Ohiɛ Akã Otsui He
Ohiɛ Akã Otsui He
“Ohiɛ akã otsui he fe nii fɛɛ; ejaakɛ no mli wala jɛɔ.”—ABƐI 4:23.
1, 2. Mɛni hewɔ ehe hiaa ni wɔhiɛ akã wɔtsui he lɛ?
NUUMO ko ni yɔɔ Caribbean ŋshɔkpɔ ko nɔ lɛ fã kpo kɛjɛ ebobaahe lɛ yɛ ahum ko ni tswa lɛ sɛɛ. Beni ekwɛɔ nibii ni efite ni ebɔle lɛ lɛ, eyɔse akɛ tso wulu ko ni ema shi afii nyɔŋmai abɔ ni bɛŋkɛ eshia lɛ agbó lɛ naa lɛ efã egbee shi. Enaa kpɛ ehe ni esusu eyiŋ akɛ: ‘Te aaafee tɛŋŋ ni enɛ aaaba lɛ nakai, yɛ be mli ni tsei bibii po ni yɔɔ akutso lɛ mli lɛ mamɔ shi loloolo lɛ?’ Tso ni egbee shi lɛ tsoku lɛ kɛ hetoo lɛ ha. Tso ni tamɔ nɔ ni anyɛŋ afã lɛ mligbɛ ekpɔtɔ, ni ahum lɛ jie nakai kpɔtɔmɔ ni anaaa lɛ kpo.
2 Mɛɛ awerɛho po eji nɛkɛ, akɛ Nyɔŋmɔ jálɔ anɔkwafo ni tamɔ mɔ ni efi shi shiŋŋ yɛ Kristofoi agbɛ lɛ nɔ lɛ aaagbee shi yɛ ehemɔkɛyeli he kaa mli. Biblia lɛ kɛɔ yɛ gbɛ ni ja nɔ akɛ, “gbɔmɔ tsuiŋ jwɛŋmɔ lɛ efɔŋ ji kɛjɛ egbekɛbiiashi.” (1 Mose 8:21) Enɛ tsɔɔ akɛ, kɛji akɛ wɔhaaa wɔhiɛ ahi wɔhe nɔ be fɛɛ be lɛ, abaanyɛ alaka tsuii kpakpai lɛ po koni amɛfee nɔ ni ehiii. Akɛni adesa ni yeee emuu tsui jeee nɔ ni eye ehe kɛjɛ fitemɔ he hewɔ lɛ, ehe miihia ni wɔkɛ hiɛdɔɔ asusu ŋaawoo nɛɛ he, akɛ: “Ohiɛ akã otsui he fe nii fɛɛ.” (Abɛi 4:23) No hewɔ lɛ, te wɔɔfee tɛŋŋ wɔha wɔhiɛ akã wɔ mfonirifeemɔŋ tsui lɛ he hu?
Gbɔmɔtso lɛ Mlitaomɔ Daa—Ehe Miihia
3, 4. (a) Mɛɛ saji abaanyɛ abi yɛ tsui diɛŋtsɛ he? (b) Mɛni baaye abua wɔ ni wɔpɛi wɔ mfonirifeemɔŋ tsui lɛ mli?
3 Kɛji akɛ otee tsofafeelɔ ko ŋɔɔ kɛha ogbɔmɔtso lɛ mlitaomɔ lɛ, eka shi faŋŋ akɛ ebaakwɛ bɔ ni otsui lɛ yɔɔ ha. Ani ogbɔmɔtsoŋ hewalɛnamɔ ni otsui lɛ fata he lɛ tsɔɔ akɛ ooná niyenii kpakpa ni fa bɔ ni sa? Te olá falɛ yɔɔ ha tɛŋŋ? Ani otsui lɛ shiɔ jogbaŋŋ ni eyɛ hewalɛ? Ani ogbɔleɔ okpɔiaŋ bɔ ni sa? Ani nɔnyɛɛ ni esaaa baa otsui nɔ?
4 Kɛji akɛ ehe hiaa ni atao heloo tsui lɛ mli daa lɛ, no lɛ mfonirifeemɔŋ tsui lɛ hu? Yehowa kaa ekwɛɔ. (1 Kronika 29:17) Nakai esa akɛ wɔfee. Yɛ mɛɛ gbɛ nɔ? Kɛtsɔ nɛkɛ sanebimɔi nɛɛ anɔ, akɛ: Ani mitsui naa mumɔŋ niyenii ni fa bɔ ni sa kɛtsɔɔ teemɔŋ nikasemɔ kɛ kpeei ni ayaa daa nɔ? (Lala 1:1, 2; Hebribii 10:24, 25) Ani Yehowa shɛɛ sane lɛ bɛŋkɛ mitsui waa tamɔ “la ní tsoɔ yɛ mitsui mli, ní aŋa yi awo miwui amli,” ni tsirɛɔ mi koni mikɛ mihe awo Maŋtsɛyeli shiɛmɔ kɛ kaselɔ feemɔ nitsumɔ lɛ mli? (Yeremia 20:9; Mateo 28:19, 20; Romabii 1:15, 16) Ani miná tsirɛmɔ koni mamia mihiɛ waa, ni mikɛ mihe awo be-fɛɛ sɔɔmɔ lɛ fã ko mli kɛ́ manyɛ mafee nakai? (Luka 13:24) Mɛɛ shihilɛ ni ebɔle mihe kɛkpe mikɛ mi mfonirifeemɔŋ tsui lɛ woɔ mli lɛ? Ani miitao mɛi ni amɛtsuii efee ekome yɛ anɔkwa jamɔ mli lɛ anaanyobɔɔ? (Abɛi 13:20; 1 Korintobii 15:33) Eba akɛ wɔhe aaafee oya ni wɔyoo he fɛɛ he ni fatɔɔ yɔɔ koni wɔto gbɛjianɔ ni wɔkɛjaje nibii amrɔ nɔŋŋ.
5. Mɛɛ yiŋtoo ni sɛɛnamɔ yɔɔ he hemɔkɛyeli he kaai baanyɛ atsu?
5 Wɔkɛ wɔ hemɔkɛyeli he kaai kpeɔ yɛ bei pii amli. Enɛɛmɛi haa wɔnáa hegbɛi ni wɔkɛaakadi bɔ ni wɔtsui lɛ yɔɔ hã. Mose kɛɛ Israelbii lɛ ni miihe abote Shiwoo Shikpɔŋ lɛ nɔ lɛ akɛ: “Yehowa, o-Nyɔŋmɔ lɛ, eha onyiɛ . . . yɛ ŋa lɛ nɔ afii nyɔŋmai ejwɛ sɔŋŋ nɛ, koni ekɛbao shi ní ekɛkao ekwɛ, [bɔni] afee ní ele nɔ ni yɔɔ otsui mli, akɛ oooye ekitai lɛ anɔ loo oyeŋ nɔ.” (5 Mose 8:2) Ani bei pii lɛ wɔnaa ekpɛɛɛ wɔhe yɛ henumɔi, akɔnɔi, loo nifeemɔi ni teɔ shi, kɛ́ wɔkɛ shihilɛi loo kaai ni wɔkpaaa gbɛ kpe trukaa lɛ ahe? Kaai ni Yehowa ŋmɛɔ gbɛ koni amɛba lɛ baanyɛ aha wɔyoo wɔ fatɔɔi diɛŋtsɛ, ni ebaaha wɔná hegbɛ ni wɔkɛya wɔhiɛ. (Yakobo 1:2-4) Ekaba kɔkɔɔkɔ akɛ wɔtsɔŋ sɔlemɔ nɔ wɔjieŋ bɔ ni wɔtsuɔ kaai ahe nii wɔhaa lɛ kpo!
Mɛni Wɔ Wiemɔi Jieɔ lɛ Kpo?
6. Mɛni saji ni wɔsumɔɔ ni wɔwie he lɛ baanyɛ ajie lɛ kpo yɛ wɔtsui lɛ he?
6 Te wɔɔfee tɛŋŋ wɔle jwetri ni wɔkɛto wɔtsui mli lɛ? Yesu kɛɛ akɛ: “Gbɔmɔ kpakpa jieɔ nɔ kpakpa kɛjɛɔ etsui mli jwetri kpakpa lɛŋ, ni gbɔmɔ fɔŋ hu jieɔ nɔ fɔŋ kɛjɛɔ etsui mli jwetri fɔŋ lɛ mli, ejaakɛ nɔ ni eyi tsui eteke nɔ lɛ, no enaabu wieɔ.” (Luka 6:45) Nɔ ni wɔfɔɔ he wiemɔ lɛ ji nɔ kpakpa ni tsɔɔ nɔ ni wɔtsui etswa efai shi akɛ ebaafee. Ani wɔfɔɔ heloo gbɛfaŋ nibii kɛ nɔ ni wɔnyɛ wɔtsu yɛ je lɛŋ lɛ ahe wiemɔ? Aloo ani bei pii lɛ wɔ sanegbaai kɔɔ mumɔŋ nibii kɛ teokrase otii ahe? Yɛ nɔ najiaŋ ni wɔɔwie mɛi krokomɛi atɔmɔi ahe wɔtsɔɔ lɛ, ani wɔsumɔɔ ni wɔjɛ suɔmɔ mli wɔha enɛɛmɛi anɔ? (Abɛi 10:11, 12) Ani wɔwieɔ gbɔmɛi kɛ nibii ni yaa nɔ yɛ amɛshihilɛi amli lɛ ahe babaoo, shi nɔ ko fioo pɛ wɔwieɔ yɛ shishitoo mlai kɛ mumɔŋ kɛ jeŋba mli saji ahe? Ani enɛ baanyɛ atsɔɔ akɛ wɔmiinya mɛi krokomɛi ateemɔŋ saji ahe tsɔ fe nine?—1 Petro 4:15.
7. Mɛɛ nikasemɔ ni kɔɔ wɔhiɛ ni aaaka wɔtsui he wɔbaanyɛ wɔkase kɛjɛ Yosef nyɛmimɛi hii nyɔŋma lɛ ahe sane lɛ mli?
7 Susumɔ nɔ ni tee nɔ yɛ weku ko ni da mli lɛ he okwɛ. Yakob bihii onukpai nyɔŋma lɛ ‘nyɛɛɛ’ ni amɛkɛ amɛnyɛmi fioo Yosef ‘awie yɛ toiŋjɔlɛ mli.’ Mɛni hewɔ? Amɛnyɛ̃ɔ lɛ ejaakɛ lɛ ji binuu ni amɛtsɛ sumɔɔ esane fe amɛ fɛɛ. Sɛɛ mli beni Nyɔŋmɔ ha Yosef la lamɔi ní yeɔ odase akɛ Yehowa duromɔ yɛ enɔ lɛ, amɛná ‘nɔ ni amɛaadamɔ nɔ lolo ni amɛbɛ lɛ amɛwo amɛmli.’ (1 Mose 37:4, 5, 11) Amɛtsɔ yiwalɛ gbɛ nɔ amɛhɔɔ amɛnyɛmi lɛ amɛwo nyɔŋyeli mli. No he ejɛ lɛ, bɔni afee ni amɛtsimɔ amɛ nɔ fɔŋ feemɔ lɛ nɔ lɛ, amɛlaka amɛtsɛ koni esusu akɛ kooloo awuiyelɔ ko egbe Yosef. Yosef nyɛmimɛi hii nyɔŋma lɛ nyɛɛɛ aha amɛhiɛ akã amɛtsui he yɛ nakai be lɛ mli. Kɛji akɛ wɔhe feɔ oya yɛ mɛi krokomɛi ni wɔwieɔ wɔshiɔ amɛ lɛ mli lɛ, ani enɛ baanyɛ afee hetsɛ loo awuŋayeli ni yɔɔ wɔtsui mli lɛ he odaseyeli? Ehe miihia ni wɔhiɛ ahi wɔhe nɔ ni wɔpɛi saji ni jɛɔ wɔdaaŋ lɛ mli, ni wɔhe afee oya ni wɔkɛjie susumɔi fɔji kɛjɛ wɔmli.
8. Mɛni baaye abua wɔ ni wɔtao wɔtsui mli kɛ́ wɔbɔi amale wiemɔ?
8 Eyɛ mli akɛ “Nyɔŋmɔ nyɛŋ emale” moŋ, shi adesai ni yeee emuu maleɔ. (Hebribii 6:18) Lalatsɛ lɛ ye awerɛho akɛ: “Gbɔmɔ fɛɛ gbɔmɔ lɛ amalelɔŋ!” (Lala 116:11) Bɔfo Petro po male ni ekɛkwa Yesu shii etɛ. (Mateo 26:69-75) Eyɛ faŋŋ akɛ, esa akɛ wɔkwɛ jogbaŋŋ koni wɔkwa amalei, ejaakɛ Yehowa nyɛɔ “apasa lilɛi.” (Abɛi 6:16-19) Kɛji akɛ wɔgbee shi kɛha amale wiemɔ lɛ, ebaafee nilee gbɛ akɛ wɔɔpɛi nɔ ni kɛba lɛ mli. Ani ejɛ gbɔmɔ gbeyeishemɔ? Ani toigbalamɔ he gbeyeishemɔ ji nɔ ni kɛba? Ani ekolɛ mɔ lɛ hiɛ ni baagbo loo ekolɛ pɛsɛmkunya ji nɔ ni hɔ naagba lɛ shishi? Bɔ fɛɛ bɔ ni sane lɛ ji ha lɛ, kwɛ bɔ ni eja gbɛ akɛ wɔɔjwɛŋ sane lɛ he, ni wɔkɛ heshibaa akpɛlɛ wɔ fatɔɔ nɔ, ni wɔkpa Yehowa fai ni ekɛke wɔ, ni wɔtao eyelikɛbuamɔ ni wɔkɛye gbɔjɔmɔ lɛ nɔ kunim! “Asafo lɛ mli onukpai lɛ” baanyɛ afee mɛi ni hi fe fɛɛ ni amɛkɛ nakai yelikɛbuamɔ lɛ baaha.—Yakobo 5:14.
9. Mɛni wɔsɔlemɔi baanyɛ ajie lɛ kpo yɛ wɔtsui he?
9 Yɛ hetoo ni Yehowa kɛha oblanyo Maŋtsɛ Salomo nibimɔ kɛha nilee kɛ sɛɛyoomɔ lɛ mli lɛ, ekɛɛ akɛ: “Gbii abɔ ni enɛ yɔɔ otsui mli, ní obiii ninámɔ, jwetrii kɛ anunyam . . . nɛɛ: ahao nilee kɛ sɛɛyoomɔ, ni asaŋ mahao nii kɛ jwetrii kɛ anunyam hu.” (2 Kronika 1:11, 12) Yehowa le nɔ ni Salomo tsui shweɔ waa kɛjɛɔ nɔ ni Salomo bi kɛ nɔ ni ebiii lɛ mli. Mɛni sɔlemɔi loo sane ni wɔkɛ Nyɔŋmɔ gbaa lɛ jieɔ lɛ kpo yɛ wɔtsui he? Ani wɔ sɔlemɔi jieɔ bɔ ni nilee, sɛɛyoomɔ, kɛ sane shishinumɔ he kumai yeɔ wɔ lɛ kpo? (Abɛi 2:1-6; Mateo 5:3) Ani wɔtsui shweɔ Maŋtsɛyeli lɛ he nibii waa? (Mateo 6:9, 10) Kɛji akɛ wɔsɔlemɔi etsɔ nɔ ko kɛkɛ ni afeɔ lɛ jabejabe lɛ, enɛ baanyɛ atsɔɔ bɔ ni ehe hiaa ni ahe be ni akɛjwɛŋ Yehowa nifeemɔi anɔ. (Lala 103:2) Esa akɛ Kristofoi fɛɛ aha amɛhiɛ ahi amɛhe nɔ koni amɛyoo nɔ ni amɛsɔlemɔi jieɔ lɛ kpo.
Mɛni Wɔnifeemɔi Kɛɔ?
10, 11. (a) Nɛgbɛ gbalafitemɔ kɛ ajwamaŋbɔɔ jeɔ shishi kɛjɛɔ? (b) Mɛni baaye abua wɔ koni ‘wɔkafite gbala yɛ tsui mli’?
10 Awie akɛ nifeemɔi wieɔ babaoo fe wiemɔi foji. Wɔnifeemɔi jieɔ nibii babaoo diɛŋtsɛ kpo yɛ bɔ ni wɔji yɛ mligbɛ lɛ he. Ákɛ nɔkwɛmɔnɔ lɛ, yɛ jeŋba he saji amli lɛ, wɔhiɛ ní aaakã wɔtsui he lɛ kɔɔ nibii babaoo he fe ni wɔɔkwa ajwamaŋbɔɔ loo gbalafitemɔ nifeemɔ ko kɛkɛ. Yɛ Yesu Gɔŋ nɔ Shiɛmɔ lɛ mli lɛ, ekɛɛ akɛ: “Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” (Mateo 5:28) Te wɔɔfee tɛŋŋ wɔkwa gbalafitemɔ yɛ wɔtsui mli po?
11 Blematsɛ Hiob to okadi efɔ̃ shi kɛha Kristofoi hii kɛ yei ni amɛbote gbalashihilɛ mli. Ŋwanejee ko bɛ he akɛ Hiob kɛ oblayei ye sharamɔ ni ekɛ mlihilɛ ye ebua amɛ kɛji akɛ yelikɛbuamɔ he miihia amɛ. Shi susumɔ akɛ eeená amɛhe akɔnɔ baaa sane lɛ mli kɛha nu ni hiɛɔ emuuyeli mli nɛɛ. Mɛni hewɔ? Ejaakɛ ekpɛ mli shiŋŋ akɛ ekɛ akɔnɔ hiŋmɛi kwɛŋ yei. Ekɛɛ akɛ: “Kpaŋmɔ mikɛ mihiŋmɛii kpaŋ, belɛ te aaafee tɛŋŋ ní makwɛ oblayoo hu?” (Hiob 31:1) Eba akɛ wɔ hu wɔkɛ wɔhiŋmɛii aaakpaŋ nakai nɔŋŋ koni wɔhiɛ akã wɔtsui he.
12. Te okɛ Luka 16:10 baatsu nii yɛ otsui lɛ ni ohiɛ aaakã he lɛ he aha tɛŋŋ?
12 Nyɔŋmɔ Bi lɛ jaje akɛ: “Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa; ni mɔ ni yeee nɔ ko bibioo mli anɔkwa lɛ, eyeee babaoo hu mli anɔkwa.” (Luka 16:10) Hɛɛ, ehe miihia ni wɔpɛi wɔ jeŋba yɛ daa gbi shihilɛ mli saji ni kɔɔ nibii ni tamɔ bibii lɛ po mli, yɛ nɔ ni yaa nɔ yɛ teemɔŋ yɛ shia lɛ po mli wɔkwɛ. (Lala 101:2) Yɛ be mli ni wɔta shi yɛ wɔ shia, ni wɔmiikwɛ tɛlivishiŋ, loo wɔmiikwɛ Internet lɛ nɔ nibii lɛ, ani wɔkwɛɔ jogbaŋŋ koni wɔkɛ Ŋmalɛ mli kɔkɔbɔɔ nɛɛ atsu nii, akɛ: “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsĩ tã tete yɛ nyɛteŋ, taakɛ bɔ ni sa mɛi krɔŋkrɔŋi, kɛ hiɛgbeji anitsumɔ kɛ yakayaka wiemɔ kɛ fɛoyeli hu ní esaaa lɛ”? (Efesobii 5:3, 4) Ni awuiyeli ni anaa yɛ tɛlivishiŋ nɔ loo vidio shwɛmɔi amli lɛ hu? Lalatsɛ lɛ kɛɛ akɛ: “Yehowa lɛ, jalɔ moŋ ekãa; shi mɔ fɔŋ kɛ mɔ ni sumɔɔ yiwalɛ lɛ, esusuma nyɛ̃ɔ amɛ.”—Lala 11:5.
13. Mɛɛ kɔkɔbɔɔ he hiaa beni asusuɔ nɔ ni baa kɛjɛɔ wɔtsui mli lɛ he lɛ?
13 Yeremia bɔ kɔkɔ akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yeremia 17:9) Nɛkɛ kutumpɔo tsui nɛɛ baanyɛ ajie ehe kpo kɛ wɔjie wɔnaa yɛ wɔ tɔmɔi ahe, wɔba wɔ fatɔɔi ashi, wɔha subaŋ ni ehiii ni hiɛdɔɔ yɔɔ mli yɛ wɔhe lɛ fee tamɔ nɔ ni sane ko bɛ he, aloo wɔwo nibii ni wɔnyɛ wɔtsu lɛ he. Tsui ni ehiii lɛ hu baanyɛ adamɔ afãi enyɔ—lilɛi ni ŋɔɔ ni kɛɔ nɔ kome, shi enifeemɔi tsɔɔ nɔ kroko. (Lala 12:2; Abɛi 23:7) Kwɛ bɔ ni ehe hiaa akɛ wɔye anɔkwa yɛ be mli ni wɔpɛiɔ nɔ ni jɛɔ tsui lɛ mli baa lɛ mli lɛ!
Ani Wɔhiŋmɛi Nɔ Tse?
14, 15. (a) Mɛni ji hiŋmɛi ni “nɔ tse”? (b) Yɛ mɛɛ gbɛ nɔ hiŋmɛi lɛ ni wɔhaa enɔ tseɔ lɛ yeɔ ebuaa wɔ koni wɔhiɛ akã wɔtsui lɛ he?
14 Yesu kɛɛ akɛ: “Gbɔmɔtso lɛ kane ji hiŋmɛi.” Ni ekɛfata he akɛ: “No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ fɛɛ aaayi kɛ la.” (Mateo 6:22) Hiŋmɛi ni nɔ tse lɛ kɛ ehiɛ maa oti kome, loo yiŋtoo kome nɔ, nɔ ko gbalaaa ejwɛŋmɔ kɛjɛɛɛ he. Yɛ anɔkwale mli lɛ, esa akɛ wɔhiŋmɛi lɛ ama ‘Nyɔŋmɔ maŋtsɛyeli lɛ kɛ ejalɛ lɛ taomɔ’ nɔ ‘klɛŋklɛŋ.’ (Mateo 6:33) Mɛni baanyɛ aba wɔ mfonirifeemɔŋ tsui lɛ nɔ kɛji akɛ wɔhaaa wɔhiŋmɛi nɔ atse?
15 Susumɔ nitsumɔ ni atsuɔ akɛnáa shihilɛ mli nibii lɛ ahe okwɛ. Wɔ weku lɛ hiamɔ nii ni wɔkɛaaha amɛ lɛ ji Kristofoi ataomɔ nii. (1 Timoteo 5:8) Shi kɛji akɛ nibii ni wɔshweɔ lɛ miika wɔ ni wɔná nibii ni eba ehee fe fɛɛ, nɔ ni hi fe fɛɛ, kɛ niyenii, atade, wɔɔhe, kɛ nibii krokomɛi ni hi fe fɛɛ ni ataoɔ lɛ hu? Ani enɛ nyɛŋ aŋɔ tsui lɛ kɛ jwɛŋmɔ lɛ nom diɛŋtsɛ, ni eha wɔfee mɛi ni kɛ tsui fã tsuɔ wɔ jamɔ lɛ he nii? (Lala 119:113; Romabii 16:18) Mɛni hewɔ esa akɛ wɔkɛ wɔhe awo heloo naa hiamɔ nii amli aahu akɛ ehaa wɔshihilɛ feɔ nɔ ni bɔleɔ weku, nitsumɔ, kɛ heloo naa nibii pɛ he lɛ? Kaimɔ ŋaawoo ni jɛ mumɔŋ lɛ, akɛ: “Nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ-ŋmãa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne.”—Luka 21:34, 35.
16. Mɛɛ ŋaawoo Yesu kɛha yɛ hiŋmɛi lɛ he, ni mɛni hewɔ?
16 Hiŋmɛi lɛ ji sanegbaa gbɛ ni he hiaa kɛha jwɛŋmɔ lɛ kɛ tsui lɛ. Nɔ ni ekɛ ehiɛ maa nɔ lɛ baanyɛ aná wɔsusumɔi, henumɔi, kɛ nifeemɔi anɔ hewalɛ waa diɛŋtsɛ. Beni Yesu kɛ mfonirifeemɔŋ wiemɔ tsuɔ nii lɛ, ewie bɔ ni hewalɛ ni nii ni anaa lɛ yɔɔ ni ekɛkaa mɔ lɛ he, ni ekɛɛ akɛ: “Shi kɛji ohiŋmɛi jurɔ miitɔtɔ onane lɛ, fãa, ni oshɛ ofɔ̃; ejaakɛshi ehi hao akɛ ohe nii lɛ eko fiteɔ, koni akashɛ ogbɔmɔtso muu lɛ afɔ̃ gehena mli.” (Mateo 5:29) Esa akɛ atsĩ hiŋmɛi lɛ gbɛ koni ekakwɛ nibii ni enaa ni ejaaa lɛ. Ákɛ nɔkwɛmɔnɔ lɛ, esaaa akɛ aŋmɛɔ lɛ gbɛ koni ekane woji ni ato he gbɛjianɔ koni ekanya loo etee akɔnɔi loo nibii ni ashweɔ ni agu lɛ ashi.
17. Yɛ mɛɛ gbɛ nɔ Kolosebii 3:5 kɛ nitsumɔ yeɔ ebuaa wɔ koni eha wɔhiɛ ahi tsui lɛ he?
17 Shi, nɔ ni anaa lɛ pɛ jeee henumɔ ni wɔtsɔɔ nɔ wɔkɛ jeŋ ni yɔɔ sɛɛ lɛ yeɔ sharamɔ. Henumɔi krokomɛi, tamɔ nɔ̃ he ni ataa kɛ ninumɔ, tsuɔ amɛ gbɛfaŋnɔ, ni ehe miihia ni wɔkɛ gbɔmɔtso lɛ he nii krokomɛi lɛ hu atsu nii jogbaŋŋ. Bɔfo Paulo wo ŋaa akɛ: “No hewɔ lɛ nyɛgbea nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ lɛ.”—Kolosebii 3:5.
18. Mɛni esa akɛ wɔfee yɛ susumɔi ni ejaaa lɛ ahe?
18 Akɔnɔ fɔŋ baanyɛ aje shishi kɛjɛ wɔ jwɛŋmɔ lɛ teemɔhei lɛ. Bei pii lɛ, enɛ ni akɛ jwɛŋmɔ maa nɔ lɛ haa akɔnɔ fɔŋ lɛ mli woɔ wu, ni enáa tsui lɛ nɔ hewalɛ. “No sɛɛ lɛ akɔnɔ lɛ, kɛ́ eŋɔ hɔ lɛ, efɔɔ esha.” (Yakobo 1:14, 15) Mɛi pii kpɛlɛɔ nɔ akɛ enɛ ji gbɛ ni bei pii lɛ mɔ diɛŋtsɛ bɔlɛnamɔ he nibii ni ekɛshwɛɔ lɛ tsɔɔ nɔ kɛbaa. Belɛ kwɛ bɔ ni ehe hiaa ha akɛ wɔɔya nɔ ni wɔkɛ mumɔŋ nibii awo wɔjwɛŋmɔ mli obɔ! (Filipibii 4:8) Ni kɛji akɛ susumɔ ko ni ejaaa ba jwɛŋmɔ lɛ mli lɛ, esa akɛ wɔbɔ mɔdɛŋ ni wɔjie kɛjɛ mli.
‘Sɔɔmɔ Yehowa Kɛ Tsui Muu Fɛɛ’
19, 20. Te wɔɔfee tɛŋŋ wɔye omanye yɛ Yehowa ní wɔɔsɔmɔ lɛ kɛ wɔtsui fɛɛ lɛ mli lɛ?
19 Maŋtsɛ David kɛɛ ebinuu yɛ egbɔlɛ be mli akɛ: “Mibi Salomo, lé otsɛ Nyɔŋmɔ lɛ, ní osɔmɔ lɛ kɛ otsui muu lɛ fɛɛ kɛ osusuma suɔmɔ naa! Ejaakɛ Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ.” (1 Kronika 28:9) Salomo diɛŋtsɛ sɔle ebi “toiboo tsui.” (1 Maŋtsɛmɛi 3:9) Kɛlɛ, ekɛ tsui ni tamɔ nɛkɛ mli ni eeehiɛ yɛ eshihilɛ be fɛɛ mli lɛ he kaa ni wa lɛ kpe.
20 Kɛji akɛ wɔɔye omanye yɛ enɛ gbɛfaŋ lɛ, jeee akɛ ehe hiaa ni wɔná tsui ni Yehowa kpɛlɛɔ nɔ kɛkɛ, shi esa akɛ wɔha wɔhiɛ ahi nɔ hu. Bɔni afee ni wɔnyɛ wɔtsu enɛ lɛ, esa akɛ wɔha Nyɔŋmɔ Wiemɔ lɛ mli kaimɔi lɛ abɛŋkɛ wɔtsui he kpaakpa—‘yɛ tsui lɛ teŋ.’ (Abɛi 4:20-22) Esa akɛ wɔkɛ wɔtsui lɛ mli ni wɔpɛiɔ wɔkwɛɔ, kɛ sɔlemɔ ni wɔkɛsusuɔ nɔ ni wɔ wiemɔi kɛ nifeemɔi jieɔ lɛ kpo lɛ ahe lɛ afee nɔ ni wɔfɔɔ feemɔ. Mɛɛ sɛɛnamɔ yɔɔ nɛkɛ niiahesusumɔ ni tamɔ nɛkɛ he, ákɛ ja wɔkɛ anɔkwayeli tao Yehowa yelikɛbuamɔ koni wɔkɛjaje gbɔjɔmɔ fɛɛ gbɔjɔmɔ ni wɔɔna? Ni kwɛ bɔ ni ehe hiaa ha akɛ wɔkwɛ nɔ ni wɔtsɔɔ wɔ henumɔi anɔ wɔŋɔɔ wɔwoɔ wɔmli lɛ jogbaŋŋ! Yɛ enɛ feemɔ mli lɛ, wɔyɛ nɔmimaa akɛ, “Nyɔŋmɔ hejɔlɛ ni fe jwɛŋmɔi fɛɛ lɛ aaato [wɔ] tsuii kɛ [wɔ] jwɛŋmɔi lɛ yɛ Kristo Yesu mli!” (Filipibii 4:6, 7) Hɛɛ, nyɛhaa wɔtswaa wɔfai shi akɛ wɔbaaha wɔhiɛ akã wɔtsuii ahe fe nɔ fɛɛ nɔ ni esa akɛ abu he, koni wɔsɔmɔ Yehowa kɛ wɔtsui fɛɛ.
Ani Okaiɔ?
•Mɛni hewɔ ehe hiaa ni wɔha wɔhiɛ ahi tsui lɛ he lɛ?
•Yɛ mɛɛ gbɛ nɔ nɔ ni wɔwieɔ lɛ mlitaomɔ yeɔ ebuaa wɔ ni ehaa wɔhiɛ hiɔ wɔtsui lɛ he?
•Mɛni hewɔ esa akɛ wɔha wɔhiŋmɛi ‘nɔ atse’ lɛ?
[Nikasemɔ lɛ he Sanebimɔi]
[Mfonirii ni yɔɔ baafa 23]
Mɛni wɔfɔɔ he wiemɔ yɛ shiɛmɔ nitsumɔ lɛ mli, yɛ kpeei ashishi, kɛ shia?
[Mfonirii ni yɔɔ baafa 25]
Anyɛɛɛ agbala hiŋmɛi ni nɔ tse lɛ kɛya he kroko