Etsɛɔ Kwraa Fe Shika Tsuru Ŋmiiŋmi

ATAOƆ shika tsuru sɛɛgbɛ waa diɛŋtsɛ yɛ bɔ ni eyɔɔ fɛo kɛ tsɛ ni etsɛɔ lɛ hewɔ. Nɔ hewɔ ni anyaa he waa lɛ jɛ anɔkwale ni eji akɛ, ekãa he ekpɛɔ ni etamɔ nɔ ni muji ko kwraa baŋ he gbi ko gbi ko. Nɔ hewɔ lɛ ji akɛ, shika tsuru nyɛɔ ekpeeɔ fitemɔ ni nu, kɔɔyɔɔ kpakpa, swɔɔ, kɛ nibii krokomɛi fɛɛ kɛbaa lɛ naa. Nibii ni akɛ shika tsuru fee ni ayana yɛ lɛji ni eshiu kɛ hei krokomɛi lɛ kã he amɛkpɛlɛɔ lolo yɛ afii ohai abɔ lɛ fɛɛ sɛɛ.

Shi kɛlɛ, eyɛ miishɛɛ akɛ, Biblia lɛ kɛɔ akɛ nɔ ko yɛ ni tsɛɔ waa ni “ejara wa aahu fe shika [tsuru] ní fiteɔ ní aka [akwɛ] yɛ la mli lɛ.” (1 Petro 1:7) Shika tsuru ni ‘aka akwɛ’ loo atsuu he kɛtsɔ la kɛ gbɛ̀i krokomɛi anɔ lɛ baanyɛ aná oha mlijaa 99.9 yɛ ehetsemɔ mli. Ni kɛlɛ, shika tsuru ni atsuu he lɛ tete po fiteɔ, loo esereɔ, kɛji akɛwo nu ni sereɔ shika (odehe nu), ni ji hydrochloric acid fãi srɔtoi etɛ ni akɛfutu kɛ nitric acid fã kome mli lɛ. No hewɔ lɛ, Biblia lɛ ja yɛ jeŋ nilee naa ákɛ eeejaje akɛ, ‘shika tsuru fiteɔ.’

Nɔ ni tamɔɔɔ nakai lɛ, anɔkwa Kristofoi ahemɔkɛyeli lɛ ‘hereɔ susuma yiwala.’ (Hebribii 10:39) Gbɔmɛi baanyɛ agbe mɔ ko ni hiɛ hemɔkɛyeli ni mli wa, taakɛ amɛfee Yesu Kristo lɛ. Shi akɛ nɛkɛ shiwoo nɛɛ haa mɛi ni hiɛ anɔkwa hemɔkɛyeli lɛ akɛ: “Feemɔ anɔkwafo kɛyashi gbele mli, ni mahao wala akekere lɛ.” (Kpojiemɔ 2:10) Mɛi ni gboi beni amɛhiɛ hemɔkɛyeli lɛ mli lɛ kã he amɛyɛ Nyɔŋmɔ kaimɔ mli lolo, ni ebaatee amɛ shi. (Yohane 5:28, 29) Shika tsuru falɛ ko kwraa nyɛŋ atsu nakai nitsumɔ. Enɛ hewɔ lɛ, hemɔkɛyeli jara wa kwraa fe shika tsuru lɛɛlɛŋ. Shi kɛlɛ, bɔni afee ni hemɔkɛyeli aná jara ni wa waa nɛkɛ lɛ, esa akɛ efee hemɔkɛyeli ni aka akwɛ. Yɛ anɔkwale mli lɛ, ‘hemɔkɛyeli ni aka akwɛ lɛ’ ji nɔ ni Petro kɛɛ ejara wa kwraa fe shika tsuru lɛ. Yehowa Odasefoi yɛ he miishɛɛ akɛ amɛaaye amɛbua bo koni okase Biblia lɛ bɔni afee ni oná hemɔkɛyeli ni mli wa yɛ anɔkwa Nyɔŋmɔ lɛ, ni ji Yehowa, kɛ e-Bi Yesu Kristo mli ni ohiɛ mli. Taakɛ Yesu tsɔɔ lɛ, enɛ ‘baafee naanɔ wala lɛ.’—Yohane 17:3.