Sanebimɔi ni Jɛ Kanelɔi Adɛŋ

Te onufu ni yɔɔ Eden abɔɔ lɛ mli lɛ fee tɛŋŋ ekɛ susumɔ ha Hawa akɛ eku Nyɔŋmɔ mla ni kɔɔ ekpakpa kɛ efɔŋ lee tso lɛ yibii ni agu eyeli lɛ he lɛ mli lɛ?

Mose Klɛŋklɛŋ Wolo 3:1 lɛ kɛɔ akɛ: “Shi onufu le ŋaa fe ŋã nɔ kooloi fɛɛ ni Yehowa Nyɔŋmɔ fee lɛ, ni ekɛɛ yoo lɛ akɛ: Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Ahiɛ susumɔi srɔtoi yɛ gbɛ ni ekolɛ, onufu lɛ nyɛ etsɔ nɔ ekɛ Hawa wie lɛ he. Susumɔ kome ji akɛ, efee enɛ kɛtsɔ gbɔmɔtso kɛ nitsumɔ loo gbɔmɔtso henii ni akɛmaa sane nɔ mi lɛ nɔ. Ákɛ nɔkwɛmɔnɔ lɛ, Ŋleshi osɔfo Joseph Benson wie he akɛ: “Etamɔ nɔ ni eka shi faŋŋ akɛ, efee enɛ kɛtsɔ okadi su ko nɔ. Yɛ anɔkwale mli lɛ, mɛi komɛi esusu akɛ no mli lɛ, ale akɛ jwɛŋmɔŋ nyɛmɔ kɛ wiemɔi ji onufui asui komɛi ni ale waa, . . . shi abɛ odaseyeli ko yɛ enɛ he.”

Shi kɛlɛ, kɛtsɔ gbɔmɔtso kɛ nitsumɔ kɛkɛ nɔ lɛ, te onufu lɛ aaafee tɛŋŋ ekɛ susumɔ lɛ aha Hawa akɛ kɛ́ eye tso yibii ni agu eyeli lɛ, ebaatsɔ tamɔ Nyɔŋmɔ, ni ebaanyɛ ekpɛ eyiŋ yɛ ekpakpa kɛ efɔŋ he lɛ? Kɛfata he lɛ, Hawa kɛ ehe wo sanegbaa lɛ mli, ni eha sanebimɔ ni onufu lɛ tee lɛ shi lɛ hetoo. (1 Mose 3:2-5) Susumɔ ni ahiɛ akɛ onufu lɛ kɛ okadii loo gbɔmɔtso pɛ tsu nii lɛ baaha amu sane naa akɛ Hawa ha hetoo kɛtsɔ egbɔmɔtso lɛ kɛ nitsumɔ nɔ, yɛ be mli ni Biblia lɛ kɛɔ akɛ ewie lɛ.

Beni bɔfo Paulo wieɔ sane nɛɛ he lɛ, ebɔ nanemɛi Kristofoi lɛ kɔkɔ akɛ: “Miishe gbeyei akɛ aleee nɔ, taakɛ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi.” Oshara ni Paulo wie he lɛ jɛ “amale bɔfoi, nitsulɔi shishiulɔi” aŋɔɔ. Nibii ni “bɔfoi agboi” lɛ wie lɛ baaa kɛtsɔ gbɔmɔtso kɛ nitsumɔ kɛ ninefɔɔ ni akɛmaa sane nɔ mi pɛ kɛkɛ nɔ. Nɔ ni fata he ji amɛwiemɔi—amɛ kutumpɔo wiemɔi, ni amɛwieɔ ni amɛkɛlakaa mɛi krokomɛi lɛ.—2 Korintobii 11:3-5, 13.

Eyɛ mli akɛ akɛ wiemɔi tsu nii ni akɛlaka Hawa yɛ Eden abɔɔ lɛ mli moŋ, shi nɔ ko bɛ ni aaadamɔ nɔ asusu akɛ onufu diɛŋtsɛ yɛ sɛ̃kpãa. Ehe ehiaaa lɛ. Beni Nyɔŋmɔ bɔfo lɛ kɛ Bileam wie kɛtsɔ teji yoo lɛ nɔ lɛ, no mli lɛ ehe ehiaaa ni kooloo lɛ ana sɛ̃ tso ni tamɔ adesa nɔ̃. (4 Mose 22:26-31) Eka shi faŋŋ akɛ, beni “teji ni leee wiemɔ lɛ kɛ gbɔmɔ gbee wie” lɛ, no mli lɛ hewalɛ ni ha ewie lɛ jɛ mumɔi ashihilɛhe lɛ.—2 Petro 2:16.

Awie mumɔŋ bɔɔ nɔ ni hɔ onufu ni kɛ Hawa wie lɛ sɛɛ lɛ he yɛ Biblia lɛ mli akɛ “blema onufu lɛ ní atsɛɔ lɛ diabolo [naafolɔlɔ loo abonsam] lɛ kɛ satan [henyɛlɔ] lɛ.” (Kpojiemɔ 12:9) Wiemɔi ni gbɛɛɔ ni Hawa nu ni ehere nɔ lɛ ba yɛ Satan, ni “tsakeɔ ehe etsɔɔ la bɔfo” lɛ hewalɛ naa.—2 Korintobii 11:14.

[Mfoniri ni yɔɔ baafa 27]

“Nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ”