Mla Kpakpa Lɛ—Anyɛɔ Akɛtsuɔ Nii

Yɛ be mli ni mɛi babaoo buɔ Mla Kpakpa lɛ akɛ jeŋba tsɔɔmɔ ni Yesu jaje etsɔɔ lɛ, lɛ diɛŋtsɛ ekɛɛ akɛ: “Minitsɔɔmɔ lɛ, jeee minɔ̃ŋ, shi moŋ mɔ ni tsu mi lɛ nɔ̃ŋ.”—Yohane 7:16.

HƐƐ, nɔ ni Yesu tsɔɔ, ní nɔ ni abale no akɛ Mla Kpakpa lɛ fata he lɛ Shishijelɔ ji Yehowa Nyɔŋmɔ, Bɔlɔ lɛ, mɔ ni tsu Yesu kɛba lɛ.

Nyɔŋmɔ to eyiŋ yɛ shishijee mli akɛ, adesai fɛɛ kɛ amɛhe aye taakɛ amɛbaasumɔ ni akɛ amɛ aye lɛ. Efee nɔkwɛmɔnɔ ni hi fe fɛɛ efɔ̃ shi yɛ bɔ ni esusuɔ mɛi krokomɛi ahilɛ-kɛhamɔ he yɛ gbɛ ni etsɔ ebɔ adesai lɛ nɔ akɛ: “Nyɔŋmɔ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.” (1 Mose 1:27) Enɛ tsɔɔ akɛ Nyɔŋmɔ jɛ esuɔmɔ mli ekɛ lɛ diɛŋtsɛ esui ni nɔ kwɔlɔ lɛ eko duro adesai bɔni afee ni amɛná toiŋjɔlɛ, miishɛɛ kɛ ekomefeemɔ mli ŋɔɔmɔ—ni baanyɛ ahi shi kɛya naanɔ. Kɛ amɛtsɔse amɛhenilee ni Nyɔŋmɔ kɛha amɛ lɛ jogbaŋŋ lɛ, ebaakudɔ  amɛ ni amɛkɛ mɛi krokomɛi aye yɛ gbɛ ni amɛsumɔɔ ni akɛ amɛ aye lɛ nɔ.

Pɛsɛmkunya Su Ná Amɛnɔ Hewalɛ

Akɛni adesai ná shishijee ni yɔɔ naakpɛɛ hewɔ lɛ, mɛni ba? Yɛ kukufoo mli lɛ, pɛsɛmkunya fite amɛ kwraa. Mɛi babaoo le Biblia mli sane ni tsɔɔ nɔ ni klɛŋklɛŋ adesai enyɔ lɛ fee lɛ, taakɛ aŋma afɔ̃ shi yɛ 1 Mose yitso 3 lɛ. Akɛni Satan ni teɔ shi ewoɔ Nyɔŋmɔ nɔ fɛɛ nɔ lɛ ná amɛnɔ hewalɛ hewɔ lɛ, Adam kɛ Hawa kɛ pɛsɛmkunya kpoo Nyɔŋmɔ nɔyeli lɛ koni amɛkɛná heyeli ni amɛ diɛŋtsɛ amɛkpɛ amɛyiŋ. Nɔ ni jɛ amɛ pɛsɛmkunya kɛ atuatsemɔ nifeemɔ lɛ mli ba lɛ jeee nii wulu ni amɛŋmɛɛ lɛ pɛ kɛkɛ shi agbɛnɛ hu efɔŋ kpele jɛ mli kɛbaha bii fɛɛ ni amɛbaafɔ wɔsɛɛ lɛ. No ji nɔ ni ehiii kwraa ni jɛɔ tsɔɔmɔ ni abale no akɛ Mla Kpakpa lɛ ni akuɔ hiɛ ashwieɔ nɔ lɛ mli kɛbaa yɛ faŋŋ mli. No hewɔ lɛ, ‘gbɔmɔ kome nɔ esha tsɔ kɛba je lɛŋ lɛ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.’—Romabii 5:12.

Eyɛ mli akɛ adesai fɛɛ kpoo Yehowa Nyɔŋmɔ gbɛ̀i ni suɔmɔ yɔɔ mli lɛ moŋ, shi ekwaaa amɛ. Ákɛ nɔkwɛmɔnɔ lɛ, Yehowa kɛ Mla ha Israel maŋ lɛ koni ekudɔ amɛ. Etsɔɔ amɛ koni amɛkɛ mɛi krokomɛi aye taakɛ amɛbaasumɔ ni mɛi krokomɛi kɛ amɛ aye lɛ. Mla lɛ kɛ gbɛtsɔɔmɔ ha ni tsɔɔ bɔ ni esa akɛ akɛ nyɔji, awusãi kɛ okulafoi aye aha. Etsɔɔ bɔ ni esa akɛ atsu tutuamɔ, mɛi amɔɔmɔ ni akɛ amɛ yaa kɛ juu he nii aha. Falefalefeemɔ he mlai tsɔɔ bɔ ni asusuɔ mɛi krokomɛi ahilɛ-kɛhamɔ he ahaa. Mlai po yɛ kɛha bɔlɛnamɔ he saji. Yehowa fee e-Mla lɛ kuku kɛtsɔ kɛɛmɔ ni ekɛɛ gbɔmɛi lɛ akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe” lɛ nɔ, wiemɔ ni Yesu tsɛ́ sɛɛ yɛ sɛɛ mli. (3 Mose 19:18; Mateo 22:39, 40) Mla lɛ tsɔɔ bɔ ni esa akɛ akɛ gbɔi ni yɔɔ Israelbii lɛ ateŋ lɛ aye aha. Mla lɛ kɛ famɔ ha akɛ: “Kaawa  gbɔ yi hu; shi nyɛ diɛŋtsɛ nyɛle gbɔ tsui, ejaakɛ nyɛ hu nyɛtsɔmɔ gbɔi yɛ Mizraim shikpɔŋ lɛ nɔ.” Yɛ gbɛ kroko nɔ lɛ, ehe bahia ni Israelbii lɛ kɛ mlihilɛ kɛ mɔbɔnalɛ asusu mɛi ni nii yɔɔ mɔbɔ lɛ ahe.—2 Mose 23:9; 3 Mose 19:34; 5 Mose 10:19.

Shii abɔ ni Israelbii lɛ kɛ Mla lɛ tsuɔ nii yɛ anɔkwayeli mli lɛ, Yehowa jɔɔ maŋ lɛ. Maŋ lɛ shwere ni gbɔmɛi lɛ ná miishɛɛ ni amɛtsui nyɔ amɛmli yɛ David kɛ Salomo nɔyeli beaŋ. Yinɔsane ko kɛɔ akɛ: “Yuda kɛ Israel yi fa babaoo, tamɔ ŋshɔ naa shia kɛ fálɛ, amɛyeyeeɔ nii, amɛnunuuɔ dãai, ni amɛmli filiɔ amɛ. Ni Salomo yinɔ lɛ fɛɛ lɛ Yuda kɛ Israel hi shi shweshweeshwe, mɔ fɛɛ mɔ yɛ eweintso shishi kɛ egbamitso shishi.”—1 Maŋtsɛmɛi 4:20, 5:5.

Mɔbɔ sane ji akɛ, maŋ lɛ toiŋjɔlɛ kɛ shweshweeshwe shihilɛ lɛ sɛɛ etsɛɛɛ. Eyɛ mli akɛ no mli lɛ Israelbii lɛ yɛ Nyɔŋmɔ Mla lɛ moŋ, shi amɛkɛtsuuu nii; amɛha pɛsɛmkunya fite mɛi krokomɛi ahe ni amɛsusuɔ lɛ. Nɔ ni jɛ enɛ mli ba ji shihilɛ ni mli wa kɛ hemɔkɛyeli kwamɔ ni ba amɛnɔ aŋkroaŋkro kɛ agbɛnɛ ákɛ maŋ. Yɛ naagbee lɛ, yɛ afi 607 D.Ŋ.B. lɛ, Yehowa ha Babilonbii lɛ kpata Yuda maŋtsɛyeli, Yerusalem maŋtiase, kɛ sɔlemɔtsu wulu ni yɔɔ jɛmɛ lɛ po hiɛ. Yɛ mɛɛ yiŋtoo hewɔ? “Akɛni nyɛbooo miwiemɔi lɛ atoi hewɔ lɛ, naa, matsu ní ayaŋɔ kooyigbɛ wekui lɛ fɛɛ kɛba, Yehowa kɛɛ, kɛ Babel maŋtsɛ Nebukadnezar, mitsulɔ lɛ, ni mikɛ amɛ aaaba nɛkɛ shikpɔŋ nɛɛ kɛ emli bii kɛ jeŋmaji ní bɔle ehe nɛɛ fɛɛ nɔ, ni mafee amɛ musu, ni mafee amɛ amaŋfɔ kɛ nɔ ni haa aboɔ tsia kɛ naanɔ olɛŋlɛ.” (Yeremia 25:8, 9) Kwɛ naagba ni ba amɛnɔ yɛ Yehowa anɔkwa jamɔ ni amɛkwa lɛ hewɔ!

Nɔkwɛmɔnɔ ni Esa akɛ Akase

Yɛ gbɛ kroko nɔ lɛ, jeee akɛ Yesu Kristo tsɔɔ Mla Kpakpa lɛ kɛkɛ shi efee enɛ ni akɛaatsu nii lɛ he nɔkwɛmɔnɔ ni hi fe fɛɛ hu efɔ̃ shi. Ekɛ anɔkwayeli susu mɛi krokomɛi ahilɛ-kɛhamɔ he. (Mateo 9:36; 14:14; Luka 5:12, 13) Be ko lɛ, Yesu na yoo okulafo ko ni werɛ eho ehe yɛ Nain maŋtiase lɛ masɛi be mli ni mɛi babaoo ni feɔ ebinuu kome pɛ lɛ yara lɛ eto sɛrɛnɛɛ kɛyaa lɛ. Biblia mli sane lɛ kɛɛ akɛ: “Beni Nuntsɔ lɛ na lɛ lɛ, emusuŋ tsɔ lɛ yɛ ehe.” (Luka 7:11-15) Taakɛ Vine’s Expository Dictionary of Old and New Testament Words lɛ tsɔɔ lɛ, wiemɔ ni ji “emusuŋ tsɔ lɛ yɛ ehe” lɛ tsɔɔ akɛ “ní mɔ ko musuŋ aaatsɔ lɛ yɛ emli.” Enu bɔ ni eyeɔ awerɛho yɛ etsuiŋ lɛ he, ni etsirɛ lɛ koni efee nibii ni ja ni baajie lɛ kɛjɛ epiŋmɔ lɛ mli. Kwɛ miishɛɛ ni nakai yoo okulafo lɛ ná beni Yesu tée gbekɛ nuu lɛ shi ni “eŋɔ lɛ eha enyɛ” lɛ!

Yɛ naagbee lɛ, yɛ enɛ kɛ Nyɔŋmɔ yiŋtoo lɛ kɛ gbeekpamɔ naa lɛ, Yesu jɛ esuɔmɔ mli ena amanehulu ni ekɛ ewala ha ákɛ kpɔmɔnɔ bɔni afee ni adesai anyɛ aye amɛhe kɛjɛ esha kɛ gbele nyɔŋyeli mli. Enɛ ji Mla Kpakpa ni aaahi shi yɛ naa lɛ he nɔkwɛmɔnɔ ni nɔ kwɔ fe fɛɛ.—Mateo 20:28; Yohane 15:13; Hebribii 4:15.

Mɛi ni Kɛ Mla Kpakpa lɛ Tsuɔ Nii

Ani gbɔmɛi yɛ wɔbe nɛɛ mli ni hiɔ shi yɛ Mla Kpakpa lɛ naa lɛɛlɛŋ? Hɛɛ, ni jeee yɛ be mli ni ehi kɛha amɛ lɛ pɛ mli kɛkɛ. Ákɛ nɔkwɛmɔnɔ lɛ, yɛ Jeŋ Ta II lɛ mli yɛ Nazi Germany lɛ, Yehowa Odasefoi hiɛ hemɔkɛyeli ni amɛyɔɔ yɛ Nyɔŋmɔ mli kɛ suɔmɔ kɛha naanyo gbɔmɔ lɛ mli ni amɛŋmɛɛɛ Mla Kpakpa lɛ he amɛkɛsaaa. Beni Maŋ lɛ kwɛ koni akɛ nyɛ̃ɛ kɛ hetsɛ he tafaa ko atsu nii ashi Yudafoi fɛɛ lɛ, Odasefoi lɛ tee nɔ amɛkɛ Mla Kpakpa lɛ tsu nii. Amɛtee nɔ amɛsusu nanemɛi adesai ahe, amɛkɛ Yudafoi kɛ mɛi ni jeee Yudafoi hu ni hɔmɔ ni naa wa yeɔ amɛ lɛ ja amɛniyenii, yɛ gboklɛfoi ansarai amli po, eyɛ mli moŋ akɛ afɔɔɔ niyenii namɔ. Kɛfata he lɛ, eyɛ mli akɛ Maŋ lɛ kɛ famɔ ha amɛ koni amɛkɔlɔ tui koni amɛgbe mɛi krokomɛi moŋ, shi amɛsumɔɔɔ ni amɛfeɔ nakai, taakɛ amɛ hu amɛsumɔŋ ni mɛi krokomɛi agbe amɛ lɛ. Te amɛaafee tɛŋŋ amɛgbe mɛi ni esa akɛ amɛsumɔ amɛ tamɔ amɛhe lɛ? Akɛni amɛkpoo enɛ hewɔ lɛ, jeee akɛ akɛ amɛteŋ mɛi babaoo tee gboklɛfoi ansarai amli kɛkɛ, shi agbe amɛ hu.—Mateo 5:43-48.

Yɛ be mli ni okaneɔ sane nɛɛ, ooná Mla Kpakpa ni tsuɔ nii lɛ he nɔkwɛmɔnɔ kroko he sɛɛ.  Yehowa Odasefoi yɔseɔ akɛ, ŋmɛnɛ, mɛi babaoo naa amanehulu ni amɛnyɛɛɛ he nɔ ko amɛfee. Yɛ enɛ hewɔ lɛ, Odasefoi lɛ jɛɔ amɛsuɔmɔ mli amɛtsuɔ he nii jogbaŋŋ koni amɛye amɛbua mɛi krokomɛi koni amɛkase Biblia mli hiɛnɔkamɔ kɛ gbɛtsɔɔmɔ ni anyɛɔ atsuɔ he nii lɛ. Fɛɛ fata jeŋ muu fɛɛ tsɔsemɔ nitsumɔ ni atsuɔ bianɛ yɛ gbɛ ni eko bako lɛ nakai dã lɛ he. Mɛni ejɛ mli eba? Taakɛ atsɔɔ yɛ Yesaia 2:2-4 lɛ, yɛ anɔkwale mli lɛ, ‘atsɔɔ’ “maji babaoo” ni fa fe mɛi akpekpei ekpaa yɛ jeŋ fɛɛ lɛ ‘Yehowa gbɛ̀i lɛ, ni amɛnyiɛ etempɔŋi lɛ anɔ.’ Yɛ mfonirifeemɔ naa lɛ, amɛkase ‘bɔ ni amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai.’ Amɛná toiŋjɔlɛ kɛ shweshweeshwe shihilɛ yɛ haomɔ bei nɛɛ amli.

Ni Bo Hu?

Susumɔ piŋmɔ kɛ amanehulu ni Mla Kpakpa ni akɛtsuuu nii lɛ kɛba adesai anɔ kɛjɛ Eden atuatsemɔ ni Satan Abonsam kɛba lɛ nɔ kɛbaa lɛ he fioo okwɛ. Yehowa to eyiŋ akɛ etsɛŋ ni ebaatsake shihilɛ lɛ. Yɛ mɛɛ gbɛ nɔ? “Enɛ hewɔ Nyɔŋmɔ bi lɛ jie ehe kpo, koni efite abonsam nitsumɔi lɛ.” (1 Yohane 3:8) Enɛ baaba yɛ Nyɔŋmɔ Maŋtsɛyeli nɔyeli lɛ shishi yɛ Yesu Kristo, mɔ ni baanyɛ atsu he nii yɛ nilee mli lɛ dɛŋ, mɔ ni tsɔɔ Mla Kpakpa lɛ ni ehi shi yɛ naa lɛ.—Lala 37:9-11; Daniel 2:44.

Maŋtsɛ David ni hi shi yɛ blema Israel lɛ kɛɛ akɛ: “Sá lɛ gbekɛ ji mi ni agbɛnɛ mitsɔ nuumo, shi minako jalɔ ko ni akwa lɛ loo ni eseshibii miisisɛ̃ aboloo pɛŋ. Daa nɛɛ enaa mɔbɔ ni efaa mɔ nɔ̃, ni eseshibii lɛ tsɔɔ jɔɔmɔ.” (Lala 37:25, 26) Ani okpɛlɛŋ nɔ akɛ gbɔmɛi babaoo ni yɔɔ ŋmɛnɛ lɛ miiŋɔ mɛi anii ni amɛmiishɔ̃ mɛi adɛŋ nii moŋ fe nɔ ni “amɛaasusu mɔ he ni amɛkɛ nibii aha”? Eyɛ faŋŋ akɛ, Mla Kpakpa lɛ ni akɛaatsu nii lɛ baanyɛ eha aná anɔkwa toiŋjɔlɛ kɛ shweshweeshwe shihilɛ ejaakɛ ebaaha mɔ lɛ aná jɔɔmɔi amrɔ nɛɛ kɛ agbɛnɛ yɛ wɔsɛɛ be mli hu yɛ Nyɔŋmɔ Maŋtsɛyeli lɛ shishi. Nyɔŋmɔ Maŋtsɛyeli lɛ baajie pɛsɛmkunya kɛ efɔŋfeemɔ fɛɛ ni yaa nɔ yɛ shikpɔŋ nɔ lɛ kɛya ní ekɛ gbɛjianɔtoo hee ni Nyɔŋmɔ kɛbaaba lɛ aye ŋmɛnɛŋmɛnɛ adesa nɔyeli gbɛjianɔtoo ni efite lɛ najiaŋ. Kɛkɛ lɛ, gbɔmɛi fɛɛ baaná Mla Kpakpa ni amɛaahi shi yɛ naa lɛ mli ŋɔɔmɔ.—Lala 29:11; 2 Petro 3:13.

[Mfonirii ni yɔɔ baafa 4, 5]

Jeee akɛ Yesu tsɔɔ Mla Kpakpa lɛ kɛkɛ shi efee ekɛ nitsumɔ he nɔkwɛmɔnɔ ni hi fe fɛɛ hu efɔ̃ shi

[Mfonirii ni yɔɔ baafa 7]

Mla Kpakpa lɛ ni akɛaatsu nii lɛ baanyɛ eha aná anɔkwa toiŋjɔlɛ kɛ shweshweeshwe shihilɛ