Sanebimɔi ni Jɛ Kanelɔi Adɛŋ

Mɛɛ gbɛ nɔ ŋa ni ji Kristofonyo lɛ baanyɛ aha anɔkwa ni eyeɔ Nyɔŋmɔ kɛ heshibaa ni eyɔɔ kɛha ewu ni heee yeee lɛ aŋmɛ pɛpɛɛpɛ kɛ́ nuu lɛ kɛ ehe woɔ jamɔŋ gbijurɔyeli nifeemɔi amli lɛ yɛ?

Nakai feemɔ baabi ni ekɛ nilee kɛ ŋaa atsu nii. Shi eefee nɔ ni ja yɛ mɔdɛŋ ni ebɔɔ koni eha gbɛnaa nii srɔtoi enyɔ lɛ aŋmɛ pɛpɛɛpɛ lɛ mli. Yesu kɛ ŋaawoo ha yɛ shihilɛ ko ni tamɔ nakai lɛ he akɛ: “Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ!” (Mateo 22:21) Eji anɔkwale akɛ, no mli lɛ eewie gbɛnaa nii ni atsuɔ he nii ahaa nɔyelii lɛ ahe, nɔ ni yɛ sɛɛ mli lɛ akɛɛ Kristofoi koni amɛba amɛhe shi amɛha no lɛ. (Romabii 13:1) Ni kɛlɛ, abaanyɛ akɛ ŋaawoo ni ekɛha lɛ atsu nii yɛ ŋa ko ni baaha gbɛnaa nii ni ehiɛ yɛ Nyɔŋmɔ hiɛ lɛ kɛ heshibaa ni eyɔɔ kɛha ewu lɛ yɛ Ŋmalɛ naa lɛ aŋmɛ pɛpɛɛpɛ, kɛ́ ejeee heyelilɔ po lɛ gbɛfaŋ.

Mɔ ko mɔ ko bɛ ni le Biblia lɛ, ni baaje tsɔɔmɔ ni Biblia lɛ tsɔɔ faŋŋ akɛ esa akɛ Kristofonyo atsu Nyɔŋmɔ Ofe lɛ he gbɛnaa nii klɛŋklɛŋ, ní eye lɛ anɔkwa yɛ bei fɛɛ mli lɛ he ŋwane. (Bɔfoi lɛ Asaji 5:39) Ni kɛlɛ, yɛ shihilɛi babaoo mli lɛ, anɔkwa jálɔ baanyɛ akpɛlɛ nibimɔi loo gbɛkpamɔi ni mɔ ni heee yeee ni yɔɔ hegbɛ ko lɛ kɛfɔɔ mɔ nɔ lɛ nɔ, yɛ be mli ni eteee shi ewooo Nyɔŋmɔ mlai ni nɔ kwɔlɔ lɛ.

Wɔnáa nɔkwɛmɔnɔ ko ni tsɔɔ mɔ nii yɛ Hebribii etɛ lɛ ahe, taakɛ agba he sane yɛ Daniel yitso 3 lɛ. Amɛnɔyeli lɛ mli onukpa fe fɛɛ ni ji Nebukadnezar wo akpɔ akɛ amɛ kɛ mɛi krokomɛi kɛ amɛhe ayatsɔɔ yɛ Dura ŋa lɛ nɔ. Beni Hebribii etɛ lɛ yɔse akɛ ato apasa jamɔ he gbɛjianɔ lɛ, ekolɛ amɛsumɔɔɔ akɛ amɛyaa jɛmɛ. Ekolɛ Daniel nyɛ ejie ehe kɛjɛ mli, shi nɛkɛ mɛi etɛ nɛɛ nyɛɛɛ afee nakai. * No hewɔ lɛ, amɛkpɛlɛ nɔ bɔ ni baaha  amɛya jɛmɛ, shi amɛkɛ amɛhe woŋ nifeemɔ gbonyo ko mli—amɛkɛ amɛhe eyawooo mli hu.—Daniel 3:1-18.

Nakai nɔŋŋ yɛ gbijurɔyeli bei amli lɛ, ekolɛ wu ko ni heee yeee lɛ baabi loo baakpa gbɛ ni eŋa ni ji Kristofonyo lɛ afee nɔ ko ni ekolɛ yoo lɛ baasumɔ akɛ ekpoo. Susumɔ nɔkwɛmɔnii komɛi ahe okwɛ: Nuu lɛ kɛɛ yoo lɛ akɛ yoo lɛ ahoo niyenii ko yɛ gbi ko ni lɛ nuu lɛ kɛ mɛi krokomɛi kɛbaaye gbi jurɔ ko lɛ nɔ. Aloo nuu lɛ baabi ni weku (ní eŋa fata he) lɛ ayasara ewekumɛi yɛ nakai gbi lɛ nɔ kɛha niyeli loo ákɛ saramɔ ko kɛkɛ. Aloo dani gbijurɔyeli lɛ aaashɛ po lɛ, ekolɛ ebaakɛɛ akɛ yɛ be mli ni eŋa lɛ etee eyaahe nibii lɛ, esa akɛ ehe nibii komɛi ebaha lɛ—niyenii ni akɛbaaye gbi jurɔ lɛ, nibii ni akɛbaake, aloo nibii ni akɛbaahà nii ahe kɛ ŋamɔ he woji ni akɛbaafata nikeenii lɛ ahe.

Shikome ekoŋŋ lɛ, esa akɛ ŋa ni ji Kristofonyo lɛ atswa efai shi akɛ ekɛ ehe woŋ apasa jamɔŋ nifeemɔi amli, shi nibimɔi ni tamɔ nɛkɛ hu? Lɛ ji wekuyitso lɛ, ni Nyɔŋmɔ Wiemɔ lɛ kɛɔ akɛ: “Nyɛ yeigbayei lɛ, nyɛbaa nyɛhe shi nyɛhaa nyɛwumɛi, taakɛ bɔ ni sa yɛ Nuntsɔ lɛ mli lɛ.” (Kolosebii 3:18) Yɛ saji ni tamɔ nɛkɛ mli lɛ, ani ebaanyɛ eba ehe shi ákɛ ŋa, yɛ be mli ni eyeɔ Nyɔŋmɔ anɔkwa? Esa akɛ ekpɛ eyiŋ yɛ bɔ ni eeefee eha toiboo ni efeɔ ehaa ewu lɛ kɛ toiboo ni efeɔ ehaa Yehowa ni he hiaa fe fɛɛ lɛ aŋmɛ pɛpɛɛpɛ.

Yɛ bei krokomɛi amli lɛ, ekolɛ ewu lɛ baabi ni ehoo niyenii ko, kɛji akɛ eji niyenii ni nuu lɛ sumɔɔ waa loo akɛni esumɔɔ ni eye niyenii ni tamɔ nɛkɛ yɛ be pɔtɛɛ ko mli lɛ hewɔ. Ebaasumɔ ni ejie suɔmɔ kpo etsɔɔ nuu lɛ kɛ bulɛ kɛha eyitsoyeli lɛ. Ani yoo lɛ baanyɛ afee nakai kɛ́ nuu lɛ ebi koni afee nii lɛ yɛ gbijurɔyeli be mli po? Ekolɛ ŋamɛi komɛi ni ji Kristofoi baanyɛ afee nakai kɛ henilee kpakpa, ní amɛmiibu enɛ akɛ eji daa gbi nihoomɔ he gbɛjianɔtoo lɛ eko kɛkɛ. Eka shi faŋŋ akɛ, Kristofonyo anɔkwafo ko kwraa bɛ ni baabu enɛ akɛ eji gbijurɔyeli, kɛ́ ewu lɛ bu enɛ akɛ gbijurɔyeli po. Nakai nɔŋŋ ebaanyɛ ebi koni yoo lɛ afata ehe beni esaraa ewekumɛi yɛ bei komɛi amli daa nyɔŋ loo daa afi lɛ. Ani eeenyɛ efee nakai kɛ́ eji gbi ni akɛyeɔ gbi jurɔ? Aloo ani ebaasumɔ ni ehé nibii taakɛ efɔɔ feemɔ kɛ́ nuu lɛ bi enɛ, yɛ be mli ni ekwɛɛɛ nɔ ni nuu lɛ kɛ nibii ni eyaahe eha lɛ lɛ aaafee yɛ be mli ni eheɔ nibii lɛ?

Yɛ anɔkwale mli lɛ, esa akɛ Kristofonyo ni ji ŋa lɛ asusu mɛi krokomɛi ahe—hewalɛ ni ebaaná yɛ amɛnɔ. (Filipibii 2:4) Ebasumɔŋ ni eha mɛi asusu kwraa akɛ ekɛ gbijurɔyeli lɛ yɛ tsakpaa ko, tamɔ bɔ ni ekolɛ Hebribii etɛ lɛ sumɔŋ ni mɛi krokomɛi ana akɛ amɛmiifa gbɛ kɛya Dura ŋa lɛ nɔ lɛ. No hewɔ lɛ, ebaanyɛ etsɔ ŋaa gbɛ nɔ ebɔ mɔdɛŋ ekɛ ewu lɛ asusu he koni ekwɛ ní kɛ́ aaahi lɛ yɛ yoo lɛ henumɔi asusumɔ hewɔ lɛ, nuu lɛ anyɛ afee gbi jurɔ lɛ he nibii komɛi eha lɛ diɛŋtsɛ ehe koni ekɛha eŋa ni sumɔɔ lɛ ni buɔ lɛ lɛ aye ehe kɛjɛ mli. Ekolɛ nuu lɛ baana nilee ni yɔɔ mli akɛ ekɛ amɛyi enyɔ lɛ fɛɛ woŋ shihilɛ ko ni baanyɛ ahao amɛ lɛ mli kɛ́ ehe baahia ni yoo lɛ akpoo akɛ ekɛ ehe aaawo apasa jamɔŋ nifeemɔi amli lɛ. Hɛɛ, sane ni agbaa yɛ dioofeemɔ mli kɛtsɔɔ hiɛ lɛ baanyɛ eha ana naa yɛ toiŋjɔlɛ mli.—Abɛi 22:3.

Yɛ naagbee kwraa lɛ, esa akɛ Kristofonyo anɔkwafo lɛ apɛi anɔkwalei ni yɔɔ mli lɛ amli ni no sɛɛ lɛ ekpɛ eyiŋ yɛ nɔ ni ebaafee he. Esa akɛ toiboo ni afeɔ ahaa Nyɔŋmɔ lɛ aba klɛŋklɛŋ, taakɛ eji yɛ Hebribii etɛ lɛ agbɛfaŋ lɛ. (1 Korintobii 10:31) Shi yɛ be mli ni no yɔɔ Kristofonyo aŋkro lɛ jwɛŋmɔ mli lɛ, ehe baahia ni ekpɛ eyiŋ yɛ nibii ni haŋ eŋmɛɛ saji ahe ekɛsaa ni abaanyɛ atsu he nii lɛ mli, yɛ be mli ni mɔ ko ni yɔɔ hegbɛ yɛ weku lɛ mli loo yɛ akutso lɛ mli lɛ ebi ni afee nɔ ko lɛ.

[Shishigbɛ niŋmaa]