Fɔlɔi—Nyɛtsua Nyɛbii Ahiamɔ Nii lɛ Ahe Nii!

GBƐTSƆƆMƆ kɛ tsɔsemɔ ni suɔmɔ yɔɔ mli he miihia gbekɛbii, titri lɛ kɛjɛ amɛfɔlɔi adɛŋ. Brazil nitsɔɔlɔ Tania Zagury wie yɛ enɛ he akɛ: “Gbekɛ fɛɛ gbekɛ nifeemɔ su ji ni etao nɔ ni baaha lɛ miishɛɛ. Ehe miihia ni akɛ naatsii atsu nii. Fɔlɔi lɛ ji mɛi ni sa akɛ amɛfee enɛ. Kɛ amɛfeee nakai lɛ, gbekɛbii lɛ bafeɔ mɛi ni anyɛɛɛ akudɔ.”

Shi kɛlɛ, yɛ shikpɔji pii anɔ lɛ, nii ni náa mɔ nɔ hewalɛ ni ji shihilɛ ni aŋmɛɔ nɔ fɛɛ nɔ feemɔ gbɛ yɛ mli ni mɛi sumɔɔ ni amɛná amɛ diɛŋtsɛ amɛ heyeli babaoo yɛ mli lɛ baanyɛ eha efee nɔ ni wa akɛ akɛ ŋaawoo ni atsɔɔ mli lɛ aaatsu nii. Belɛ nɛgbɛ ji he ni fɔlɔi baanyɛ atsɔ kɛya kɛha yelikɛbuamɔ? Fɔlɔi ni sheɔ Nyɔŋmɔ gbeyei lɛ yɔseɔ akɛ “Yehowa gboshinii” ji amɛbii lɛ. (Lala 127:3) No hewɔ lɛ, amɛkɛ amɛhe fɔɔ Nyɔŋmɔ Wiemɔ ni ji Biblia lɛ nɔ kɛha gbɛtsɔɔmɔ yɛ tsɔsemɔ ni amɛkɛhaa amɛ lɛ mli. Ákɛ nɔkwɛmɔnɔ lɛ, Abɛi 13:24 kɛɔ akɛ: “Mɔ ni tsĩɔ etso naa lɛ, eenyɛ ebi lɛ; shi mɔ ni sumɔɔ lɛ lɛ, ejɛɔ mra etsɔseɔ lɛ.”

Ehe ehiaaa ni anuɔ wiemɔ ‘tso’ ni Biblia lɛ kɛtsuɔ nii lɛ shishi akɛ yii diɛŋtsɛ pɛ ni akɛgbalaa mɔ toi; edamɔ shi kɛha gbɛ ni atsɔɔ nɔ ajajeɔ mɔ, ni ekɔɔɔ he eko bɔ ni aaafee lɛ aha. Yɛ anɔkwale mli lɛ, bei pii lɛ wiemɔi baanyɛ afee nɔ pɛ ni he hiaa koni akɛjaje gbekɛ ni egba afa lɛ. Abɛi 29:17 kɛɔ akɛ: “Tsɔsemɔ obi, ni eeeha ohe ajɔo; ni eeeha osusuma mii ashɛ ehe.”

Tsɔsemɔ ni suɔmɔ yɔɔ mli he hiaa gbekɛbii koni amɛjie sui ni esaaa lɛ kɛje amɛmli. Jajemɔ ni yɔɔ shiŋŋ ni mlihilɛ yɔɔ mli nɛkɛ lɛ kɛ odaseyeli haa ni tsɔɔ akɛ fɔlɔ lɛ kwɛɔ gbekɛ lɛ nɔ. (Abɛi 22:6) No hewɔ lɛ, fɔlɔi, nyɛnáa tsui! Kɛ okɛ Biblia mli ŋaawoo kpakpa ni anyɛɔ atsuɔ he nii tsu nii lɛ, obaasa Yehowa Nyɔŋmɔ hiɛ ni obii lɛ baaná bulɛ amɛha bo.