Ani Oheɔ Nyɔŋmɔ ni Yɔɔ Diɛŋtsɛ lɛ Oyeɔ?

Gbɛfalɔi asafo ko ni American Museum of Natural History kɛ nitsumɔ wo amɛdɛŋ lɛ miiya koni amɛyakase Arctic shikpɔŋ ko ní shikpɔji ahe nibii ashikpálɔ Robert E. Peary bɔ amaniɛ akɛ ena afii kpawo komɛi ni tsɔ hiɛ yɛ afi 1906 lɛ he nii.

PEARY damɔ Cape Colgate ni yɔɔ North America kooyi-anaigbɛ shɔŋŋ lɛ nɔ ni ena nɔ ni tamɔ shikpɔŋ yɛji ni yɔɔ shɔŋŋ ni nɔkwɔlɔ lɛ. Ekɛ mɛi ni ye ebua lɛ lɛ ateŋ mɔ kome gbɛi wo lɛ akɛ Crocker Land. Kwɛ bɔ ni gbɛfalɔi asafo lɛ mli bii baaná miishɛɛ amɛha beni amɛna nɔ ko bibioo yɛ amɛhiɛ gbɛ tamɔ gɔŋ, jɔɔi, kɛ gɔji ni amɛnɔkwɔlɔ ni snoo ehà amɛyiteŋ fɛɛ yɛ shɔŋŋ lɛ! Shi etsɛɛɛ ni amɛna akɛ amɛmiikwɛ nɔ ko kɛkɛ ni jeee Arctic. Nɛkɛ kɔɔyɔŋ tsakemɔ nifeemɔ nɛɛ elaka Peary, ni beni amɛhiɛ baa amɛhe nɔ lɛ, no mli lɛ amɛfite amɛbe, hewalɛ, kɛ heloonaa nibii amɛkɛtao nɔ ko ni bɛ shihilɛ mli diɛŋtsɛ.

Ŋmɛnɛ, mɛi babaoo tuuɔ amɛhe kɛ amɛbe amɛhaa nyɔŋmɔi ni amɛheɔ amɛyeɔ akɛ amɛyɛ diɛŋtsɛ lɛ. Yɛ Yesu bɔfoi lɛ agbii lɛ amli lɛ, ajá nyɔŋmɔi tamɔ Herme kɛ Dio. (Bɔfoi lɛ Asaji 14:11, 12) Ŋmɛnɛ, nyɔŋmɔi ni mɛi ni yɔɔ Shinto, Hindu, kɛ jamɔi krokomɛi ni yɔɔ je lɛ mli lɛ amli lɛ jáa lɛ baashɛ akpekpei abɔ. Eji anɔkwale akɛ, taakɛ Biblia lɛ kɛɔ lɛ, “asɛ̃ɛɛ nyɔŋmɔi ahe ni asɛ̃ɛɛ nuntsɔmɛi ahe” hu. (1 Korintobii 8:5, 6) Ani enɛɛmɛi fɛɛ baanyɛ afee nyɔŋmɔi diɛŋtsɛ?

Nyɔŋmɔi ní ‘Nyɛɛɛ Mɔ Yiwala Ahere’

Ákɛ nɔkwɛmɔnɔ lɛ, susumɔ amagai loo okadii ni akɛtsuɔ nii yɛ jamɔ mli lɛ he okwɛ. Yɛ mɛi ni kɛ amɛhiɛ fɔ̃ɔ amɛnɔ loo amɛsɔleɔ kɛtsɔɔ amɛnɔ lɛ gbɛfaŋ lɛ, amagai tamɔ yibaalɔi ni hiɛ hewalɛi ni fe adesai anɔ ní baanyɛ awo adesai anyɔmɔ loo ejie amɛ kɛjɛ oshara mli. Shi ani amɛbaanyɛ amɛhere mɔ yiwala lɛɛlɛŋ? Yɛ nɔ ni kɔɔ nɛkɛ nibii nɛɛ ahe lɛ, lalatsɛ lɛ lá akɛ: “Jeŋmaji lɛ amagai lɛ, jwiɛtɛi kɛ shika ni, gbɔmɛi aninenaa nitsumɔi ni. Amɛyɛ naabu, shi amɛwieee; amɛyɛ hiŋmɛii, shi amɛnaaa nii; amɛyɛ toii, shi amɛnuuu ni; asaŋ mumɔ ko bɛ  amɛdaaŋ.” Eji anɔkwale akɛ, amɛji nyɔŋmɔi ni “nyɛɛɛ mɔ yiwala ahere.”—Lala 135:15-17; Yesaia 45:20.

Eji anɔkwale akɛ, mɛi ni feɔ nyɔŋmɔi lɛ baanyɛ amɛkɛ amɛninenaa nitsumɔ lɛ he woo lɛ aha wala kɛ hewalɛ. Ni mɛi ni jáa amagai lɛ kɛ amɛhiɛ fɔ̃ɔ amɛnɔ. Gbalɔ Yesaia kɛɛ akɛ: “Amɛŋɔɔ lɛ amɛtswaa amɛkɔŋ, amɛtereɔ lɛ ni amɛkɛ lɛ yamaa emaahe.” Ekɛfata he akɛ: “Emaa shi, etsiii ehe kɛjɛɛɛ emaahe lɛ: abolɔɔ atsɛɔ lɛ, shi ehereee nɔ; enyɛɛɛ mɔ yiwala ehere kɛjɛ haomɔ mli.” (Yesaia 46:7) Anɔkwale lɛ ji akɛ, amaga kãa he ehiɔ shi ni wala bɛ emli, ekɔɔɔ he eko bɔ ni mɛi ni kɛ amɛhiɛ fɔ̃ɔ enɔ lɛ heɔ lɛ amɛyeɔ haa. Nakai amagai ni akpɛ kɛ wɔji lɛ ji ‘wɔji ni sɛɛnamɔ ko bɛ amɛhe.’—Habakuk 2:18.

Jamɔ, woo, loo wulamɔ ni akɛhaa gbɔmɛi ni jieɔ mɛi ahiɛtserɛ, kpɔiaŋgbɔlelɔi ni ehe gbɛi, maŋkwramɔŋ gbɛjianɔtoi, kɛ jamɔ mli hiɛnyiɛlɔi komɛi lɛ hu ji nii ni ehe shi yɛ he fɛɛ he ŋmɛnɛ. Kɛfata he lɛ, shika ebatsɔ nyɔŋmɔ kɛha mɛi babaoo. Yɛ shihilɛ nɛɛ eko fɛɛ eko mli lɛ, awieɔ amagai nɛɛ ahe akɛ amɛyɛ sui komɛi shi amɛbɛ eko. Amɛnyɛŋ amɛkɛ nibii fɛɛ ni mɛi ni heɔ amɛnɔ amɛyeɔ lɛ kpaa gbɛ yɛ amɛdɛŋ lɛ aha amɛ. Ákɛ nɔkwɛmɔnɔ lɛ, heloonaa ninamɔ baanyɛ afee tamɔ eji tsabaa kɛha naagbai babaoo, shi hewalɛ ni yɔɔ ninamɔ mli lɛ lakaa mɔ. (Marko 4:19) Niiamlipɛilɔ ko bi akɛ: “Te wɔɔfee tɛŋŋ wɔtsɔɔ anɔkwale ni eji akɛ nɔ ko ni mɛi babaoo sumɔɔ ni amɛheɔ amɛyeɔ akɛ etsaa nɔ fɛɛ nɔ, shi beni nine eshɛ enɛ fɛɛ nɔ lɛ, nɔ ni sa akɛ ejɛ mli kɛba lɛ baanyɛ aha mɛi komɛi anijiaŋ aje wui ni amɛhao lɛ mli wɔha tɛŋŋ?” Hɛɛ, heloonaa nii asɛɛtiumɔ baabi ni mɔ ko kɛ nɔ ko ni jara wa diɛŋtsɛ, tamɔ gbɔmɔtsoŋ hewalɛnamɔ, weku shihilɛ ni haa mɔ tsui nyɔɔ emli, naanyobɔɔ ni yɔɔ gbagbalii, loo wɔkɛ Bɔlɔ lɛ teŋ wekukpaa ni jara wa ashã afɔle. Shika ní efee lɛ enyɔŋmɔ lɛ jeee nɔ ko nɔ ko fe “amale yaka nii” kɛkɛ!—Yona 2:9.

‘Mɔ ko Bɛ ni Miihere Nɔ’

Eji kwashiafeemɔ akɛ aaatsɛ nɔ ni bɛ lɛ akɛ nɔ ko ni yɔɔ diɛŋtsɛ. Mɛi ni jáa Baal nyɔŋmɔ lɛ yɛ gbalɔ Elia gbii lɛ amli lɛ kase enɛ yɛ gbɛ ni wa waa nɔ. Amɛhe amɛye diɛŋtsɛ akɛ Baal yɛ hewalɛ ni ekɛaaha la ajɛ ŋwɛi aba ni eshã kooloo ni akɛbaashã afɔle lɛ. Yɛ anɔkwale mli lɛ, “amɛtsɛ Baal gbɛi kɛjɛ leebi-leebi aahu kɛyashi shwane amɛkɛɛ: Baal, heremɔ wɔ nɔ!” Ani Baal yɛ toii ni ekɛaanyɛ enu, kɛ naabu ni ebaanyɛ ekɛ wie? Nɔ ni aŋma afɔ̃ shi lɛ tsaa nɔ akɛ: “Gbee ko bɛ, ni nɔherelɔ ko bɛ.” Yɛ anɔkwale mli lɛ, “nɔherelɔ ko bɛ.” (1 Maŋtsɛmɛi 18:26, 29) Baal jeee mɔ ko ni yɔɔ diɛŋtsɛ, ebɛ wala mli loo enyɛŋ nɔ ko efee.

Kwɛ bɔ ni ehe hiaa ni wɔyɔse Nyɔŋmɔ mɔ ni yɔɔ diɛŋtsɛ lɛ ni wɔjá lɛ! Shi namɔ eji? Ni mɛɛ gbɛ nɔ wɔhiɛ ni wɔkɛaafɔ̃ enɔ lɛ he baaba sɛɛnamɔ kɛha wɔ yɛ?

[Mfonirii ni yɔɔ baafa 3]

Peary naanyo Egingwah miikwɛ ŋwɛi kɛ shikpɔŋ kpeehe lɛ

Robert E. Peary

[He ni Sane lɛ Jɛ]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Mfonirii ni yɔɔ baafa 4]

Akɛ nibii ni yɔɔ je nɛŋ ni ajáa lɛ elaka mɛi pii