Noa Hemɔkɛyeli lɛ Bu Je lɛ Fɔ

ANI onu Noa, ni ji nuu ni sheɔ Nyɔŋmɔ gbeyei, ni kpɛ adeka ko ni akɛbáa wala yi yɛ jeŋ fɛɛ nu afua ko mli lɛ he? Yɛ bɔ ni eji blema sane lɛ fɛɛ sɛɛ lɛ, mɛi akpekpei abɔ le nɛkɛ sane nɛɛ. Shi kɛlɛ, nɔ ni mɛi babaoo yɔseee ji akɛ, Noa shihilɛ lɛ hiɛ shishinumɔ ko kɛha wɔ fɛɛ.

Mɛni hewɔ esa akɛ wɔná sane ko ni ba afii akpei abɔ ni eho nɛ lɛ he miishɛɛ lɛ? Ani nɔ ko yɛ ni je amɛhe yɛ Noa be lɛ kɛ wɔ diɛŋtsɛ wɔnɔ lɛ he? Kɛ́ nɔ ko yɛ lɛ, te wɔɔfee tɛŋŋ wɔná enɔkwɛmɔnɔ lɛ he sɛɛ lɛ?

Noa Gbii lɛ Amli Je Lɛ

Biblia mli be he akɔntaabuu wieɔ Noa fɔmɔ he akɛ afɔ́ lɛ yɛ afi 2970 D.Ŋ.B.—Adam gbele sɛɛ afii 126. Beni shɛɔ Noa gbii lɛ amli lɛ, no mli lɛ shikpɔŋ lɛ nɔ eyi obɔ kɛ efɔŋfeemɔ sɔŋŋ, ni Adam shwiei lɛ ateŋ mɛi babaoo hala akɛ amɛbaanyiɛ amɛ blematsɛ ni baaa ejeŋ jogbaŋŋ lɛ nɔkwɛmɔnɔ lɛ sɛɛ. No hewɔ lɛ, “Yehowa na akɛ gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.”—1 Mose 6:5, 11, 12.

Jeee adesai atuatsemɔ lɛ pɛ kɛkɛ hewɔ ni Yehowa náaa amɛhe miishɛɛ lɛ. Sane ni yɔɔ Mose Klɛŋklɛŋ Wolo lɛ tsɔɔ mli akɛ: “Nyɔŋmɔ bihii lɛ yana akɛ gbɔmɛi abiyei lɛ ahe yɛ fɛo, ni amɛwɛwɛɛ amɛteaŋ yei fɛɛ ni amɛsumɔɔ. . . . No gbii lɛ amli lɛ oblaŋi agboi lɛ yɛ shikpɔŋ lɛ nɔ ni no sɛɛ hu, beni Nyɔŋmɔ bihii lɛ tee gbɔmɛi abiyei lɛ aŋɔɔ, ni amɛkɛ amɛ fɔfɔ́ɔ bii lɛ, amɛ nɔŋŋ amɛji kakalɔi ni yɔɔ gbɛi kɛjɛ blema beebe.” (1 Mose 6:2-4) Kɛ́ akɛ kukuji nɛɛ to wiemɔ ni bɔfo Petro ŋma lɛ he lɛ, etsɔɔ akɛ “Nyɔŋmɔ bihii lɛ” ji ŋwɛibɔfoi atuatselɔi. Nefilim lɛ ji bii ni ŋwɛibɔfoi ní tse amɛhe ni tsake amɛhe amɛkɔ gbɔmɔ su, ní amɛkɛ adesai ná bɔlɛ yɛ gbɛ ni ejaaa nɔ lɛ fɔ́.—1 Petro 3:19, 20.

“Nefilim,” ni eshishi ji “Asaabui” lɛ tsɔɔ aŋkroaŋkroi ni haa mɛi krokomɛi gbeɔ shi. Yiwalɔi ji amɛ, ni akɛ esha ni amɛtsɛmɛi ni akɔnɔ gbonyo ená amɛnɔ hewalɛ lɛ fee lɛ toɔ Sodom kɛ Gomora nɔ fɔŋ lɛ he. (Yuda 6, 7) Amɛfee ekome ni amɛkanya efɔŋfeemɔ ni asumɔɔɔ yɛ shikpɔŋ nɔ.

 “Eye Emuu yɛ Eyinɔbii lɛ Ateŋ”

No mli lɛ efɔŋfeemɔ ehe shi aahu akɛ Nyɔŋmɔ kpɛ eyiŋ akɛ ebaakpata adesai ahiɛ. Shi sane ni jɛ mumɔŋ ni aŋma afɔ̃ shi lɛ kɛɛ akɛ: “Noa hiɛ ba nyam yɛ Yehowa hiɛ. . . . Noa ji jalɔ, ni eye emuu yɛ eyinɔbii lɛ ateŋ; ni Noa kɛ Nyɔŋmɔ nyiɛ.” (1 Mose 6:8, 9) Te aaafee tɛŋŋ anyɛ akɛ ‘Nyɔŋmɔ anyiɛ’ yɛ jeŋ ni leee Nyɔŋmɔ ni sa hiɛkpatamɔ nɛɛ mli?

Ŋwanejee ko bɛ he akɛ, Noa kase nii babaoo kɛjɛ etsɛ Lamek, ni ji nuu ni yɔɔ hemɔkɛyeli, ni hi shi yɛ Adam beaŋ lɛ ŋɔɔ. Beni Lamek woɔ ebi lɛ gbɛi akɛ Noa (ní asusuɔ akɛ eshishi ji “Hejɔɔmɔ,” loo “Miishɛjemɔ”) lɛ, egba akɛ: “Mɔnɛ baashɛje wɔmii yɛ wɔnitsumɔi kɛ wɔnijiaŋ tɔlɛi lɛ ni jɛ shikpɔŋ lɛ loomɔ ni Yehowa elomɔ lɛ hewɔ lɛ mli.” Nakai gbalɛ lɛ ba mli beni Nyɔŋmɔ jie eloomɔ ni kã shikpɔŋ lɛ nɔ lɛ kɛtee lɛ.—1 Mose 5:29; 8:21.

Fɔlɔi ni sheɔ Nyɔŋmɔ gbeyei ni mɔ ko aaaná lɛ etsɔɔɔ akɛ ebaafee mumɔŋ gbɔmɔ, ejaakɛ esa akɛ mɔ aŋkro fɛɛ mɔ aŋkro aná lɛ diɛŋtsɛ ekɛ Yehowa teŋ wekukpaa. Noa ‘kɛ Nyɔŋmɔ nyiɛ’ kɛtsɔ gbɛ ni Nyɔŋmɔ kpɛlɛɔ nɔ ni ekɔ lɛ nɔ. Nɔ ni Noa kase yɛ Nyɔŋmɔ he lɛ tsirɛ lɛ koni esɔmɔ Lɛ. Beni aha Noa le Nyɔŋmɔ yiŋtoo ákɛ ‘ekɛ nu afua baakpata heloo fɛɛ hiɛ lɛ,’ hemɔkɛyeli ni eyɔɔ lɛ gbugbaaa.—1 Mose 6:13, 17.

Akɛni Noa ná hekɛnɔfɔɔ akɛ nɛkɛ hiɛkpatamɔ ni eko bako dã nɛɛ baaba hewɔ lɛ, ebo Yehowa famɔ nɛɛ toi: “Ŋɔɔ gofertso ofee adeka oha ohe, ni ofee tsũi yɛ adeka lɛ mli, ni owo emli kɛ ehe amã.” (1 Mose 6:14) Bɔ ni Nyɔŋmɔ taoɔ ní akpɛ adeka aha lɛ he ní aaashɛ lɛ jeee nitsumɔ bibioo. Ni kɛlɛ, “Noa fee nakai; bɔ ni Nyɔŋmɔ fã lɛ lɛ.” Yɛ anɔkwale mli lɛ, “nakai pɛpɛɛpɛ efee.” (1 Mose 6:22) Noa ŋa kɛ ebihii Shem, Ham, kɛ Yafet kɛ amɛŋamɛi lɛ ye amɛbua lɛ ni ekɛtsu enɛ. Yehowa jɔɔ nakai hemɔkɛyeli lɛ. Kwɛ nɔkwɛmɔnii fɛfɛo ní enɛ ji kɛha wekui ŋmɛnɛ!

Mɛni baanyɛ afata adeka lɛ kpɛɛ he? Yehowa fã Noa akɛ ekpɛ adeka ni nu nyɛŋ abote mli, ni hiɛ nsɔɔdoi etɛ, ni ekɛlɛ ji ninetalɔi 437 kɛ elɛɛmɔ ninetalɔi 73 kɛ ekwɔlɛ ninetalɔi 44. (1 Mose 6:15, 16) Kulɛ, abaanyɛ akɛ nakai lɛlɛ lɛ ato ŋmɛnɛŋmɛnɛ beaŋ lɛji srɔtoi ni hiɛ nakai da lɛ lɛ nɔŋŋ lɛ he.

Mɛɛ nitsumɔ kpeteŋkpele nɛ! Eka shi faŋŋ akɛ, enɛ tsɔɔ akɛ abaafolɔ tsei akpei abɔ ashwie shi, abaagbala amɛ kɛba nitsumɔhe lɛ, ni abaafolɔ mli afee lɛ ŋmoŋmolo loo tsei bibii. Enɛ tsɔɔ akɛ abaafee tsei ni akɛmamɔɔ atswere kɛyaa ŋwɛi gbɛ fiofio, abaafee tso plɛkoi, abaatao amã ni akɛbaakpa mli koni nu akanyɛ ebote mli, ni abaatao niloomɔ nii kɛ dɛŋdadei, kɛ ekrokomɛi. Ekolɛ nitsumɔ lɛ baabi ni akɛ guɔyelɔi aná yelikɛfuamɔi ni awo nibii kɛ nitsumɔ ni atsu lɛ ahe nyɔmɔ. Eka shi faŋŋ akɛ, ebaabi ni amɛná kapintɛ nitsumɔ lɛ mli ŋaalee bɔni afee ni amɛkɛ tsei lɛ ahɔlɔ mli jogbaŋŋ ni amɛma adeka ni ená hewalɛ waa. Ni bo lɛ susumɔ he okwɛ—ekolɛ adeka lɛ kpɛɛ lɛ he aaafee afii 50 loo 60!

No sɛɛ lɛ, esa akɛ Noa agbala ejwɛŋmɔ kɛya niyenii ni fa bɔ ni sa kɛ kooloi aniyenii  ní eeetao lɛ nɔ. (1 Mose 6:21) Esa akɛ ebua kooloi srɔtoi lɛ anaa ní ekudɔ amɛ ewo adeka lɛ mli. Noa tsu nibii fɛɛ ni Nyɔŋmɔ efã lɛ lɛ, ni egbe nitsumɔ lɛ naa. (1 Mose 6:22) Yehowa jɔɔmɔ ha egbe naa yɛ omanyeyeli mli.

“Jalɛ Shiɛlɔ”

Yɛ adeka lɛ kpɛɛ sɛɛ lɛ, Noa bɔ kɔkɔ ni esɔmɔ Nyɔŋmɔ yɛ anɔkwayeli mli akɛ “jalɛ shiɛlɔ.” Shi gbɔmɛi lɛ ‘ahiɛ bɛ amɛhe nɔ kɛyashi nu afua lɛ baloo amɛ fɛɛ kɛtee.’—2 Petro 2:5; Mateo 24:38, 39.

Kɛ́ wɔsusu bɔ ni nakai gbii lɛ amli bii lɛ amumɔŋ shihilɛ kɛ jeŋba ekpɔtɔ eha lɛ he lɛ, ewaaa kwraa akɛ wɔɔna bɔ ni Noa weku lɛ baanyɛ afee mɛi ni akutsoŋbii ní bɛ hemɔkɛyeli lɛ ŋmɔɔ amɛ kɛ mɛi ni afeɔ amɛ niseniianii ni ayeɔ amɛhe fɛo. Ekolɛ gbɔmɛi susu akɛ amɛye sɛkɛ. Shi kɛlɛ, Noa ye omanye yɛ mumɔŋ hewalɛwoo kɛ yelikɛbuamɔ ni ekɛha eshiabii lɛ gbɛfaŋ, ejaakɛ amɛkɔɔɔ awuiyeli, jeŋba shara, kɛ atuatsemɔ gbɛ̀i ni amɛyinɔbii ni leee Nyɔŋmɔ lɛ kɔ lɛ eko. Noa tsɔ ewiemɔ kɛ enifeemɔi, ni jie hemɔkɛyeli ni eyɔɔ lɛ kpo lɛ nɔ ebu ebe lɛ mli je lɛ fɔ́.—Hebribii 11:7.

Abaa Amɛyi Kɛtsɔ Nu Afua lɛ Mli

Beni eshwɛ fioo ni nu afua lɛ baaje shishi lɛ, Nyɔŋmɔ kɛɛ Noa koni ebote adeka ni egbe naa lɛ mli. Beni Noa weku lɛ kɛ kooloi lɛ bote adeka lɛ mli lɛ, “Yehowa ŋa eyi,” koni ekɛtsĩ hefɛoyelɔi lɛ naa. Beni Nu Afua lɛ ba lɛ, eka shi faŋŋ akɛ ŋwɛibɔfoi toigbolɔi lɛ tsake amɛgbɔmɔtso su lɛ ni amɛjo hiɛkpatamɔ lɛ naa foi. Shi mɛi krokomɛi lɛ hu? Bɔɔ nii fɛɛ ni hiɛ kã, ni hiɔ shikpɔŋ gbiŋ nɔ, ni bɛ adeka lɛ mli, ni Nefilim lɛ fata he lɛ ahiɛ kpata! Noa kɛ eweku lɛ pɛ yi abaa.—1 Mose 7:1-23.

Noa kɛ eshiabii lɛ ye nyɔŋtsere afi kɛ gbii nyɔŋma yɛ adeka lɛ mli. No mli lɛ, amɛbɛ dekã kɛmiiha kooloi lɛ aniyenii kɛ nu, amɛmiibɛɛ amɛshishi, ni amɛmiikane be lɛ. Mose Klɛŋklɛŋ Wolo lɛ etsɔɔ be kɛ nibii ni ba yɛ Nu Afua lɛ mli lɛ fɛɛ fitsofitso, tamɔ lɛlɛ mli wolo ko ni akɛkadiɔ be, ni ejie bɔ ni sane lɛ ja ha lɛ kpo.—1 Mose 7:11, 17, 24; 8:3-14.

Beni Noa yɔɔ adeka lɛ mli lɛ, ŋwanejee ko bɛ he akɛ enyiɛ eweku lɛ hiɛ yɛ mumɔŋ sanegbaai  amli, ni amɛda Nyɔŋmɔ shi. Eka shi faŋŋ akɛ, kɛtsɔ Noa kɛ eweku lɛ nɔ lɛ, abaa yinɔsane ni tsɔ Nu Afua lɛ hiɛ lɛ yi. Blema saji ni akɛ naabu jaje ni anyɛɔ akɛ he fɔ̃ɔ nɔ, loo yinɔsaji ni aŋmala ni amɛhiɛ lɛ baaha amɛnyɛ amɛsusu saji ni he yɔɔ sɛɛnamɔ lɛ ahe yɛ Nu Afua be lɛ mli.

Kwɛ miishɛɛ ni Noa kɛ eweku lɛ baaná beni amɛnyiɛ shikpɔŋ gbiŋ nɔ ekoŋŋ lɛ nɛkɛ! Klɛŋklɛŋ nii ni efee ji akɛ, ema afɔleshaa latɛ ni esɔmɔ ákɛ osɔfo yɛ eweku lɛ gbɛfaŋ, ni eshã afɔlei eha Mɔ ni báa amɛyi lɛ.—1 Mose 8:18-20.

“Bɔ ni Noa Gbii lɛ Fee Lɛ”

Yesu Kristo kɛɛ akɛ: “Bɔ ni Noa gbii lɛ fee lɛ, nakai gbɔmɔ bi lɛ baa lɛ hu baatamɔ.” (Mateo 24:37) Ŋmɛnɛ, Kristofoi hu ji jalɛ shiɛlɔi, ni amɛmiiwo mɛi hewalɛ koni amɛtsake amɛtsui. (2 Petro 3:5-9) Yɛ bɔ ni shihilɛi lɛ je amɛhe lɛ hewɔ lɛ, ekolɛ wɔbaasusu nɔ ni tee nɔ yɛ Noa jwɛŋmɔ mli dani Nu Afua lɛ shɛ lɛ he. Ani enu he be ko akɛ sɛɛnamɔ ko bɛ eshiɛmɔ lɛ he? Ani bei komɛi lɛ enu he akɛ etɔ lɛ? Biblia lɛ ekɛɛɛ wɔ. Ekɛɔ wɔ kuku kɛkɛ akɛ Noa bo Nyɔŋmɔ toi.

Ani oona bɔ ni wɔbaanyɛ wɔkɛ Noa shihilɛ lɛ ato wɔgbii lɛ ahe lɛ? Ebo Yehowa toi, yɛ shitee-kɛ-woo kɛ jaramɔ be ni mli wa lɛ fɛɛ sɛɛ. Enɛ hewɔ ni Yehowa bu lɛ jalɔ lɛ. Noa weku lɛ leee be pɔtɛɛ ni Nyɔŋmɔ kɛ Nu Afua lɛ baaba, shi amɛle akɛ ebaaba. Hemɔkɛyeli ni Noa yɔɔ yɛ Nyɔŋmɔ wiemɔ lɛ mli lɛ báa eyi kɛtsɔ tɔlɛ afii lɛ, kɛ nɔ ni ekolɛ etamɔ shiɛmɔ ni wooo yibii lɛ mli. Yɛ anɔkwale mli lɛ, akɛɔ wɔ akɛ: “Hemɔkɛyeli Noa hu kɛbu Nyɔŋmɔ, beni efã lɛ yɛ nii ní anako lɛ ahewɔ lɛ, ni ekɛsaa adeka eha ewe lɛ yiwalaheremɔ, no nɔ hu etsɔ ni ebu je nɛŋ fɔ, ni etsɔ hemɔkɛyeli naa jalɛ lɛ yelɔ lɛ.”—Hebribii 11:7.

Te fee tɛŋŋ Noa ná nakai hemɔkɛyeli lɛ? Eka shi faŋŋ akɛ, ehe be ni ekɛsusu nɔ fɛɛ nɔ ni ele yɛ Yehowa he lɛ he, ni eha nakai nilee lɛ kudɔ lɛ. Ŋwanejee ko bɛ he akɛ, Noa kɛ Nyɔŋmɔ wie yɛ sɔlemɔ mli. Yɛ anɔkwale mli lɛ, ebale Yehowa jogbaŋŋ aahu akɛ ‘ekɛ Nyɔŋmɔ nyiɛ.’ Ákɛ weku yitso lɛ, Noa kɛ miishɛɛ tuu ebe kɛ ehe eha eweku lɛ ni ejɛ suɔmɔ mli ni egbala ejwɛŋmɔ kɛba amɛnɔ. Nɔ ni fata enɛ he ji eŋa lɛ, ebihii etɛ lɛ, kɛ eshaayei lɛ amumɔŋ hiamɔ nii ahe nitsumɔ.

Taakɛ Noa ji lɛ, anɔkwa Kristofoi le ŋmɛnɛ akɛ etsɛŋ ni Yehowa kɛ nibii agbɛjianɔtoo ni leee Nyɔŋmɔ nɛɛ baaba naagbee. Wɔleee nakai gbi lɛ loo ŋmɛlɛtswaa lɛ, shi wɔle akɛ kɛ́ wɔkase nɛkɛ “jalɛ shiɛlɔ” nɛɛ hemɔkɛyeli kɛ toiboo lɛ, nɔ ni baajɛ mli aba ji ‘wɔsusumai ayiwalaheremɔ.’—Hebribii 10:36-39.

[Akrabatsa ni yɔɔ baafa 29]

Ani Eba Mli Lɛɛlɛŋ?

Adesai ashihilɛ he nikaselɔi ebua nu afua lɛ he adesãi 270 naa kɛjɛ nɔ ni miihe ashɛ akutsei kɛ maji fɛɛ amli. Woloŋlelɔ Claus Westermann kɛɛ akɛ: “Anaa nu afua lɛ he sane yɛ je lɛŋ he fɛɛ he. Taakɛ adebɔɔ mli sane lɛ ji lɛ, eji wɔhiŋmɛigbelemɔ gboshinii lɛ fã. Eyɛ naakpɛɛ lɛɛlɛŋ: wɔnaa saji ni kɔɔ blema nu afua kpeteŋkpele ko he yɛ shikpɔŋ lɛ nɔ he fɛɛ he.” Mɛni ji shishitsɔɔmɔ ni yɔɔ he? Saji amlitsɔɔlɔ Enrico Galbiati kɛɛ akɛ: “Bɔ ni nu afua lɛ he sane lɛ jeɔ kpo shii abɔ yɛ gbɔmɛi ni egbɛ eshwã lɛ ateŋ lɛ tsɔɔ akɛ eji yinɔsane mli anɔkwa sane ni nakai blema saji lɛ fɛɛ damɔ nɔ.” Shi kɛlɛ, nɔ ni he hiaa Kristofoi waa fe nɔ ni woloŋlelɔi ekɛɛ lɛ ji le ni wɔle akɛ Yesu diɛŋtsɛ wie Nu Afua lɛ he ákɛ adesai ayinɔsane mli anɔkwa nifeemɔ ko lɛ.—Luka 17:26, 27.

[Akrabatsa ni yɔɔ baafa 30]

Nefilim lɛ Yɛ Blema Saji Amli?

Ale adesãi ni kɔɔ wekukpaa ni kã nyɔŋmɔi kɛ adesai ateŋ—kɛ “kakalɔi” loo “nyɔŋmɔi bibii” ni afɔ amɛ kɛjɛ mɛi enyɔ nɛɛ ateŋ lɛ—waa yɛ Hela, Mizraim, Ugarit, Hurria, kɛ Mesopotamia jamɔ he nikasemɔi amli. Hela blema adesãi amli Nyɔŋmɔi lɛ hiɛ adesai asu ni amɛhe yɛ fɛo waa. Amɛyeɔ nii, amɛnuɔ dãa, amɛwɔɔ, amɛnáa bɔlɛ, amɛbéiɔ, amɛnɔɔ, amɛlakaa mɔ, ni amɛtoɔ kabonaa. Eyɛ mli akɛ asusuɔ akɛ amɛyɛ krɔŋkrɔŋ moŋ, shi amɛnyɛɔ amɛlakaa mɔ ni amɛyeɔ mɔ awui. Awieɔ kakalɔi ni tamɔ Achilles he akɛ amɛji bii ní nyɔŋmɔi lɛ kɛ adesai fɔ́, ni aha amɛ nyɛmɔ ni fe adesai anɔ, shi jeee shihilɛ ni gbele bɛ mli. No hewɔ lɛ, nɔ ni Mose Klɛŋklɛŋ Wolo lɛ kɛɔ yɛ Nefilim lɛ ahe lɛ haa wɔnyɛɔ wɔnaa he ni ebaanyɛ efee akɛ nɛkɛ blema adesãi nɛɛ ashishijee jɛ.