Mɛni Hewɔ Oheɔ Anɔ ni Oheɔ Oyeɔ lɛ Oyeɔ?

Atsɔɔ hé ni aaahe nɔ ko aye lɛ shishi akɛ “ní aaakpɛlɛ nɔ akɛ eji anɔkwale, eja, loo nɔ ni yɔɔ diɛŋtsɛ.” Jeŋmaji Ekomefeemɔ Universal Declaration of Human Rights wolo lɛ buɔ mɔ fɛɛ mɔ “hegbɛ ni eyɔɔ kɛha nii ahe susumɔ, henilee kɛ jamɔ” lɛ he. Nɔ ni fata enɛ he ji hegbɛ “ni ekɛaatsake ejamɔ loo ehemɔkɛyeli” kɛ́ eesumɔ ni efee nakai.

BELƐ, mɛni hewɔ ni mɔ ko baasumɔ ni etsake ejamɔ loo ehemɔkɛyeli? Jwɛŋmɔ ni afɔɔ lɛ kpojiemɔ ji “miyɛ mi diɛŋtsɛ mihemɔkɛyelii, ni miyɛ he miishɛɛ.” Mɛi babaoo susuɔ akɛ hemɔkɛyelii ni tɔmɔi yɔɔ mli lɛ po kɛ naagba fioo ko baa mɔ nɔ. Ákɛ nɔkwɛmɔnɔ lɛ, mɔ ko ni heɔ eyeɔ akɛ shikpɔŋ lɛ yɛ tɛtrɛɛ lɛ jeee mɔ ko ni aaanyɛ aye ehe awui loo eeeye mɔ kroko awui. Mɛi komɛi kɛɔ akɛ: “Esa akɛ wɔkpɛlɛ nɔ kɛkɛ akɛ esoro wɔteŋ mɔ fɛɛ mɔ.” Ani nilee yɛ mli be fɛɛ be? Ani nɔ̃ pɛ ni datrɛfonyo baasumɔ ni efee ji ní ehiɛ jwɛŋmɔ kroko ni teɔ shi woɔ kɛkɛ, ní efeŋ nɔ ko dɔŋŋ kɛfataŋ he kɛ́ enanemɛi lɛ ateŋ mɔ kome hé eye shii abɔ akɛ ebaanyɛ eya nɔ nɔŋŋ koni ebɔi helatsɛmɛi akwɛmɔ yɛ helatsamɔhe tsũ mli yɛ be mli ni eji mɔ ko ni tsuɔ nii yɛ he ni akɛ gbohii toɔ lɛ?

Kɛ aawie jamɔ he lɛ, hemɔkɛyelii ni ejaaa lɛ kɛ yinɔsane mli naagba wulu eba. Susumɔ nibii gbeyeigbeyei ni jɛ mli ba lɛ he okwɛ beni jamɔŋ hiɛnyiɛlɔi “kanya Kristofoi hiɛdɔlɔi lɛ koni amɛkɛ amɛhe awo niseniianiifeemɔ ni mɔbɔnalɛ bɛ mli lɛ mli” yɛ nɔ ni afɔɔ lɛ tsɛmɔ akɛ Holy Crusades of the Middle Ages lɛ he. Aloo susumɔ ŋmɛnɛŋmɛnɛ beaŋ “Kristofoi” hii ni tswiaa tui yɛ nyɛsɛɛ maŋ ta lɛ mli lɛ he okwɛ, ní “taakɛ teŋgbɛ afii lɛ amli tabilɔi ni yɔɔ hetselɔi agbɛii yɛ amɛklantei atsei anaa lɛ ji lɛ, amɛkɛ Oblayoo Fro lɛ he mfonirii kpɛtɛ amɛtui asɛɛ tsei lɛ ahe lɛ.”  Nɛkɛ hiɛdɔlɔi nɛɛ fɛɛ heɔ amɛyeɔ akɛ amɛsane ja. Ni kɛlɛ, eka shi faŋŋ akɛ nɔ ko yɛ ni ejaaa kwraa yɛ enɛɛmɛi kɛ jamɔŋ nii ahepelemɔi kɛ nɔmɔi krokomɛi lɛ amli.

Mɛni hewɔ ni yiŋfutumɔ kɛ béi babaoo yɔɔ lɛ? Biblia lɛ haa hetoo akɛ Satan Abonsam ji mɔ ni “shishiuɔ jeŋ muu lɛ fɛɛ lɛ.” (Kpojiemɔ 12:9; 2 Korintobii 4:4; 11:3) Mɔbɔ sane ji akɛ, bɔfo Paulo bɔ kɔkɔ akɛ jamɔŋ bii pii yɛ ni “hiɛ baakpata kɛ̃” ejaakɛ Satan ni “baafee naakpɛɛ nii koni ekɛlaka mɛi” lɛ baalaka amɛ. Paulo kɛɛ akɛ, mɛi ni tamɔ nakai lɛ “baaŋamɔ amɛjwɛŋmɔi anaa kɛjɛ anɔkwale suɔmɔ ni kulɛ ebaanyɛ ehere amɛyiwala lɛ he,” ni enɛ hewɔ lɛ ‘ebaalaka amɛ koni amɛhe amale amɛye.’ (2 Tesalonikabii 2:9-12, The New Testament, ni William Barclay ŋma) Te ooofee tɛŋŋ oha nyɛ ni eeenyɛ eba lɛ akɛ ooohe amale oye lɛ aba shi? Yɛ anɔkwale mli lɛ, mɛni hewɔ oheɔ oyeɔ taakɛ ofeɔ lɛ?

Ani Akɛba Koni Ahe Aye?

Ekolɛ atsɔse bo yɛ hemɔkɛyelii ni oweku lɛ heɔ eyeɔ lɛ amli. No baanyɛ afee nɔkpakpa. Nyɔŋmɔ miisumɔ ni fɔlɔi atsɔɔ amɛbii anii. (5 Mose 6:4-9; 11:18-21) Ákɛ nɔkwɛmɔnɔ lɛ, oblanyo Timoteo ná he sɛɛ babaoo diɛŋtsɛ yɛ enyɛ kɛ enaa toi ni ebo lɛ hewɔ. (2 Timoteo 1:5; 3:14, 15) Ŋmalɛi lɛ woɔ hewalɛ ni akɛ bulɛ aha nɔ ni fɔlɔi heɔ amɛyeɔ lɛ. (Abɛi 1:8; Efesobii 6:1) Shi ani o-Bɔlɔ lɛ miisumɔ ni ohe nibii oye akɛni ofɔlɔi heɔ amɛyeɔ kɛkɛ hewɔ? Yɛ anɔkwale mli lɛ, nɔ ni tsutsu yinɔbii he amɛye ni amɛfee ní akɛ he kpɛtɛɔ he bɔ ni asusuuu he lɛ baanyɛ afee oshara.—Lala 78:8; Amos 2:4.

Átsɔse Samariayoo ko ni kɛ Yesu Kristo kpe lɛ yɛ ejamɔ ni ji Samariabii ajamɔ lɛ mli. (Yohane 4:20) Yesu kɛ bulɛ ha hegbɛ ni eyɔɔ akɛ eeehala nɔ ni esumɔɔ ni ehe eye lɛ, shi etsɔɔ mli eha lɛ hu akɛ: “Nyɛleee nɔ ni nyɛjáa.” Yɛ anɔkwale mli lɛ, ejamɔŋ hemɔkɛyelii lɛ babaoo ji tɔmɔ, ni ekɛɛ lɛ akɛ ehe baahia ni efee tsakemɔi yɛ ehemɔkɛyelii amli kɛ́ ebaajá Nyɔŋmɔ kɛ nɔkpɛlɛmɔ—“yɛ mumɔ kɛ anɔkwale mli.” Yɛ nɔ najiaŋ ni ekɛ ehe aaakpɛtɛ nɔ ni ŋwanejee ko bɛ he akɛ eji hemɔkɛyelii ni esumɔɔ waa lɛ, etsɛŋ ni ehe baahia ni lɛ kɛ mɛi krokomɛi ni tamɔ lɛ lɛ ‘abo hemɔkɛyeli’ ni ajie lɛ kpo kɛtsɔ Yesu Kristo nɔ “lɛ toi.”—Yohane 4:21-24, 39-41; Bɔfoi lɛ Asaji 6:7.

Atsɔse Lɛ Koni Ehe Eye?

Tsɔɔlɔi kɛ mɛi babaoo ni yɔɔ nibii komɛi ahe nilee jogbaŋŋ diɛŋtsɛ lɛ sa bulɛ kpele. Ni kɛlɛ, yinɔsane eyi obɔ kɛ nɔkwɛmɔnii ni tsɔɔlɔi ni ale amɛ jogbaŋŋ ni amɛsane ejaaa kwraa lɛ kɛha. Ákɛ nɔkwɛmɔnɔ lɛ, yɛ nɔ ni kɔɔ woji enyɔ ni tsɔɔ jeŋ nilee saji ni Hela jeŋ nilelɔ Aristotle ŋma lɛ he lɛ, yinɔsaneŋmalɔ Bertrand Russell kɛɛ akɛ “ewa waa akɛ abaanyɛ akpɛlɛ wiemɔ kakadaŋŋ ko ni yɔɔ enyɔ lɛ fɛɛ mli lɛ nɔ yɛ ŋmɛnɛŋmɛnɛ jeŋ nilee shishinumɔ naa.” Bei pii lɛ ŋmɛnɛŋmɛnɛ beaŋ hegbɛi ni yɔɔ lɛ po muɔ saji anaa yɛ gbɛ ni ejaaa kwraa nɔ. Sane ni Britain jeŋ nilelɔ Lord Kelvin kɛha yɛ afi 1895 kɛ nɔmimaa ji “ewa akɛ aaaná nɔ ko ni mli tsii fe tsɔnei ni nyiɛɔ ŋwɛi yɛ kɔɔyɔŋ.” No hewɔ lɛ, mɔ ni ji nilelɔ heee nɔ ko eyeee kɛkɛ akɛ sane ko ji anɔkwale akɛni tsɔɔlɔ ko ni yɔɔ enɛ he nilee jogbaŋŋ lɛ ekɛɛ hewɔ.—Lala 146:3.

Nakai ŋaawoo lɛ nɔŋŋ he hiaa kɛ́ aawie jamɔŋ tsɔsemɔ he. Bɔfo Paulo jamɔŋ tsɔɔlɔi lɛ tsɔse lɛ jogbaŋŋ diɛŋtsɛ ni ‘ehiɛ dɔɔ naakpa’ diɛŋtsɛ ‘yɛ etsɛmɛi ablema saji lɛ ahewɔ.’ Shi kɛlɛ, ekãa ni eyɔɔ kɛha eblematsɛmɛi lɛ ablemasane mli hemɔkɛyelii lɛ kɛ naagbai diɛŋtsɛ ba enɔ. Eha ‘ewa Nyɔŋmɔ asafo lɛ yi ni ekpata hiɛ.’ (Galatabii 1:13, 14; Yohane 16:2, 3) Nɔ ni ehiii kwraa lɛ, Paulo tee nɔ ekɛ be kakadaŋŋ ‘fa ntia eshi kooloi akpalamɔtso lɛ naa dade lɛ,’ ni ete shi ewo hewalɛi ni kulɛ esa akɛ eha ehe Yesu Kristo eye lɛ. Ebi koni Yesu diɛŋtsɛ kɛ ehe awo mli waa diɛŋtsɛ koni etsirɛ Paulo ni etsake ehemɔkɛyelii.—Bɔfoi lɛ Asaji 9:1-6; 26:14.

Ani Adafitswaa Gbɛ̀i Ená Onɔ Hewalɛ?

Ekolɛ adafitswaa gbɛ̀i ená ohemɔkɛyelii anɔ hewalɛ waa diɛŋtsɛ. Mɛi babaoo yɛ miishɛɛ akɛ wiemɔ mli heyeli yɛ adafitswaa gbɛ̀i lɛ mli, ni no haa amɛnáa saji ni he baanyɛ aba sɛɛnamɔ kɛha amɛ. Shi kɛlɛ, hewalɛi ni naa wa yɛ ni baanyɛ akudɔ adafitswaa gbɛ̀i lɛ ni amɛfeɔ nakai  daa. Bei pii lɛ, nɔ ni akɛhaa ji saji ni ejaaa kwraa ni baanyɛ aná osusumɔ nɔ hewalɛ nigii.

Kɛfata he lɛ, bɔni afee ni toibolɔi ni fa babaoo aná he miishɛɛ loo egbala amɛ lɛ, adafitswaa he nitsulɔi sumɔɔ ni amɛha ale nɔ ni teeɔ henumɔ shi kɛ nɔ ni afɔɔɔ feemɔ. Nɔ ni ewa akɛ aaakɛɛ loo aaakala koni maŋbii anine ashɛ nɔ afii fioo komɛi kɛkɛ ni eho lɛ ebafee nɔ ni egbɛ eshwã ŋmɛnɛ. Eyɛ mli akɛ jeŋba he tɛi ni ato ni afolɔ ashwie shi lɛ baa fiofio moŋ, shi atutuaa ni ajieɔ kɛyaa. Gbɔmɛi ajwɛŋmɔ miifite fiofio. Amɛjeɔ shishi amɛheɔ amɛyeɔ akɛ ‘ekpakpa ji efɔŋ ni efɔŋ ji ekpakpa.’—Yesaia 5:20; 1 Korintobii 6:9, 10.

Nɔdaamɔnɔ Kpakpa ni Aaaná Aha Hemɔkɛyeli

Gbɔmɛi asusumɔi kɛ jeŋ nileei ni aaatswa ama nɔ lɛ tamɔ nɔ ni aama tsũ yɛ shia nɔ. (Mateo 7:26; 1 Korintobii 1:19, 20) Belɛ, mɛni nɔ obaanyɛ okɛ ohemɔkɛyeli lɛ adamɔ kɛ nɔmimaa? Akɛni Nyɔŋmɔ eha bo nilee babaoo ni okɛaapɛi jeŋ ni ebɔle bo kɛkpe lɛ mli ní obi mumɔŋ nibii ahe saji hewɔ lɛ, ani nilee bɛ mli akɛ ekɛ gbɛ ni oootsɔ nɔ oná osanebimɔi ahetooi lɛ hu aaaha? (1 Yohane 5:20) Yɛ anɔkwale mli lɛ, ebaafee nakai kɛ̃! Belɛ, te ooofee tɛŋŋ ole jamɔ he saji ni ji anɔkwale, ní ja, ni hi jogbaŋŋ? Wɔshashaooo shi akɛ wɔɔkɛɛ akɛ Nyɔŋmɔ Wiemɔ ni ji Biblia lɛ kɛ nɔ̃ pɛ ni aaadamɔ nɔ afee enɛ haa.—Yohane 17:17; 2 Timoteo 3:16, 17.

Mɔ ko aaakɛɛ akɛ: “Shi mɛɛ fioo, ani jeee mɛi diɛŋtsɛ ni yɔɔ Biblia lɛ ji mɛi ni kɛ béi kɛ yiŋfutumɔ ni fá babaoo eba je lɛŋ saji amli lɛ?” Ojogbaŋŋ, eji anɔkwale akɛ, jamɔŋ hiɛnyiɛlɔi ni kɛɔ akɛ amɛkɛ Biblia lɛ tsuɔ nii lɛ efee susumɔi babaoo ni futuɔ mɔ yiŋ ni teeɔ béi ashi. Yɛ anɔkwale mli lɛ, nɔ hewɔ lɛ ji akɛ, amɛkɛ amɛhemɔkɛyelii lɛ damɔɔɔ Biblia lɛ nɔ. Bɔfo Petro wie amɛhe akɛ “amale gbalɔi” kɛ “amale tsɔɔlɔi” ni kɛ ‘nifitemɔ kui’ baaba. Ákɛ nɔ ni jɛ amɛnitsumɔi lɛ amli ba lɛ, Petro kɛɛ akɛ, “aaawie anɔkwale gbɛ lɛ he musubɔɔ wiemɔi.” (2 Petro 2:1, 2) Ni kɛlɛ, Petro ŋma akɛ, “ama gbalɛ wiemɔ lɛ nɔ mi aha wɔ fe tsutsu lɛ, nɔ ni kɛji nyɛŋɔ nyɛhiɛ nyɛto nɔ akɛ la ni tsoɔ yɛ he ko ni woɔ duŋ . . . lɛ, no lɛ nyɛmiifee jogbaŋŋ” lɛ.—2 Petro 1:19; Lala 119:105.

Biblia lɛ woɔ wɔ hewalɛ koni wɔkɛ wɔhemɔkɛyelii lɛ ato nɔ ni etsɔɔ lɛ he akɛ eja lo. (1 Yohane 4:1) Nɛkɛ wolo tɛtrɛɛ nɛɛ kanelɔi akpekpei abɔ lɛ baanyɛ aye odase akɛ nakai feemɔ eha amɛná yiŋtoo kɛ shiŋŋfeemɔ yɛ amɛshihilɛi amli. No hewɔ lɛ, feemɔ tamɔ Beroiabii ni amɛsu hi lɛ. ‘Kpaa Ŋmalɛi lɛ amli jogbaŋŋ daa nɛɛ’ dani ole nɔ ni obaahe oye. (Bɔfoi lɛ Asaji 17:11) Yehowa Odasefoi baaná he miishɛɛ akɛ amɛaaye amɛbua bo koni ofee enɛ. Yɛ anɔkwale mli lɛ, bo ji mɔ ni baakpɛ oyiŋ yɛ nɔ ni osumɔɔ ni ohe oye lɛ he. Shi kɛlɛ, eji nilee gbɛ akɛ oookwɛ koni okudɔ ohemɔkɛyelii, jeee kɛtsɔ adesai anilee kɛ akɔnɔi anɔ, shi moŋ kɛtsɔ anɔkwale Wiemɔ ni Nyɔŋmɔ ejie lɛ kpo lɛ nɔ.—1 Tesalonika 2:13; 5:21.

[Mfonirii ni yɔɔ baafa 6]

Obaanyɛ okɛ ohemɔkɛyelii adamɔ Biblia lɛ nɔ yɛ hekɛnɔfɔɔ mli