Kunimyeli yɛ Maŋnɔkwɛmɔ Gbɛjianɔtoo Saneyelihe

YEHOWA ODASEFOI ni yɔɔ Germany lɛ ye kunim ko ni sa kadimɔ waa yɛ Maŋnɔkwɛmɔ Gbɛjianɔtoo Saneyelihe ni yɔɔ Karlsruhe lɛ mli. Amɛkɔ gbɛ ko ni he hiaa ni kɛ amɛ yɔsemɔ ákɛ nitsumɔ gbɛjianɔtoo ni maŋ mla ŋmɛɔ gbɛ lɛ yɔɔ tsakpaa.

Yehowa Odasefoi kɛ nɔ ni fe afii 100 eshiɛ yɛ Germany. Amɛye omanye yɛ yiwaa ni naa wa ni afii ohai 20 lɛ mli Kwasafo Nɔyelii enyɔ—National Socialistbii kɛ Komunistbii lɛ kɛba amɛnɔ lɛ mli. Kɛjɛ afi 1990 lɛ, Odasefoi lɛ ebɔ mɔdɛŋ akɛ amɛaaha ayɔse amɛ akɛ nitsumɔ gbɛjianɔtoo ni maŋ mla ŋmɛɔ amɛ gbɛ. Yɛ saneyelihe lɛ atɛŋbuui enyɔ ni aye omanye kɛ ekome ni ayeee mli omanye lɛ sɛɛ lɛ, Odasefoi lɛ kɛ sane lɛ tee Maŋnɔkwɛmɔ Gbɛjianɔtoo Saneyelihe lɛ, ni tswa bɔ ni ekojo sane lɛ eha lɛ he adafi yɛ December 19, 2000.

Kojolɔi lɛ Fee Ekome Kɛbu Yehowa Odasefoi lɛ Bem

Saneyelihe lɛ mli kojolɔi kpawo lɛ fɛɛ ye sane lɛ amɛha Odasefoi lɛ. Kojolɔi lɛ fo afi 1997 kojomɔ ni Maŋnɔkwɛmɔ Gbɛjianɔtoo lɛ Saneyelihe lɛ kɛha lɛ mli ni efã akɛ saneyelihe lɛ aku sɛɛ asusu gbɛbimɔ ni Odasefoi lɛ kɛba lɛ he ekoŋŋ.

Maŋnɔkwɛmɔ Gbɛjianɔtoo Saneyelihe lɛ kɛ nifeemɔ lɛ tsu nii ni amɛkɛwie shishijee tsakpaa ni kã Maŋ lɛ kɛ jamɔ kui ateŋ lɛ he. Klɛŋklɛŋ lɛ, “jeee hemɔkɛyeli nɔ adamɔɔ abuɔ” gbɛhe ni jamɔ ko yɔɔ, “shi moŋ kɛtsɔ esubaŋ nɔ.”

Saneyelihe lɛ yɔse hu akɛ kɛji Yehowa Odasefoi lɛ kɔ shidaamɔ ni ji “Kristofoi ahe ni amɛkɛwooo maŋ saji amli lɛ,” amɛ “tutuaaa demokrase shishitoo mlai lɛ” ni amɛ “sumɔɔɔ ni amɛkɛ nɔyeli kroko abaye demokrase nɔ̃ lɛ najiaŋ.” No hewɔ lɛ, esaaa akɛ akpɛlɛɔ amɛhe ni amɛkɛwooo maŋkwramɔŋ oshikifɔɔ mli lɛ akɛ odaseyeli nɔ ni akɛteɔ shi ashiɔ Odasefoi yɛ mla naa yɔsemɔ ni amɛtaoɔ lɛ hewɔ.—Yohane 18:36; Romabii 13:1.

Saneyelihe lɛ tee nɔ eyɔse akɛ heyelilɔ ko—kɛji mɔ lɛ ji Odasefonyo loo mɔ ko ni yɔɔ jamɔ kroko mli lɛ—baanyɛ ana ehe bei komɛi yɛ shihilɛ ko ni nibii ni Maŋ lɛ biɔ lɛ kɛ nibii ni ehemɔkɛyeli lɛ taoɔ lɛ kpãaa gbee mli. Kɛji akɛ mɔ aŋkro lɛ nyiɛ ehenilee sɛɛ kɛtsɔ “toiboo ni efee eha ejamɔŋ hemɔkɛyeli lɛ fe maŋ mla lɛ nɔ lɛ,” ekolɛ Maŋ lɛ baabu enɛ akɛ eji nɔ ni ja, jamɔŋ heyeli gbɛjianɔtoo lɛ kpɛlɛɔ nɔ nakai.—Bɔfoi lɛ Asaji 5:29.

Anu buamɔ ni kojomɔhe lɛ kɛha lɛ yɛ maŋ lɛ mli fɛɛ. Eehe efee akɛ, adafitswaa woji fɛɛ ni yɔɔ Germany lɛ tswa nɔ ni ba lɛ he adafi. Tɛlivishiŋ kɛ redio nitsumɔhei wuji fɛɛ wie sane lɛ kɛ saji ni abibii mɛi lɛ he. Be ko bako ni awie Yehowa gbɛi lɛ he yɛ Germany maŋ muu lɛ fɛɛ mli nɛkɛ pɛŋ.

[He ni Mfoniri ni yɔɔ baafa 8 lɛ Jɛ]

AP Photo/Daniel Maurer