Henry VIII kɛ Biblia Lɛ
Henry VIII kɛ Biblia Lɛ
WINSTON CHURCHILL ŋma yɛ ewolo ni ji History of the English-Speaking Peoples (Kpo 2) lɛ mli akɛ: “Yɛ jamɔŋ hemɔkɛyeli nifeemɔ lɛ mli lɛ, Jamɔ Hiɛtsakemɔ he gbɛjianɔtoo lɛ kɛ tsakemɔ wulu ba. Biblia lɛ baná hewalɛ hee agbɛnɛ ni akpɛlɛɔ nɔ yɛ hei babaoo. Yinɔbii ni egbɔlɔ lɛ hiɛ susumɔ akɛ Ŋmalɛ Krɔŋkrɔŋ lɛ ji oshara yɛ mɛi ni leee woloŋ lɛ adɛŋ, ni esa akɛ osɔfoi lɛ pɛ akane.”
Sane lɛ tee nɔ akɛ: “Bibliai ni akala agbe naa, ni Tyndal kɛ Coverdale tsɔɔ shishi kɛtee Ŋleshi mli lɛ je kpo klɛŋklɛŋ kwraa yɛ gbo be mli yɛ afi 1535 lɛ naagbee gbɛ, ni amrɔ nɛɛ aakala shishitsɔɔmɔi babaoo. Nɔyeli lɛ wo osɔfoi lɛ ŋaa koni amɛwo Biblia kanemɔ he hewalɛ.” Yɛ afii ohai abɔ ni abɛ nilee yɛ Biblia lɛ kɛ emli saji lɛ ahe lɛ sɛɛ lɛ, ehe bahia ni England abatsɔ maŋ ni akɛ Biblia lɛ he nilee etsɔse amɛ, ni le emli saji jogbaŋŋ, shi enɛ ba lɛ nakai yɛ Henry VIII nɔyeli lɛ yelikɛbuamɔ naa shi jeee yɛ sɔlemɔ lɛ yelikɛbuamɔ naa. *
“Awui kroko ni atsa nɔ aye yinɔbii ni egbɔlɔ lɛ ji akɛ Nɔyeli lɛ kɛ famɔ ha koni akala Ŋleshi Bibliai ni fa babaoo diɛŋtsɛ yɛ Paris, nɔ ni hi jogbaŋŋ diɛŋtsɛ fe eko fɛɛ eko ni etsɔ hiɛ lɛ, ni yɛ September afi 1538 lɛ efã akɛ sɔlemɔ fɛɛ sɔlemɔ ni yɔɔ maŋ lɛ mli lɛ ahe Biblia ni hiɛ kpo ni da fe fɛɛ eko yɛ Ŋleshi mli, koni akɛkpasa shi yɛ sɔlemɔtsu fɛɛ sɔlemɔtsu mli, he ni yɛ bɔ ni eda waa eha lɛ hewɔ lɛ, sɔlemɔyalɔi lɛ baanyɛ ana faŋŋ ni amɛkɛtsu nii ni amɛkane hu. Akɛ ekomekomei ekpaa kpasa shi yɛ St Paul’s yɛ City of London, ni gbɔmɛi asafoi babaoo yabuaa sɔlemɔtsu wulu lɛ mli gbi muu fɛɛ koni amɛkane, titri lɛ, taakɛ akɛɔ wɔ lɛ, be mli ni ekolɛ amɛbaaná mɔ ko ni gbeeŋ wa koni ekane lɛ waa lɛ.”
Mɔbɔ sane ji akɛ, yɛ maji babaoo amli lɛ, mɛi babaoo kɛ hegbɛ ni amɛná akɛ amɛkane Biblia lɛ daa lɛ tsuuu nii. Enɛ ji sane ko ni esa akɛ asusu he kɛ hiɛdɔɔ, akɛni Biblia lɛ pɛ ji wolo ní ‘jɛ Nyɔŋmɔ mumɔ lɛŋ, ní hi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ’ hewɔ lɛ.—2 Timoteo 3:16.
[Shishigbɛ niŋmaa]
^ kk. 3 Maŋtsɛ Henry VIII lɛ ye England nɔ kɛjɛ afi 1509 kɛyashi afi 1547.
[He ni Mfoniri ni yɔɔ baafa 32 lɛ Jɛ]
Henry VIII: Wolo ni nitɛŋmɔ ni yɔɔ Royal Gallery yɛ Kensington lɛ jɛ mli ji The History of Protestantism (Kpo I)