Maŋtsɛyeli Jajelɔi Bɔ Amaniɛ

“Ótswa Nɔmba Kroko”

YƐ Johannesburg yɛ South Africa lɛ, Leslie kɛ Caroline kɛ tɛlifoŋ miiye gbɔmɛi ni yɔɔ akrowa ko ni mɛi ni eba nitsumɔ mli hejɔɔmɔ yɔɔ mli ni abuɔ agbó ni aboteɔ mli lɛ naa lɛ odase, kɛ́ shɛ amɛteŋ mɔ fɛɛ mɔ nɔ. Amɛnine shɛ mɛi fioo komɛi ni miishɛɛ fioo ko pɛ amɛyɔɔ yɛ Kristofoi ashɛɛ sane ni amɛyɔɔ lɛ he lɛ anɔ yɛ shia, no hewɔ lɛ Caroline ná ekãawoo beni awula ko here nɔ lɛ.

Caroline bi akɛ: “Ani Awula B—ji mɔ ni wieɔ nɛɛ?”

Naanyobɔɔ gbee ko kɛɛ akɛ: “Oo, dabi, miji Awula G—. Ótswa nɔmba kroko.”

Beni Caroline na akɛ ekɛ miishɛɛ gbee wie lɛ, ekɛɛ akɛ: “Ojogbaŋŋ, ha magbála nɔ ni kulɛ misumɔɔ ni makɛɛ Awula B—lɛ mli matsɔɔ bo.” Kɛkɛ ni etee nɔ ewie Nyɔŋmɔ Maŋtsɛyeli ni baa lɛ mli jɔɔmɔi lɛ ahe sane. Beni ato gbɛjianɔ koni akɛ wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ aha lɛ, Awula G—bi akɛ: “Ojogbaŋŋ, mɛɛ jamɔ mli oyɔɔ?”

Caroline here nɔ akɛ: “Yehowa Odasefoi ji wɔ.”

“Oo, dabi, misumɔɔɔ nakai jamɔ lɛ! Efeee mi akɛ masumɔ akɛ mana bo.”

Caroline kpa fai akɛ: “Shi Awula G—, yɛ minitii 20 ni eho lɛ mli lɛ, mikɛ bo egba hiɛnɔkamɔ ni yɔɔ naakpɛɛ fe fɛɛ lɛ he sane, ni mijɛ Biblia lɛ mli mitsɔɔ bo nɔ ni etsɛŋ ni Nyɔŋmɔ Maŋtsɛyeli lɛ baafee eha adesai. Omii shɛ ohe waa akɛ onu nɛkɛ saji nɛɛ—omli fili bo po—ni oosumɔ ni okase babaoo. Mɛni ji nɔ diɛŋtsɛ ni ole yɛ Yehowa Odasefoi ahe? Kɛ ohe miiye lɛ, ani obaasumɔ ni oya tsɔne saalɔ ŋɔɔ? Mɛni hewɔ ohaaa makɛɛ bo nɔ ni Yehowa Odasefoi heɔ yeɔ?”

Yɛ dioofeemɔ be fioo ko sɛɛ lɛ, eha lɛ hetoo akɛ: “Efeɔ mi akɛ, osane ja. Obaanyɛ oba. Shi ná ole akɛ, otsakeŋ mi kɔkɔɔkɔ!”

Caroline here nɔ akɛ: “Awula G—, minyɛŋ matsake bo kɔkɔɔkɔ, kɛ́ miisumɔ lɛ nakai po. Yehowa pɛ baanyɛ nakai afee.”

Saramɔ ni ato he gbɛjianɔ koni akɛ wolo bibioo lɛ ayaha lɛ tee nɔ jogbaŋŋ, ni Awula G—(Betty) kpɛlɛ koni abasara lɛ ekoŋŋ. Beni Caroline ku sɛɛ etee lɛ, Betty kɛɛ akɛ ékɛɛ awulai ni kɛ lɛ tara okpɔlɔ lɛ he lɛ akɛ Yehowa Odasefoi kɛ lɛ kaseɔ nii. Amɛhwanya amɛniji yɛ kɔɔyɔŋ ni amɛbi lɛ akɛ: “Mɛni hewɔ ofee nakai? Nakai gbɔmɛi lɛ, amɛheee Yesu nɔ po amɛyeee!”

Amrɔ nɔŋŋ kɛkɛ ni Caroline kai Betty sane oti ko ni je kpo yɛ Nyɔŋmɔ Maŋtsɛyeli lɛ he sane ni amɛgba nyɛsɛɛ ko lɛ mli.

Caroline bi akɛ: “Namɔ baafee Maŋtsɛ lɛ?”

Betty here nɔ akɛ: “Yɛ anɔkwale mli lɛ, Yesu ni.”

Caroline kɛɛ akɛ: “Eji anɔkwale.” Kɛkɛ ni etee nɔ etsɔɔ mli akɛ Yehowa Odasefoi heɔ yeɔ akɛ Yesu ji Nyɔŋmɔ Bi, shi ekɛ Nyɔŋmɔ yeee hegbɔ akɛ Triniti fã ko.—Marko 13:32; Luka 22:42; Yohane 14:28.

Beni Betty esara lɛ saŋŋ sɛɛ lɛ, ebafee faŋŋ akɛ eyɛ mli moŋ akɛ ehiɛ jwɛŋmɔ kpakpa ni eyɛ miishɛɛ waa moŋ, shi ehe miiye waa. Yɛ anɔkwale mli lɛ, eeye kansa hela ni eeshe gbeyei akɛ ebaagbo. Ekpɛlɛ nɔ akɛ: “Miná ni kulɛ minu nɛkɛ saji nɛɛ afii komɛi ni eho lɛ ní miná nyɛhemɔkɛyeli lɛ eko.” Caroline shɛje emii kɛtsɔ ŋmalɛi ni tsɔɔ akɛ gbele ji wɔ̀ ni tsii, ni mɔ baanyɛ aná shitee kɛjɛ mli yɛ gbohiiashitee lɛ mli lɛ ni ekane etsɔɔ lɛ lɛ nɔ. (Yohane 11:11, 25) Enɛ ha Betty mii shɛ ehe waa diɛŋtsɛ, ni amrɔ nɛɛ akɛ lɛ feɔ Biblia mli nikasemɔ daa. Nɔ kome pɛ ji akɛ egbɔmɔtsoŋ hewalɛnamɔ ni baa shi be fɛɛ be lɛ haaa enyɛ eya kpeei yɛ Maŋtsɛyeli Asa lɛ nɔ.

Caroline kɛɛ akɛ: “Eyɛ faŋŋ kɛha mi akɛ ŋwɛibɔfoi miikudɔ nɛkɛ nitsumɔ nɛɛ. ‘Nɔmba kroko’ atswa ni eyaje Betty ŋɔɔ nɛɛ, ni kɛfata he hu lɛ, eye afii 89!”—Kpojiemɔ 14:6.