Sanebimɔi ni Jɛ Kanelɔi Adɛŋ

Ani gbɛtsɔɔmɔ ni Nyɔŋmɔ kɛha ni aŋma yɛ Yeremia 7:16 lɛ tsɔɔ akɛ Kristofoi nyɛŋ asɔle yɛ mɔ ko ni ashwie lɛ kɛjɛ Kristofoi asafo lɛ mli lɛ he akɛni eji eshafeelɔ ni tsakeee etsui lɛ hewɔ?

Beni Yehowa jaje ekojomɔi lɛ eshi Yuda ni yeee anɔkwa lɛ, ekɛɛ Yeremia akɛ: “No hewɔ lɛ bo lɛ, kaakpa fai oha nɛkɛ maŋ nɛɛ, ni asaŋ kaawó bolɔmɔ loo sɔlemɔ nɔ oha amɛ, ni kaahao mi yɛ amɛhe, ejaakɛ miboŋ bo toi!”—Yeremia 7:16.

Mɛni hewɔ ni Yehowa gu Yeremia koni ekasɔle eha Israelbii lɛ? Eka shi faŋŋ akɛ, enɛ jɛ tɔmɔi ni mli wa waa ni amɛtɔ̃ amɛshi e-Mla lɛ hewɔ. ‘Amɛjuɔ, amɛyeɔ awui, amɛfiteɔ gbala, amɛkamɔɔ apasa kitai, ni amɛyashãa tsofa-kɛ-ŋma amɛhaa Baal, ni amɛyanyiɛɔ nyɔŋmɔi krokomɛi asɛɛ’ kpetekpelee yɛ gbɛ ni efeee amɛ hiɛgbele nɔ. No hewɔ lɛ, Yehowa kɛɛ Yudafoi ni yeee anɔkwa lɛ akɛ: “Mashɛrɛ nyɛ mashwie kɛaajɛ mihiɛ, taakɛ bɔ ni mishɛrɛ nyɛnyɛmimɛi lɛ fɛɛ, ni ji Efraim seshibii lɛ fɛɛ, mishwie lɛ!” Eka shi faŋŋ akɛ, ebaafee nɔ ni ejaaa gbɛ akɛ Yeremia loo mɔ kroko aaasɔle aha Yehowa koni egbala E-kojomɔ lɛ sɛɛ.—Yeremia 7:9, 15.

Yɛ enɛ kɛ gbeekpamɔ naa lɛ, bɔfo Yohane ŋma yɛ sɔlemɔ ni ja ni akɛhaa Nyɔŋmɔ lɛ he. Klɛŋklɛŋ lɛ, ema nɔ mi eha Kristofoi akɛ: “Kɛji wɔba nɔ ko yɛ esuɔmɔ naa lɛ, eboɔ wɔ toi.” (1 Yohane 5:14) Kɛkɛ ni Yohane tee nɔ yɛ nɔ ni kɔɔ sɔlemɔ ni asɔleɔ ahaa mɛi krokomɛi lɛ gbɛfaŋ lɛ he, akɛ: “Kɛji mɔ ko na enyɛmi miifee esha ni jeee gbele esha lɛ, ebi, ni eeeha lɛ wala, mɛi ni feɔ esha ni jeee gbele esha lɛŋ. Gbele esha ko yɛ; jeee enɛ hewɔ mikɛɔ akɛ ebi lɛ.” (1 Yohane 5:16) Yesu wie esha ni “aŋɔfaŋ” lɛ hu he, ni no ji esha ni afeɔ ashiɔ mumɔ krɔŋkrɔŋ lɛ.—Mateo 12:31, 32.

Ani enɛ tsɔɔ akɛ mɛi fɛɛ ni ashwieɔ amɛ kɛjɛɔ Kristofoi asafo lɛ mli yɛ esha ni amɛfee ni amɛtsakeee amɛtsui lɛ hewɔ lɛ efee eshai ni ji “gbele  esha” ni yɛ no hewɔ lɛ esaaa akɛ asɔleɔ yɛ he? Jeee nakai eji diɛŋtsɛ ejaakɛ yɛ shihilɛi komɛi amli lɛ tɔmɔi ni tamɔ nɛkɛ lɛ jeee eshai ni kɛ gbele baa. Yɛ anɔkwale mli lɛ, eji nɔ ni wa akɛ aaatsɔɔ kɛ́ nakai eji. Enɛ he nɔkwɛmɔnɔ ko diɛŋtsɛ ji Maŋtsɛ Manase ni jɛ Yuda lɛ. Emamɔ afɔleshaa latɛi eha apasa nyɔŋmɔi, ni ekɛ lɛ diɛŋtsɛ ebihii shã afɔle, ekɛ ehe wo mumɔi atsɛmɔ mli, ni eshɔ̃shɔ̃ɔi amagai emamɔ Yehowa sɔlemɔtsu lɛ mli. Yɛ anɔkwale mli lɛ, Biblia lɛ kɛɔ akɛ Manase kɛ gbɔmɛi lɛ ‘fee efɔŋ fe jeŋmaji ní Yehowa kpata amɛhiɛ yɛ Israelbii ahiɛ lɛ tete.’ Yehowa gbala Manase toi yɛ enɛɛmɛi fɛɛ hewɔ kɛtsɔ gboklɛi ni eha awo lɛ ni akɛ lɛ tee Babilon nomŋɔɔ mli lɛ nɔ.—2 Maŋtsɛmɛi 21:1-9; 2 Kronika 33:1-11.

Ani Manase he eshai ni mli wa waa lɛ ji esha ni kɛ gbele baa lɛ eko? Eka shi faŋŋ akɛ dabi, ejaakɛ sane lɛ yaa nɔ ekɛɔ yɛ ehe akɛ: “Beni efĩ lɛ lɛ, ekpá Yehowa, e-Nyɔŋmɔ lɛ, fai, ni eba ehe shi babaoo yɛ etsɛmɛi a-Nyɔŋmɔ lɛ hiɛ. Ni beni ekpá lɛ fai lɛ, ebo lɛ toi, ni enu esɔlemɔ lɛ, ni eŋɔ lɛ kɛba Yerusalem yɛ emaŋtsɛyeli lɛ mli ekoŋŋ. Kɛkɛ ni Manase ná le akɛ Yehowa lɛ, lɛ ji Nyɔŋmɔ.”—2 Kronika 33:12, 13.

No hewɔ lɛ, esaaa akɛ wɔmuɔ sane naa oya nɔŋŋ akɛ, shii abɔ ni ashwie mɔ ko kɛjɛ asafo lɛ mli hewɔ lɛ, eyeɔ esha ni kɛ gbele baa lɛ he fɔ. Ekolɛ, eeeŋɔ be kpalaŋŋ dani mɔ aŋkro lɛ anɔkwa tsui shihilɛ lɛ baajie ehe kpo. Yɛ anɔkwale mli lɛ, afɔɔ kɛɛmɔ akɛ yiŋtoi ahewɔ ni ashwieɔ mɔ kɛjɛɔ asafo lɛ mli lɛ eko ji koni eha eshafeelɔ lɛ hiɛ atserɛ lɛ kɛ hiɛnɔkamɔ akɛ eeetsake etsui ni eku esɛɛ eba.

Akɛni mɔ lɛ bɛ asafo lɛ mli dɔŋŋ hewɔ lɛ, mɛi ni baanyɛ ana etsuitsakemɔ kɛ esubaŋ ni etsake lɛ klɛŋklɛŋ ji mɛi ni bɛŋkɛ lɛ lɛ, tamɔ gbalashihilɛ mli hefatalɔ loo weku mli bii. Ekolɛ mɛi ni naa tsakemɔi ni tamɔ nɛkɛ lɛ baamu sane naa akɛ nɔtɔlɔ lɛ efeee esha ni ji gbele esha. Ekolɛ enɛ baatsirɛ amɛ koni amɛsɔle koni ená hewalɛwoo kɛjɛ Nyɔŋmɔ Wiemɔ ni jɛ mumɔŋ lɛ mli, ni ákɛ Yehowa baaye ebua eshafeelɔ lɛ yɛ E-suɔmɔnaa nifeemɔ lɛ kɛ gbeekpamɔ naa.—Lala 44:22; Jajelɔ 12:14.

Yɛ be mli ni ekolɛ mɛi komɛi baaná hegbɛ ni baaha amɛná odaseyeli ni fa bɔ ni sa koni amɛhe amɛye akɛ eshafeelɔ lɛ etsake etsui lɛ, enɛ baŋ lɛ nakai yɛ asafo muu lɛ fɛɛ gbɛfaŋ. Ekolɛ amɛyiŋ aaafutu amɛ, amɛaahao, ni amɛnane aaatɔ̃tɔ̃ po kɛ́ amɛaanu ni mɔ ko miisɔle yɛ faŋŋ yɛ mɔ ko ni tɔ̃ɔ he lɛ. Enɛ hewɔ lɛ, mɛi ni enɛ tsirɛɔ amɛ koni amɛsɔle yɛ eshafeelɔ ko he lɛ afee nakai yɛ teemɔŋ pɛ, ni amɛshĩ hiɛyaai fɛɛ ni aaajɛ mli aba yɛ sane lɛ mli lɛ awo onukpai ni gbɛnaa nii kã amɛnɔ yɛ asafo lɛ mli lɛ adɛŋ.

[Mfoniri ni yɔɔ baafa 31]

Akɛ Manase he eshai ni mli wa waa lɛ fa lɛ beni eba ehe shi yɛ Yehowa hiɛ lɛ

[He ni Mfoniri ni yɔɔ baafa 30 lɛ Jɛ]

Aná kɛjɛ Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s