Kaaha Ekpakpafeemɔ Miitɔ Bo
Kaaha Ekpakpafeemɔ Miitɔ Bo
“Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.”—GALATABII 6:9.
1, 2. (a) Mɛni hewɔ tsuishitoo he hiaa kɛha Nyɔŋmɔ sɔɔmɔ lɛ? (b) Abraham jie tsuishiŋmɛɛ kpo yɛ mɛɛ gbɛ nɔ, ni mɛni ye ebua lɛ ni efee enɛ?
AKƐ Yehowa Odasefoi lɛ, wɔnáa Nyɔŋmɔ suɔmɔnaa nifeemɔ he miishɛɛ. Wɔnáa hejɔɔmɔ hu yɛ kaselɔ-feemɔ ‘apã’ lɛ teremɔ mli. (Mateo 11:29) Shi kɛlɛ, jeee be fɛɛ be efeɔ mlɛo akɛ wɔɔfata Kristo he kɛsɔmɔ Yehowa. Bɔfo Paulo fee enɛ faŋŋ beni ewo nanemɛi Kristofoi lɛ hewalɛ akɛ: “Tsuishitoo ehia nyɛ, koni, beni nyɛfee Nyɔŋmɔ suɔmɔnaa nii lɛ, nyɛnine ashɛ shiwoo lɛ nɔ.” (Hebribii 10:36) Tsuishitoo he miihia ejaakɛ Nyɔŋmɔ sɔɔmɔ baanyɛ afee kaa.
2 Eka shi faŋŋ akɛ Abraham shihilɛ yeɔ anɔkwa sane nɛɛ he odase. Ekɛ nihalamɔi ní mli wa kɛ haomɔ shihilɛi kpe shii abɔ. Famɔ ní akɛha lɛ akɛ eshi hejɔlɛ shihilɛ ní eyɔɔ mli yɛ Ur lɛ ji shishijee pɛ kɛkɛ. Etsɛɛɛ kwraa ni ekɛ hɔmɔ, béi ní jɛ ekutsoŋbii aŋɔɔ, eŋa ní shwɛ sharao ní ahe lɛ yɛ edɛŋ, nyɛɛ ní jɛ wekumɛi komɛi aŋɔɔ, kɛ ta mli yiwalɛ shihilɛ ko kpe. Kaai wuji jwere ehiɛ lolo kɛmiiba. Shi Abraham haaa ekpakpafeemɔ atɔ lɛ kɔkɔɔkɔ. Enɛ sa kadimɔ waa kɛji osusu he akɛ no mli lɛ ebɛ Nyɔŋmɔ Wiemɔ muu lɛ fɛɛ, tamɔ bɔ ni wɔyɔɔ ŋmɛnɛ lɛ. Shi kɛlɛ, ŋwanejee ko bɛ he akɛ ele klɛŋklɛŋ gbalɛ lɛ, ní Nyɔŋmɔ jaje yɛ mli akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ.” (1 Mose 3:15) Akɛni Abraham nɔ Seshi lɛ baatsɔ kɛba hewɔ lɛ, eka shi faŋŋ akɛ Satan kɛ nyɛɛ baaba enɔ titri. Ŋwanejee ko bɛ he akɛ anɔkwale nɛɛ ní Abraham le lɛ ye ebua lɛ ni ekɛ miishɛɛ ŋmɛ etsui shi yɛ ekaai lɛ amli.
3. (a) Mɛni hewɔ esa akɛ Yehowa webii ní yɔɔ ŋmɛnɛ lɛ akpa amanehului agbɛ lɛ? (b) Mɛɛ hewalɛwoo Galatabii 6:9 lɛ kɛhaa wɔ?
3 Esa akɛ Yehowa webii ní yɔɔ ŋmɛnɛ lɛ hu akpa amanehului agbɛ. (1 Petro 1:6, 7) Ejaakɛ, Kpojiemɔ 12:17 lɛ bɔɔ wɔ kɔkɔ akɛ Satan ‘miiwu ta’ eeshi shwɛɛnii ní afɔ amɛ mu lɛ. Ni akɛni “tooi krokomɛi” lɛ kɛ amɛhe ekpɛtɛ mɛi ní afɔ amɛ mu lɛ ahe gbagbalii hewɔ lɛ, amɛ hu amɛbafeɔ mɛi ní Satan kɛ mlifu jieɔ ehiɛ ekáa amɛ. (Yohane 10:16) Yɛ shitee-kɛ-woo ní ekolɛ Kristofoi kɛbaakpe yɛ amɛmaŋ shiɛmɔ nitsumɔ lɛ mli lɛ sɛɛ lɛ, ekolɛ amɛkɛ nɔnyɛɛ shihilɛi ní kaa mɔ baakpe yɛ amɛ diɛŋtsɛ amɛshihilɛi amli. Paulo woɔ wɔ ŋaa akɛ: “Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:9) Hɛɛ, eyɛ mli akɛ Satan etswa efai shi akɛ ebaafite wɔhemɔkɛyeli lɛ moŋ, shi esa akɛ wɔte shi wɔshi lɛ, ní wɔdamɔ shi shiŋŋ yɛ hemɔkɛyeli lɛ mli. (1 Petro 5:8, 9) Mɛni baanyɛ ajɛ wɔ anɔkwayeli gbɛ lɛ mli aba? Yakobo 1:2, 3 lɛ tsɔɔ mli akɛ: “Minyɛmimɛi, kɛji nyɛgbee kaai srɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛ́ɔ tsuishiŋmɛɛ kɛbaa.”
Tutuamɔ ní Baa Tɛ̃ɛ
4. Satan kɛ tutuamɔ ní yɔɔ tɛ̃ɛ etsu nii yɛ mɔdɛŋ ní ebɔɔ ní efite Nyɔŋmɔ webii lɛ emuuyeli mlihiɛmɔ lɛ yɛ mɛɛ gbɛ nɔ?
4 Eka shi faŋŋ akɛ Abraham shihilɛ feɔ “kaai srɔtoi” ní Kristofonyo baanyɛ ekɛkpe ŋmɛnɛ lɛ he mfoniri. Ákɛ nɔkwɛmɔnɔ lɛ, ehe bahia ní efee tutualɔi ní jɛ Shinear lɛ atutuamɔ lɛ he nɔ ko. (1 Mose 14:11-16) Ebɛ naakpɛɛ akɛ Satan yaa nɔ ekɛ tutuamɔi ní yɔɔ tɛ̃ɛ baa, ni efeɔ enɛ akɛ yiwaa. Kɛjɛ Jeŋ Ta II lɛ naagbee kɛbaa nɛɛ, shikpɔji nyɔŋmai abɔ anɔyelii kɛ naatsii eba Kristofoi atsɔsemɔ nitsumɔ ní Yehowa Odasefoi tsuɔ lɛ nɔ. Afi 2001 Yearbook of Jehovah’s Witnesses lɛ bɔɔ yiwalɛ nifeemɔ ní Kristofoi ní yɔɔ Angola lɛ ŋmɛ amɛtsui shi yɛ mli, yɛ henyɛlɔi adɛŋ lɛ he amaniɛ. Akɛni amɛkɛ amɛhe fɔ̃ɔ Yehowa nɔ hewɔ lɛ, wɔnyɛmimɛi ní yɔɔ shikpɔji nɛɛ anɔ lɛ kɛ shifimɔ etee nɔ ni amɛkpaaa! Amɛkpee naa, jeee kɛtsɔ yiwalɛ nifeemɔ loo atuatsemɔ nɔ, shi moŋ kɛtsɔ ŋaa gbɛ ní amɛtsɔɔ nɔ amɛtsuɔ shiɛmɔ nitsumɔ lɛ nɔ.—Mateo 24:14.
5. Abaanyɛ akɛ yiwaa aba Kristofoi gbekɛbii anɔ yɛ skul yɛ mɛɛ gbɛ nɔ?
5 Shi kɛlɛ, yiwaa etsɔɔɔ doo akɛ ekɔɔ awuiyeli nifeemɔi ahe. Yɛ naagbee lɛ, ajɔɔ Abraham ni efɔ́ bihii enyɔ—Ishmael kɛ Isak. Akɛɔ wɔ yɛ 1 Mose 21:8-12 lɛ akɛ be ko lɛ Ishmael ‘ye’ Isak “he fɛo.” Paulo tsɔɔ yɛ ewolo ní eŋma eyaha Galatabii lɛ mli akɛ enɛ yɛ hiɛdɔɔ kwraa fe gbekɛbii ashwɛmɔ folo ko kɛkɛ, ejaakɛ ewie Ishmael he akɛ ewa Isak yi! (Galatabii 4:29) Enɛ hewɔ lɛ, abaanyɛ atsɛ hefɛoyeli ní jɛɔ nanemɛi skulbii aŋɔɔ kɛ jɛmɔ wiemɔi ní shitee-kɛ-wolɔi wieɔ lɛ yɛ gbɛ ní ja nɔ akɛ yiwaa. Kristofonyo gbekɛ ko ní atsɛɔ lɛ Ryan lɛ kaiɔ haomɔ ní ená yɛ eklasbii adɛŋ lɛ, akɛ: “Minitii 15 ní wɔkɛtáa bɔs mli kɛyaa skul loo wɔbaa shia lɛ feɔ tamɔ ŋmɛlɛtswai abɔ, yɛ jɛmɔ ní amɛjɛɔ mi lɛ hewɔ. Amɛkɛ la ní akɛsuɔ zigaret lɛ shãa dadei ní akɛmɔmɔɔ woji lɛ ni dadei lɛ dɔɔ waa ni amɛkɛshãa mi.” Mɛɛ yiŋtoo yɔɔ yiwalɛ nifeemɔ nɛɛ sɛɛ? “Teokrase tsɔsemɔ ní akɛha mi lɛ ha esoro mi kwraa yɛ gbekɛbii krokomɛi ní yɔɔ skul lɛ ahe.” Shi kɛlɛ, Ryan tsɔ sɛɛfimɔ ní efɔlɔi kɛha lɛ lɛ nɔ ekɛ anɔkwayeli ŋmɛ etsui shi. Nyɛ gbekɛbii lɛ, ani nyɛtipɛŋfoi ahefɛoyeli lɛ haa nyɛnijiaŋ jeɔ wui? Ojogbaŋŋ, nyɛnijiaŋ akajea wui! Kɛ́ nyɛkɛ anɔkwayeli ŋmɛ nyɛtsui shi lɛ, nyɛbaaná Yesu wiemɔi nɛɛ amlibaa mli niiashikpamɔ, akɛ: “Ajɔɔ nyɛ, kɛji ajɛ́ nyɛ ni awa nyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ.”—Mateo 5:11.
Daa Gbi Yeyeeyefeemɔi
6. Mɛɛ nibii baanyɛ afite nanemɛi Kristofoi ateŋ wekukpaai ŋmɛnɛ?
6 Kaai ní wɔkɛkpeɔ ŋmɛnɛ lɛ amli babaoo ji daa gbi shihilɛ mli yeyeeyefeemɔi kɛkɛ. Ehe bahia ní Abraham akpee béi shihilɛ ní te shi yɛ ekooloo kwɛlɔi lɛ kɛ ewɔfaase Lot nɔ̃ lɛ ateŋ lɛ naa. (1 Mose 13:5-7) Nakai nɔŋŋ hu ŋmɛnɛ, mɛi ateŋ naagbai kɛ awuŋayeli bibii baanyɛ afite mɛi ateŋ wekukpaai ni ebaanyɛ ekɛ asafo lɛ toiŋjɔlɛ po awo oshara mli. “He ni awuŋayeli kɛ béi yɔɔ lɛ, jɛi sakasakafeemɔ kɛ nishaianii fɛɛ yɔɔ.” (Yakobo 3:16) Kwɛ bɔ ni ehe hiaa ní wɔnijiaŋ akaje wui, shi moŋ wɔha toiŋjɔlɛ aye henɔwomɔ hiɛ, taakɛ Abraham fee lɛ, ní wɔtiu mɛi krokomɛi ahilɛ-kɛhamɔ moŋ sɛɛ!—1 Korintobii 13:5; Yakobo 3:17.
7. (a) Mɛni esa akɛ mɔ ko afee kɛji enaanyo Kristofonyo ko eye lɛ awui lɛ? (b) Mɛɛ gbɛ nɔ Abraham fee nɔkwɛmɔnɔ kpakpa eha wɔ yɛ wɔkɛ mɛi krokomɛi ateŋ wekukpaa kpakpa ní wɔɔhiɛ mli daa lɛ gbɛfaŋ?
7 Mɛi ní he jɔ ní wɔɔfee lɛ baanyɛ afee kaa kɛji wɔnuɔ he akɛ wɔnaanyo heyelilɔ ko kɛ wɔ eye yɛ gbɛ ní ejaaa nɔ lɛ. Abɛi 12:18 lɛ kɛɔ akɛ: “Mɔ ko yɛ ni wieɔ bambam, tamɔ adumɔɔ klante.” Wiemɔi ní awieɔ kɛkɛ, ní ahiɛɛɛ jwɛŋmɔ fɔŋ yɛ sɛɛ po lɛ, baanyɛ ekɛ dɔlɛ ní naa wa waa aba. Ni dɔlɛ lɛ mli waa babaoo po kɛji wɔnu he akɛ agbe wɔhe guɔ loo aye wɔhe osheku ni akɛfite wɔ kwraa lɛ. (Lala 6:7, 8) Shi esaaa ní Kristofonyo ŋmɛɔ gbɛ ní dɔlɛ henumɔi haa enijiaŋ jeɔ wui! Kɛ́ oyɛ shihilɛ ní tamɔ nakai mli lɛ, ŋɔɔ hegbɛ lɛ ní okɛjaje saji kɛtsɔ wiemɔ ní okɛ mɔ ní etɔ̃ onɔ lɛ baawie yɛ mlihilɛ mli lɛ nɔ. (Mateo 5:23, 24; Efesobii 4:26) Kpɛɛ oyiŋ akɛ okɛ nakai mɔ lɛ he baake lɛ. (Kolosebii 3:13) Kɛ́ wɔŋmɛɛ mlifu lɛ he kwraa lɛ, wɔhaa enyɛɔ ebaa akɛ wɔɔsaa wɔ diɛŋtsɛ wɔhenumɔi kɛ wɔkɛ wɔnyɛmi lɛ teŋ wekukpaa hu. Abraham eyaaa nɔ ekɛ mlifu ní ekolɛ ená yɛ Lot he lɛ wooo emli. Ejaakɛ, Abraham kɛ oyaiyeli tee eyafã Lot kɛ eweku lɛ he!—1 Mose 14:12-16.
Kaai ní Wɔ Diɛŋtsɛ Wɔkɛbaa Wɔnɔ
8. (a) Kristofoi baanyɛ ‘amɛkɛ piŋmɔi babaoo agbulɔ amɛ diɛŋtsɛ amɛhe’ yɛ mɛɛ gbɛ nɔ? (b) Mɛni hewɔ Abraham nyɛ ená heloonaa nibii ahe jwɛŋmɔ ní ŋmɛɔ pɛpɛɛpɛ lɛ?
8 Wɔkpɛlɛɔ nɔ akɛ, kaai lɛ ekomɛi yɛ ní wɔ diɛŋtsɛ wɔkɛbaa wɔnɔ. Ákɛ nɔkwɛmɔnɔ lɛ, Yesu kɛ famɔ ha esɛɛnyiɛlɔi lɛ akɛ: “Nyɛkabɔa jwetrii nyɛhaa nyɛhe yɛ shikpɔŋ lɛ nɔ, he ni omlɛ̃gɛ̃ kɛ ŋkanale fiteɔ nii ni julɔi gbáa bajuɔ yɛ lɛ.” (Mateo 6:19) Ni kɛlɛ, nyɛmimɛi komɛi ‘kɛ piŋmɔi babaoo gbulɔɔ amɛ diɛŋtsɛ amɛhe’ kɛtsɔɔ heloonaa nibii ní amɛkɛyeɔ Maŋtsɛyeli lɛ he nibii ahiɛ lɛ nɔ. (1 Timoteo 6:9, 10) Abraham sumɔ ní ekɛ heloonaa miishɛɛnamɔi ashã afɔle koni esa Nyɔŋmɔ hiɛ. “Hemɔkɛyeli ekɛyato gbɔ yɛ shiwoo shikpɔŋ lɛ nɔ tamɔ mɔkpɔŋ, ni ekɛ Isak kɛ Yakob, ni ekɛ amɛ ji nakai shiwoo lɛ nɔŋŋ yelɔi lɛ, hi shi yɛ buui amli; ejaakɛ eekwɛ maŋ ní yɔɔ shishitoo ní wa ní etolɔ kɛ emalɔ ji Nyɔŋmɔ lɛ gbɛ.” (Hebribii 11:9, 10) Hemɔkɛyeli ní Abraham yɔɔ yɛ wɔsɛɛ be “maŋ,” loo ŋwɛi nɔyeli mli lɛ, ye ebua lɛ ni ekɛ ehiɛ efɔ̃ɔɔ ninamɔ nɔ. Ani wɔfeeŋ nilelɔi akɛ wɔ hu wɔɔfee nakai?
9, 10. (a) Gbɛi-hemɔ he akɔnɔ baanyɛ ekɛ kaa aba yɛ mɛɛ gbɛ nɔ? (b) Nyɛminuu ko baanyɛ aba ejeŋ akɛ ‘mɔ bibioo’ ŋmɛnɛ yɛ mɛɛ gbɛ nɔ?
9 Susumɔ fã kroko hu he okwɛ. Biblia lɛ kɛ gbɛtsɔɔmɔ ní mli wa waa nɛɛ haa akɛ: “Kɛ́ efeɔ mɔ ko akɛ nɔ ko ji lɛ ni ejeee nɔ ko lɛ, lɛ diɛŋtsɛ ehe eshishiuɔ.” (Galatabii 6:3) Kɛfata he lɛ, awoɔ wɔ hewalɛ akɛ ‘wɔkaŋmɛ mligbalamɔi loo yaka anunyam taomɔ gbɛ, shi moŋ wɔná heshibaa jwɛŋmɔ.’ (Filipibii 2:3) Mɛi komɛi kɛ kaai baa amɛ diɛŋtsɛ amɛnɔ kɛtsɔ ŋaawoo nɛɛ ní amɛkɛtsuuu nii lɛ nɔ. Akɛni gbɛi-hemɔ he akɔnɔ tsirɛɔ amɛ, shi jeee akɔnɔ akɛ amɛaatsu “nitsumɔ kpakpa” hewɔ lɛ, kɛ́ ahaaa amɛ sɔɔmɔ hegbɛi yɛ asafo lɛ mli lɛ, amɛnijiaŋ jeɔ wui ni amɛmii shɛɛɛ amɛhe.—1 Timoteo 3:1.
10 Abraham fee nɔkwɛmɔnɔ fɛfɛo efɔ̃ shi yɛ ‘lɛ diɛŋtsɛ ehe ní ebuuu tuutu fe bɔ ni sa’ lɛ gbɛfaŋ. (Romabii 12:3) Beni Abraham kɛ Melkizedek kpe lɛ, Abraham efeee enii tamɔ nɔ ni Nyɔŋmɔ hiɛ duromɔ ní eyɔɔ lɛ hewɔ lɛ enɔ kwɔ fe lɛ. Shi moŋ, ekpɛlɛ Melkizedek gbɛhe ní nɔ kwɔ akɛ osɔfo lɛ nɔ kɛtsɔ enibii lɛ mlijaa nyɔŋma mli ekome ní ekɛha lɛ lɛ nɔ. (Hebribii 7:4-7) Esa akɛ Kristofoi ní yɔɔ ŋmɛnɛ lɛ hu asumɔ akɛ amɛaaba amɛjeŋ akɛ ‘mɛi bibii’ ní amɛkatao akɛ amɛaaha ale amɛ. (Luka 9:48) Kɛ́ efee tamɔ nɔ ni mɛi ní nyiɛɔ hiɛ yɛ asafo lɛ mli lɛ etsĩ hegbɛi komɛi ní ooona lɛ anaa lɛ, okɛ anɔkwayeli apɛi bo diɛŋtsɛ omli okwɛ ní okɛna tsakemɔi komɛi ní obaanyɛ ofee yɛ osu kɛ baŋ loo bɔ ni otsuɔ nibii ahe nii ohaa lɛ mli. Yɛ nɔ̃ najiaŋ ní omli aaafu yɛ hegbɛi ní akɛhako bo lɛ hewɔ lɛ, ŋɔɔ hegbɛ ní oyɔɔ lɛ—ni ji hegbɛ ní oyɔɔ akɛ oye obua mɛi krokomɛi ní amɛbale Yehowa lɛ ní okɛtsu nii jogbaŋŋ kɛmɔ shi. Hɛɛ, “nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli.”—1 Petro 5:6.
Nibii ní Anaaa lɛ Amli Hemɔkɛyeli Namɔ
11, 12. (a) Mɛni hewɔ ekolɛ mɛi ní yɔɔ asafo lɛ mli lɛ ekomɛi laajeɔ amɛ hehiamɔ henumɔ lɛ? (b) Abraham fee nɔkwɛmɔnɔ fɛfɛo efɔ̃ shi yɛ eshihilɛ ní eha edamɔ Nyɔŋmɔ shiwoi anɔ lɛ gbɛfaŋ yɛ mɛɛ gbɛ nɔ?
11 Kaa kroko hu baanyɛ akɔ nibii agbɛjianɔtoo fɔŋ nɛɛ naagbee lɛ ní tamɔ nɔ ni miitsɛ waa lɛ he. Taakɛ 2 Petro 3:12 tsɔɔ lɛ, esa akɛ Kristofoi ‘akwɛ gbɛ ní amɛshwe Yehowa gbi lɛ baa lɛ.’ Shi kɛlɛ, mɛi babaoo ekwɛ “gbi” nɛɛ gbɛ aahu afii babaoo, yɛ mɛi komɛi agbɛfaŋ lɛ, afii nyɔŋmai abɔ. Enɛ hewɔ lɛ, mɛi komɛi anijiaŋ baanyɛ aje wui ni amɛbaalaaje amɛ hehiamɔ henumɔ lɛ.
12 Shikome ekoŋŋ lɛ, susumɔ Abraham nɔkwɛmɔnɔ lɛ he okwɛ. Eha eshihilɛ fɛɛ damɔ Nyɔŋmɔ shiwoi lɛ amli hemɔkɛyeli nɔ, eyɛ mli akɛ enyɛŋ eba akɛ fɛɛ baaba mli yɛ ewala bei amli. Lɛɛlɛŋ, ehi shi be kakadaŋŋ bɔ ni sa ni ena ebinuu Isak akɛ etsɔ onukpa. Shi afii ohai abɔ baaho dani abaanyɛ akɛ Abraham shwiei lɛ ato “ŋwɛi ŋulamii” loo “ŋshɔ naa shia” he. (1 Mose 22:17) Shi kɛlɛ, enɛ edɔɔɔ Abraham ni enijiaŋ ejeee wui. Enɛ hewɔ lɛ, bɔfo Paulo wie Abraham kɛ blematsɛmɛi krokomɛi lɛ ahe akɛ: “Hemɔkɛyeli mli mɛnɛɛmɛi fɛɛ gboi yɛ, tsɛ amɛnine shɛko nii ni awo shi lɛ anɔ, shi moŋ shɔŋŋ kɛkɛ amɛna yɛ, ni amɛkɛshɛje amɛmii, ni amɛnyã he, ni amɛjaje akɛ gbɔi kɛ mɛikpɔji ji amɛ yɛ shikpɔŋ lɛ nɔ.”—Hebribii 11:13.
13. (a) Kristofoi ní yɔɔ ŋmɛnɛ lɛ tamɔ “mɛikpɔji” yɛ mɛɛ gbɛ nɔ? (b) Mɛni hewɔ Yehowa kɛ nibii agbɛjianɔtoo nɛɛ baaba naagbee lɛ?
13 Kɛji Abraham nyɛ eha eshihilɛ damɔ shiwoi ní amɛmlibaa yɔɔ “shɔŋŋ” lɛ anɔ lɛ, no lɛ kwɛ bɔ ni esa akɛ wɔ hu wɔfee nakai nɔŋŋ ŋmɛnɛ, akɛni nibii nɛɛ amlibaa ebɛŋkɛ kpaakpa lɛ hewɔ! Taakɛ Abraham fee lɛ, esa akɛ wɔna wɔhe akɛ “mɛikpɔji” ji wɔ yɛ Satan gbɛjianɔtoo lɛ mli, ní wɔkɛ wɔhe akawo shihilɛ gbɛ ní ŋmɛɔ nɔ fɛɛ nɔ feemɔ gbɛ lɛ mli. Yɛ adebɔɔ naa lɛ, wɔmiisumɔ ní kulɛ “nibii fɛɛ anaagbee” lɛ eba momo, jeee ní ebɛŋkɛ kɛkɛ. (1 Petro 4:7) Ekolɛ wɔmiiná hewalɛnamɔ mli naagbai ní mli wa amli amanehulu. Aloo ekolɛ wɔyɛ shika gbɛfaŋ nɔnyɛɛ ní naa wa waa shishi. Shi kɛlɛ, esa akɛ wɔkai akɛ Yehowa kɛ naagbee lɛ baaba, jeee ní ekɛjie wɔ kɛjɛ shihilɛi ní mli wawai amli kɛkɛ, shi moŋ ní ekɛtse lɛ diɛŋtsɛ egbɛi lɛ hu he. (Ezekiel 36:23; Mateo 6:9, 10) Naagbee lɛ baaba, jeee doo akɛ yɛ be ní hi kɛha wɔ lɛ mli, shi moŋ yɛ be ní hi fe fɛɛ kɛha Yehowa yiŋtoi ahe nitsumɔ lɛ mli.
14. Nyɔŋmɔ tsuishitoo lɛ he baa sɛɛnamɔ kɛhaa Kristofoi ŋmɛnɛ yɛ mɛɛ gbɛ nɔ?
14 Kaimɔ hu akɛ, “jeee tsɛɛ [Yehowa, NW] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Kadimɔ akɛ, Nyɔŋmɔ ‘toɔ etsui shi ehaa wɔ’—ni ji Kristofoi asafo lɛ mli bii lɛ. Eka shi faŋŋ akɛ ehe miihia ní wɔteŋ mɛi komɛi aná be babaoo ní wɔkɛfee tsakemɔi komɛi bɔni afee ní ‘ana wɔ ní muji loo kpa ko bɛ wɔhe yɛ ehiɛ, yɛ hejɔlɛ mli.’ (2 Petro 3:14) Belɛ, ani esaaa akɛ wɔdaa shi akɛ Nyɔŋmɔ ejie tsuishitoo ní tamɔ nɛkɛ kpo?
Bɔ ni Wɔɔfee Wɔná Miishɛɛ yɛ Gbɛtsii Nii Fɛɛ Sɛɛ
15. Mɛɛ gbɛ nɔ Yesu tsɔ ehiɛ emiishɛɛ lɛ mli yɛ kaai ní ekɛkpe lɛ fɛɛ sɛɛ, ni ekasemɔ he baa sɛɛnamɔ kɛhaa Kristofoi ŋmɛnɛ yɛ mɛɛ gbɛ nɔ?
15 Abraham shihilɛ tsɔɔ Kristofoi nibii babaoo ŋmɛnɛ. Jeee hemɔkɛyeli kɛkɛ ejie lɛ kpo, shi moŋ ejie tsuishitoo, hiɛtɛ̃ɛ, ekãafeemɔ, kɛ suɔmɔ ní pɛsɛmkunya bɛ mli hu kpo. Eha Yehowa jamɔ ye klɛŋklɛŋ gbɛhe yɛ eshihilɛ mli. Shi kɛlɛ, esa akɛ wɔkai akɛ, Yesu Kristo ji mɔ ni fee nɔkwɛmɔnɔ ní fe fɛɛ efɔ̃ shi eha wɔ koni wɔnyiɛ sɛɛ. Lɛ hu ekɛ kaai srɔtoi babaoo kpe, shi yɛ fɛɛ mli lɛ, elaajeee emiishɛɛ lɛ kɔkɔɔkɔ. Mɛni hewɔ? Ejaakɛ eha ejwɛŋmɔ tee nɔ ehi hiɛnɔkamɔ ní kã ehiɛ lɛ nɔ. (Hebribii 12:2, 3) Enɛ hewɔ lɛ, Paulo sɔle akɛ: “Shi tsuishiŋmɛɛ kɛ miishɛjemɔ Nyɔŋmɔ lɛ aha nyɛná jwɛŋmɔ kome yɛ nyɛteŋ tamɔ Kristo Yesu.” (Romabii 15:5) Kɛ́ wɔná jwɛŋmɔŋ su ní ja lɛ, no lɛ wɔbaanyɛ wɔná miishɛɛ, yɛ gbɛtsii nii ní Satan kɛbaaba wɔgbɛ nɔ lɛ fɛɛ sɛɛ.
16. Kɛ́ efee tamɔ nɔ ni wɔ naagbai lɛ amli wa waa lɛ, mɛni wɔbaanyɛ wɔfee?
16 Kɛ́ efee tamɔ nɔ ni naagbai lɛ amli wa waa lɛ, kaimɔ akɛ bɔ ni Yehowa sumɔ Abraham sane lɛ, nakai bo hu esumɔɔ osane. Eetao ní oye omanye. (Filipibii 1:6) Okɛ ohiɛ afɔ̃ Yehowa nɔ kɛmɔ shi, kɛ hekɛnɔfɔɔ akɛ ‘ehaŋ aka bo fe bɔ ni ooonyɛ, shi moŋ ekɛ kaa lɛ nɔŋŋ aaaje gbɛ aha bo ní oje mli hu, koni onyɛ mli omɔ.’ (1 Korintobii 10:13) Ná su ni ji Nyɔŋmɔ Wiemɔ lɛ kanemɔ daa gbi. (Lala 1:2) Kã sɔlemɔ he daa, ní obi Yehowa ní eye ebua bo ní oŋmɛ otsui shi. (Filipibii 4:6) ‘Ekɛ mumɔ krɔŋkrɔŋ baaha mɛi ní biɔ lɛ lɛ.’ (Luka 11:13) Okɛ nibii ní Yehowa eto he gbɛjianɔ koni ewaje bo yɛ mumɔŋ, tamɔ wɔ Biblia kasemɔ woji lɛ atsu nii jogbaŋŋ kɛmɔ shi. Agbɛnɛ hu, taomɔ sɛɛfimɔ kɛjɛ nyɛmimɛi lɛ aŋɔɔ. (1 Petro 2:17) Okɛ anɔkwayeli aya Kristofoi akpeei fɛɛ, ejaakɛ jɛmɛ ji he ni obaaná hewalɛwoo ni he hiaa bo koni onyɛ oŋmɛ otsui shi lɛ yɛ. (Hebribii 10:24, 25) Omli afili bo yɛ nɔmimaa ní oyɔɔ akɛ otsuishiŋmɛɛ lɛ haa onáa Nyɔŋmɔ nɔkpɛlɛmɔ, ni ákɛ onɔkwayeli lɛ haa etsui nyɔɔ emli lɛ mli!—Abɛi 27:11; Romabii 5:3-5.
17. Mɛni hewɔ Kristofoi eŋmɛɛɛ amɛhe amɛhaaa nijiaŋwujee lɛ?
17 Nyɔŋmɔ sumɔ Abraham sane akɛ ‘eshieŋtsɛ.’ (Yakobo 2:23) Nakai po lɛ, kaai kɛ amanehului ní naa wa tsara nɔ ba yɛ Abraham shihilɛ mli. No hewɔ lɛ Kristofoi baanyɛ akpa nibii ní tamɔ nakai nɔŋŋ gbɛ yɛ nɛkɛ “naagbee gbii” fɔji nɛɛ amli. Yɛ anɔkwale mli lɛ, Biblia lɛ bɔɔ kɔkɔ akɛ “gbɔmɛi fɔji kɛ shishiulɔi aaawo wu yɛ efɔŋ mli.” (2 Timoteo 3:1, 13) Yɛ nɔ̃ najiaŋ ní oooŋmɛɛ ohe oha nijiaŋwujee lɛ, yɔsemɔ akɛ nɔnyɛɛi ní wɔkɛkpeɔ lɛ yeɔ odase akɛ Satan gbɛjianɔtoo fɔŋ lɛ naagbee ebɛŋkɛ. Shi Yesu kaiɔ wɔ akɛ “mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) No hewɔ lɛ, ‘kaaha ekpakpafeemɔ miitɔ bo!’ Kasemɔ Abraham, koni ofata mɛi ní “tsɔɔ hemɔkɛyeli kɛ tsuishitoo nɔ náa shiwoi lɛ” ahe.—Hebribii 6:12.
Ani Okadi?
• Mɛni hewɔ esa akɛ Yehowa webii akpa kaai kɛ amanehulu gbɛ ŋmɛnɛ lɛ?
• Satan baanyɛ ekɛ tutuamɔi ní yɔɔ tɛ̃ɛ atsu nii yɛ mɛɛ gbɛ̀i anɔ?
• Mɛɛ gbɛ nɔ abaanyɛ atsɔ asaa Kristofoi ateŋ naataamɔi?
• Henɔwomɔ kɛ yaka anunyam taomɔ baanyɛ ekɛ kaai aba yɛ mɛɛ gbɛ nɔ?
• Abraham fee nɔkwɛmɔnɔ kpakpa efɔ̃ shi beni emɛ Nyɔŋmɔ shiwoi lɛ amlibaa lɛ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 26]
Akɛ yiwaa baa Kristofoi oblahii kɛ oblayei bibii pii anɔ, yɛ amɛ hefɛo ni amɛtipɛŋfoi yeɔ lɛ hewɔ
[Mfoniri ni yɔɔ baafa 29]
Yɛ Abraham gbii lɛ amli lɛ, no mli lɛ Nyɔŋmɔ shiwoi lɛ amlibaa yɛ “shɔŋŋ,” shi kɛlɛ eha eshihilɛ damɔ nomɛi anɔ