Nyɛkɛ Nɔmimaa ni Mli Wa Adamɔa Shi Shiŋŋ

Gbɔmɛi Akpekpei Abɔ Hiɛ Sɔɔ New World Translation lɛ yɛ Jeŋ Fɛɛ

EHÉ afii 12, nyɔji 3, kɛ gbii 11 nitsumɔ dɛŋdɛŋ. Shi kɛlɛ, yɛ March 13, afi 1960 lɛ, agbe naagbee niŋmaa kɛha Biblia shishitsɔɔmɔ hee lɛ naa. Atsɛ lɛ New World Translation of the Holy Scriptures.

Afi sɛɛ lɛ Yehowa Odasefoi kala shishitsɔɔmɔ nɛɛ yɛ kpo kome mli. Akala nɔ ni je kpo yɛ afi 1961 lɛ mli akpe toi akpe kome. Ŋmɛnɛ, yibɔ ni akalaa lɛ eho akpekpei oha oti lɛ he, ni efee New World Translation lɛ Bibliai ni aja babaoo fe Bibliai krokomɛi fɛɛ yɛ je lɛŋ lɛ ateŋ ekome. Shi kɛlɛ, mɛni tsirɛ Odasefoi lɛ koni amɛto shishitsɔɔmɔ nɛɛ he gbɛjianɔ?

Mɛni Hewɔ Esa akɛ Aná Biblia Shishitsɔɔmɔ Hee?

Yɛ afii abɔ ni eho lɛ amli lɛ Yehowa Odasefoi kɛ Blɔfo Biblia shishitsɔɔmɔi srɔtoi babaoo etsu nii, bɔni afee ni amɛnyɛ amɛnu Ŋmalɛ Krɔŋkrɔŋ lɛ shishi koni amɛjaje emli sane lɛ. Yɛ be mli ni sɛɛnamɔ yɔɔ shishitsɔɔmɔi srɔtoi lɛ fɛɛ ahe lɛ, bei pii lɛ jamɔ mli kusumii kɛ Kristendom hemɔkɛyeli jajemɔi náa nɔ hewalɛ. (Mateo 15:6) No hewɔ lɛ Yehowa Odasefoi yɔse bɔ ni ehe ehia ni aná Biblia shishitsɔɔmɔ ko ni ja jogbaŋŋ ni kɛ nɔ ni yɔɔ shishijee niŋmaa ni jɛ mumɔŋ lɛ haa.

Atsu klɛŋklɛŋ nifeemɔ kɛha hiamɔ nii nɛɛ he nii yɛ October afi 1946 mli beni Nathan H. Knorr, ni ji Yehowa Odasefoi a-Nɔyeli Kuu lɛ mlinyo lɛ wo ŋaa koni akala Biblia shishitsɔɔmɔ hee lɛ. Yɛ December 2, afi 1947 lɛ, New World Bible Translation Committee lɛ to gbɛjianɔ koni amɛje shishitsɔɔmɔ ko ni baaye shishijee niŋmaa lɛ anɔkwale lɛ shishi, nɔ ni kɛ nibii heei ni woloŋlelɔi etsa shi amɛna ni abua naa kɛjɛ blema Biblia woji heei ni ana ni akɛ niji ŋmala lɛ amli lɛ baatsu nii, nɔ ni kɛ wiemɔ ni ŋmɛnɛŋmɛnɛ nikanelɔi nuɔ shishi jogbaŋŋ lɛ baatsu nii.

Beni akala—New World Translation of the Christian Greek Scriptures lɛ—klɛŋklɛŋ fã lɛ yɛ afi 1950 mli lɛ, ebafee faŋŋ akɛ shishitsɔɔlɔi lɛ etsu amɛyiŋtoi lɛ ahe nii. Biblia mli ŋmalɛi ni tsutsu ko lɛ anuuu shishi jogbaŋŋ lɛ bafee faŋŋ kɛmɔ shi. Ákɛ nɔkwɛmɔnɔ lɛ, susumɔ ŋmalɛ ni futuɔ mɔ yiŋ ni yɔɔ Mateo 5:3 lɛ he okwɛ, nɔ ni kɛɛ: “Ajɔɔ mumɔ lɛŋ ohiafoi lɛ.” (King James Version) Atsɔɔ shishi akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ.” Atsɔɔ bɔfo Paulo ŋaawoo ni atsɔɔ shishi akɛ “nyɛkwɛa jogbaŋŋ yakatswaa” (King James Version) lɛ shishi akɛ: “Nyɛkahaoa yɛ nɔ ko nɔ ko he.” (Filipibii 4:6) Ni bɔfo Yohane wiemɔ ni etsɛ yisɛɛ ni ji “bɔlɛnamɔ akɔnɔ ni mli wa lɛ” (Douay Version) kaneɔ akɛ, “heloo lɛ sɛɛdii lɛ.” (1 Yohane 2:16) Eyɛ faŋŋ akɛ, New World Translation lɛ gbele jeŋ hee shishinumɔ ko naa.

Woloŋlelɔi srɔtoi ná he miishɛɛ. Ákɛ nɔkwɛmɔnɔ lɛ, Britania woloŋlelɔ Alexander Thomson kɛɛ akɛ New World Translation lɛ nɔ bɛ yɛ bɔ ni etsɔɔ Hela wiemɔ ni tsɔɔ nifeemɔ ni tsaraa  nɔ lɛ mli pɛpɛɛpɛ eha lɛ. Ákɛ nɔkwɛmɔnɔ lɛ: Efesobii 5:25 lɛ kaneɔ akɛ “Wumɛi, nyɛyaa nɔ nyɛsumɔa nyɛ diɛŋtsɛ nyɛŋamɛi” yɛ nɔ najiaŋ ni eeekɛɛ kɛkɛ akɛ, “Wumɛi, nyɛsumɔa nyɛŋamɛi.” (King James Version) Thomson kɛɛ yɛ New World Translation lɛ he akɛ “shishitsɔɔmɔ kroko ko bɛ ni kɛ Hela wiemɔ ni tsɔɔ nifeemɔ ni tsaraa nɔ ni nɔ bɛ ni yeɔ emuu haa.”

Nɔ kroko ni sa kadimɔ waa yɛ New World Translation lɛ he ji bɔ ni ekɛ Nyɔŋmɔ diɛŋtsɛ gbɛi Yehowa lɛ tsu nii eha, yɛ Hebri kɛ Hela Ŋmalɛi lɛ fɛɛ amli. Akɛni Hebri gbɛi kɛha Nyɔŋmɔ lɛ jeɔ kpo shii 7,000 sɔŋŋ yɛ nɔ ni akɛɛ atsɛɔ lɛ Kpaŋmɔ Momo lɛ mli pɛ hewɔ lɛ, eyɛ faŋŋ akɛ wɔ-Bɔlɔ lɛ miitao ni ejálɔi kɛ egbɛi lɛ atsu nii koni amɛle lɛ akɛ mɔ pɔtɛɛ ko. (2 Mose 34:6, 7) New World Translation lɛ eye ebua mɛi akpekpei abɔ koni amɛfee nakai.

Aakala New World Translation lɛ yɛ Wiemɔi Babaoo Mli

Kɛjɛ be ni eje kpo yɛ Blɔfo wiemɔ mli lɛ, Yehowa Odasefoi ni yɔɔ je lɛŋ fɛɛ lɛ miishwe ni amɛnine ashɛ New World Translation lɛ nɔ yɛ amɛmaŋ wiemɔ mli—ni yɛ yiŋtoo kpakpa hewɔ. Yɛ maji komɛi anɔ lɛ, ewa akɛ nine aaashɛ shishitsɔɔmɔi ni yɔɔ maŋ lɛ mli wiemɔi amli lɛ nɔ ejaakɛ Bible Societies lɛ najiaŋdamɔlɔi ni jaa lɛ náaa he miishɛɛ akɛ amɛaana akɛ Bibliai ni yɔɔ maŋ lɛ mli wiemɔi amli ni amɛjaa lɛ baaya ayagbe naa yɛ Yehowa Odasefoi lɛ adɛŋ. Kɛfata he lɛ, bei pii lɛ Bibliai ni yɔɔ maŋbii lɛ awiemɔi amli nɛɛ tsimɔɔ tsɔɔmɔi ni he hiaa waa lɛ anɔ. Enɛ he nɔkwɛmɔnɔ titri ji shishitsɔɔmɔ ko ni yɔɔ Europa wuoyigbɛ wiemɔ ko mli lɛ ni kɛ Nyɔŋmɔ gbɛi lɛ toɔ kɛtsɔ Yesu wiemɔi akɛ “Ha ogbɛi lɛ he atse” ni ekɛ “Ha gbɔmɛi kɛ woo aha bo” bayeɔ najiaŋ lɛ nɔ.—Mateo 6:9.

Shishitsɔɔlɔi lɛ je New World Translation lɛ Blɔfo niŋmaa lɛ shishitsɔɔmɔ kɛmiiya wiemɔi krokomɛi amli yɛ afi 1961 mli. Afii enyɔ pɛ sɛɛ lɛ, agbe New World Translation of the Christian Greek Scriptures lɛ naa yɛ wiemɔi ekpaa krokomɛi amli. Yɛ nakai beaŋ lɛ, Odasefoi 4 fɛɛ 4 ni yɔɔ jeŋ muu lɛ fɛɛ amli mɛi 3 baanyɛ akane Biblia nɛɛ yɛ amɛ diɛŋtsɛ amɛwiemɔ mli. Ni kɛlɛ, ebiɔ ni afee babaoo kɛji Yehowa Odasefoi baanyɛ amɛha gbɔmɛi akpekpei babaoo aná Biblia nɛɛ eko.

Abɛŋkɛ nakai oti lɛ he kpaakpa yɛ afi 1989 mli beni ato Translation Services (Wiemɔ Shishitsɔɔmɔ Nitsumɔhe) lɛ shishi yɛ Yehowa Odasefoi ajeŋ fɛɛ nitsumɔhe yitso lɛ. Nakai nitsumɔhe lɛ to gbɛ ko ni atsɔɔ nɔ atsɔɔ nii ashishi ni kɛ Biblia mli wiemɔ lɛ kasemɔ yɛ kɔmpiuta nɔ lɛ he nilee yɔɔ tsakpaa. Nɛkɛ gbɛjianɔtoo nɛɛ kɛ nitsumɔ eha anyɛ atsɔɔ Kristofoi a-Hela Ŋmalɛi lɛ ashishi kɛtee wiemɔi krokomɛi amli yɛ afi mli kɛ Hebri Ŋmalɛi lɛ hu yɛ afii enyɔ mli—bei pii lɛ bei fioo ko pɛ he hiaa kɛha Biblia shishitsɔɔmɔ nitsumɔ lɛ. Kɛjɛ be ni ato nifeemɔ gbɛ nɛɛ he gbɛjianɔ lɛ, atsɔɔ New World Translation lɛ 29 shishi kɛjɛ Blɔfo wiemɔ mli ni ajie lɛ kpo yɛ wiemɔi ni gbɔmɛi ni fa fe akpekpei toi akpei enyɔ wieɔ amli. Amrɔ nɛɛ aatsu he nii yɛ wiemɔi krokomɛi 12 mli. Kɛbashi amrɔ nɛɛ, atsɔɔ Blɔfo New World Translation muu lɛ fɛɛ shishi loo efã ko shishi kɛtee wiemɔi krokomɛi 41 mli.

Nɔ ni fe afii 50 eho kɛjɛ beni ajie New World Translation lɛ klɛŋklɛŋ fã lɛ kpo yɛ August 3, afi 1950, yɛ Teokrase Shweremɔ Yehowa Odasefoi Akpee ni afee yɛ New York City lɛ shishi. Yɛ nakai nifeemɔ lɛ shishi lɛ, Nathan H. Knorr wo mɛi ni eba kpeei lɛ hewalɛ akɛ: “Nyɛŋɔa shishitsɔɔmɔ nɛɛ. Nyɛkanea mli, nɔ ko ni akɛ miishɛɛ baafee. Nyɛkasea, ejaakɛ  ebaaye ebua nyɛ koni nyɛnu Nyɔŋmɔ Wiemɔ lɛ shishi jogbaŋŋ. Nyɛjaa nyɛhaa mɛi krokomɛi.” Wɔmiiwo nyɛ hewalɛ koni nyɛkane Biblia lɛ daa, ejaakɛ emli wiemɔ lɛ baanyɛ aye abua nyɛ koni “nyɛkɛ nɔmimaa ni mli wa adamɔ shi shiŋŋ yɛ Nyɔŋmɔ suɔmɔnaa nii fɛɛ mli.”—Kolosebii 4:12, NW.

[Akrabatsa/Mfonirii ni yɔɔ baafa 8, 9]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

“New World Translation Srɔtoi ni Ajie lɛ Kpo”

Ákɛ nɔ ni ajie lɛ kpo klɛŋklɛŋ kwraa yɛ Blɔfo mli lɛ, amrɔ nɛɛ New World Translation muu loo efã ko yɛ wiemɔi 41 ni akɛfata he mli

Kristofoi a-Hela Ŋmalɛi Lɛ Biblia Muu lɛ Fɛɛ

1950 1

1960-69 6 5

1970-79 4 2

1980-89 2 2

1990-Ŋmɛnɛ 29 19