Tsei Ahiɛkpatalɔi

YƐ Biblia bei amli lɛ, abuɔ tsei akɛ nibii ni jara wa waa. Ákɛ nɔkwɛmɔnɔ lɛ, beni Abraham hé fuuhe kɛha eŋa Sara ni esumɔɔ lɛ waa lɛ, abu tsei ni yɔɔ mli lɛ anaa afata nibii ni aba gbeekpamɔ yɛ he ni akɛbaaha lɛ lɛ mli.—1 Mose 23:15-18.

Nakai nɔŋŋ ŋmɛnɛ, abuɔ tsei akɛ nɔ ko ni jara wa waa, ni majimaji lɛ gbalaa amɛjwɛŋmɔ waa kɛyaa kooi lɛ ayibaamɔ nɔ. Wolo ni ji State of the World 1998 lɛ, kɛɛ akɛ: “Eyɛ mli akɛ mɛi babaoo ni yɔɔ kooyigbɛ maji lɛ amli lɛ susuɔ kooi ni mli dɔɔ lɛ he moŋ, shi ekolɛ amɛleee akɛ kooi ni amɛnaa yɛ amɛ diɛŋtsɛ amɛmaji amli he ni kɔɔyɔŋ tsakemɔ lɛ hi fioo lɛ ji nɔ ni yɔɔ hei ni etse amɛhe ni yɔɔ kooi ahenɔ ni yɔɔ fitemɔ hewalɛ babaoo shishi lɛ amli.” Mɛɛ nibii woɔ kooi ni yɔɔ kooyigbɛ maji tamɔ Europa kɛ Amerika Kooyigbɛ lɛ hewalɛnamɔ he gbeyei? Mɛi babaoo kɛ amɛnine tsɔɔ koo mli tsei babaoo ni afolɔɔ ashwieɔ, shi hewalɛi krokomɛi hu yɛ ni kpataa tsei ahiɛ yɛ gbɛ ni yɔɔ nigii nɔ, baji ni akpɔlɔɔ yɛ tsei ahe lɛ kpataa tsei lɛ ahiɛ ekomekomei, kɛ wɔɔwie he nakai. Mɛɛ nibii ni? Kɔɔyɔɔŋ fitemɔ kɛ nugbɔnɛmɔ ni asid yɔɔ mli. Nɛkɛ tsofai ni woɔ kɔɔyɔɔŋ muji nɛɛ baanyɛ aha hewalɛ ni tsei yɔɔ lɛ nɔ agbɔ fiofio, ni ehaa kooloi bibii kɛ helai nyɛɔ enáa amɛnɔ hewalɛ.

Afii nyɔŋmai abɔ nɛ ni shihilɛhei ahebuu he nilelɔi kɛ maŋbii krokomɛi ni susuɔ shihilɛ nɛɛ he lɛ ebɔ kɔkɔ yɛ bɔ ni ehe ehia ni abu tsei kɛ kooloi ni ebɔle wɔhe kɛkpe lɛ ahe. Yɛ afi 1980 afii lɛ amli, beni jeŋ nilelɔi ni yɔɔ Germany lɛ ekase nibii ni jɛɔ kɔɔyɔɔŋ fitemɔ kɛ nugbɔnɛmɔ ni asid yɔɔ mli lɛ mli kɛbaa shihilɛhei anɔ sɛɛ lɛ, amɛmu sane naa akɛ: ‘Kɛji afeee he nɔ ko lɛ, beni baashɛ afi 2000 lɛ, mfonirii ni kɔɔ kooi ahe ni asha kɛjɛ blema kɛ nɔ ni yɔɔ sinii amli pɛ gbɔmɛi baanyɛ ajie hiɛsɔɔ kpo yɛ he.’ Miishɛɛ sane ji akɛ, hewalɛ ni shikpɔŋ lɛ yɔɔ ni ekɛfeɔ nii ehee lɛ yɛ hewalɛ aahu akɛ kɛ hoo kwraa lɛ kooi lɛ enyɛ amɛdamɔ oshara ni agba akɛ ebaaba lɛ babaoo naa.

Kɛlɛ, yɛ naagbee lɛ, Nyɔŋmɔ ji mɔ ni baafee babaoo kɛbaa tsei kɛ kooloi ni ebɔle wɔ kɛkpe lɛ ayi. “Ojɛɔ oŋwɛi tsũi lɛ amli oshwieɔ gɔji lɛ anɔ nu, ohaa jwɛi kwɛɔ haa shia kooloi lɛ, kɛ shwie hu ni gbɔmɔ yɔɔ he nitsumɔ.” Ni ewo shi akɛ ‘ebaafite mɛi ni fiteɔ shikpɔŋ lɛ.’ (Lala 104:13, 14; Kpojiemɔ 11:18) Kwɛ bɔ ni ebaafee nɔ ni yɔɔ naakpɛɛ beni shikpɔŋ lɛ nɔ bii baaná jeŋ ko ni mujiwoo bɛ mli mli ŋɔɔmɔ kɛya naanɔi anaanɔ!—Lala 37:9-11.