‘Hiŋmɛi Tsofa ni Okɛfɔ Ohiŋmɛii Nɔ’

YESU KRISTO ji mɔ ni kɛ nakai tsofafeemɔ lɛ ha klɛŋklɛŋ afii oha lɛ mli Kristofoi asafo ni yɔɔ Laodikea yɛ Asia Bibioo lɛ.

Yesu kɛɛ: ‘Hémɔ hiŋmɛi tsofa ni okɛfɔ ohiŋmɛii nɔ koni ona nii.’ Jeee hiŋmɛi hela diɛŋtsɛ, shi moŋ mumɔŋ shwilamɔ ni ehe miihia ni atsá. Heloo gbɛfaŋ ninámɔ ni shwereɔ babaoo lɛ he mumɔ ni yɔɔ Laodikea lɛ ená Kristofoi ni yɔɔ mli lɛ anɔ hewalɛ, ni amɛfee shikpilikpii yɛ amɛ anɔkwa mumɔŋ hiamɔ nii ahe.

Beni Yesu wieɔ enɛ he akɛ no ji nɔ ni haaa amɛna nii jogbaŋŋ lɛ, ekɛɛ akɛ: “Okɛɛɔ akɛ: Niiatsɛ ji mi ni miyɛ nii ni nɔ ko nɔ ko ehiaaa mi, ni oleee akɛ oyɛ amane mli ni onii hu yɛ mɔbɔ ni ohiafo kɛ shwilafo kɛ heyayaiatsɛ jio.” (Wɔma efã ko nɔ mi.) Eyɛ mli akɛ asafo lɛ mli bii lɛ leee moŋ, shi “hiŋmɛi tsofa” ni baatsa amɛ ni amɛnine baashɛ nɔ kɛtsɔ amɛhe shi ni amɛaaba amɛha Yesu Kristo tsɔɔmɔ kɛ tsɔsemɔ pɛ nɔ he miihia amɛ. Yesu kɛɛ: ‘Hémɔ yɛ miŋɔɔ.’—Kpojiemɔ 3:17, 18.

Taakɛ eji anɔkwale yɛ mɛi ni yɔɔ Laodikea lɛ ahe lɛ, ehe miihia ni anɔkwa Kristofoi ni yɔɔ ŋmɛnɛ lɛ abu amɛhe kɛjɛ hewalɛ ni heloo gbɛfaŋ nibii asɛɛdii kɛ hiɛtserɛjiemɔ shihilɛ mli ni amɛyɔɔ ni ebɔle amɛhe lɛ aaaná yɛ amɛnɔ bɔ ni esaaa, ekolɛ ni amɛhiɛ bɛ amɛhe nɔ po lɛ he. Tsofafeemɔ ni baaha akwɛ nii jogbaŋŋ yɛ mumɔŋ lɛ yɛ ŋaawoo lɛ mli: ‘Hémɔ hiŋmɛi tsofa kɛjɛ Yesu ŋɔɔ ni okɛfɔ ohiŋmɛii anɔ, koni ona nii.’

Nɔ ni sa kadimɔ ji anɔkwale ni eji akɛ esa akɛ ahé “hiŋmɛi tsofa” nɛɛ. Nitsumɔ babaoo loo shika he sane yɛ mli. Esa akɛ akɛ be babaoo atsu nii koni akɛkase Nyɔŋmɔ Wiemɔ lɛ ni ajwɛŋ nɔ. Wiemɔ nɛɛ ji nɔ ni lalatsɛ lɛ maa nɔ mi ehaa wɔ akɛ ‘eyɛ krɔŋŋ, ni ehaa mɔ mumɔŋ hiŋmɛii anɔ tseɔ’ lɛ.—Lala 19:9.