Maŋtsɛyeli Jajelɔi Bɔ Amaniɛ

Nine ní Aaashɛ Mɛi ni Ewa akɛ Abaana Amɛ lɛ Anɔ

YEHOWA ODASEFOI bɔɔ mɔdɛŋ ni amɛkɛ Maŋtsɛyeli lɛ he sanekpakpa lɛ ahã mɔ fɛɛ mɔ ni amɛnine baashɛ enɔ lɛ. Bei komɛi lɛ, ebiɔ mɔdɛŋbɔɔ ni ekaaa koni nine anyɛ ashɛ mɛi ni efɔɔɔ shia hilɛ lɛ anɔ. (Marko 13:10) Enɛ hewɔ lɛ, gbɛgbalɔ krɛdɛɛ ko ni yɔɔ South America maŋ ko mli lɛ gba niiashikpamɔ ni nyiɛ sɛɛ nɛɛ.

“Mibaná mile gbi ko akɛ maŋ lɛŋ amralo lɛ baaba ebasara shikpɔŋkuku ni akɛha mikɛ miŋa ní wɔtsu mli nii lɛ. Akɛni eka shi faŋŋ akɛ eji mɛi ni efɔɔɔ shia hilɛ lɛ ateŋ mɔ kome hewɔ lɛ, miŋma wolo kɛmaje lɛ ni mikɛ Biblia kasemɔ woji srɔtoi fata he, ni nɔ ni fata he ji Mɛni Nyɔŋmɔ Taoɔ yɛ Wɔdɛŋ? wolo bibioo lɛ, Nyɔŋmɔ Sɛɛ Gbɛ ni Adesai Taoɔ kɛ Nilee ni Kɛ Mɔ Yaa Naanɔ Wala Mli woji lɛ. Mitsɔɔ yiŋtoo ni yɔɔ woji nɛɛ ateŋ eko fɛɛ eko sɛɛ lɛ mli yɛ wolo ni miŋma lɛ lɛ mli.

“Akɛni miisumɔ ni male nɔ ni esusuɔ yɛ woji lɛ ahe hewɔ lɛ, mibi gbɛ koni aha mikɛ lɛ akpe. Otsii komɛi asɛɛ lɛ aha mi hegbɛ lɛ, ni mikɔ vidio ni ji Jehovah’s Witnesses—The Organization Behind the Name lɛ kɛtee. Kpee lɛ he nɔ ni miihe ashɛ ŋmɛlɛtswaai enyɔ. Beni mikɛ amralo lɛ ekwɛ vidio lɛ wɔgbe naa lɛ, mibi lɛ nɔ ni esusuɔ yɛ he. Eha hetoo akɛ: ‘Gbɛjianɔtoo ko bɛ shikpɔŋ lɛ nɔ ni tamɔ nyɛnɔ lɛ. Miná ni kulɛ miyɛ gbɔmɛi tamɔ nyɛ ní baanyɛ aye abua mi kɛgbe minɔyeli nitsumɔi lɛ anaa!’ Kɛkɛ ni ebi kɛji miná hegbɛ mitee asafo lɛ jeŋ fɛɛ nitsumɔhe yitso lɛ pɛŋ. Mikɛɛ lɛ akɛ eyɛ mli akɛ no ji oti ni kã mihiɛ kɛjɛ beni miná afii 14 moŋ, shi minako hegbɛ koni mayasara wɔ jeŋ fɛɛ nitsumɔhe yitso ni yɔɔ Brooklyn, New York lɛ. Eji otii ni ewa akɛ aaashɛ he lɛ ateŋ ekome. Ekwɛ mi gãa fioo. Kɛkɛ ni ekɛɛ akɛ eesumɔ ni maná nakai hegbɛ lɛ. Ekwɛ koni wɔnine ashɛ gbɛŋmɛɛ woji anɔ yɛ mla naa, ni ewo kɔɔyɔŋ lɛlɛ ni wɔkɛbaaya lɛ he nyɔmɔ eha wɔ!

“Amrɔ nɛɛ amralo lɛ nine shɛɔ Buu-Mɔɔ kɛ Awake! woji tɛtrɛbii lɛ anɔ daa. Wɔ shwelɛ ji akɛ, etsɛŋ ni wɔbaanyɛ waná hegbɛ lɛ ni wɔkɛ lɛ aje Biblia kasemɔ shishi.”