Sanebimɔi ni Jɛ Kanelɔi Adɛŋ
Sanebimɔi ni Jɛ Kanelɔi Adɛŋ
Te akɛ tsei ní akɛwóɔ kpaŋmɔ adeka lɛ woɔ he ahaa tɛŋŋ, akɛni 1 Maŋtsɛmɛi 8:8 lɛ tsɔɔ akɛ anaa tsei lɛ yɛ He Krɔŋkrɔŋ lɛ?
Beni Yehowa kɛ kpeebuu lɛ he gbɛjianɔtoo lɛ ha Mose yɛ ŋã lɛ nɔ lɛ, efã titri ko ní he hiaa waa ji kpaŋmɔ adeka lɛ. Nɛkɛ adeka ní hiɛ koji ejwɛ, ní akɛ shika ehà he fɛɛ nɛɛ mli ji he ni akɛ tɛtaoi ní Mla lɛ yɔɔ nɔ lɛ kɛ nibii krokomɛi lɛ woɔ. Akɛma tsũ ní yɔɔ mligbɛ fe fɛɛ, ni ji He Krɔŋkrɔŋ Fe Fɛɛ lɛ mli. Akɛ shika efee kerubim enyɔ ní egbɛ amɛfijiaŋ kɛtee ŋwɛi yɛ Adeka lɛ naa nɔ̃ lɛ nɔ. Afee gai yɛ Adeka lɛ afã biɛ kɛ biɛ, ni akɛ tsei kakadaji enyɔ, ní akɛ yɔɔyi tsei fee, ní akɛ shika ehà he fɛɛ hɔlɔɔ mli ni akɛwóɔ adeka lɛ. Yɛ shishinumɔ ní ja naa lɛ, akɛ tsei lɛ hɔlɔɔ Adeka lɛ he gai lɛ amli yɛ afãi enyɔ lɛ, yɛ ekɛlɛ lɛ ŋɛlɛ nɔ. Enɛ hewɔ lɛ, kɛ́ akɛ Adeka lɛ ma emaahe lɛ yɛ kpeebuu lɛ He Krɔŋkrɔŋ Fe Fɛɛ ní kwɛɔ bokagbɛ lɛ, tsei lɛ beleɔ shi kɛjɛɔ kooyigbɛ kɛyaa wuoyigbɛ. Nakai nɔŋŋ eji yɛ sɛɛ mli beni Adeka lɛ yɔɔ sɔlemɔtsu ní Salomo ma lɛ mli lɛ.—2 Mose 25:10-22; 37:4-9; 40:17-21. *
Muhɔɔ foɔ He Krɔŋkrɔŋ Fe Fɛɛ lɛ kɛ He Krɔŋkrɔŋ (agbó naa gbɛ tsu) lɛ teŋ. Osɔfoi ní yɔɔ He Krɔŋkrɔŋ lɛ nyɛɛɛ akwɛ He Krɔŋkrɔŋ Fe Fɛɛ lɛ ní amɛna Adeka lɛ ní Nyɔŋmɔ jieɔ ehe kpo yɛ nɔ lɛ. (Hebribii 9:1-7) Enɛ hewɔ lɛ, ekolɛ etamɔ nɔ ni 1 Maŋtsɛmɛi 8:8 lɛ futuɔ mɔ yiŋ fioo, akɛ: “Tsei lɛ kɛlɛ, bɔ ni anaa tsei lɛ anaabui yɛ he krɔŋkrɔŋ lɛ yɛ sɛɛtsu lɛ hiɛ, shi anaaa yɛ kpo lɛ nɔ gbɛ.” Ama nakai oti lɛ nɔŋŋ nɔ mi yɛ 2 Kronika 5:9 lɛ. Te feɔ tɛŋŋ ni mɔ ko ní yɔɔ sɔlemɔtsu lɛ He Krɔŋkrɔŋ lɛ nyɛɔ enaa tsei lɛ?
Mɛi komɛi susuɔ akɛ tsei lɛ saa muhɔɔ lɛ he, ni efeɔ okadii loo bui bibii yɛ muhɔɔ lɛ mli ní anaa. Shi ebaŋ lɛ nakai kɛji tsei lɛ beleɔ shi kɛjɛɔ kooyigbɛ kɛyaa wuoyigbɛ, ní muhɔɔ lɛ kɛ tsei lɛ ashibelemɔ lɛ yeɔ egbɔ lɛ. (4 Mose 3:38) Naatsɔɔmɔ ko ní shishinumɔ yɔɔ he waa yɛ. Ekolɛ anyɛɔ anaa tsei lɛ kɛji fɔlɔ bibioo bakã muhɔɔ lɛ kɛ sɔlemɔtsu lɛ gbogbo lɛ teŋ, aloo kɛji osɔfonukpa lɛ miibote He Krɔŋkrɔŋ Fe Fɛɛ lɛ. Muhɔɔ lɛ tsĩɔ Adeka lɛ diɛŋtsɛ hiɛ ní akana, shi ekolɛ anaa ehe tsei lɛ ní kɛlɛ fioo fe adeka lɛ, ní yɔɔ afã biɛ kɛ biɛ lɛ kɛtsɔɔ fɔlɔ lɛ mli. Eyɛ mli akɛ naatsɔɔmɔ nɛɛ tamɔ nɔ ni ja moŋ, shi wɔnyɛŋ wɔfee keketee yɛ enɛ he.
Eyɛ faŋŋ akɛ, nibii babaoo yɛ ní ekolɛ kpaako wɔbaaná wɔle. Bɔfo Paulo tsĩ fãi fioo komɛi atã yɛ ewolo ní eŋma eyaha Hebribii lɛ mli. Kɛkɛ ni ewie akɛ: “Amrɔ nɛɛ wɔnyɛŋ amɛhe wɔwie ekomekome.” (Hebribii 9:5) Anɔkwafoi lɛ agbohiiashitee ní baa lɛ baaha wɔná hegbɛi ní kanyaa mɔ ní wɔkɛkase nii kɛjɛ gbɔmɛi tamɔ Mose, Aaron, Bezaleel, kɛ mɛi krokomɛi ní le kpeebuu lɛ he gbɛjianɔtoo kɛ enitsumɔ he saji jogbaŋŋ diɛŋtsɛ lɛ aŋɔɔ.—2 Mose 36:1.
[Shishigbɛ niŋmaa]
^ kk. 3 Kɛ́ akɛ Adeka lɛ ma emaahe lɛ yɛ kpeebuu lɛ mli po lɛ, ajieee tsei lɛ kɛjɛɛɛ gai lɛ amli. No hewɔ lɛ, anyɛɛɛ akɛ tsei lɛ atsu yiŋtoo kroko ko he nii. Agbɛnɛ hu, ehe ehiaaa ní ata Adeka lɛ he; eji ajieɔ tsei lɛ kɛjɛɔ gai lɛ amli kulɛ, be fɛɛ be ní abaawó lɛ, ebaabi ní ata Adeka krɔŋkrɔŋ lɛ he koni akɛ tsei lɛ awo ehe gai lɛ amli. Ekolɛ wiemɔ ni yɔɔ 4 Mose 4:6 ní tsɔɔ ‘ewómɔ tsei ní akɛaahɔlɔ mli’ lɛ kɔɔ tsei lɛ asaamɔ loo amɛjajemɔ he koni akɛfee klalo ní akɛwó adeka ní tsii waa nɛɛ kɛya he ní ayabɔ nsara hee lɛ yɛ lɛ.