Sanebimɔi ni Jɛ Kanelɔi Adɛŋ
Sanebimɔi ni Jɛ Kanelɔi Adɛŋ
Wɔkaneɔ yɛ 1 Petro 4:3 akɛ, be ko ni eho lɛ Kristofoi komɛi kɛ amɛhe wo “wɔŋjamɔi ní ahiɔ” mli. Ani jeee wɔŋjamɔi fɛɛ ahiɔ, ni Nyɔŋmɔ buɔ lɛ fɔ ni eguɔ?
Hɛɛ, yɛ Nyɔŋmɔ nikwɛmɔ naa lɛ, ahiɔ wɔŋjamɔi fɛɛ. Mɛi ni taoɔ ehiɛ duromɔ lɛ nyɛŋ amɛjá wɔŋ.—1 Korintobii 5:11; Kpojiemɔ 21:8.
Shi kɛlɛ, etamɔ nɔ ni bɔfo Petro miiwie wɔŋjamɔ he yɛ gbɛ kroko nɔ. Nɔ kome ji akɛ, yɛ blema maji babaoo mli lɛ, ajáa wɔŋ yɛ he fɛɛ he, ni nɔyelii lɛ amli mla etsĩii naa. No ji akɛ, shikpɔŋ lɛ nɔ mla lɛ eguuu nakai wɔŋjamɔ. Wɔŋjamɔi komɛi po fee maŋ loo nɔyeli lɛ nifeemɔ fã. Yɛ nakai shishinumɔ lɛ naa lɛ, mɛi komɛi kɛ amɛhe wo ‘wɔŋjamɔi ni mla etsĩii naa lɛ mli’ dani amɛbatsɔmɔ Kristofoi. (New World Translation, 1950 nɔ̃) Ákɛ nɔkwɛmɔnɔ lɛ, abaanyɛ akadi akɛ Babilon Maŋtsɛ Nebukadnezar fee shika amaga ema shi, shi Yehowa tsuji ni ji Shadrak, Meshak, kɛ Abednego kpoo akɛ amɛaajá.—Daniel 3:1-12.
Yɛ gbɛ kroko nɔ lɛ, nifeemɔi ni ehiii kwraa ni teɔ shi ewoɔ adebɔɔ naa mla loo jeŋba mli henumɔ ni aná kɛjɛ henilee mli lɛ fata wɔŋjamɔ kusumii pii ahe. (Romabii 2:14, 15) Bɔfo Paulo ŋmala nifeemɔi ni ehiii ni “afeee” kɛ ‘nyaŋemɔ nii,’ ni bei pii lɛ anaa yɛ jamɔ nifeemɔi amli lɛ ahe saji. (Romabii 1:26, 27) Hii kɛ yei ni kɛ amɛhe woɔ wɔŋjamɔ ni ahiɔ mli lɛ booo adesai adebɔɔ mla ni tsĩɔ naa lɛ toi. Ebafee nɔ ni sa jogbaŋŋ akɛ mɛi ni batsɔmɔ Kristofoi lɛ shi nakai nifeemɔi ni ekpɔtɔ lɛ.
Kɛfata nɔ ni etsɔ hiɛ lɛ he lɛ, Yehowa Nyɔŋmɔ buɔ nakai wɔŋjamɔi ni egbɛ eshwã mɛi ni jeee Yudafoi lɛ ateŋ lɛ fɔ. No hewɔ lɛ, mla eŋmɛɛɛ gbɛ. *—Kolosebii 3:5-7.
[Shishigbɛ niŋmaa]
^ kk. 6 Hela wiemɔ ni yɔɔ 1 Petro 4:3 lɛ shishitsɔɔmɔ diɛŋtsɛ ji “wɔŋjamɔi ni mla eŋmɛɛɛ gbɛ.” Atsɔɔ wiemɔ kuku lɛ shishi yɛ gbɛ̀i babaoo nɔ yɛ Blɔfo Bibliai amli kɛ wiemɔi tamɔ “wɔŋjamɔ gbonyo,” “amaga jamɔ ni agu,” kɛ “wɔŋjamɔi ni tsɔɔ mlakwamɔ.”