Ani Okaiɔ?

Ani ohiɛ esɔ Buu-Mɔɔ srɔtoi ni je kpo nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni hewɔ esa akɛ asusu sanebimɔi ni atee lɛ shi yɛ Hiob yitso 38 lɛ he ŋmɛnɛ po?

Ŋmɛnɛŋmɛnɛ beaŋ jeŋ nilelɔi po nyɛɛɛ anu naakpɛɛ nitsumɔi ni Nyɔŋmɔ gbala jwɛŋmɔ kɛtee nɔ lɛ babaoo shishi. Nɔ ni fata enɛɛmɛi ahe ji bɔ ni nigbalamɔ hewalɛ lɛ haa shikpɔŋ lɛ bɔleɔ shi be fɛɛ be, nɔ diɛŋtsɛ ni la ji, nɔ hewɔ ni snoo fufuji srɔtoisrɔtoi ni fa babaoo lɛ yɔɔ, bɔ ni feɔ ni nugbɔ nɛɔ, kɛ hewalɛ ni yɔɔ nugbɔshiimɔi ni naa wa waa lɛ amli.—4/15, baafa 4-11.

• Mɛɛ Biblia mli nɔkwɛmɔnii baanyɛ aye abua wɔ koni wɔdamɔ henumɔi ni esaaa naa?

Asaf, Baruk, kɛ Naomi nijiaŋ je wui yɛ bei komɛi amli loo amɛná henumɔi krokomɛi ni esaaa, ni Ŋmalɛ mli saji ni aŋmala ashwie shi ni tsɔɔ bɔ ni amɛkɛ omanyeyeli damɔ shihilɛi ni tamɔ nakai anaa lɛ baanyɛ aye abua wɔ.—4/15, baafa 22-24.

• Mɛni ji gbɛ̀i kpakpai komɛi ni abaatsɔ nɔ aye abua Kristofoi okulafoi?

Nanemɛi baanyɛ amɛjɛ mlihilɛ mli koni amɛye amɛbua amɛ yɛ faŋŋ mli. Weku mli bii loo mɛi krokomɛi baanyɛ amɛkɛ shika loo heloonaa yelikɛbuamɔ aha, kɛ́ hiamɔ diɛŋtsɛ yɛ. Nanemɛi Kristofoi hu baanyɛ aye abua kɛtsɔ yelikɛbuamɔ ni ajɛɔ suɔmɔ kɛ naanyobɔɔ mli akɛhaa kɛ mumɔŋ yelikɛbuamɔ kɛ miishɛjemɔ ni akɛhaa lɛ nɔ.—5/1, baafa 5-7.

• Mɛni hewɔ ni ehe hiaa ni abote gbalashihilɛ mli ‘yɛ Nuntsɔ lɛ mli pɛ,’ taakɛ 1 Korintobii 7:39 woɔ he ŋaa lɛ?

Bei pii lɛ, gbalashihilɛ ni akɛ mɛi ni heee yeee boteɔ mli lɛ yeee omanye. Kɛfata he lɛ, ŋaawoo ni jɛ ŋwɛi ni akɛtsuɔ nii nɛɛ ji sane ko ni tsɔɔ anɔkwa ni ayeɔ Yehowa Nyɔŋmɔ. Kɛ wɔkɛ Nyɔŋmɔ Wiemɔ lɛ tsu nii lɛ, wɔtsuii ebuuu wɔ fɔ́. (1 Yohane 3:21, 22)—5/15, baafa 20-21.

• Akɛni Yehowa ji mɔ ni baanyɛ ekɛ wɔhe eshai afa wɔ hewɔ lɛ, mɛni hewɔ ni Kristofoi jajeɔ eshai ni hiɛdɔɔ yɔɔ mli amɛtsɔɔ hii onukpai ni yɔɔ asafo lɛ mli lɛ?

Hɛɛ, eshai ni hiɛdɔɔ yɔɔ mli ni Yehowa kɛfaa lɛ ji nɔ ni esa akɛ Kristofonyo atao. (2 Samuel 12:13) Shi taakɛ bɔ ni gbalɔ Natan ye ebua David lɛ, hii onukpai ni edara yɛ mumɔŋ ni yɔɔ asafo lɛ mli lɛ, baanyɛ aye abua eshafeelɔi ni etsake amɛtsui lɛ. Onukpai lɛ aŋɔɔ ni aaaya lɛ kɛ gbɛtsɔɔmɔ ni akɛha yɛ Yakobo 5:14, 15 lɛ kpãa gbee.—6/1, baafa 31.

• Mɛɛ odaseyeli yɔɔ ni tsɔɔ akɛ esa akɛ wɔkwɛ awusãi kɛ okulafoi ni ehia amɛ lɛ?

Yinɔsane ni aŋma afɔ̃ shi lɛ tsɔɔ akɛ yelikɛbuamɔ ni tamɔ nɛkɛ ni akɛhaa lɛ ji nɔ ni kadi anɔkwa jamɔ yɛ blema Hebribii kɛ mra be mli Kristofoi ateŋ. (2 Mose 22:22, 23; Galatabii 2:9, 10; Yakobo 1:27) Bɔfo Paulo kɛ gbɛtsɔɔmɔi ni yɔɔ faŋŋ ni Kristofoi baatsɔ nɔ amɛkɛ kwɛmɔ aha okulafoi ni ehia amɛ lɛ fata he yɛ Ŋmalɛi lɛ amli. (1 Timoteo 5:3-16)—6/15, baafa 9-11.

• Mɛɛ nɔ̃ titri haa anáa miishɛɛ shihilɛ ni shishinumɔ yɔɔ mli?

Esa akɛ wɔná wɔkɛ Yehowa, wɔŋwɛi Tsɛ lɛ teŋ wekukpaa kpakpa ni wɔhiɛ mli. Biblia lɛ kasemɔ ji yelikɛbuamɔ nɔ ko ni baaha wɔfee nakai pɛpɛɛpɛ.—7/1, baafa 4-5.

• Ani adesa fɛɛ adesa yɛ mumɔ ko ni gbooo ni hiɔ shi yɛ gbele sɛɛ?

Eyɛ mli akɛ mɛi komɛi heɔ amɛyeɔ akɛ mumɔ ko—ni jeee susuma—gbooo moŋ, shi Biblia lɛ fĩii susumɔ nɛɛ sɛɛ. Etsɔɔ akɛ kɛ́ adesa gbo lɛ, ekuɔ esɛɛ kɛyaa sũ lɛ mli ni ebɛ shihilɛ mli. Shi Nyɔŋmɔ yɛ nyɛmɔ ni baaha ekɛ lɛ aba wala mli ekoŋŋ, no hewɔ lɛ hiɛnɔkamɔi fɛɛ ni yɔɔ kɛha wɔsɛɛ shihilɛ kɛtsɔ gbohiiashitee nɔ lɛ yɛ Nyɔŋmɔ dɛŋ. (Jajelɔ 12:7)—7/15, baafa 3-6.

• Nɛgbɛ Daniel yɔɔ beni aka Hebribii etɛ lɛ yɛ Dura ŋa lɛ nɔ lɛ?

Biblia lɛ etsɔɔɔ. Eeenyɛ efee akɛ ekolɛ ebiii ni Daniel aba jɛmɛ yɛ hegbɛ ni eyɔɔ lɛ hewɔ, aloo ekolɛ etee eyaatsu nɔyeli lɛ nitsumɔ. Shi wɔbaanyɛ wɔná nɔmimaa akɛ eŋmɛɛɛ anɔkwa ni eyeɔ Yehowa lɛ he ekɛsaaa.—8/1, baafa 31.