“Mɛni Yaa Nɔ yɛ France?”

“Heyeli, heyeli ni asumɔɔ,” ji wiemɔi ni jɛ “La Marseillaise,” ni ji Francebii ajakumaŋ lala lɛ mli. Ŋwanejee ko bɛ he akɛ esa akɛ abu heyeli akɛ nɔ ko ni jara wa. Ni kɛlɛ, nibii ni yaa nɔ nyɛsɛɛ nɛɛ yɛ France lɛ miiha aasusu akɛ abuuu heyeli ni esa akɛ aná lɛ. No hewɔ ejɛ ni yɛ Sohaa, November 3, 2000 lɛ, Yehowa Odasefoi akpei nyɔŋmai abɔ ja woji krɛdɛɛi komɛi ni falɛ ji akpekpei 12 ni hiɛ saneyitso akɛ “Mɛni Yaa Nɔ yɛ France? Ani Heyeli Baanyɛ Afee Nɔ ni Bɛ Dɔŋŋ?”

KƐBASHI amrɔ nɛɛ, ní Yehowa Odasefoi ni yɔɔ France lɛ kɛ afii babaoo ehi shitee-kɛ-woo ni maŋkwramɔŋ kui srɔtoi kɛ kui ni teɔ shi amɛshiɔ jamɔ kɛbaa amɛnɔ lɛ shishi. Enɛ kɛ shihilɛi ni mli wawai eba Odasefoi anɔ ákɛ aŋkroaŋkroi, asafoi, kɛ maŋ tso muu lɛ fɛɛ. Shi kɛlɛ, yɛ June 23, 2000 lɛ, Conseil d’État, ni ji Francebii akojomɔhe wulu ni fe fɛɛ lɛ, kɛ yiŋkpɛɛ ko ni sa kadimɔ ha ni ma jwɛŋmɔ ni saneyelihei bibii 31 lɛ kɛtsuɔ nii waa yɛ saji ni fa fe 1,100 lɛ amli nɔ mi. Saneyelihe wulu lɛ ma nɔ mi akɛ jamɔ ni Yehowa Odasefoi diɔ sɛɛ lɛ kɛ France mla lɛ kpãa gbee kwraa kɛmɔɔ shi, ni ákɛ, taakɛ eji yɛ jamɔi krokomɛi agbɛfaŋ lɛ, nakai nɔŋŋ esaaa akɛ aheɔ shika kɛjɛɔ amɛ dɛŋ yɛ amɛ Maŋtsɛyeli Asai lɛ ahewɔ.

Shi kɛlɛ, akɛni France Maŋ Sɔɔmɔ ni Kwɛɔ Shika He Gbɛjianɔtoo Nɔ lɛ bɛ bulɛ ko kwraa kɛha yiŋkpɛɛ nɛɛ hewɔ lɛ, nɔ ni eyaa nɔ efeɔ lolo ji akɛ ehaaa Yehowa Odasefoi aye amɛhe kɛjɛ too ni maŋ mla biɔ ni jamɔŋ gbɛjianɔtoi lɛ awo lɛ mli. Maŋ Sɔɔmɔ Nitsumɔhe lɛ kɛ shika oha mlijaa 60 eŋmɛ too ni Odasefoi kɛ amɛnanemɛi ni kɛ amɛ asafoi 1,500 ni yɔɔ France lɛ bɔɔ lɛ yeɔ lɛ nɔ. Aaye sane nɛɛ yɛ mla naa amrɔ nɛɛ.

 Yiŋtoo ni yɔɔ tafaa ni atsĩ tã kɛtsɔ hiɛ lɛ he ji ni akɛkpa sane ni teɔ shi woɔ ehe nɛɛ he mama, koni akɛha ale osharai ni baanyɛ aba yɛ too ni amɛ diɛŋtsɛ amɛfo ni amɛheɔ lɛ hewɔ kɛ osharai ni baanyɛ aba yɛ mlai ni akpɛ yiŋ yɛ he lɛ hewɔ ni baanyɛ afite mɛi fɛɛ ajamɔŋ heyeli lɛ fiofio lɛ. *

Ehe Gbi Muu Fɛɛ

Odasefoi ni yɔɔ asafoi komɛi amli lɛ je wolo lɛ jaa shishi leebi ŋmɛji enyɔ mli yɛ oketekei amaamɔhei kɛ guɔyeli nibii afeemɔhei, kɛ agbɛnɛ yɛ kɔɔyɔŋ lɛji amaamɔhei. Beni atswa ŋmɛji ekpaa lɛ, mɛi ni yɔɔ Paris maŋ lɛ mli lɛ ebɔi yaa kɛ baa. Mɛi aaashɛ 6,000 ni kɛ amɛhe eha lɛ eyadamɔ hei ni mɛi fɔɔ tsɔmɔ lɛ koni amɛnine ashɛ mɛi ni baaho kɛya nitsumɔ lɛ anɔ. Oblayoo ko wie akɛ: “Nɔ ni nyɛfeɔ kɛha jamɔ mli heyeli lɛ sa yijiemɔ. Jeee Yehowa Odasefoi pɛ enɛ kɔɔ amɛhe.” Yɛ Marseilles lɛ, Odasefoi ni fa fe 350 kɛ dɛhiɛmɔ woji lɛ hã yɛ oketekei ashimaamɔhei ni afee yɛ shikpɔŋ shishi lɛ kɛ yɛ gbɛjegbɛi lɛ anɔ. Yɛ ŋmɛlɛtswaa kome mli lɛ, maŋ redio nitsumɔhe lɛ tswa tafaa lɛ he adafi, ni eekɛɛ etoibolɔi lɛ koni amɛnaa akakpɛ amɛhe kɛji Yehowa Odasefoi tsi amɛbɛŋkɛ amɛ. Yɛ Strasbourg, ni ji he ni European Court of Human Rights (Europa Adesai Ahegbɛ Kojomɔhe) lɛ yitso yɔɔ lɛ, gbɛfalɔi ni yɔɔ oketeke shimaamɔhe wulu fe fɛɛ lɛ to amɛtsui shi kɛto sɛrɛnɛɛ koni amɛnine ashɛ eko nɔ. Mlalelɔ ko wie akɛ, yɛ be mli ni ekɛ wɔ ehiɛɛɛ hemɔkɛyeli kome lɛ, ekɛ miishɛɛ miikwɛ nɔ ni baajɛ wɔsane lɛ mli kɛba, akɛni nɔ ni wɔkɛ ekãa biɔ lɛ he miihia ni eji nɔ ni ja lɛ hewɔ.

Beni atswaa ŋmɛji kpaanyɔ yɛ nugbɔ ni nɛɔ waa lɛ fɛɛ sɛɛ lɛ, Odasefoi 507 ni yɔɔ Grenoble ni ji Alpine maŋtiase lɛ mli lɛ kpa gbɛjegbɛi lɛ anɔ fɛɛ ni amɛkɛ dɛhiɛmɔ woji lɛ hã loo amɛkɛ dɛhiɛmɔ woji lɛ wo woji amajemɔ adekai amli. Tsɔnei akudɔlɔi kɛ tsɔnei ni tsuɔ nii kɛtsɔ sarawa hewalɛ nɔ lɛ akudɔlɔi ní na akɛ nɔ ko miiya nɔ lɛ, wá kɛdamɔ shi koni amɛbi dɛhiɛmɔ wolo lɛ eko. Yɛ anaigbɛ maŋtiase ni ji Poitiers lɛ mli lɛ, gbɛfalɔi ni kɛ oketeke bashɛ shi ŋmɛji nɛɛhu mli lɛ anine eshɛ dɛhiɛmɔ woji lɛ anɔ momo kɛjɛ he ni amɛjɛ kɛba lɛ. Yɛ Mulhouse, ni bɛŋkɛ Germany husu lɛ naa lɛ, akɛ dɛhiɛmɔ woji komekomei 40,000 eha momo.

Beni atswaa ŋmɛji nyɔŋma lɛ, asafoi babaoo eja amɛ dɛhiɛmɔ woji lɛ nɔ ni fe fã. Beni eheɔ eshɛ shwane lɛ, mɛi fioo pɛ kpoo akɛ amɛaahe dɛhiɛmɔ wolo lɛ, ni nɔ jɛ mli kɛba ji sanegbaa ni miishɛɛ yɔɔ mli babaoo. Yɛ Besançon, ni ji kilomitai 80 pɛ jɛkɛmɔ kɛjɛ Swissbii ahusu lɛ naa lɛ, oblanyo ko jie miishɛɛ kpo yɛ Biblia lɛ mli ni ebi nɔ hewɔ ni Nyɔŋmɔ eŋmɛ efɔŋfeemɔ gbɛ. Odasefonyo lɛ fɔ̃ lɛ nine koni etsa sanegbaa lɛ nɔ yɛ Maŋtsɛyeli Asa ni bɛŋkɛ lɛ mli, he ni akɛ lɛ je Biblia mli nikasemɔ shishi amrɔ nɔŋŋ yɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ mli yɛ lɛ.

Shwane mli lɛ Odasefoi babaoo kɛ be ni amɛkɛbaaye nii shwane lɛ tsu nii koni amɛkɛshiɛ ŋmɛlɛtswaa kome loo enyɔ. Atee nɔ aja woji lɛ yɛ shwane lɛ mli fɛɛ, ni beni shɛɔ shwane ŋmɛji etɛ loo ejwɛ mli lɛ, asafoi babaoo egbe amɛnɔ lɛ naa. Yɛ champagne maŋtiase ni ji Reims lɛ mli lɛ, mɛi komɛi ni ekase loo amɛkɛ Yehowa Odasefoi ebɔ yɛ be ni eho lɛ amli lɛ tsɔɔ akɛ amɛbaasumɔ ni amɛkɛ asafo lɛ abɔi bɔɔ ekoŋŋ. Aje shia Biblia mli nikasemɔi etɛ shishi yɛ Bordeaux. Yɛ nakai maŋtiase lɛ nɔŋŋ mli lɛ, Odasefonyo ko bote shwapo ko mli koni eyahe adafitswaa wolo kɛkɛ ni ena dɛhiɛmɔ woji ni abua naa yɛ shwapo lɛ okpɔlɔ lɛ nɔ. Shwapo nɔkwɛlɔ, ni eji Odasefonyo tsutsu ko lɛ, nine shɛ dɛhiɛmɔ woji lɛ anɔ, ni akɛni eyɔse sɛɛnamɔ ni yɔɔ he lɛ hewɔ lɛ, efee fotokɔpei koni lɛ diɛŋtsɛ ekɛha.

 Yɛ Le Havre lɛ, Normandy, ni ji Protestant oblayoo ko ni nu yɛ redio nɔ akɛ aabi toowoo kɛmiijɛ too ni Yehowa Odasefoi tsuɔ lɛ mli lɛ naa kpɛ ehe. Ekɛ ekãa he dɛhiɛmɔ wolo lɛ ni ejie Odasefoi lɛ ayi akɛ amɛmiiwie yɛ faŋŋ mli amɛmiishi jalɛ sane ni ayeee ni tamɔ enɛ. Yɛ gbɛkɛ 7:20 mli lɛ, jɛmɛ kpokpaa lɛ nɔ TV nitsumɔhe ni yɔɔ Lyons lɛ tswa woji ni ajaa lɛ he adafi, akɛ: “Leebi nɛɛ eyɛ mlɛo akɛ abaajo nugbɔ shwamɔ lɛ naa foi fe bɔ ni abaanyɛ akpoo Yehowa Odasefoi adɛhiɛmɔ woji lɛ.” Abibii Odasefoi enyɔ saji ni amɛtsɔɔ yiŋtoi kɛha tafaa lɛ mli.

Odasefoi ni miitao amɛná gbɛfaŋnɔ be mli ni amɛkpa nitsumɔ sɛɛ lɛ ja dɛhiɛmɔ woji lɛ ekomɛi amɛha mɛi ni kuɔ amɛsɛɛ kɛjɛ nitsumɔ lɛ ni amɛkɛ ekrokomɛi yawo woji amajemɔ adekai amli. Yɛ maji tamɔ Brest kɛ Limoges mli nɛkɛ lɛ—ní ehe gbɛi yɛ sũ yɛŋ nibii afeemɔ mli lɛ—mɛi ni shiɔ sini kwɛmɔhe lɛ yɛ gbɛkɛ ŋmɛji 11 lɛ fata mɛi ni yɛ naagbee lɛ amɛnine shɛ dɛhiɛmɔ wolo lɛ nɔ yɛ gbi lɛ mli lɛ ahe. Abua dɛhiɛmɔ woji ni shwɛ lɛ anaa ni aja enɔ jetsɛremɔ leebi.

Nɔ ni Jɛ Mli Ba

Odasefonyo ko ŋma akɛ: “Wɔ henyɛlɔi lɛ susuɔ akɛ amɛmiije wɔnijiaŋ wui. Yɛ anɔkwale mli lɛ, nɔ ni tamɔɔɔ nakai lɛ miiba mli.” Yɛ asafoi babaoo amli lɛ, Odasefoi ni fa fe oha mlijaa 75 ná gbɛfaŋnɔ nakai gbi lɛ, amɛteŋ mɛi komɛi kɛ ŋmɛlɛtswai 10, 12 loo 14 tsu nii yɛ nifeemɔ nɛɛ mli. Yɛ Hem, yɛ France kooyigbɛ lɛ, be mli ni Odasefonyo ko ekpa jenamɔ nitsumɔ sɛɛ lɛ, eja dɛhiɛmɔ wolo lɛ kɛjɛ leebi ŋmɛji enumɔ kɛyashi shwane ŋmɛji etɛ. Yɛ Denain ni bɛŋkɛ lɛ mli, he ni asafo ko yɔɔ kɛjɛ afi 1906 lɛ, Odasefoi 75 kɛ ŋmɛlɛtswai 200 tsu nii ni amɛkɛmiija dɛhiɛmɔ wolo lɛ Sohaa. Mɛi krokomɛi lɛ, yɛ gbɔlɛ, gbɔjɔmɔ, kɛ kɔɔyɔɔŋ tsakemɔ ní ehiii lɛ fɛɛ sɛɛ lɛ, amɛ hu amɛtswa amɛfai shi akɛ amɛbaaná mli gbɛfaŋnɔ. Ákɛ nɔkwɛmɔnɔ lɛ, yɛ Le Mans lɛ, mɛi etɛ ni yɔɔ amɛ afii 80 mli lɛ kɛ ŋmɛlɛtswai enyɔ tsu nii ni amɛkɛ dɛhiɛmɔ woji miiwo woji amajemɔ adekai amli, ni Odasefonyo ko ni ta helatsɛmɛi ashwiili mli lɛ kɛ dɛhiɛmɔ woji lɛ ha yɛ oketeke shimaamɔhe lɛ hiɛ. Ni mɛɛ hewalɛwoo eji nɛkɛ akɛ aaana Odasefoi babaoo ni tsutsu ko lɛ amɛbɛ ekãa lɛ akɛ amɛmiiná gbɛfaŋnɔ yɛ nɛkɛ nitsumɔ krɛdɛɛ nɛɛ mli!

Ŋwanejee ko bɛ he akɛ, woji ajaa nɛɛ kɛ odaseyeli kpele ba. Gbɔmɛi ni jɛ shihilɛi srɔtoi fɛɛ amli, amɛteŋ mɛi babaoo ni afɔɔɔ amɛ namɔ yɛ amɛshiai amli lɛ, anine shɛ dɛhiɛmɔ wolo lɛ eko nɔ. Aŋkroaŋkroi babaoo nu he akɛ nifeemɔ nɛɛ tsu babaoo kwraa fe saji ni Odasefoi lɛ taoɔ amɛbu he lɛ. Mɛi babaoo na lɛ akɛ eji hefamɔ kɛha henilee kɛ jamɔ mli heyeli kɛha Francebii fɛɛ. Ákɛ nɔ ni yeɔ enɛ he odase lɛ, maŋbii lɛ bi ni aha amɛ dɛhiɛmɔ woji lɛ ekomɛi afata he koni amɛkɛha amɛnanemɛi, nanemɛi nitsulɔi, loo wekumɛi.

Hɛɛ, Yehowa Odasefoi ni yɔɔ France lɛ yɛ he miishɛɛ waa akɛ amɛha ale Yehowa gbɛi lɛ koni amɛfã Maŋtsɛyeli lɛ he nibii ahe. (1 Petro 3:15) Eji amɛhiɛnɔkamɔ yɛ anɔkwale mli akɛ amɛbaanyɛ ‘amɛya nɔ amɛhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli,’ ákɛ, mɛi akpekpei abɔ baaba abafata amɛhe yɛ amɛŋwɛi Tsɛ, ni ji Yehowa lɛ yijiemɔ mli.—1 Timoteo 2:2.

[Shishigbɛ niŋmaa]