“Agbɛnɛ, Mibale Nɔ ni Gbaa Minaa Lɛ!”

NAKAI ji bɔ ni nuu ko ní yɔɔ Tokyo lɛ nu he eha beni ekane wala shihilɛ he sane ní je kpo yɛ December 1, 2000, Buu-Mɔɔ lɛ mli lɛ. Nakai sane ní aŋma lɛ yitso ji “Nyɛleee Wɔ́ Sane,” ni egba tsutsu maŋsɛɛ sanekpakpa shiɛlɔ ko ní na amanehulu yɛ hela ko ní atsɛɔ lɛ yɛ tsofafeemɔ mli akɛ manic-depressive psychosis hewɔ lɛ niiashikpamɔi.

Nuu ni jɛ Tokyo lɛ kɛɛ yɛ wolo ní eŋma eyaha mɛi ní ŋmala wolo tɛtrɛɛ nɛɛ mli akɛ: “Bɔ ni atsɔɔ akɛ hela lɛ feɔ mɔ lɛ saa mihe pɛpɛɛpɛ. No hewɔ lɛ mitee jwɛŋmɔŋ helatsamɔhe ni miná mile akɛ miná jwɛŋmɔŋ nɔnyɛɛ hela. Datrɛfonyo ní kwɛ mi lɛ naa kpɛ ehe waa. Ewie akɛ, ‘Efɔɔɔ kaa akɛ gbɔmɛi ní yeɔ hela nɛɛ aaanu he akɛ amɛhe miiye.’ Aye abua mi ni mibale bɔ ni hela lɛ feɔ mɔ ehaa dani eba akɛ emli aaawo wu.”

Gbɔmɛi akpekpei abɔ ní yɔɔ je lɛŋ fɛɛ lɛ náa Buu-Mɔɔ kɛ wolo tɛtrɛɛ kroko ní fata he, ni ji Awake! lɛ eko fɛɛ eko ní jeɔ kpo lɛ akanemɔ he sɛɛ yɛ gbɛ̀i srɔtoi babaoo nɔ. Amɛnaa akɛ nilee yɛ amɛmli saji lɛ amli ni amɛyɛ miishɛɛ hu. Amrɔ nɛɛ akalaa Buu-Mɔɔ wolo tɛtrɛɛ lɛ yɛ wiemɔi 141 mli, ni akalaa Awake! lɛ yɛ wiemɔi 86 mli. Bo hu obaanyɛ oná Buu-Mɔɔ kɛ Awake! woji tɛtrɛbii lɛ akanemɔ mli ŋɔɔmɔ be fɛɛ be.