“Mikɛ Bo Baakpe yɛ Nyɔŋmɔ Maŋtsɛyeli lɛ Mli”

“Suɔmɔ Naanyo! Rupert, abu mi gbele fɔ ŋmɛnɛ. Kaaye awerɛho yɛ mihewɔ. Mikɛ misuɔmɔ ŋamɔ miimaje bo kɛ mɛi fɛɛ ni yɔɔ shia lɛ. Mikɛ bo baakpe yɛ Nyɔŋmɔ Maŋtsɛyeli lɛ mli.”

YƐ JUNE 8, 1942 mli lɛ, Franc Drozg ŋmala nɛkɛ wiemɔi nɛɛ etsɛɛɛ nɔŋŋ ni Nazi asraafoi lɛ gbe lɛ. Mɛni ha amɛgbe lɛ lɛ?

Taakɛ woji ni aŋmala ashwie shi ni yɔɔ Museum of National Liberation yɛ Maribor, Slovenia lɛ tsɔɔ lɛ, nɛkɛ dadesɔ̃lɔ ni eye afii 38 nɛɛ kpoo akɛ eeefata Wehrmannschaft, ni ji Germany asraafoi ni akɛ amɛ etee Slovenia ní Germany ebaŋɔ lɛ he. Eji Bibelforscher, loo Biblia Kaselɔ, taakɛ ale Yehowa Odasefoi lɛ yɛ nakai beaŋ lɛ. Akɛni ekɛ Yesaia 2:4 lɛ kpãa gbee hewɔ lɛ, efiii Nazi ta lɛ sɛɛ, ni etsɔɔ akɛ eji Nyɔŋmɔ Maŋtsɛyeli lɛ shishinyo.—Mateo 6:33.

Beni Franc yɔɔ emaŋ ni ji Ptuj lɛ, no mli lɛ ale lɛ akɛ Nyɔŋmɔ Maŋtsɛyeli lɛ he sanekpakpa jajelɔ ni yɔɔ ekãa. (Mateo 24:14) Yɛ jaramɔ shihilɛi babaoo ni ekɛkpe lɛ fɛɛ sɛɛ lɛ, eshiɛ sanekpakpa lɛ ní efɔɔɔ kɛyashi amɔ lɛ yɛ May 1942 mli.

Nazibii lɛ wa Sloveniabii ni amɛji Yehowa Odasefoi lɛ babaoo yi waa diɛŋtsɛ. Franc ji amɛteŋ klɛŋklɛŋ bii ni agbe amɛ yɛ amɛjamɔ mli hemɔkɛyelii hewɔ lɛ ateŋ mɔ kome. Taakɛ klɛŋklɛŋ afii oha lɛ mli Kristofoi lɛ ji lɛ, wiemɔi nɛɛ wo lɛ hewalɛ, akɛ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli.” (Bɔfoi lɛ Asaji 14:22) Hemɔkɛyeli ni eyɔɔ yɛ bɔ ni ŋwɛi nɔyeli lɛ ji nɔ ni yɔɔ diɛŋtsɛ lɛ je kpo yɛ enaagbee wiemɔi nɛɛ amli, akɛ, “Mikɛ bo baakpe yɛ Nyɔŋmɔ Maŋtsɛyeli lɛ mli.”

[He ni Mfoniri ni yɔɔ baafa 32 lɛ Jɛ]

Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia