“Gbi ni Akɛtoɔ Tsui Shi yɛ Jamɔ He”
“Gbi ni Akɛtoɔ Tsui Shi yɛ Jamɔ He”
AKƐNI skul nɔkwɛlɔ ko ni yɔɔ Poland lɛ ná sanegbaa ni tee nɔ yɛ ekɛ Yehowa Odasefoi ateŋ lɛ he miishɛɛ waa hewɔ lɛ, eto gbɛjianɔ kɛha “Gbi ni Akɛtoɔ Tsui Shi yɛ Jamɔ He” lɛ he kɛha eskul lɛ. Ŋaawoo ni ekɛha ji akɛ nikaselɔi lɛ ateŋ mɛi ni kɛ amɛhe baaha—Katolikbii, Buddhabii, kɛ Yehowa Odasefoi—lɛ afee shiɛmɔ wiemɔi kukuji ni amɛkɛha nikaselɔi krokomɛi lɛ ale amɛhemɔkɛyelii kɛ nifeemɔi lɛ. Yehowa Odasefoi etɛ ni yeko afii nyɔŋmai enyɔ kɛ amɛhe ha amrɔ nɔŋŋ.
Beni gbi lɛ bashɛ lɛ, klɛŋklɛŋ mɔ ni wie ji Malwina ni eye afii 15 lɛ. Wiemɔ ni ewie lɛ eko ji: “Nyɛteŋ mɛi babaoo le wɔ dani wɔbɔi skul nɛɛ baa, ejaakɛ wɔba nyɛŋɔɔ yɛ nyɛshiai amli. Ekolɛ nyɛbaasusu nɔ hewɔ ni wɔyaa nɔ wɔfeɔ nakai lolo lɛ he. Nɔ hewɔ ji akɛ wɔnyiɛɔ Yesu Kristo ni ji Kristojamɔ Shishitolɔ lɛ nɔkwɛmɔnɔ lɛ sɛɛ. Eshiɛ Nyɔŋmɔ Maŋtsɛyeli lɛ he sanekpakpa lɛ yɛ he fɛɛ he ni abaanyɛ ana gbɔmɛi yɛ. Bɔfoi lɛ kɛ mra be mli Kristofoi krokomɛi lɛ fee nakai nɔŋŋ. Yehowa Odasefoi ŋmɛɔ amɛtsui shi yɛ hemɔkɛyeli he kaai ni mli wa mli yɛ hei babaoo, shi wɔyɛ miishɛɛ akɛ wɔnáa toiŋjɔlɛ yɛ wɔskul lɛ mli, ni nyɛ fɛɛ nyɛyeɔ nyɛbuaa kɛha nakai feemɔ. Wɔmiida nyɛ shi yɛ no hewɔ!”
Beni Malwina kɛ eshiɛmɔ wiemɔ lɛ baa naagbee lɛ, ekɛɛ akɛ: “Yiŋtoo kroko hu yɛ ni tsɔɔ nɔ hewɔ ni wɔbaa nyɛshia lɛ. Wɔsusuɔ nyɛhe. Biblia lɛ kɛɔ akɛ etsɛŋ ni adesai baana saji ni baaha je lɛ he ajɔ̃ ehe. No hewɔ lɛ be kroko kɛ wɔbatswa nyɛshinaa lɛ, nyɛfainɛ ni nyɛtaoa be ni nyɛboa wɔ toi. Wɔbaasumɔ ni wɔkɛɛ nyɛ bɔ ni wɔɔfee ni wɔnyɛ wɔkɛ ekomefeemɔ ahi shi yɛ shikpɔŋ nɔ paradeiso mli kɛya naanɔ.”
Mɔ ni wie kɛnyiɛ sɛɛ ji Mateusz, lɛ hu eye afii 15. Mateusz kɛɛ etoibolɔi lɛ akɛ, yɛ afii ni eho lɛ amli lɛ, Yehowa Odasefoi kɛ nifeemɔ gbɛ̀i srɔtoi babaoo etsu nii koni amɛkɛgbɛ sanekpakpa lɛ amɛshwã. Ákɛ nɔkwɛmɔnɔ nɔ lɛ, yɛ afi 1914—yɛ be mli ni ajieɔ sinii ni egbɛɛɛ lɛ—no mli lɛ Odasefoi lɛ jieɔ “Photo-Drama of Creation,” sini ni emli mfonirii lɛ tsirɛɔ amɛhe kɛ sini ni ewieee ni gbɛɛmɔ fataa he yɛ nakai beaŋ nɔŋŋ lɛ.
Mateusz gba bɔ ni akɛ redio tsu nii koni akɛgbɛ Maŋtsɛyeli shɛɛ sane lɛ ashwã ni agbɛnɛ etsɔɔ bɔ ni kɔmpiuta wiemɔi babaoo he ilɛtrɔnik fotoshamɔ gbɛjianɔtoo (MEPS) ni yɔɔ srɔto kwraa ni Yehowa Odasefoi fee lɛ yɔɔ ha. Agbɛnɛ egba bɔ ni Yehowa Odasefoi eye ebua koni agba datrɛfoi tsofafeemɔ mli ŋaai ni lá fataaa he lɛ he sane. Ekɛɛ akɛ: “Amrɔ nɛɛ, Poland tsofafeelɔi ni ehe gbɛi waa lɛ wieɔ shidaamɔ ni wɔkɔ lɛ he ekpakpa ni amɛmaa nɔ mi akɛ, daa afi lɛ afeɔ helatsɛmɛi ni yi fáa daa ni amɛjeee Odasefoi lɛ opireshɛn ni lá fataaa he.”
Mateusz mu sane naa kɛtsɔ Maŋtsɛyeli Asai amaa lɛ he wiemɔ nɔ ni ekɛɛ akɛ: “Ani nyɛbaasumɔ ni nyɛbakwɛ wɔnɔ̃ lɛ? Awooo he nyɔmɔ, ni aheee shika.” Beni Mateusz wieɔ kpee wulu asa ni yɔɔ Sosnowiec lɛ he lɛ, ekɛɛ akɛ: “Esa akɛ nyɛna nɛkɛ tsũ wulu ni akɛtsuɔ eyiŋtoo he nii lɛ. Mɛni hewɔ wɔfeee ekome kɛyaaa jɛmɛ? Wɔhiɛ susumɔ ko, ni wɔnaanyo Katarzyna baakɛɛ nyɛ he nɔ ko.”
No sɛɛ lɛ, Katarzyna ni eye afii 15 lɛ kɛ miishɛɛ kɛɛ akɛ: “Aahere nyɛ atuu kɛmiiba Sosnowiec kɛha Yehowa Odasefoi akpokpaa wulu nɔ kpee lɛ. Abaasusu saji ni kɔɔ oblahii kɛ oblayei ahe.” Katarzyna wie gbi jurɔ wulu ni yɔɔ kɛha Kristofoi—Yesu Kristo gbele Kaimɔ lɛ hu he. Ewo etoibolɔi lɛ ahewalɛ akɛ: “Nyɛsɛɛ afi lɛ, mɛi ni fa fe akpekpei 14 ye nakai gbi jurɔ lɛ yɛ jeŋ fɛɛ. Mɛni hewɔ nyɛfataaa wɔhe be kroko?”
Beni Malwina, Mateusz, kɛ Katarzyna kɛ amɛshiɛmɔ wiemɔi lɛ ha amɛgbe naa lɛ, amɛkɛ wolo ni ji Jehovah’s Witnesses—Proclaimers of God’s Kingdom kɛ vidio kasɛtii enyɔ ni wieɔ Yehowa Odasefoi ahemɔkɛyelii kɛ nifeemɔi ahe lɛ ha tsɔɔlɔi lɛ. * Tsɔɔlɔi lɛ kɛ hiɛsɔɔ he woji lɛ ni amɛwo shi akɛ amɛkɛbaatsu nii yɛ yinɔsane he nitsɔɔmɔ mli.
Yɛ nifeemɔ lɛ sɛɛ lɛ, Martyna ni eye afii 12 lɛ tswa lala ni yitso ji “We Thank You, Jehovah” (Wɔmiidao Shi, Yehowa) lɛ eha mɛi fɛɛ ni ebua amɛhe naa yɛ jɛmɛ lɛ. Nɛkɛ Odasefoi oblahii kɛ oblayei nɛɛ ‘ná ekãa yɛ amɛ-Nyɔŋmɔ lɛ mli’ ni amɛye odase jogbaŋŋ. (1 Tesalonikabii 2:2) Mɛɛ nɔkwɛmɔnɔ ni sa jogbaŋŋ nɛ kɛha Odasefoi oblahii kɛ oblayei yɛ he fɛɛ he nɛkɛ!
[Shishigbɛ niŋmaa]
^ kk. 9 Yehowa Odasefoi ji mɛi ni fee.
[Mfoniri ni yɔɔ baafa 26]
Malwina ni miito shiɛmɔ wiemɔ lɛ he gbɛjianɔ gbii fioo komɛi dani eha yɛ skul
[Mfoniri ni yɔɔ baafa 26]
Katarznya miihala ŋmalɛi kɛha shiɛmɔ wiemɔ lɛ