Wolo ni Oblahii kɛ Oblayei Nyaaa He

“OBLAYOO ko ni atsɛɔ lɛ Beate wie akɛ: “Te mafee tɛŋŋ maná nɔmimaa diɛŋtsɛ akɛ Biblia lɛ ji Nyɔŋmɔ Wiemɔ lɛɛlɛŋ lɛ? Mináaa he miishɛɛ ákɛ wolo.”

Yɛ Germany he ni Beate yɔɔ lɛ, oblahii kɛ oblayei babaoo nuɔ he tamɔ bɔ ni enu he lɛ nɔŋŋ; no hewɔ lɛ, amɛsusuɔ akɛ sɛɛnamɔ ko bɛ Biblia kanemɔ he. Niiamlipɛimɔ ko ni afee nyɛsɛɛ nɛɛ jie lɛ kpo akɛ, aaafee oblahii oha mlijaa 1 kaneɔ Biblia lɛ yɛ bei pii amli, oha mlijaa 2 kaneɔ daa, oha mlijaa 19 efɔɔɔ kanemɔ, kɛ mɛi ni miihe ashɛ oha mlijaa 80 ni kaneee kwraa. Ekolɛ eeenyɛ eba akɛ, niiamlitaomɔ nɛɛ baanyɛ atamɔ bɔ ni eji yɛ shikpɔji krokomɛi anɔ, ekolɛ yɛ he ni oyɔɔ lɛ hu. Eyɛ faŋŋ akɛ, Biblia lɛ ji wolo ni oblahii kɛ oblayei nyaaa he.

Ebɛ naakpɛɛ mɔ akɛ, oblahii kɛ oblayei lɛ leee nɔ ko kwraa yɛ Biblia lɛ he! Adafitswaa wolo ni ji Lausitzer Rundschau lɛ bɔ amaniɛ yɛ afi 2000 lɛ mra mli yɛ nɔ ni kɔɔ niiamlipɛimɔ ni tsɔɔ mɛi ayibɔ ni le Kitai Nyɔŋma lɛ, ni amɛkɛ tsu nii ákɛ gbɛtsɔɔmɔ nɔ̃ yɛ amɛshihilɛ mli lɛ he. Yɛ nɔ ni kɔɔ mɛi ni eye afii 60 lɛ he lɛ, oha mlijaa 65 le kitai lɛ ni ekudɔɔ amɛ; ni kɛha mɛi ni nako afii 30 lɛ, yibɔ lɛ ji oha mlijaa 28 pɛ. Hɛɛ, kɛha oblahii kɛ oblayei babaoo lɛ, amɛleee nɔ ni yɔɔ Nyɔŋmɔ Wiemɔ lɛ mli.

Mɛi Komɛi Hiɛ Jwɛŋmɔ Kroko

Nɔ ni tamɔɔɔ nakai lɛ, oblahii kɛ oblayei akpekpei abɔ yɛ jeŋ muu fɛɛ ena akɛ Nyɔŋmɔ Wiemɔ lɛ he yɛ sɛɛnamɔ waa diɛŋtsɛ. Ákɛ nɔkwɛmɔnɔ lɛ, Alexander ni eye afii 19 lɛ kaneɔ Biblia lɛ daa leebi dani eyaa nitsumɔ. Ekɛɛ akɛ: “Eji nifeemɔ ni hi fe fɛɛ ni akɛaaje gbi lɛ shishi.” Sandra kɛfee esu akɛ ebaakane Biblia lɛ fã ko daa gbɛkɛ. Etsɔɔ mli akɛ: “Ebatsɔ midaa gbi shihilɛ lɛ fã.” Ni Julia ni eye afii 13 lɛ, etsɔ hiɛ eto gbɛjianɔ momo ní ekɛkaneɔ Biblia lɛ, kɛ hoo kwraa lɛ yitso kome dani ewɔɔ gbɛkɛ. “Mináa he miishɛɛ diɛŋtsɛ, ni masumɔ akɛ matsa nakai nifeemɔ lɛ nɔ wɔsɛɛ.”

Mɛɛ susumɔ ji nɔ ni ja ni nilee yɔɔ mli? Ani esa akɛ akane Biblia lɛ lɛɛlɛŋ? Ani eji nɔ ko ni he yɔɔ sɛɛnamɔ ni he hiaa kɛha oblahii kɛ oblayei? Te osusuɔ tɛŋŋ?