Maŋtsɛyeli Jajelɔi Bɔ Amaniɛ

Nyɔŋmɔ Etsumɔ Ehiɛ Yaafonui

AJƆƆ mɛi ni haa amɛshihilɛ kɛ Yehowa mlai kpãa gbee lɛ waa diɛŋtsɛ. Eyɛ mli akɛ jeee be fɛɛ be tsakemɔi ni he hiaa ni afeɔ lɛ yɔɔ mlɛo moŋ, shi yelikɛbuamɔ kɛ hewalɛwoo yɛ ni nine baanyɛ ashɛ nɔ. (Lala 84:12) Niiashikpamɔ ni nyiɛ sɛɛ nɛɛ ni jɛ Southeast Asia lɛ tsɔɔ enɛ mli.

Beni Odasefonyo ko ni jɛ France lɛ yɔɔ hejɔɔmɔ lɛ, ekɛ shwapotsɛ ko ni atsɛɔ lɛ Kim * lɛ gba yiŋtoo ni Yehowa yɔɔ kɛha shikpɔŋ lɛ he sane. Eshi wolo ko hu ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ekome eha Kim. Beni Kim kwɛɔ wolo lɛ mli lɛ, trukaa lɛ, ehiŋmɛi gba wiemɔi ni ji “aaatsumɔ amɛhiɛaŋ yaafonui fɛɛ” lɛ nɔ. (Kpojiemɔ 21:4) Kim kɛɛ akɛ: “Nɛkɛ kuku nɛɛ ta mimli diɛŋtsɛ. Yɛ be mli ni anaa mi akɛ miŋmɔɔ ni migbaa sane gbi muu lɛ fɛɛ yɛ shwapo lɛ mli lɛ, namɔ aaanyɛ ale akɛ kɛ mishɛ shia gbɛkɛ nɔŋŋ pɛ lɛ, mifóɔ ni minyɛɛɛ mawɔ?” Beni ewieɔ nɔ ni kɛ ewerɛhoyeli lɛ baa lɛ, ekɛɛ akɛ: “No mli lɛ mikɛ nuu ko ehi shi afii 18 ni mibɛ miishɛɛ kwraa ejaakɛ esumɔɔɔ akɛ efeɔ mihe nii. Miisumɔ ni mafo nɛkɛ shihilɛ gbɛ nɛɛ mli, shi akɛni mikɛ lɛ ehi shi aahu hewɔ lɛ, mináaa ekãa ni mikɛaafee nakai.”

Be fioo ko sɛɛ lɛ, Kim kpɛlɛ koni Yehowa Odasefonyo ko ni gbɛi ji Linh lɛ kɛ lɛ akase Biblia lɛ. Kim kɛɛ akɛ: “Miisumɔ waa akɛ mikɛ Biblia lɛ mli nitsɔɔmɔ lɛ aaatsu nii. Ákɛ nɔkwɛmɔnɔ lɛ, mikpá miblematsɛmɛi lɛ ajamɔ, eyɛ mli moŋ akɛ miweku lɛ mli bii wa mi yi yɛ enɛ hewɔ. Kɛfata he lɛ, mika akɛ mikɛ wɔshihilɛ ni jeee gbalashihilɛ lɛ aaawo mla shishi, shi mihefatalɔ lɛ ekpɛlɛɛɛ nakai feemɔ. Yɛ be ni mli wa nɛɛ mli lɛ, Odasefonyo ni jɛ France lɛ tee nɔ emaje mi Biblia he woji, ni Linh wo mi hewalɛ waa diɛŋtsɛ. Tsuishitoo kɛ suɔmɔ sɛɛfimɔ ni nɛkɛ nyɛmimɛi yei nɛɛ kɛha mi lɛ, ye ebua mi koni mafi shi shiŋŋ kɛyashi be mli ni mina bɔ ni mihefatalɔ lɛ subaŋ ji jogbaŋŋ diɛŋtsɛ. Miná mile akɛ eyɛ ‘ŋamɛi’ 5 momo kɛ bii 25! Enɛ ha miná ekãa koni mashi lɛ maya.

“Shia wulu ni hejɔlɛ yɔɔ mli ni mashi kɛyahi tsũ bibioo ko mli lɛ bɛ mlɛo. Kɛfata he lɛ, mitsutsu hefatalɔ lɛ nyɛ minɔ koni mikɛ lɛ abahi shi ekoŋŋ, aahu akɛ ewo mihe gbeyei akɛ ebaatsi asid eshwie mihe koni ekɛfite mi kɛ́ mikpɛlɛɛɛ. Yɛ Yehowa yelikɛbuamɔ naa lɛ, minyɛ mifee nɔ ni ja.” Kim tee hiɛ aahu ni yɛ naagbee lɛ abaptisi lɛ yɛ April 1998. Kɛfata he lɛ, enyɛmimɛi yei lɛ ateŋ mɛi enyɔ kɛ ebinuu ni yeko afii 20 lɛ kɛ Yehowa Odasefoi bɔi Biblia lɛ kasemɔ.

Kim kɛɛ akɛ: “Misusuɔ tsutsu ko akɛ mishihilɛ baafee nɔ ni hiɛnɔkamɔ bɛ mli be fɛɛ be. Shi amrɔ nɛɛ, miyɛ miishɛɛ, ni mifooo dɔŋŋ nyɔɔŋ. Yehowa etsumɔ mihiŋmɛiiaŋ yaafonui lɛ momo.”

[Shishigbɛ niŋmaa]