Jiemɔ Hiɛsɔɔ Kpo ni Oná Miishɛɛ

“CANADABII adafitswaa wolo ko ni ji Calgary Herald lɛ wie akɛ: “Kanyamɔ ni anáa kɛha hiɛsɔɔ kpojiemɔ lɛ ji adesai ashishijee niiashikpamɔ ko.” Herald lɛ tsɛ shishijee skul nikaselɔi ni eye afii nɛɛhu komɛi ni amɛtsɔɔlɔ ko bi amɛ koni amɛŋma yɛ nibii fɛɛ ni amɛdaa shi yɛ he lɛ ahe sane lɛ yisɛɛ. Oblanyo fioo ko kɛɛ akɛ ehiɛ sɔɔ eweku lɛ ‘ejaakɛ amɛkwɛ enɔ.’ Oblayoo fioo ko hu da shi yɛ eweku lɛ he, ni ekɛɛ akɛ: “Amɛhaa mihiɔ shi shweshweeshwe, mináa gbɔmɔtsoŋ hewalɛ, amɛkwɛɔ mi, amɛsumɔɔ mi, amɛlɛɔ mi, ni kɛ jeee mifɔlɔi ahewɔ kulɛ, mibɛ wala mli.”

Hiɛsɔɔ kpo ni ajieee kɛ miishɛɛ ni anáaa baa be fɛɛ be. Taakɛ jeŋ nilelɔ kɛ Nyɔŋmɔ jamɔ he nilelɔ J. I. Packer tsɔɔ lɛ, “abɔ wɔ koni wɔkɛ wɔhe afɔ̃ Nyɔŋmɔ nɔ ni wɔkɛ wɔhe afɔ̃ wɔteŋ mɔ fɛɛ mɔ nɔ yɛ ekomefeemɔ mli.” Enɛ kaiɔ wɔ Biblia lɛ mli ŋaawoo ni nilee yɔɔ mli ni akɛha afii ohai abɔ ni eho, ni kɛɔ akɛ: “Nyɛlea shidaa” lɛ. (Kolosebii 3:15) Nifeemɔi ni tsɔɔ shidaa kɛ hiɛsɔɔ ni jɛ tsui mli ni ajieɔ lɛ kpo atsɔɔ mɛi krokomɛi lɛ yeɔ buaa koni aná wekukpaa ni mɔ he susumɔ yɔɔ mli.

Kɛfata he lɛ, kɛtsɔ hiɛsɔɔ kpojiemɔ kɛ wɔhe ni wɔbaabu akɛ wɔ jara wa lɛ lɛ nɔ lɛ, wɔkɛ wɔhe tsɔɔ hu akɛ wɔdaa Yehowa shi, ni eyɔseɔ enɛ. Biblia lɛ kɛɔ akɛ: “[Yehowa hiŋmɛii] kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.” (2 Kronika 16:9) Nyɔŋmɔ maa nɔ mi ehaa wɔ akɛ ekaiɔ ni ehiɛ sɔɔ suɔmɔ deŋme ni adesai gboɔ yɛ egbɛi lɛ ahewɔ lɛ. (Hebribii 6:10) Hɛɛ, wɔyɛ yiŋtoo kpakpa hewɔ ni esa akɛ wɔjie wɔhe kpo akɛ mɛi ni hiɛ sɔɔ nii ejaakɛ nɛkɛ Nyɔŋmɔ su kpakpa nɛɛ, kɛji ajie lɛ kpo daa lɛ, esaa Yehowa hiɛ ni ehaa wɔnáa miishɛɛ. Etamɔ bɔ pɛ ni Abɛi 15:13 lɛ kɛɛ, akɛ: “Miishɛɛ tsui haa mɔ tseɔ ehiɛ” lɛ.