“Ola lɛ Mli Wɔnaa La Yɛ”

LA JI nɔ ko ni bei pii lɛ wɔkuɔ wɔhiɛ wɔshwieɔ nɔ kwraa kɛyashi beni agbeɔ kane ní ehaa wɔ akutso lɛ mli woɔ duŋ. Miishɛɛ sane ji akɛ, anyɛɔ akɛ he fɔ̃ɔ wɔŋwɛi niiaŋ “kane hewalɛ jɛɛhe”—hulu lɛ—nɔ kwraa diɛŋtsɛ. Ni akɛni la loo kane jɛɔ hulu lɛ nɔ kɛbaa hewɔ lɛ, wɔbaanyɛ wɔna nii, wɔye nii, wɔmu ni wɔhi wala mli.

Akɛni la he hiaa kɛha wala hewɔ lɛ, esaaa akɛ efeɔ wɔ naakpɛɛ akɛ wɔɔkane yɛ Mose Klɛŋklɛŋ Wolo lɛ mli akɛ la ba yɛ nibɔɔ klɛŋklɛŋ gbi lɛ nɔ. “Nyɔŋmɔ kɛɛ: La aba! ni la ba.” (1 Mose 1:3) Hii anɔkwafoi tamɔ Maŋtsɛ David yɔse Yehowa be fɛɛ be akɛ wala kɛ la jɛɛhe. David ŋma akɛ: “Bo oŋɔɔ wala nubu yɔɔ; ola lɛ mli wɔnaa la yɛ.”—Lala 36:10.

David wiemɔi lɛ tsuɔ nii yɛ faŋŋ kɛ mfonirifeemɔ gbɛ nɔ. Encyclopædia Britannica lɛ tsɔɔ mli akɛ: “Eka shi faŋŋ akɛ, la ji nɔ ni haa anyɛɔ anaa nii.” Kɛkɛ ni ekɛfata he akɛ: “Saji babaoo tsɔɔ hiŋmɛii lɛ amli kɛboteɔ jwɛŋmɔ lɛ mli fe gbɔmɔtso lɛ henumɔ nii srɔtoi lɛ eko fɛɛ eko mli.” Akɛni nɔ ni wɔkaseɔ lɛ babaoo damɔ ninaa he nikeenii—ni he hiaa koni ená la dani etsu nii jogbaŋŋ lɛ nɔ hewɔ lɛ—akɛ la hu tsuɔ nii yɛ Ŋmalɛi lɛ amli yɛ mfonirifeemɔ gbɛ nɔ.

No hewɔ lɛ, Yesu kɛɛ ekaselɔi lɛ akɛ: “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.” (Yohane 8:12) Mfonirifeemɔŋ la ni Yesu wie he lɛ ji anɔkwale he shɛɛ sane ni eshiɛ ni baanyɛ akpɛ etoibolɔi lɛ ajwɛŋmɔi kɛ tsuii amli lɛ. Beni Yesu kaselɔi lɛ kɛ afii babaoo ehi mumɔŋ duŋ mli lɛ, yɛ naagbee lɛ amɛbaanyɛ amɛnu yiŋtoo ni Nyɔŋmɔ yɔɔ kɛha adesai kɛ Maŋtsɛyeli lɛ he hiɛnɔkamɔ lɛ shishi. “Wala la” diɛŋtsɛ nɛ, ejaakɛ nakai nilee lɛ baanyɛ eha aná naanɔ wala. Yesu kɛɛ eŋwɛi Tsɛ lɛ yɛ sɔlemɔ mli akɛ: “Enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Eba akɛ wɔkuŋ wɔhiɛ wɔshwieŋ mumɔŋ la nɛɛ nɔ kɔkɔɔkɔ!