wolo tɛtrɛɛ nɛɛ klɛŋklɛŋ nɔ̃ ni aŋma (July 1879) lɛ mli kɛbaa nɛɛ, wiemɔi ni ji “Herald of Christ’s Presence,” (Eetswa Ba ni Kristo Eba lɛ He Adafi) “Herald of Christ’s Kingdom” (Eetswa Kristo Maŋtsɛyeli lɛ He Adafi) aloo “Eetswa Yehowa Maŋtsɛyeli lɛ He Adafi” efata saneyitso lɛ he.
8 Atuu Nyɔŋmɔ ŋwɛi Maŋtsɛyeli lɛ awo Yesu Kristo dɛŋ yɛ afi 1914, ni amrɔ nɛɛ wɔmiijaje shɛɛ sane ni hiɛnɔkamɔ yɔɔ mli lɛ kɛ hehiamɔ babaoo fe bei fɛɛ ni eho. Mɛni hewɔ? Ejaakɛ nɔ ni fata Maŋtsɛyeli nɔyeli lɛ jɔɔmɔi ahe ji ŋmɛnɛŋmɛnɛ yiwalɛ gbɛjianɔtoo nɛɛ naagbee ni ebɛŋkɛ lɛ. (Daniel 2:44) Mɛɛ shɛɛ sane kpakpa yɔɔ fe enɛ? Ni mɛɛ miishɛɛ babaoo wɔbaanyɛ wɔná fe ni wɔkɛ wɔhe aaawo Maŋtsɛyeli lɛ he adafitswaa mli dani ‘amanehulu kpeteŋkpele’ lɛ aba?—Mateo 24:21; Marko 13:10.
Mɛi Ataomɔ ko ni Yeɔ Omanye
9. Mɛɛ famɔ Yesu kɛha ekaselɔi lɛ, ni te gbɔmɛi fee amɛnii yɛ Maŋtsɛyeli shɛɛ sane lɛ he amɛha tɛŋŋ?
9 Nɔ kroko ni yeɔ ebuaa wɔmiishɛɛnamɔ akɛ nikpamɔ nitsulɔi ji bɔ ni mɛi ataomɔ ni haa amɛbatsɔmɔɔ kaselɔi ni bafataa wɔhe yɛ nikpamɔ nitsumɔ lɛ mli lɛ yeɔ omanye ha lɛ. Yesu fã ekaselɔi lɛ yɛ afi 31-32 Ŋ.B. lɛ mli akɛ: “Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi.” (Mateo 10:11) Jeee aŋkroaŋkroi fɛɛ sa, taakɛ bɔ ni mɛi feɔ amɛnii yɛ Maŋtsɛyeli shɛɛ sane lɛ he jieɔ lɛ kpo lɛ. Ni kɛlɛ, Yesu kaselɔi lɛ kɛ ekãa shiɛ sanekpakpa lɛ yɛ he fɛɛ he ni amɛaana gbɔmɛi yɛ.
10. Te Paulo tee nɔ yɛ mɛi ni sa lɛ ataomɔ mli eha tɛŋŋ?
10 Yɛ Yesu gbele kɛ eshitee lɛ sɛɛ lɛ, mɛi ni sa lɛ ataomɔ lɛ tee nɔ kɛ ekãa babaoo. Paulo kɛ Yudafoi lɛ susu saji ahe yɛ amɛkpeehei lɛ kɛ gbɔmɛi ni yɔɔ Ateene jarawoohei lɛ. Beni eye odase ko yɛ Areopago lɛ ni yɔɔ Hela maŋtiase lɛ mli lɛ, “hii komɛi kɛ amɛhe kpɛtɛ ehe ni amɛhé amɛye; amɛteŋ mɛi komɛi ji Dionisio, Areopagonyo lɛ hu, kɛ yoo ko ni atsɛɔ lɛ Damari lɛ, kɛ mɛi krokomɛi ni fata amɛhe.” He fɛɛ he ni Paulo aaaya lɛ, etoɔ okadi kpakpa yɛ shiɛmɔ mli yɛ “shia fɛɛ shia hu.”—Bɔfoi lɛ Asaji 17:17, 34; 20:20.
11. Mɛɛ gbɛ̀i ni atsɔɔ nɔ atsuɔ sɔɔmɔ nitsumɔ lɛ he nii akɛtsu nii afii abɔ ni eho nɛ?
11 Yɛ afii ohai 19 lɛ naagbee afii nyɔŋmai fioo lɛ amli lɛ, Kristofoi ni afɔ amɛ mu lɛ kɛ amɛhe wo mɛi ni sa lɛ ataomɔ mli yɛ ekãa naa. Sane ko ni aŋma ni eyitso ji “Afɔ Amɛ Mu ni Amɛshiɛ” ni je kpo yɛ July kɛ August 1881 Zion’s Watch Tower lɛ mli lɛ kɛɛ akɛ: “Sanekpakpa lɛ shiɛmɔ . . . miihe shi yɛ ‘heshibalɔi lɛ aŋɔɔ’—mɛi ni sumɔɔ ni amɛnyɛɔ amɛboɔ toi lɛ, bɔni afee ni abua Kristo gbɔmɔtso lɛ, nanemɛi gboshiniyelɔi lɛ anaa kɛjɛ amɛteŋ.” Bei pii lɛ Nyɔŋmɔ nikpamɔ nitsulɔi lɛ kɛ mɛi kpeɔ yɛ be mli ni amɛ́kpa sɔlemɔi ni amɛmiiya shia lɛ, ni amɛkɛ dɛhiɛmɔ woji ni Ŋmalɛ naa shɛɛ saji yɔɔ mli, ni aje gbɛ aŋma koni ekanya mɛi ni sa lɛ ni amɛkpɛlɛ nɔ lɛ haa amɛ. Beni aku sɛɛ asusu bɔ ni odaseyeli gbɛ nɛɛ mɔɔ shi ha lɛ he ekoŋŋ lɛ, May 15, 1903 Watch Tower lɛ wo nikpamɔ nitsulɔi lɛ hewalɛ ni amɛja dɛhiɛmɔ woji lɛ “kɛjɛ shia kɛya shia” yɛ Hɔgbaa leebi leebi.”
12. Yɛ mɛɛ gbɛ nɔ wɔ́ha bɔ ni wɔshiɛmɔ nitsumɔ lɛ mɔɔ shi ha lɛ etee hiɛ? Feemɔ ehe nɔkwɛmɔnɔ.
12 Wɔ́lɛɛ wɔsɔɔmɔ nitsumɔ lɛ mli yɛ nyɛsɛɛ afii nɛɛ amli kɛtsɔ gbɔmɛi ni wɔyaa amɛ ŋɔɔ yɛ hei krokomɛi fe shiai pɛ lɛ nɔ. Enɛ efee nɔ ni mɔɔ shi jogbaŋŋ yɛ shikpɔji ni shika helɛtemɔ shihilɛi kɛ hiɛtserɛjiemɔ nifeemɔi asɛɛdii gbalaa gbɔmɛi kɛjɛɔ amɛshiai amli yɛ bei ni wɔkɛyaa amɛ ŋɔɔ lɛ ekomɛi amli lɛ. Beni Odasefonyo ko ni yɔɔ England lɛ kɛ ehefatalɔ lɛ na akɛ shisharalɔi kɛ bɔɔs shiɔ ŋshɔnaa be fɛɛ be beni amɛbajie amɛhiɛtserɛ yɛ gbi lɛ mli lɛ sɛɛ lɛ, amɛfee ekãa ni amɛkwɔ bɔɔs srɔtoi lɛ, ni amɛkɛ Buu-Mɔɔ lɛ kɛ Awake! lɛ ekomɛi hã mɛi ni fãa gbɛ lɛ. Amɛja ekomekomei 229 yɛ nyɔŋ kome mli. Amɛbɔ amaniɛ akɛ: “Wɔsheee odaseyeli yɛ ŋshɔnaa, shikpɔŋkuku ni nitsumɔhei yɔɔ jɛmɛ, aloo kaa fɛɛ kaa ni wɔkɛaakpe lɛ gbeyei, ejaakɛ wɔle akɛ Yehowa kɛ wɔ yɛ be fɛɛ be.” Amɛná mɛi ni amɛkɛ woji tɛtrɛbii lɛ haa amɛ daa, amɛje shia Biblia mli nikasemɔ shishi, ni amɛyi enyɔ lɛ fɛɛ kɛ amɛhe ewo gbɛgbalɔi awalɔ sɔɔmɔ lɛ mli.
13. Mɛɛ tsakemɔ yɛ wɔsɔɔmɔ nitsumɔ lɛ mli esa akɛ afee yɛ hei komɛi bianɛ?
13 Yɛ be mli ni mɛi ni sa lɛ ataomɔ yaa hiɛ lɛ, ekolɛ ebaabi wɔsɔɔmɔ nitsumɔ lɛ mli kwɛmɔ jogbaŋŋ ekoŋŋ yɛ hei komɛi. Eyɛ mli akɛ nɔ ni Odasefoi babaoo fɔɔ feemɔ ji amɛhe ni amɛkɛwoɔ shiɛmɔ nitsumɔ lɛ mli yɛ shia kɛ shia yɛ Hɔgbaa leebi mli moŋ, shi hei komɛi yɛ ni amɛnaa akɛ mɛi ashiai ni amɛyaa leebi mra lɛ mɔɔɔ shi jogbaŋŋ, ejaakɛ ekolɛ mɛi ni yɔɔ shia yɛ nakai beaŋ lɛ miijɔɔ amɛhe. Kɛtsɔ amɛbe he gbɛjianɔtoo lɛ mli ni amɛtsake hewɔ lɛ, Odasefoi babaoo taoɔ mɛi lɛ yɛ sɛɛ mli yɛ gbi lɛ mli, ekolɛ beni amɛ́kpa Kristofoi akpeei lɛ asɛɛ. Ni nɛkɛ mɛi ataomɔ nɛɛ ewo yibii diɛŋtsɛ. Maŋtsɛyeli jajelɔi ayifalɛ yɛ jeŋ fɛɛ lɛ tee hiɛ kɛ oha mlijaa 2.3. Enɛ woɔ nikpamɔ Nuntsɔ lɛ hiɛ nyam ni ehaa wɔtsuii nyãa.
Ha Toiŋjɔlɛ Ahi Nikpamɔ Nitsumɔ lɛ Mli
14. Mɛɛ su mli wɔkɛ wɔ shɛɛ sane lɛ haa yɛ, ni mɛni hewɔ?
14 Yiŋtoo kroko ni haa wɔnáa miishɛɛ lɛ kɔɔ toiŋjɔlɛ su ni wɔjieɔ lɛ kpo yɛ nikpamɔ nitsumɔ lɛ mli lɛ he. Yesu kɛɛ akɛ: “Shi kɛ́ nyɛmiibote shia lɛ, nyɛŋaa lɛ. Ni kɛji shia lɛ sa lɛ, nyɛhaa nyɛhejɔlɛ lɛ abaa enɔ.” (Mateo 10:12, 13) Hebri ŋamɔ lɛ kɛ nɔ ni tamɔ no ni yɔɔ Hela Biblia lɛ mli lɛ fɛɛ hiɛ susumɔ kome, ni ji akɛ, ‘Ahi aha bo.’ Nɛkɛ henumɔ nɛɛ kudɔɔ bɔ ni wɔyaa mɛi aŋɔɔ beni wɔshiɛɔ sanekpakpa lɛ. Wɔhiɛnɔkamɔ ji akɛ amɛbaabo Maŋtsɛyeli shɛɛ sane lɛ toi jogbaŋŋ. Kɛha mɛi ni feɔ nakai lɛ, gbɛkpamɔ akɛ abaasaa amɛkɛ Nyɔŋmɔ teŋ, yɛ be mli ni amɛtsakeɔ amɛtsui kɛjɛɔ amɛhe eshai amli, ni amɛtsiɔ amɛhe kɛjɛɔ he, ni amɛfeɔ esuɔmɔnaa nii lɛ yɛ. Yɛ no sɛɛ lɛ, amɛkɛ Nyɔŋmɔ teŋ toiŋjɔlɛ lɛ kɛ amɛ yaa naanɔ wala mli.—Yohane 17:3; Bɔfoi lɛ Asaji 3:19; 13:38, 48; 2 Korintobii 5:18-20.
15. Te wɔɔfee tɛŋŋ wɔhiɛ toiŋjɔlɛ su mli beni wɔkɛ nifeemɔ ni ehiii kpeɔ yɛ wɔshiɛmɔ nitsumɔ lɛ mli lɛ?
15 Te wɔɔfee tɛŋŋ wɔhiɛ wɔ toiŋjɔlɛ mli kɛji akɛ bɔ ni mɛi feɔ amɛnii yɛ sane lɛ he lɛ ehiii? Yesu fã akɛ: “Kɛji [shia lɛ] esaaa lɛ, no lɛ nyɛhejɔlɛ lɛ akpale aba nyɛŋɔɔ ekoŋŋ.” (Mateo 10:13) Yesu wiemɔ nɛɛ fata nɔ ni Luka ŋma ni kɔɔ kaselɔi 70 ni atsu amɛ lɛ ahe lɛ he, akɛ: “Kɛji hejɔlɛ bi ko yɛ jɛi lɛ, nyɛ hejɔlɛ lɛ aaahi enɔ; shi kɛ́ jeee nakai lɛ, eeeku esɛɛ eba nyɛŋɔɔ ekoŋŋ.” (Luka 10:6) Kɛji akɛ wɔkɛ sanekpakpa lɛ tee gbɔmɛi lɛ aŋɔɔ lɛ, wɔfeɔ nakai kɛ jwɛŋmɔ kpakpa kɛ agbɛnɛ yɛ toiŋjɔlɛ mli. Nifeemɔ ni tsɔɔ sane ni kɔɔɔ mɔ he eko, huhuuhu wiemɔ, aloo wiemɔ ko ni etsɔɔɔ mlihilɛ ni shiatsɛ ko aaawie lɛ haa wɔ shɛɛ sane lɛ ‘kuɔ esɛɛ kɛbaa wɔŋɔɔ ekoŋŋ.’ Shi enɛɛmɛi eko kwraa haaa toiŋjɔlɛ ni wɔyɔɔ lɛ sɛɛ afo, ni ji Yehowa mumɔ krɔŋkrɔŋ lɛ yibii lɛ eko lɛ.—Galatabii 5:22, 23.
Oti Kpakpa ko Kɛha Nikpamɔ Nitsulɔi
16, 17. (a) Mɛni ji oti ni ma wɔhiɛ beni wɔfeɔ sɛɛsaramɔi lɛ? (b) Te wɔɔfee tɛŋŋ wɔye wɔbua mɛi ni yɔɔ Biblia mli sanebimɔi?
16 Ákɛ nikpamɔ nitsulɔi lɛ, eŋɔɔ wɔnaa akɛ wɔná gbɛfaŋnɔ yɛ gbɔmɛi ni abuaa amɛnaa kɛha naanɔ wala lɛ mli. Ni kwɛ miishɛɛ ni wɔnáa, beni mɔ ni wɔshiɛɔ wɔtsɔɔ lɛ lɛ kpɛlɛɔ nɔ, ni eesumɔ ni ekase babaoo, ni ebatsɔɔ “toiŋjɔlɛ shieŋtsɛ” (NW) lɛ! Ekolɛ eyɛ Biblia mli sanebimɔi babaoo, ni wɔnaa akɛ wɔnyɛŋ wɔha fɛɛ hetoo yɛ esaramɔ shikome mli. Akɛni be kpalaŋŋ ni wɔkɛ lɛ aaaye yɛ klɛŋklɛŋ saramɔ lɛ mli lɛ esaaa hewɔ lɛ, mɛni abaanyɛ afee? Wɔbaanyɛ wɔná oti ko, tamɔ eko ni ajie yi aha aaafee afii 60 ni eho nɛ lɛ.
17 “Esa akɛ Yehowa odasefoi fɛɛ asaa amɛhe ni amɛfee Biblia lɛ mli nikasemɔ ákɛ nɔkwɛmɔnɔ.” Nakai wiemɔ lɛ je kpo yɛ Model Study ni ji tsɔsemɔ wolo bibioo ni afee yɛ afi 1937 kɛyashi afi 1941 lɛ mli nikasemɔ ni tsara nɔ lɛ mli nɔ ni ji etɛ lɛ mli. Etee nɔ ekɛɛ akɛ: “Esa akɛ [Maŋtsɛyeli] shiɛlɔi fɛɛ aná miishɛɛ akɛ amɛaaye amɛbua mɛi ni yɔɔ tsuijurɔ ni jieɔ miishɛɛ kpo yɛ Maŋtsɛyeli shɛɛ sane lɛ he lɛ bɔ ni amɛaanyɛ. Esa akɛ osara nɛkɛ gbɔmɛi nɛɛ, ni oha sanebimɔi srɔtoi ahetoo . . . , koni okɛ amɛ aje nikasemɔ he nɔkwɛmɔnɔ shishi . . . amrɔ nɔŋŋ bɔ ni ooonyɛ.” Hɛɛ, oti ni yɔɔ wɔ sɛɛsaramɔi lɛ asɛɛ ji ni wɔje shia Biblia mli nikasemɔ shishi ni wɔfee lɛ daa kɛtsara nɔ. * Naanyobɔɔ su kɛ mɔ hesusumɔ kɛ suɔmɔ kɛha mɔ ni yɔɔ wiemɔ lɛ he miishɛɛ lɛ kanyaa wɔ koni wɔsaa wɔhe jogbaŋŋ koni wɔfee nikasemɔ lɛ ni emɔ shi jogbaŋŋ.
18. Te wɔɔfee tɛŋŋ wɔye wɔbua mɛi heei ni amɛbatsɔmɔ Yesu Kristo kaselɔi?
18 Yɛ wolo ni ji Nilee Ni Kɛ Mɔ Yaa Naanɔ Wala Mli lɛ kɛ woji bibii tamɔ Mɛni Nyɔŋmɔ Taoɔ yɛ Wɔdɛŋ? lɛ yelikɛbuamɔ naa lɛ, wɔbaanyɛ wɔfee shia Biblia mli nikasemɔi ni mɔɔ shi, ni wɔbaanyɛ wɔná mɛi heei ni yɔɔ wiemɔ lɛ he miishɛɛ ni ayeɔ abuaa amɛ koni amɛbatsɔmɔ kaselɔi lɛ mli gbɛfaŋnɔ yɛ nɛkɛ gbɛ nɔ. Yɛ be mli ni wɔtaoɔ ni wɔkase Tsɔɔlɔ Kpele, Yesu Kristo lɛ, ebaanyɛ eba akɛ nɛkɛ Biblia kaselɔi nɛɛ hu baakase nii kɛjɛ wɔ toiŋjɔlɛ, miishɛɛ su, wɔ anɔkwayeli, kɛ bulɛ ni wɔyɔɔ kɛha Yehowa taomɔ nii kɛ egbɛtsɔɔmɔi lɛ amli. Kɛji akɛ wɔye wɔbua mɛi heei ni amɛná amɛ sanebimɔi ahetoo lɛ, nyɛhaa wɔfea bɔ ni wɔbaanyɛ hu ni wɔtsɔɔ amɛ bɔ ni amɛaaha mɛi ni biɔ amɛ saji lɛ ahetoo. (2 Timoteo 2:1, 2; 1 Petro 2:21) Yɛ anɔkwale mli lɛ, ákɛ mfonirifeemɔŋ nikpamɔ nitsulɔi lɛ, wɔbaanyɛ wɔná miishɛɛ akɛ, kɛ́ aja mli lɛ, afee shia Biblia mli nikasemɔi 4,766,631 yɛ jeŋ fɛɛ yɛ sɔɔmɔ afi ni ho nɛɛ mli. Wɔnáa miishɛɛ krɛdɛɛ ko kɛji akɛ wɔ diɛŋtsɛ lɛ wɔfataa nikpamɔ nitsulɔi ni náa shia Biblia mli nikasemɔ nitsumɔ lɛ mli gbɛfaŋnɔ lɛ ahe.
Nyɛyaa Nɔ Nyɛnyãa yɛ Nikpamɔ lɛ Mli
19. Mɛni hewɔ ayɔɔ nɔ ni adamɔ nɔ aná miishɛɛ yɛ nikpamɔ lɛ mli yɛ Yesu sɔɔmɔ be lɛ mli kɛ no sɛɛ nɔŋŋ lɛ?
19 Yiŋtoi kpakpai yɛ ni aaadamɔ nɔ anyã yɛ nikpamɔ lɛ mli, yɛ Yesu sɔɔmɔ nitsumɔ lɛ mli kɛ agbɛnɛ yɛ no sɛɛ nɔŋŋ. No mli lɛ mɛi babaoo here sanekpakpa lɛ nɔ. Anyã babaoo diɛŋtsɛ yɛ Pentekoste, afi 33 Ŋ.B., ejaakɛ mɛi ni shɛɔ 3,000 kpɛlɛ Petro gbɛtsɔɔmɔ lɛ nɔ, ni amɛnine shɛ Yehowa mumɔ krɔŋkrɔŋ lɛ nɔ, ni amɛbafee Nyɔŋmɔ maŋ ni ji mumɔŋ Israel lɛ fã. Yɛ anɔkwale mli lɛ, amɛyifalɛ tee hiɛ be fɛɛ be, ni amɛná miishɛɛ babaoo yɛ be mli ni “[Yehowa] ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi” lɛ.—Bɔfoi lɛ Asaji 2:37-41, 46, 47; Galatabii 6:16; 1 Petro 2:9.
20. Mɛni haa wɔnáa miishɛɛ babaoo yɛ wɔ nikpamɔ nitsumɔ lɛ mli?
20 No mli lɛ, Yesaia gbalɛ lɛ miiba mli anɔkwale, akɛ: “[Yehowa] oha jeŋmaŋ lɛ yi efá, oha enyamɔ lɛ eda, amɛmiinyã yɛ ohiɛ, tamɔ anyãa yɛ nikpamɔ be mli, tamɔ bɔ ni mɛi amli filiɔ amɛ kɛ́ amɛmiija nomŋɔɔ nii lɛ.” (Yesaia 9:2) Eyɛ mli akɛ amrɔ nɛɛ wɔnaa mɛi ni afɔ amɛ mu lɛ ‘ajeŋmaŋ ni yi efa’ lɛ akɛ amɛ́tã kwraa moŋ, shi kɛlɛ wɔmiishɛɛ lɛ fa babaoo yɛ be mli ni wɔnaa bɔ ni nikpamɔ nitsulɔi krokomɛi lɛ ayi faa afi fɛɛ afi lɛ hewɔ.—Lala 4:8; Zakaria 8:23; Yohane 10:16.
21. Mɛni wɔbaasusu he yɛ nikasemɔ ni baanyiɛ sɛɛ lɛ mli?
21 Yɛ anɔkwale mli lɛ wɔyɛ yiŋtoi kpakpai ni baaha wɔya nɔ ni wɔmli afili wɔ yɛ nikpamɔ nitsumɔ lɛ mli. Wɔ shɛɛ sane ni hiɛnɔkamɔ yɔɔ mli, mɛi ni sa lɛ ní wɔtaoɔ amɛ, kɛ wɔ subaŋ ni tsɔɔ toiŋjɔlɛ lɛ—nɛkɛ nibii nɛɛ fɛɛ kɛ miishɛɛ bahaa wɔ ákɛ nikpamɔ nitsulɔi. Kɛlɛ, ehaa mɛi babaoo teeɔ nifeemɔi ni hetsɛ̃ yɔɔ mli ashi. Bɔfo Yohane kɛ enɛ kpe. Awo lɛ tsuŋ yɛ Patmo ŋshɔkpɔ lɛ nɔ “yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Belɛ te wɔɔfee tɛŋŋ wɔhiɛ wɔmiishɛɛ lɛ mli kɛ́ wɔkɛ yiwaa kɛ shitee-kɛ-woo kpe? Mɛni baaye abua wɔ koni wɔnyɛ wɔdamɔ mɛi ni wɔshiɛɔ wɔhaa amɛ bianɛ lɛ ateŋ mɛi pii asubaŋ ni feɔ keketee lɛ naa? Wɔ nikasemɔ ni nyiɛ enɛ sɛɛ lɛ kɛ Ŋmalɛ naa yelikɛbuamɔ haa yɛ nɛkɛ sanebimɔi nɛɛ ahetoohamɔ mli.
[Shishigbɛ niŋmaa]
^ kk. 17 Klɛŋklɛŋ lɛ ato nikasemɔi ahe gbɛjianɔ yɛ hei ni abaanyɛ abua kui ni yɔɔ wiemɔ lɛ he miishɛɛ lɛ anaa yɛ. Shi etsɛɛɛ ni akɛ aŋkroaŋkroi kɛ wekui hu bɔi nikasemɔ.—Kwɛmɔ Jehovah’s Witnesses—Proclaimers of God’s Kingdom, ni Yehowa Odasefoi fee lɛ baafa 574.
Te obaaha Hetoo Oha Tɛŋŋ?
• Mɛni ji mfonirifeemɔŋ nikpamɔ nitsumɔ lɛ?
• Mɛɛ shɛɛ sane nɛkɛ wɔjajeɔ lɛ?
• Mɛni hewɔ wɔyeɔ omanye yɛ kaselɔi ni wɔtaoɔ amɛ lɛ mli lɛ?
• Mɛɛ gbɛ nɔ wɔtsɔɔ wɔhiɛɔ toiŋjɔlɛ mli yɛ nikpamɔ nitsumɔ lɛ mli?
• Mɛni hewɔ wɔmli filiɔ wɔ kɛyaa nɔ yɛ nikpamɔ lɛ mli lɛ?
[Nikasemɔ lɛ he Sanebimɔi]
[Mfonirii ni yɔɔ baafa 12]
Shiɛmɔ yɛ klɛŋklɛŋ afii oha lɛ mli kɛ afii ohai 20 lɛ mli
[Mfonirii ni yɔɔ baafa 13]
Taakɛ Paulo ji lɛ, ŋmɛnɛŋmɛnɛ gbii nɛɛ amli nikpamɔ nitsulɔi lɛ bɔɔ mɔdɛŋ ni amɛnine ashɛ gbɔmɛi anɔ yɛ he fɛɛ he
[Mfoniri ni yɔɔ baafa 13]
Okɛ miishɛɛ kɛ jwɛŋmɔ kpakpa ashiɛ sanekpakpa lɛ