Yehowa Ji Wɔbobaahe
Yehowa Ji Wɔbobaahe
“Ejaakɛ bo, Yehowa, ji mibobaahe! . . . Efɔŋ ko efɔŋ ko baŋ onɔ.”—LALA 91:9, 10.
1. Mɛni hewɔ wɔbaanyɛ wɔkɛɛ akɛ Yehowa ji wɔbobaahe lɛ?
YEHOWA ji anɔkwa abobaahe kɛha ewebii lɛ. Kɛ́ wɔjɔɔ wɔhe nɔ kwraa wɔha lɛ lɛ, no lɛ ekolɛ ‘afĩfĩaa wɔ yɛ gbɛ fɛɛ gbɛ nɔ, shi kɛlɛ wɔtsui esuuu; wɔfeɔ yeyeeye, shi kɛlɛ wɔnijiaŋ ejeko wui; awaa wɔ yi, shi kɛlɛ akwako wɔ; atswiaa wɔ shi, shi kɛlɛ wɔpleneeko.’ Mɛni hewɔ? Ejaakɛ Yehowa haa wɔ “hewalɛ ní fá kɛteke nɔ.” (2 Korintobii 4:7-9) Hɛɛ, wɔ ŋwɛi Tsɛ lɛ yeɔ ebuaa wɔ koni wɔhi Nyɔŋmɔ gbeyeishemɔ shihilɛ mli, ni wɔbaanyɛ wɔná miishɛjemɔ kɛjɛ lalatsɛ lɛ wiemɔi nɛɛ amli: “Ejaakɛ bo, Yehowa, ji mibobaahe! Oŋɔ Ŋwɛinyo lɛ ofee oshihilɛhe. Efɔŋ ko efɔŋ ko baŋ onɔ.”—Lala 91:9, 10.
2. Mɛni abaanyɛ awie yɛ Lala 91 lɛ kɛ shiwoo ní ekɛhaa lɛ he?
2 Ekolɛ Mose ji mɔ ni ŋmala nakai Lala 91 lɛ mli wiemɔi lɛ. Lala 90 lɛ yiteŋgbɛ niŋmaa lɛ tsĩɔ etã akɛ mɔ ni ŋma, ni Lala 91 lɛ nyiɛɔ no sɛɛ nɔŋŋ ní wiemɔ ko efooo lalai enyɔ lɛ ateŋ ní eetsĩ niŋmalɔ kroko tã. Ekolɛ alá Lala 91 lɛ ákɛ lala kɛ enɔheremɔ; ni ji akɛ, ekolɛ mɔ kome lá klɛŋklɛŋ (91:1, 2), ni lalɔi akuu ko here nɔ (91:3-8). Eeenyɛ efee akɛ anu lalɔ kome pɛ gbee kɛnyiɛ no sɛɛ (91:9a) ni no sɛɛ lɛ kuu ko here nɔ (91:9b-13). Kɛkɛ ni no sɛɛ lɛ lalɔ kome lá naagbee wiemɔi ní eshwɛ lɛ fɛɛ (91:14-16). Bɔ fɛɛ bɔ ni eji lɛ, Lala 91 lɛ kɛ shweshweeshwefeemɔ he shiwoo haa Kristofoi ní afɔ amɛ mu lɛ akɛ kuu, ni ekɛ shiwoo ní tamɔ nakai nɔŋŋ haa amɛhefatalɔi ní ejɔɔ amɛhe nɔ lɛ hu akɛ kuu. * Nyɛhaa wɔsusua lala nɛɛ he kɛjɛa Yehowa tsuji nɛɛ fɛɛ ashishinumɔ naa wɔkwɛa.
Wɔyɛ Shweshweeshwe yɛ ‘Nyɔŋmɔ Teemɔhe Lɛ’
3. (a) Mɛni ji “Ŋwɛinyo lɛ teemɔhe lɛ”? (b) Mɛni mli ŋɔɔmɔ wɔnáa kɛji ‘wɔhi Ofe lɛ hɔ̃ɔŋ lɛ shishi’?
3 Lalatsɛ lɛ lá akɛ: “Mɔ ni hiɔ Ŋwɛinyo lɛ teemɔhe lɛ, eeehi Ofe lɛ hɔ̃ɔŋ lɛ shishi. Makɛɛ Yehowa akɛ: Mibobaahe kɛ mimɔɔ jio, mi-Nyɔŋmɔ hu ní mihiɛ kã enɔ!” (Lala 91:1, 2) “Ŋwɛinyo lɛ teemɔhe lɛ” ji mfonirifeemɔŋ hebuuhe kɛha wɔ, ni titri lɛ kɛha mɛi ní afɔ amɛ mu lɛ, ni ji mɛi ní Abonsam tutuaa amɛ yɛ gbɛ krɛdɛɛ nɔ lɛ. (Kpojiemɔ 12:15-17) Kɛ́ jeee hebuu ní wɔnáa akɛ mɛi ní kɛ Nyɔŋmɔ hiɔ shi akɛ mumɔŋ gbɔi kulɛ, ebaakpata wɔ fɛɛ wɔhiɛ. Akɛni ‘wɔhiɔ Ofe lɛ hɔ̃ɔŋ lɛ shishi’ hewɔ lɛ, wɔnáa Nyɔŋmɔ hɔ̃ɔŋ, loo susuma ní buɔ mɔ he lɛ mli ŋɔɔmɔ. (Lala 15:1, 2; 121:5) He ko bɛ ní yɔɔ shweshweeshwe, loo eji mɔɔ ní wa fe wɔ-Nuntsɔ Maŋtsɛ, Yehowa.—Abɛi 18:10.
4. Mɛɛ ŋaa gbɛ̀i “loofɔlɔdũlɔ,” Satan kɛtsuɔ nii, ni te wɔfeɔ tɛŋŋ wɔjeɔ mli hu?
4 Lalatsɛ lɛ kɛfata he akɛ: “Ejaakɛ lɛ [Yehowa] ebaajieo kɛjɛ loofɔlɔdũlɔ tsɔne mli, kɛ gbele hela ní naa wa lɛ mli.” (Lala 91:3) Bei pii lɛ blema Israel loofɔlɔdũlɔ lɛ kɛ tsɔnei loo akpái tsuɔ nii ni ekɛdũɔ loofɔji. Tsɔnei ní “loofɔlɔdũlɔ,” Satan kɛtsuɔ nii lɛ ekomɛi ji egbɛjianɔtoo fɔŋ lɛ kɛ “ŋaatsɔɔi ní yɔɔ nigii” lɛ. (Efesobii 6:11, NW shishigbɛ niŋmaa) Ekɛ tsɔnei ní ekɛtée lɛ mamɔɔ wɔgbɛ nɔ koni ekɛlaka wɔ kɛya efɔŋfeemɔ mli ní ekɛye wɔ awui yɛ mumɔŋ. (Lala 142:4) Ni kɛlɛ, akɛni wɔkwa efɔŋfeemɔ kwraa hewɔ lɛ, ‘wɔsusuma tamɔ loofɔlɔ ní eje loofɔlɔdũlɔ tsɔne mli.’ (Lala 124:7, 8) Kwɛ bɔ ni wɔdaa Yehowa shi babaoo akɛ ejieɔ wɔ kɛjɛɔ “loofɔlɔdũlɔ” fɔŋ lɛ dɛŋ!—Mateo 6:13.
5, 6. Mɛɛ “gbele hela” kɛ shihilɛ “ní naa wa” eba, shi mɛni hewɔ Yehowa webii eŋmɛɛɛ amɛhe amɛhaaa no lɛ?
5 Lalatsɛ lɛ tsĩ “gbele hela ní naa wa” tã. Taakɛ tsɛŋemɔ hela ní gbɛɔ eshwãa lɛ ji lɛ, nɔ ko yɛ ní “naa wa” waa kɛha adesai aweku lɛ kɛ mɛi fɛɛ ní fiɔ Yehowa maŋtsɛyeli lɛ sɛɛ lɛ. Yɛ enɛ gbɛfaŋ lɛ, yinɔsaneŋmalɔ Arnold Toynbee ŋma akɛ: “Kɛjɛ Jeŋ Ta II sɛɛ kɛbaa nɛɛ, maŋhedɔɔ eha maji ní yɔɔ heyeli ní amɛkɛyeɔ amɛ diɛŋtsɛ amɛhe nɔ lɛ eku ebɔ he toi enyɔ . . . Adesa su ní eyɔɔ bianɛ lɛ kɛ mligbalamɔ babaoo miiba.”
6 Yɛ afii ohai abɔ ní eho lɛ mli fɛɛ lɛ, nɔyelɔi komɛi eha mligbalamɔ ní kɛ majimaji ateŋ béi kɛ nɔmɔ baa lɛ mli ewo wu. Amɛbi hu ní akɛ woo kɛ jamɔ aha amɛ loo akɛha amagai loo okadii srɔtoi. Shi Yehowa hako ewebii anɔkwafoi lɛ aŋmɛɛ amɛhe amɛha nɛkɛ “gbele hela” nɛɛ dã. (Daniel 3:1, 2, 20-27; 6:7-10, 16-22) Ákɛ majimaji ateŋ nyɛmifeemɔ ní yɔɔ suɔmɔ lɛ, wɔkɛ hetuu-kɛhamɔ fɛɛ haa Yehowa kome pɛ, ni wɔhiɛɔ wɔhe ní wɔkɛwooo maŋ saji amli, ní damɔ Ŋmalɛ nɔ lɛ mli, ni wɔkpɛlɛɔ nɔ yɛ gbɛ ní hiɛaŋkwɛmɔ bɛ mli nɔ akɛ “maŋ fɛɛ maŋ mli lɛ, mɔ ni sheɔ [Nyɔŋmɔ] gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35; 2 Mose 20:4-6; Yohane 13:34, 35; 17:16; 1 Petro 5:8, 9) Eyɛ mli akɛ wɔnaa amanehului “ní naa wa” tamɔ yiwaa ní akɛbaa wɔnɔ ákɛ Kristofoi lɛ moŋ, shi wɔnáa miishɛɛ ni wɔyɛ shweshweeshwe yɛ mumɔŋ “yɛ Ŋwɛinyo lɛ teemɔhe lɛ.”
7. Yehowa kɛ “etsɛji” buɔ wɔhe yɛ mɛɛ gbɛ nɔ?
7 Akɛni Yehowa ji wɔbobaahe hewɔ lɛ, wɔnáa miishɛjemɔ kɛjɛɔ wiemɔi nɛɛ amli, akɛ: “Ekɛ etsɛji aaaha onɔ, ni oooba abo yɛ efiji ashishi; tsɛŋ kɛ dama ji enɔkwale lɛ.” (Lala 91:4) Nyɔŋmɔ buɔ wɔhe, tamɔ bɔ ni loofɔlɔ nyɛ filikiɔ yɛ ebii anɔ kɛbuɔ amɛhe lɛ. (Yesaia 31:5) ‘Ekɛ etsɛji haa wɔnɔ.’ Kɛ́ aalɛɛ eshishinumɔ mli lɛ, loofɔlɔ tsɛji lɛ ji efiji lɛ. Loofɔlɔ kɛ no haa ebii anɔ, ni ekɛbuɔ amɛhe kɛjɛɔ kooloi ní mɔmɔɔ amɛ lɛ ahe. Taakɛ loofɔlɔ bii ji lɛ, wɔyɛ shweshweeshwe yɛ Yehowa mfonirifeemɔŋ tsɛji lɛ ashishi ejaakɛ wɔyaba abo yɛ enɔkwa Kristofoi asafo lɛ mli.—Rut 2:12; Lala 5:2, 12.
8. Yehowa ‘anɔkwale’ lɛ ji tsɛŋ agbo kɛ gbogbo ní wa yɛ mɛɛ gbɛ nɔ?
8 Wɔkɛ wɔhe fɔ̃ɔ ‘anɔkwale,’ loo anɔkwayeli nɔ. Etamɔ blema beaŋ tsɛŋ agbo ko, ni bei pii lɛ esu tamɔ shinaa su, ni eda bɔ ni sa, ni enyɛɔ etsĩɔ mɔ gbɔmɔtso muu lɛ fɛɛ hiɛ. (Lala 5:13) Hekɛnɔfɔɔ ní wɔyɔɔ yɛ hebuu ní tamɔ nɛkɛ mli lɛ haa wɔyeɔ wɔhe kɛjɛɔ gbeyeishemɔ mli. (1 Mose 15:1; Lala 84:12) Taakɛ wɔhemɔkɛyeli lɛ ji lɛ, Nyɔŋmɔ anɔkwayeli lɛ ji hebuu tsɛŋ agbo ní tsĩɔ Satan gãimlibii ní tsoɔ lɛ anaa, ni etswaa henyɛlɔ lɛ tutuamɔi efɔ̃ɔ afã. (Efesobii 6:16) Eji gbogbo hu, ni ji hebuu afabaŋ ní he wa, ní wɔdamɔɔ shi shiŋŋ yɛ esɛɛ.
‘Wɔsheŋ Gbeyei’
9. Mɛni hewɔ nyɔɔŋ mli baanyɛ afee be ni yɔɔ gbeyei waa lɛ, shi mɛni hewɔ wɔsheee gbeyei lɛ?
9 Yɛ hebuu ní Nyɔŋmɔ kɛhaa lɛ hewɔ lɛ, lalatsɛ lɛ wie akɛ: “Osheŋ nyɔɔŋ ŋmiŋmi gbeyei, loo gãimlibi ní filikiɔ shwane lɛ, loo gbele hela ní nyiɛɔ duŋ mli lɛ, loo tsɛŋemɔ hela ní kpataa mɔ hiɛ shwane lɛ.” (Lala 91:5, 6) Akɛni afeɔ nibii fɔji pii yɛ duŋ mli hewɔ lɛ, nyɔɔŋ be mli baanyɛ afee be ní yɔɔ gbeyei waa diɛŋtsɛ. Bei pii lɛ, wɔhenyɛlɔi lɛ kɛ amɛhe woɔ teemɔŋ nifeemɔi komɛi amli, yɛ mumɔŋ duŋ ní ehà shikpɔŋ lɛ nɔ bianɛ lɛ mli, ni amɛbɔɔ mɔdɛŋ ní amɛkɛfite wɔ mumɔŋ shidaamɔ, ní amɛkɛtsĩ wɔ shiɛmɔ nitsumɔ lɛ naa. Shi ‘wɔsheee nyɔɔŋ ŋmiŋmi ko gbeyei’ ejaakɛ Yehowa buɔ wɔhe.—Lala 64:2, 3; 121:4; Yesaia 60:2.
10. (a) Etamɔ nɔ ni “gãimlibi ní filikiɔ shwane lɛ” tsɔɔ mɛni, ni te wɔfeɔ wɔnii yɛ he wɔhaa tɛŋŋ? (b) Te “gbele hela ní nyiɛɔ duŋ mli lɛ” su tamɔ eha tɛŋŋ, ni mɛni hewɔ wɔsheee gbeyei lɛ?
10 Etamɔ nɔ ni “gãimlibi ní filikiɔ shwane lɛ” miitsɔɔ tutuamɔ wiemɔi. (Lala 64:4-6; 94:20) Yɛ be mli ní wɔkãa he wɔkɛ saji ni ji anɔkwale lɛ haa lɛ, nɛkɛ shitee-kɛ-woo ní akɛbaa wɔ sɔɔmɔ krɔŋkrɔŋ lɛ nɔ yɛ faŋŋ mli nɛɛ feɔ efolo. Kɛfata he lɛ, wɔsheee “gbele hela ní nyiɛɔ duŋ mli lɛ” hu gbeyei. Enɛ miitsɔɔ mfonirifeemɔŋ gbele hela ní akɛba jeŋ ní kã Satan hewalɛ mli, ní ehe yeɔ yɛ jeŋba mli kɛ mumɔŋ nɛɛ mli duŋ shihilɛ lɛ mli lɛ. (1 Yohane 5:19) Ekɛ jwɛŋmɔŋ kɛ tsui mli shihilɛ ní gbeɔ mɔ baa, ni ehaa gbɔmɛi hiɔ shi ní amɛleee Yehowa, kɛ eyiŋtoi, kɛ gbɛjianɔ ní ejɛ suɔmɔ mli eto lɛ ahe nɔ ko kwraa. (1 Timoteo 6:4) Akɛni wɔnáa mumɔŋ la babaoo mli ŋɔɔmɔ hewɔ lɛ, duŋ shihilɛ nɛɛ yɛ moŋ, shi wɔsheee gbeyei.—Lala 43:3.
11. Mɛni baa mɛi ní ‘hiɛ kpataa shwane’ lɛ anɔ?
11 “Tsɛŋemɔ hela ní kpataa mɔ hiɛ shwane lɛ” hu wooo wɔhe gbeyei. Ekolɛ “shwane” ni atsɔɔ nɛɛ miitsɔɔ nɔ ni atsɛɔ lɛ akɛ je lɛ hiŋmɛigbelemɔ lɛ. Mɛi ni ŋmɛɛɔ amɛhe amɛhaa eheloonaa ninamɔ mli susumɔi lɛ ahiɛ kpataa yɛ mumɔŋ. (1 Timoteo 6:20, 21) Yɛ be mli ní wɔkɛ ekãa jajeɔ Maŋtsɛyeli shɛɛ sane lɛ, wɔsheee wɔhenyɛlɔi lɛ ateŋ mɔ ko kwraa gbeyei, ejaakɛ Yehowa ji wɔ-Hebulɔ.—Lala 64:2; Abɛi 3:25, 26.
12. Mɛi akpei abɔ ‘nyɔɔ’ yɛ namɛi amasɛi, ni yɛ mɛɛ gbɛ nɔ?
12 Lalatsɛ lɛ tee nɔ akɛ: “Kɛ́ mɛi akpe nyɔ yɛ omasɛi, ní mɛi akpei nyɔŋma hu nyɔ yɛ oninejurɔ nɔ po, bo lɛ, ebɛŋkɛŋo. Ohiŋmɛii kɛkɛ okɛaakwɛ, ni ooona mɛi fɔji anyɔmɔwoo.” (Lala 91:7, 8) Akɛni amɛkɛ Yehowa efeee amɛbobaahe hewɔ lɛ, mɛi pii ‘nyɔɔ’ yɛ mumɔŋ gbele mli yɛ ‘wɔmasɛi.’ Ni tsɔɔ akɛ, “mɛi akpei nyɔŋma” enyɔnyɔi yɛ mumɔŋ Israelbii ní yɔɔ ŋmɛnɛ lɛ ‘aninejurɔ nɔ.’ (Galatabii 6:16) Shi, kɛ́ wɔji Kristofoi ní afɔ amɛ mu loo amɛhefatalɔi ní ejɔɔ amɛhe nɔ lɛ jio, wɔyɛ shweshweeshwe yɛ Nyɔŋmɔ “teemɔhe” lɛ. ‘Wɔhiŋmɛii kɛkɛ wɔkɛkwɛɔ ni wɔnaa mɛi fɔji anyɔmɔwoo,’ beni amɛkpáa haomɔ yɛ jarayeli, kɛ jamɔ mli, kɛ gbɛ̀i krokomɛi anɔ lɛ.—Galatabii 6:7.
‘Efɔŋ ko Efɔŋ ko Baŋ Wɔnɔ’
13. Mɛɛ shihilɛi fɔji baaa wɔnɔ lɛ, ni mɛni hewɔ?
13 Eyɛ mli akɛ je nɛɛ shweshweeshwe shihilɛ miifite kwraa moŋ, shi wɔkɛ Nyɔŋmɔ yeɔ klɛŋklɛŋ gbɛhe ni wɔnáa hewalɛwoo kɛjɛɔ lalatsɛ lɛ wiemɔi nɛɛ amli: “Ejaakɛ bo, Yehowa, ji mibobaahe! Oŋɔ Ŋwɛinyo lɛ ofee oshihilɛhe. Efɔŋ ko efɔŋ ko baŋ onɔ, ni haomɔ ko bɛŋkɛŋ obuu lɛ.” (Lala 91:9, 10) Hɛɛ, Yehowa ji wɔbobaahe. Shi kɛlɛ, wɔkɛ Ŋwɛi Flooflo Nyɔŋmɔ lɛ hu feɔ ‘wɔ shihilɛhe,’ he ni wɔnáa shweshweeshwefeemɔ yɛ. Wɔjieɔ Yehowa yi akɛ Jeŋ Muu Fɛɛ Maŋtsɛ, ni ‘wɔhiɔ’ emli ákɛ wɔ shweshweeshwefeemɔ Jɛɛhe, ni wɔjajeɔ e-Maŋtsɛyeli lɛ he sanekpakpa lɛ. (Mateo 24:14) No hewɔ lɛ, ‘efɔŋ ko efɔŋ ko baŋ wɔnɔ’—ni ji akɛ, efɔji ní awie he kɛtsɔ hiɛ yɛ lala nɛɛ mli lɛ eko kwraa baŋ wɔnɔ. Kɛ́ shihilɛi fɔji tamɔ shikpɔŋhosomɔi, lasuogbelei, nu afuai, hɔmɔ, kɛ nibii ní tai kpataa hiɛ lɛ amli amanehului ba wɔ kɛ mɛi krokomɛi anɔ po lɛ, enɛɛmɛi fiteee wɔhemɔkɛyeli loo wɔ mumɔŋ shweshweeshwe shihilɛ lɛ.
14. Ákɛ Yehowa tsuji lɛ, mɛni hewɔ helai ní gbeɔ mɔ lɛ tsɛŋeee wɔ lɛ?
14 Kristofoi ní afɔ amɛ mu lɛ tamɔ gbɔi ní hiɔ buui amli, ní etse amɛhe kwraa kɛjɛ nibii agbɛjianɔtoo nɛɛ he. (1 Petro 2:11) ‘Haomɔ ko kwraa bɛŋkɛɛɛ amɛbuu lɛ po.’ Kɛ́ wɔhiɛnɔkamɔ ji ŋwɛi nɔ̃ loo shikpɔŋ nɔ nɔ̃ jio, wɔjeee je lɛ fã, ni helai ní gbeɔ mɔ yɛ mumɔŋ, tamɔ jeŋba shara, heloonaa ninamɔ sɛɛdii, apasa jamɔ, kɛ jamɔ ní akɛhaa “kooloo lɛ” kɛ ehe “amaga,” ni ji Jeŋmaji Ekomefeemɔ lɛ, eko kwraa tsɛŋeee wɔ.—Kpojiemɔ 9:20, 21; 13:1-18; Yohane 17:16.
15. Wɔnáa ŋwɛibɔfoi ayelikɛbuamɔ mli ŋɔɔmɔ yɛ mɛni mli?
15 Lalatsɛ lɛ kɛfata he, yɛ hebuu ní wɔnáa mli ŋɔɔmɔ lɛ he akɛ: “[Lɛ Yehowa] eeewo ebɔfoi lɛ akpɔ yɛ ohewɔ, ní amɛbaa oyi yɛ ogbɛ̀i fɛɛ nɔ; amɛaahiɛo yɛ amɛdɛ̃, koni okaŋɔ onane oshi tɛ ko.” (Lala 91:11, 12) Aha ŋwɛibɔfoi lɛ hewalɛ koni amɛkɛbu wɔhe. (2 Maŋtsɛmɛi 6:17; Lala 34:8-10; 104:4; Mateo 26:53; Luka 1:19) Amɛbuɔ wɔhe ‘yɛ wɔgbɛ̀i fɛɛ nɔ.’ (Mateo 18:10) Wɔnáa ŋwɛibɔfoi agbɛtsɔɔmɔ kɛ amɛhebuu mli ŋɔɔmɔ akɛ Maŋtsɛyeli jajelɔi, ni wɔnaji etɔ̃tɔ̃ɔɔ yɛ mumɔŋ. (Kpojiemɔ 14:6, 7) ‘Tɛi’ ní tamɔ naatsii ní akɛbaa wɔnitsumɔ lɛ nɔ lɛ po haaa wɔnaji atɔ̃tɔ̃, loo Nyɔŋmɔ hiɛ duromɔ ní wɔyɔɔ lɛ aŋmɛɛ wɔ.
16. Esoro bɔ ni “jata” tutuaa mɔ yɛ bɔ ni “shikpãa” tutuaa mɔ lɛ he yɛ mɛɛ gbɛ nɔ, ni te wɔfeɔ wɔnii yɛ amɛhe wɔhaa tɛŋŋ?
16 Lalatsɛ lɛ tee nɔ akɛ: “Onyiɛ jata kɛ shikpãa po nɔ; ooonaanaa jata bi kɛ jeŋ nɔ yɛ onajiashi.” (Lala 91:13) Bɔ ni jata tutuaa mɔ tɛ̃ɛ yɛ faŋŋ mli lɛ, nakai nɔŋŋ wɔhenyɛlɔi lɛ ekomɛi jieɔ amɛshitee-kɛ-woo kpo faŋŋ kɛtsɔ mlai ní amɛtoɔ gbɛjianɔ ní awoɔ koni akɛtsĩ wɔ shiɛmɔ nitsumɔ lɛ naa lɛ nɔ. Shi bei komɛi lɛ, amɛkɛ tutuamɔi ní akpaaa gbɛ hu baa wɔnɔ trukaa, tamɔ bɔ ni shikpãa teeɔ ehe ní ekɔ̃ɔ mɔ lɛ. Akɛni amɛsumɔɔɔ ní ale akɛ amɛ amɛtutuaa wɔ lɛ hewɔ lɛ, bei komɛi lɛ osɔfoi lɛ tsɔɔ mlawolɔi, kojolɔi, kɛ mɛi krokomɛi anɔ amɛfeɔ enɛ. Shi kɛtsɔ Yehowa sɛɛfimɔ nɔ lɛ, wɔkɛ toiŋjɔlɛ taoɔ ní akwɛ wɔsane lɛ aha wɔ yɛ kojomɔhei, ni wɔkɛ nakai feemɔ ‘fãa sanekpakpa lɛ he ni wɔkɛmaa nɔ mi yɛ mla naa.’—Filipibii 1:7; Lala 94:14, 20-22.
17. Wɔnaanaa “jata bi” nɔ yɛ wɔ najiashi yɛ mɛɛ gbɛ nɔ?
17 Lalatsɛ lɛ wie bɔ ni abaanaanaa “jata bi kɛ jeŋ” nɔ yɛ najiashi lɛ he. Jata oblanyo ji kooloo ní hiɛ yɔɔ la waa, ni jeŋ ji onufu ko ní nyɛɔ edaa agbo diɛŋtsɛ. (Yesaia 31:4) Ni kɛlɛ, bɔ fɛɛ bɔ ni jata lɛ hiɛ woɔ la ehaa kɛji eetutua wɔ tɛ̃ɛ po lɛ, wɔnaanaa enɔ yɛ mfonirifeemɔŋ kɛtsɔ toiboo ní wɔfeɔ wɔhaa Nyɔŋmɔ moŋ fe adesai kɛ gbɛjianɔtoi ní tamɔ jata lɛ nɔ. (Bɔfoi lɛ Asaji 5:29) No hewɔ lɛ “jata” ní hiɛ yɔɔ la lɛ yeee wɔ awui ko yɛ mumɔŋ.
18. Ekolɛ “jeŋ” lɛ haa wɔkaiɔ namɔ, ni kɛ́ eetutua wɔ lɛ, mɛni esa akɛ wɔfee?
18 Atsɛɔ “jeŋ” lɛ akɛ “drako,” yɛ Hela Septuagint lɛ mli. Ekolɛ enɛ baaha wɔkai “drako kpeteŋkpele lɛ . . . , mɔ ni ji blema onufu lɛ ní atsɛɔ lɛ diabolo [naafolɔlɔ loo abonsam] lɛ kɛ satan [henyɛlɔ] lɛ” waa diɛŋtsɛ. (Kpojiemɔ 12:7-9; 1 Mose 3:15) Etamɔ waamɔ kooloo kpele ko ní nyɛɔ egbeɔ kooloo kroko ní emiɔ lɛ. (Yeremia 51:34) Kɛ́ Satan miibɔ mɔdɛŋ ní ebala wɔ, ní ekɛ je nɛŋ nɔnyɛɛi lɛ agbe wɔ koni no sɛɛ ní emi wɔ lɛ, nyɛhaa wɔhosoa wɔhe waa koni wɔje edɛŋ ní wɔnaanaa nɛkɛ “jeŋ” nɛɛ nɔ. (1 Petro 5:8) Esa akɛ shwɛɛnii ní afɔ amɛ mu lɛ afee enɛ kɛji amɛbaaná Romabii 16:20 lɛ mlibaa lɛ mli gbɛfaŋnɔ.
Yehowa—Wɔ Yiwalaheremɔ Jɛɛhe
19. Mɛni hewɔ wɔbaa Yehowa abó lɛ?
19 Lalatsɛ lɛ damɔ Nyɔŋmɔ najiaŋ ni ewie anɔkwa jálɔ lɛ he akɛ: “Ejaakɛ eesumɔ mi, hewɔ lɛ majie lɛ, mawó enɔ gojoo, ejaakɛ ele migbɛi lɛ.” (Lala 91:14) Wiemɔ kuku ni ji “mawó enɔ gojoo” lɛ shishinumɔ kroko hu ji “mabu ehe,” ni tsɔɔ akɛ, mɔ ko nine nyɛŋ ashɛ enɔ. Wɔbaa Yehowa abó akɛ ejálɔi, titri lɛ akɛni ‘wɔsumɔɔ lɛ lɛ hewɔ.’ (Marko 12:29, 30; 1 Yohane 4:19) Ni Nyɔŋmɔ hu ‘jieɔ wɔ’ kɛjɛɔ wɔhenyɛlɔi adɛŋ. Akpataŋ wɔhiɛ kɛjɛŋ shikpɔŋ nɛɛ nɔ kɔkɔɔkɔ. Shi moŋ, abaahere wɔyiwala ejaakɛ wɔle Nyɔŋmɔ gbɛi lɛ, ni wɔboɔ wɔtsɛɔ lɛ yɛ hemɔkɛyeli mli. (Romabii 10:11-13) Ni wɔtswa wɔfai shi akɛ ‘wɔbaanyiɛ yɛ Yehowa gbɛi amli kɛya naanɔ.’—Mika 4:5; Yesaia 43:10-12.
20. Beni Lala 91 lɛ baa naagbee lɛ, mɛɛ shiwoo Yehowa kɛha etsulɔ anɔkwafo lɛ?
20 Beni Lala 91 lɛ baa naagbee lɛ, Yehowa wie etsulɔ anɔkwafo lɛ he akɛ: “Eeetsɛ́ mi, ni mahere nɔ; mikɛ lɛ aaahi shi yɛ haomɔ mli: majie lɛ ni mawo ehiɛ nyam. Maha etɔ kɛ wala sɛɛtsɛlɛ, ni maha ena miyiwalaheremɔ lɛ!” (Lala 91:15, 16) Kɛ́ wɔtsɛ́ Nyɔŋmɔ yɛ sɔlemɔ mli yɛ esuɔmɔnaa nii kɛ gbeekpãmɔ naa lɛ, eboɔ wɔ toi. (1 Yohane 5:13-15) Wɔtsɔmɔ haomɔi babaoo mli momo, yɛ nyɛɛ kɛ shitee-kɛ-woo ní Satan woɔ he hewalɛ lɛ hewɔ. Shi wiemɔi ni ji “mikɛ lɛ aaahi shi yɛ haomɔ mli” lɛ sáa wɔ etoɔ kɛha wɔsɛɛ be mli kaai, ni emaa nɔ mi ehaa wɔ akɛ Nyɔŋmɔ baawaje wɔ yɛ be mli ní ekpataa gbɛjianɔtoo fɔŋ nɛɛ hiɛ lɛ.
21. Awo mɛi ní afɔ amɛ mu lɛ ahiɛ nyam momo yɛ mɛɛ gbɛ nɔ?
21 Yɛ Satan shitee-kɛ-woo ní naa wa lɛ fɛɛ sɛɛ lɛ, abaawo mɛi ní afɔ amɛ mu ní yɔɔ wɔteŋ lɛ fɛɛ ahiɛ nyam yɛ ŋwɛi yɛ Yehowa diɛŋtsɛ be ni eto mli—yɛ amɛ “wala sɛɛtsɛlɛ” yɛ shikpɔŋ nɔ lɛ sɛɛ. Ni kɛlɛ, Nyɔŋmɔ yiwalaheremɔi ní sa kadimɔ waa lɛ kɛ mumɔŋ anunyam ebaha mɛi ní afɔ amɛ mu lɛ momo. Ni kwɛ bɔ ni awo amɛhiɛ nyam akɛ amɛaanyiɛ hiɛ akɛ Yehowa Odasefoi yɛ shikpɔŋ lɛ nɔ yɛ nɛkɛ naagbee gbii nɛɛ amli! (Yesaia 43:10-12) Yehowa webii ayiwala kpele fe fɛɛ ní ebaahere lɛ baaba yɛ eta kpeteŋkpele lɛ mli yɛ Harmagedon beni ebaabu emaŋtsɛyeli lɛ bem, ní ebaatse egbɛi krɔŋkrɔŋ lɛ he lɛ.—Lala 83:19; Ezekiel 38:23; Kpojiemɔ 16:14, 16.
22. Namɛi ‘baana Yehowa yiwalaheremɔ lɛ’?
22 Kɛ́ wɔji Kristofoi ní afɔ amɛ mu lɛ loo amɛhefatalɔi ní ejɔɔ amɛhe nɔ lɛ jio, wɔkwɛɔ Nyɔŋmɔ gbɛ kɛha yiwalaheremɔ. Abaahere mɛi ni kɛ anɔkwayeli sɔmɔɔ Nyɔŋmɔ lɛ ayiwala yɛ “Yehowa gbi wulu ní he yɔɔ gbeyei lɛ” nɔ. (Yoel 3:3-5) Wɔteŋ mɛi ní wɔbaafee “asafo babaoo” ní yi baaná wala kɛyabote Nyɔŋmɔ jeŋ hee lɛ mli, ní wɔɔya nɔ wɔye anɔkwa yɛ naagbee kaa lɛ mli lɛ, ‘ebaaha wɔtɔrɔ kɛ wala sɛɛtsɛlɛ’—ni ji naanɔ wala. Ebaatee mɛi babaoo hu shi kɛba wala mli. (Kpojiemɔ 7:9; 20:7-15) Yehowa baaná he miishɛɛ diɛŋtsɛ akɛ ‘eeeha wɔna eyiwalaheremɔ lɛ’ kɛtsɔ Yesu Kristo nɔ. (Lala 3:9) Akɛni gbɛkpamɔi ní yɔɔ nyam tamɔ nɛkɛ jwere wɔhiɛ hewɔ lɛ, nyɛhaa wɔyaa nɔ wɔkwɛa Nyɔŋmɔ gbɛ kɛha yelikɛbuamɔ ní wɔkɛkane wɔgbii lɛ ní wɔkɛwo ehiɛ nyam. Eba akɛ wɔɔtsɔ wɔwiemɔi kɛ wɔnifeemɔi anɔ wɔma nɔ mi akɛ Yehowa ji wɔbobaahe.
[Shishigbɛ niŋmaa]
^ kk. 2 Mɛi ni ŋmala Kristofoi a-Hela Ŋmalɛi lɛ ewieee Lala 91 lɛ he kɛ shishinumɔ akɛ eji Mesia lɛ he gbalɛ. Yɛ anɔkwale mli lɛ, Yehowa fee abobaahe kɛ mɔɔ ní wa kɛha gbɔmɔ Yesu Kristo, taakɛ bɔ ni E-ji kɛha Yesu sɛɛnyiɛlɔi ní afɔ amɛ mu lɛ kɛ amɛhefatalɔi ní ejɔɔ amɛhe nɔ lɛ akɛ kuu, yɛ nɛkɛ “naagbee be” nɛɛ mli.—Daniel 12:4.
Te Obaaha Hetoo Tɛŋŋ?
• Mɛni ji “Ŋwɛinyo lɛ teemɔhe lɛ”?
• Mɛni hewɔ wɔsheee gbeyei lɛ?
• Te ebaa lɛ tɛŋŋ ni ‘efɔŋ ko efɔŋ ko baŋ wɔnɔ’?
• Mɛni hewɔ wɔbaanyɛ wɔkɛɛ akɛ Yehowa ji wɔ yiwalaheremɔ jɛɛhe lɛ?
[Nikasemɔ lɛ he Sanebimɔi]
[Mfoniri ni yɔɔ baafa 17]
Ani ole bɔ ni Yehowa anɔkwayeli lɛ ji tsɛŋ kpele kɛha wɔ lɛ?
[Mfonirii ni yɔɔ baafa 18]
Yehowa yeɔ ebuaa etsuji ni amɛtsuɔ amɛsɔɔmɔ nitsumɔ lɛ yɛ tutuamɔi ní akɛbaa amɛnɔ trukaa kɛ shitee-kɛ-woo ní yɔɔ faŋŋ lɛ fɛɛ sɛɛ
[He ni Sane lɛ Jɛ]
Blikã: A. N. Jagannatha Rao, Trustee, Madras Snake Park Trust