Nyɔŋmɔ Wiemɔ lɛ Tsɔɔlɔi ni Awo Amɛ Hewalɛ ni Amɛtsu Nitsumɔ ni Akɛwo Amɛdɛŋ lɛ He Nii

TSƆƆLƆI akpei ohai abɔ bua amɛhe naa yɛ nyɔji ni ho nɛɛ amli koni atsɔɔ amɛ nii. Amɛje amɛhenaabuamɔ lɛ shishi kɛjɛ nyɛsɛɛ afi lɛ May mli yɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpeei ohai abɔ ni Yehowa Odasefoi fee yɛ jeŋ fɛɛ lɛ shishi. Awo mɛi ni ba lɛ hewalɛ ni amɛtsɔɔ amɛhe nii, ni amɛfee mɛi ni he esa jogbaŋŋ, ni amɛtsu nitsumɔ ni akɛwo amɛdɛŋ ákɛ tsɔɔlɔi lɛ he nii.

Ani otee kpeei wuji nɛɛ eko shishi? Kɛji nakai lɛ, belɛ ŋwanejee ko bɛ he akɛ ohiɛ sɔ mumɔŋ niyenii kpakpa ni akɛha yɛ nɛkɛ henaabuamɔi kɛha anɔkwa Nyɔŋmɔ, Yehowa, lɛ jamɔ lɛ shishi. Mɛni hewɔ ofataaa wɔhe agbɛnɛ yɛ be mli ni wɔtiɔ kpee lɛ shishi wiemɔi ni tsɔɔ mɔ nii lɛ amli lɛ?

Klɛŋklɛŋ Gbi—Ŋmalɛi ni Jɛ Mumɔŋ He yɛ Sɛɛnamɔ Kɛha Nitsɔɔmɔ

Kpee lɛ shishi sɛinɔtalɔ lɛ kɛ miishɛɛ here mɛi ni eba kpee lɛ atuu kɛ wiemɔ ni ji “Nyɛhaa Atsɔɔa Nyɛ Nii, Nyɛ Nyɔŋmɔ Wiemɔ lɛ Tsɔɔlɔi.” Akɛni Yesu Kristo kase nii kɛjɛ ‘Tsɔɔlɔ ni Fe Fɛɛ’ ni ji Yehowa ŋɔɔ hewɔ lɛ, ebatsɔ Tsɔɔlɔ Kpele. (Yesaia 30:20; Mateo 19:16) Kɛji akɛ wɔɔya wɔhiɛ akɛ Nyɔŋmɔ Wiemɔ lɛ tsɔɔlɔi lɛ, belɛ esa akɛ wɔ hu Yehowa atsɔɔ wɔ nii.

Nɔ ni nyiɛ sɛɛ ba ji wiemɔ ni ji “Maŋtsɛyeli lɛ He Nitsɔɔmɔ Woɔ Yibii Kpakpai” lɛ. Atsɔ saji ni abibii Nyɔŋmɔ Wiemɔ lɛ tsɔɔlɔi ni he esa lɛ anɔ ama kaselɔ feemɔ lɛ mli miishɛɛ kɛ jɔɔmɔi anɔ mi.

 Wiemɔ ni kanyaa mɔ ni eyitso ji “‘Nyɔŋmɔ Niwuji’ lɛ Kanyaa Wɔ” nyiɛ sɛɛ ba. “Niwuji” ni kɔɔ Nyɔŋmɔ Maŋtsɛyeli lɛ he lɛ kanya gbɔmɛi ni amɛtsu he nii yɛ klɛŋklɛŋ afii oha lɛ mli. (Bɔfoi lɛ Asaji 2:11) Wɔ hu wɔbaanyɛ wɔkanya gbɔmɛi ni amɛfee nii kɛtsɔ “niwuji” nɛɛ ni amɛaajaje, tamɔ Ŋmalɛ naa tsɔɔmɔi ni kɔɔ kpɔmɔnɔ lɛ, gbohiiashitee lɛ, kɛ kpaŋmɔ hee lɛ ahe lɛ nɔ.

Wiemɔ ni nyiɛ sɛɛ lɛ wo mɛi fɛɛ hewalɛ, ni no ji, “Ná Yehowa Jalɛ lɛ He Miishɛɛ.” (Lala 35:27) Ayeɔ abuaa wɔ koni wɔtiu jalɛ sɛɛ kɛtsɔ suɔmɔ ni wɔɔná wɔha nɔ ni ja, ni wɔnyɛ̃ nɔ ni ejaaa, kɛtsɔ Biblia lɛ kasemɔ nɔ, kɛtsɔ ekãa ni wɔkɛaate shi wɔshi nibii fɔji ni yeɔ mɔ awui yɛ mumɔŋ, kɛ heshibaa ni wɔɔná lɛ nɔ. Nifeemɔi ni tamɔ nɛkɛ baaye abua ni ebu wɔhe kɛjɛ naanyobɔɔ ni ehiii he, kɛjɛ je lɛ heloo nibii asɛɛdii he, ni kɛmiijɛ hiɛtserɛjiemɔ mli jeŋba shara kɛ awuiyeli he.

Wiemɔ krɛdɛɛ, ni eyitso ji, “Asaa Wɔ Jogbaŋŋ Kɛmɔ Shi akɛ Nyɔŋmɔ Wiemɔ lɛ Tsɔɔlɔi” lɛ kai wɔ akɛ Yehowa tsɔɔ e-Wiemɔ, emumɔ krɔŋkrɔŋ lɛ, kɛ eshikpɔŋ nɔ gbɛjianɔtoo lɛ nɔ efeɔ wɔ sɔɔlɔi ni he esa. Yɛ Nyɔŋmɔ Wiemɔ lɛ kɛ nitsumɔ gbɛfaŋ lɛ, wielɔ lɛ wo wɔ ŋaa akɛ: ‘Oti ni ma wɔhiɛ ji ni wɔkɛ Biblia mli saji lɛ aha mɛi ni boɔ wɔ toi lɛ ní wɔshɛ amɛtsuii ahe.’

Klɛŋklɛŋ wiemɔi ni ahaa kɛtsaraa nɔ yɛ kpee lɛ shishi lɛ yitso ji “Ni Wɔɔtsɔɔ Wɔhe Nii Beni Wɔtsɔɔ Mɛi Krokomɛi Hu.” Shishijee nɔ lɛ ma nɔ mi akɛ esa akɛ wɔhi shi yɛ Kristofoi ajeŋba he tɛi ni nɔ kwɔlɔ ni wɔkɛtsɔɔ mɛi krokomɛi anii lɛ nɔŋŋ naa. Nɔ ni nyiɛ sɛɛ lɛ wo wɔ ŋaa ni ‘wɔja anɔkwale wiemɔ lɛ mli pɛpɛɛpɛ.’ (2 Timoteo 2:15) Kɛji akɛ wɔɔtsɔɔ wɔhe nii lɛ, belɛ Biblia lɛ kasemɔ daa kɛ hiɛdɔɔ he miihia, ni be sɛɛkɛlɛ ní wɔkɛsɔmɔ Nyɔŋmɔ lɛ kɔɔɔ he eko. Wiemɔ ni ahaa kɛtsaraa nɔ lɛ naagbee fã lɛ tsɔɔ akɛ Abonsam miikwɛ wɔ koni wɔjie sui tamɔ henɔwomɔ, heyeli mumɔ, bɔ ni abuɔ he tsɔ fe nine, awuŋayeli, hetsɛ, mlifu, nyɛ̃ɛ, kɛ tɔmɔ taomɔ kpo. Kɛlɛ, kɛji akɛ wɔkɛ hiɛdɔɔ te shi wo Abonsam lɛ, ebaajo wɔnaa foi. Bɔni afee ni wɔte shi wɔwo lɛ lɛ, esa akɛ wɔtsi wɔbɛŋkɛ Nyɔŋmɔ he kpaakpa.—Yakobo 4:7, 8.

Wiemɔ ni ba yɛ ebe naa pɛpɛɛpɛ, ni ji “Nyaŋemɔ Je Lɛŋ Bɔlɛnamɔ He Mfonirii kɛ Woji Ahe Haomɔi Lɛ” tsɔɔ wɔ bɔ ni wɔɔfee wɔdamɔ nakai  su ni baa shi ni woɔ wɔmumɔŋ shidaamɔ he gbeyei lɛ naa. Gbalɔ Habakuk wie yɛ Yehowa he akɛ: “Ohiŋmɛii yɛ krɔŋŋ tsɔ, bɔ ni okɛaakwɛ nɔ̃ fɔŋ, ni onyɛŋ okwɛ haomɔ.” (Habakuk 1:13) Esa akɛ ‘wɔhi efɔŋ kwraa.’ (Romabii 12:9) Awo fɔlɔi aŋaa ni amɛkwɛ bɔ ni amɛbii kɛ Internet lɛ tsuɔ nii amɛhaa kɛ nibii ni amɛkwɛɔ yɛ tɛlivishiŋ nɔ lɛ hu. Wielɔ lɛ kɛɛ akɛ esa akɛ mɛi ni bɔlɛnamɔ he mfonirii kɛ woji gbalaa amɛ lɛ atao yelikɛbuamɔ kɛjɛ naanyo ko ni eda yɛ mumɔŋ lɛ ŋɔɔ. Ebaaye ebua hu akɛ amɛaajwɛŋ ŋmalɛi tamɔ Lala 97:10; Mateo 5:28; 1 Korintobii 9:27; Efesobii 5:3, 12; Kolosebii 3:5; kɛ 1 Tesalonikabii 4:4, 5 nɔ ni amɛkɛwo amɛyitsoŋ.

Wiemɔ ni nyiɛ sɛɛ ni ji “Ha Nyɔŋmɔ Toiŋjɔlɛ lɛ Abu Ohe” lɛ shɛje wɔmii kɛ nɔmimaa akɛ, kɛji akɛ yeyeeyefeemɔ ha etɔ wɔ lɛ, wɔbaanyɛ wɔshɛ wɔ jatsu lɛ wɔfɔ̃ Yehowa nɔ. (Lala 55:23) Kɛji akɛ wɔfɔse wɔtsuii amli saji wɔshwie shi yɛ sɔlemɔ mli lɛ, Yehowa baaha wɔ ‘Nyɔŋmɔ toiŋjɔlɛ’ lɛ, kpoofeemɔ kɛ mligbɛ mlijɔlɛ ni baa kɛjɛɔ wɔkɛ lɛ teŋ wekukpaa ni jara wa waa lɛ mli lɛ.—Filipibii 4:6, 7.

Klɛŋklɛŋ gbi lɛ ba naagbee kɛ wiemɔ ko ni yɔɔ miishɛɛ waa, akɛ, “Yehowa kɛ La Ewula Ewebii,” ni enɛ tsɔɔ Yesaia yitso 60 lɛ mlibaa lɛ mli. Yɛ ŋmɛnɛŋmɛnɛ jeŋ ni mli ewo duŋ nɛɛ mli lɛ, “gbɔi abii”—ni ji asafo babaoo ni baa tamɔ tooi lɛ—kɛ Kristofoi ni afɔ amɛ mu lɛ fɛɛ náa Yehowa la lɛ mli ŋɔɔmɔ. Beni wielɔ lɛ wieɔ kuku 19 kɛ 20 he lɛ, etsɔɔ mli akɛ: “Yehowa ‘enyɔŋ shi’ tamɔ hulu aloo ni ‘eeegbo’ tamɔ nyɔɔŋtsere. Ebaaya nɔ ewula ewebii lɛ jogbaŋŋ kɛtsɔ la ni eeekpɛ eshwie amɛnɔ lɛ nɔ. Mɛɛ nɔmimaa ni yɔɔ naakpɛɛ enɛ ji kɛha wɔ nɛkɛ, yɛ be mli ni wɔhiɔ shi kɛtsɔɔ jeŋ ni mli ewo duŋ kpii nɛɛ mli lɛ naagbee gbii lɛ amli lɛ!” Yɛ wiemɔ lɛ naagbee lɛ, wielɔ lɛ tswa wolo ni ji, Yesaia Gbalɛ Lɛ—La Kɛha Adesai Fɛɛ, Kpo 2 ni ajie lɛ kpo lɛ he adafi. Ani ógbe wolo hee nɛɛ kanemɔ naa?

Gbi ni Ji Enyɔ—Wɔsa Jogbaŋŋ akɛ Wɔtsɔɔ Mɛi Krokomɛi Anii

Yɛ daa gbi ŋmalɛ lɛ he susumɔ kɛha gbi ni ji enyɔ lɛ sɛɛ lɛ, wɔkɛ miishɛɛ bo kpee lɛ shishi wiemɔi ni ji enyɔ ni ahaa kɛtsaraa nɔ, ni ji “Sɔɔlɔi ní Mɛi krokomɛi Tsɔɔ Amɛnɔ Kɛbatsɔmɔɔ Heyelilɔi” lɛ toi. Wielɔi ni wieɔ fãi etɛ nɛɛ ahe lɛ ma gbɛ̀i srɔtoi etɛ ni atsɔɔ nɔ ayeɔ abuaa gbɔmɛi koni amɛbatsɔmɔ heyelilɔi lɛ nɔ mi—Maŋtsɛyeli sane lɛ ni agbɛɔ ashwãa, mɛi ni yɔɔ wiemɔ lɛ he miishɛɛ ni anaa amɛ, kɛ mɛi ni yɔɔ wiemɔ lɛ he miishɛɛ ni atsɔɔ amɛ nii koni amɛye nɔ ni Kristo efã lɛ nɔ. Kɛtsɔ saji ni abibii kɛ nɔkwɛmɔnii ni afee atsɔɔ lɛ ayelikɛbuamɔ nɔ lɛ, wɔnyɛ wɔna bɔ ni wɔbaanyɛ wɔtsɔɔ mɛi krokomɛi nii ni amɛbatsɔmɔ kaselɔi lɛ pɔtɛɛ.

Fã ni nyiɛ sɛɛ lɛ kɔɔ saneyitso ni ji “Okɛ Nyɔŋmɔ Jamɔ Hetuu-Kɛhamɔ Afata Otsuishiŋmɛɛ He” lɛ he. Wielɔ lɛ tsɔɔ akɛ, nɔ ni yɛ naagbee lɛ ehe hiaa ji ‘wɔtsui shi ni wɔɔŋmɛ kɛyashi naagbee.’ (Mateo 24:13) Esa akɛ wɔkɛ gbɛjianɔ ni Nyɔŋmɔ eto lɛ fɛɛ atsu nii—sɔlemɔ, teemɔŋ nikasemɔ, kpeei, kɛ sɔɔmɔ nitsumɔ lɛ—ni wɔkɛná  Nyɔŋmɔ jamɔ hetuu-kɛhamɔ. Ehe miihia ni wɔkaha je lɛŋ akɔnɔi kɛ nifeemɔi miiye wɔ Nyɔŋmɔjamɔ hetuu-kɛhamɔ lɛ nɔ loo ni eefite lɛ.

Te aaafee tɛŋŋ ni gbɔmɛi ni etɔ amɛ ni amɛjatsui tsii fe amɛ lɛ aaaná hejɔɔmɔ ŋmɛnɛ? Wiemɔ ni ji “Hejɔɔmɔ ni Aaaná yɛ Kristo Apã lɛ Shishi” lɛ ha nakai sanebimɔ lɛ hetoo. Yesu kɛ mlihilɛ fɔ̃ nine etsɛ esɛɛnyiɛlɔi lɛ ni amɛba epã lɛ shishi ni amɛkase lɛ. (Mateo 11:28-30) Wɔbaanyɛ wɔba Yesu apã lɛ shishi kɛtsɔ enɔkwɛmɔnɔ ni ji shihilɛ ni yɔɔ mlɛo ni ŋmɛɔ pɛpɛɛpɛ ni wɔɔnyiɛ sɛɛ lɛ nɔ. Atsɔ saji ni abibii mɛi ni amɛ́ha amɛshihilɛ efee mlɛo lɛ nɔ aha wiemɔ lɛ mli saji otii lɛ fee faŋŋ.

Nibii titrii ni jeɔ kpo yɛ Yehowa Odasefoi ahenaabuamɔi wuji ashishi lɛ ekome ji Nyɔŋmɔ tsuji ni amɛjɔɔ amɛhe nɔ ehee lɛ abaptisimɔ. Nyɛmi nuu ni haa wiemɔ ni ji, “Baptisimɔ kɛ Mɔ Yaa Nitsɔɔmɔ Hegbɛi Wuji Amli” lɛ kɛ miishɛɛ here mɛi ni abaabaptisi amɛ lɛ atuu, ni efɔ̃ amɛ nine koni amɛná gbɛfaŋnɔ yɛ sɔɔmɔ hegbɛi wuji amli. Nyɔŋmɔ Wiemɔ lɛ tsɔɔlɔi ni abaptisi amɛ ehee ni anaa Ŋmalɛ naa hesaai yɛ amɛhe lɛ anine baanyɛ ashɛ gbɛnaa nii srɔtoi anɔ yɛ asafo lɛ mli.

“Kasemɔ Tsɔɔlɔ Kpele Lɛ” ji nakai shwane lɛ klɛŋklɛŋ wiemɔ. Yesu kɛ afii babaoo ni aleee ekwɛ e-Tsɛ lɛ ni ekase lɛ jogbaŋŋ, ni enɛ ha ebatsɔ Tsɔɔlɔ Kpele lɛ. Beni eyɔɔ shikpɔŋ nɔ lɛ, ekɛ nitsɔɔmɔ gbɛ̀i ni mɔɔ shi tsu nii, tamɔ sanebimɔi ni gbuɔ shi kɛ nɔkwɛmɔnii ni mli ka shi faŋŋ ni yɔɔ kuku. Yesu kɛ enitsɔɔmɔ lɛ damɔ Nyɔŋmɔ Wiemɔ lɛ nɔ ni ekɛ miishɛɛ, henumɔ, kɛ hewalɛ wie. Ani enɛ kanyaaa wɔ ni wɔkase Tsɔɔlɔ Kpele lɛ?

Wiemɔ kroko ni kanyaa mɔ, “Ani Oosumɔ ni Osɔmɔ Mɛi Krokomɛi?” lɛ wo wɔ hewalɛ ni wɔkase Yesu nɔkwɛmɔnɔ lɛ yɛ mɛi krokomɛi ni esɔmɔɔ amɛ lɛ mli. (Yohane 13:12-15) Wielɔ lɛ je gbɛ ebi ni hii ni he esa lɛ atamɔ Timoteo yɛ hegbɛi ni emɔ mli koni ekɛye ebua mɛi krokomɛi lɛ mli. (Filipibii 2:20, 21) Awo fɔlɔi hewalɛ ni amɛkase Elkana kɛ Hana yɛ amɛbii lɛ ni amɛaaye amɛbua amɛ koni amɛtiu be-fɛɛ sɔɔmɔ lɛ sɛɛ lɛ mli. Ni awo oblahii kɛ oblayei bibii lɛ hewalɛ ni amɛkase Yesu Kristo kɛ Timoteo ni edako lɛ nɔkwɛmɔnɔ lɛ kɛtsɔ amɛsuɔmɔ mli ni amɛaajɛ amɛkɛ amɛhe aha lɛ nɔ. (1 Petro 2:21) Mɛi ni amɛŋɔ hegbɛi koni amɛkɛsɔmɔ mɛi krokomɛi lɛ awiemɔi hu kanya wɔ.

Wiemɔi ni ahaa kɛtsaraa nɔ lɛ nɔ ni ji etɛ lɛ yitso ji “Ná Teokrase Tsɔsemɔ He Sɛɛ Babaoo Kɛmɔ Shi.” Klɛŋklɛŋ wielɔ lɛ ma bɔ ni ehe hiaa ni wɔha wɔjwɛŋmɔ ahi saji anɔ lɛ nɔ mi. Bɔni afee ni wɔtsu nakai oti lɛ he nii lɛ, wɔbaanyɛ wɔje shishi kɛ teemɔŋ nikasemɔi ni akɛ be kuku feɔ, kɛkɛ lɛ wɔbɔ mɔdɛŋ wɔha esɛɛ etsɛ. Ewo toibolɔi lɛ hewalɛ hu ni amɛgbele Biblia lɛ mli ni amɛkane ni amɛŋmala saji amɛshwie shi beni afeɔ kpeei. Wielɔ ni ji enyɔ lɛ hɛle wɔ shi yɛ bɔ ni ehe hiaa ni wɔkɛ wɔhe akpɛtɛ “tsamɔ wiemɔi” lɛ ahe gbagbalii. (2 Timoteo 1:13, 14) Bɔni afee ni wɔbu wɔhe kɛjɛ jeŋbai gbohii ni baa kɛjɛɔ redio kɛ adafitswaa woji amli, adesa jeŋ nilee mli, Biblia mli wiemɔi ni awieɔ ashiɔ, kɛ hemɔkɛyeli kwalɔi atsɔɔmɔi ahe lɛ, esa akɛ wɔhe be kɛha teemɔŋ nikasemɔ kɛ kpeeiyaa. (Efesobii 5:15, 16) Naagbee wielɔ yɛ wiemɔ ni ahaa kɛtsaraa nɔ lɛ mli lɛ ma bɔ ni ehe hiaa ni wɔkɛ nibii ni wɔkase lɛ atsu nii lɛ nɔ mi, bɔni afee ni wɔnyɛ wɔná teokrase tsɔsemɔ he sɛɛ kɛmɔ shi.—Filipibii 4:9.

Kwɛ miishɛɛ ni wɔná beni wɔnu wiemɔ ni ji “Woji kɛ Tsakemɔi Heei Kɛha Wɔmumɔŋ Nɔyaa” lɛ! Wɔmli fili wɔ beni wɔná wɔle akɛ etsɛŋ ni abaafee wolo hee ko ni egbɛi ji Ná Teokrase Sɔɔmɔ Skul Tsɔsemɔ lɛ He Sɛɛ lɛ. Wɔhe tswa shi waa akɛ wɔnine aaashɛ wolo lɛ nɔ beni wielɔ lɛ  tsɔɔ emli saji lɛ amli lɛ. Yɛ wolo lɛ fã ni wiemɔ he ŋaawoo mli otii yɔɔ jɛmɛ lɛ gbɛfaŋ lɛ, ekɛɛ akɛ: “Nɛkɛ nikasemɔ wolo hee nɛɛ damɔɔɔ bɔ ni je lɛ feɔ enii ehaa yɛ nikanemɔ, wiemɔ, kɛ nitsɔɔmɔ sui kpakpai 53 nɛɛ ahe lɛ nɔ. Wolo lɛ damɔ Ŋmalɛ naa shishitoo mlai anɔ.” Wolo lɛ baatsɔɔ bɔ ni gbalɔi lɛ, Yesu, kɛ ekaselɔi lɛ fee hesaa yɛ nitsɔɔmɔi kpakpai amli lɛ he nɔkwɛmɔnɔ. Hɛɛ, nikasemɔ wolo nɛɛ kɛ Teokrase Sɔɔmɔ Skul lɛ mli nibii heei lɛ baaye abua wɔ diɛŋtsɛ koni wɔtsɔmɔ Nyɔŋmɔ Wiemɔ lɛ he tsɔɔlɔi kpakpai.

Gbi ni Ji Etɛ—Nyɛfea Tsɔɔlɔi yɛ Be lɛ Hewɔ

Yɛ daa gbi ŋmalɛ lɛ he susumɔ yɛ naagbee gbi lɛ nɔ lɛ sɛɛ lɛ, mɔ fɛɛ mɔ bo kpee lɛ naagbee wiemɔi ni ahaa kɛtsaraa nɔ, ni ji “Maleaki Gbalɛ lɛ Sáa Wɔ Kɛhaa Yehowa Gbi Lɛ” toi jogbaŋŋ diɛŋtsɛ. Maleaki gba aaafee Yudafoi lɛ asɛɛkuu kɛmiijɛ Babilon lɛ sɛɛ afii oha. Amɛ́kpalaŋ kɛtee hemɔkɛyeli kwamɔ kɛ efɔŋfeemɔ mli ekoŋŋ, ni amɛgbeɔ Yehowa gbɛi lɛ he guɔ kɛtsɔɔ ejalɛ mlai ní amɛkuɔ amɛhiɛ amɛshwieɔ nɔ, ní amɛkɛ kooloi ní eshwila, eje kpa, ní he yeɔ bashãa afɔle lɛ hewɔ lɛ nɔ. Agbɛnɛ hu amɛmiishwie amɛblahiiaŋ ŋamɛi lɛ, ekolɛ bɔni afee ni amɛkɛ maŋsɛɛ yei abote gbalashihilɛ mli.

Maleaki gbalɛ lɛ klɛŋklɛŋ yitso lɛ maa suɔmɔ ni Yehowa yɔɔ kɛha ewebii lɛ nɔ mi. Emaa bɔ ni ehe hiaa ni wɔná gbeyeishemɔ ni woo yɔɔ mli wɔha Nyɔŋmɔ, ni agbɛnɛ hu wɔhiɛ asɔ krɔŋkrɔŋnii. Yehowa miikpa wɔ gbɛ ni wɔkɛ nɔ ni hi fe fɛɛ aha lɛ, ni wɔjɛ suɔmɔ ni pɛsɛmkunya bɛ mli lɛ mli wɔjá lɛ. Esaaa akɛ wɔ sɔɔmɔ krɔŋkrɔŋ lɛ feɔ nɔ ko ni ato ama shi kɛkɛ ni afeɔ, ni esa akɛ wɔbu wɔhe akɔntaa wɔha Nyɔŋmɔ.

Beni wielɔ ni haa wiemɔ ni ahaa kɛtsaraa nɔ lɛ nɔ ni ji enyɔ lɛ, ní ekɛ Maleaki yitso ni ji enyɔ lɛ toɔ wɔgbii nɛɛ ahe lɛ, ebi akɛ: “Ani wɔ diɛŋtsɛ lɛ wɔhiɛ yɛ wɔhe nɔ jogbaŋŋ koni ‘akana sane ko ni ejaaa yɛ wɔnaabui’?” (Maleaki 2:6) Esa akɛ mɛi ni nyiɛɔ hiɛ yɛ nitsɔɔmɔ mli lɛ akwɛ jogbaŋŋ koni nɔ ni amɛkɛɔ lɛ adamɔ Nyɔŋmɔ Wiemɔ lɛ nɔ shiŋŋ. Esa akɛ wɔná nyɛ̃ɛ wɔha kutumpɔo, tamɔ gbalamlitsemɔi ni ejaaa ni amɛnine shɛɔ nɔ lɛ nɛkɛ.—Maleaki 2:14-16.

Beni naagbee wielɔ ni haa wiemɔi ni ahaa kɛtsaraa nɔ lɛ wieɔ saneyitso ni ji “Namɔ Baaje Yehowa Gbi lɛ Mli Shweshweeshwe?” lɛ he lɛ, eye ebua ni esaa wɔ kɛha Yehowa gbi lɛ. Wielɔ lɛ kɛ hewalɛ wie akɛ: “Kwɛ miishɛjemɔ ni eji kɛha Yehowa tsuji akɛ amɛaale akɛ Maleaki yitso 3 kuku 17 lɛ miiná emlibaa wulu yɛ amɛnɔ! Ekɛɔ akɛ: ‘Gbi ní mibafee lɛ amɛaatsɔ minɔ,  Yehowa Zebaot kɛɛ, mi diɛŋtsɛ minɔ; ni mabaa amɛyi, tamɔ bɔ ni mɔ báa lɛ diɛŋtsɛ ebi ní sɔmɔɔ lɛ yi.’”

Nɔ kroko hu ni je kpo waa yɛ kpee lɛ shishi ji drama ni akɛ blema hesaamɔ fee lɛ, ni ji, “Ná Bulɛ Kɛha Yehowa Nɔyeli Hegbɛ,” ni kɔɔ Kora bii lɛ ahe lɛ. Yɛ atua ni amɛtsɛ tse eshi Mose kɛ Aaron lɛ fɛɛ sɛɛ lɛ, ebii lɛ hi shi akɛ anɔkwafoi amɛha Yehowa kɛ enajiaŋdamɔlɔi lɛ. Yɛ be mli ni Kora kɛ esɛɛnyiɛlɔi lɛ ahiɛ kpata lɛ, Kora bii lɛ ayi ná wala. Wiemɔ ni nyiɛ sɛɛ, ni ji, “Okɛ Anɔkwayeli Aba Ohe Shi Oha Nyɔŋmɔ Nɔyeli Hegbɛ” lɛ kɛ drama lɛ mli saji lɛ to wɔteŋ mɔ fɛɛ mɔ he. Wielɔ lɛ bɔ kɔkɔ yɛ hei ekpaa ni Kora kɛ esɛɛnyiɛlɔi lɛ anine nyɛ shi yɛ lɛ he: amɛkɛ anɔkwayeli fiii Yehowa nɔyeli hegbɛ lɛ sɛɛ; amɛha henɔwomɔ, hiɛnyam taomɔ, kɛ awuŋayeli ná amɛnɔ hewalɛ; amɛgbala jwɛŋmɔ kɛtee emuu ni mɛi ni Yehowa ehala amɛ lɛ yeee lɛ anɔ; amɛná huhuuhu wiemɔ su; amɛtsui enyɔɔɔ amɛmli yɛ sɔɔmɔ hegbɛi ni amɛyɔɔ lɛ ahe; ni amɛha naanyobɔi loo wekukpaai baye anɔkwa ni amɛaaye Yehowa lɛ hiɛ.

“Namɛi Tsɔɔ Jeŋmaji Fɛɛ Anɔkwale Lɛ?” ji maŋshiɛmɔ lɛ yitso. Anɔkwale ni awie he lɛ jeee anɔkwale ko kɛkɛ, shi anɔkwale ni kɔɔ Yehowa yiŋtoo ni Yesu Kristo ye he odase lɛ he. Wielɔ lɛ susu anɔkwale ni kɔɔ hemɔkɛyelii, anɔkwale ni kɔɔ jamɔ nifeemɔ, kɛ anɔkwale ni kɔɔ mɔ diɛŋtsɛ jeŋba he lɛ ahe. Bɔ ni ekɛ klɛŋklɛŋ afii oha lɛ mli Kristofoi lɛ to Yehowa Odasefoi ahe ŋmɛnɛ eha hewɔ lɛ, ewaje hekɛnɔfɔɔ ni wɔyɔɔ akɛ ‘Nyɔŋmɔ yɛ wɔteŋ lɛɛlɛŋ’ lɛ yɛ faŋŋ mli.—1 Korintobii 14:25.

Yɛ Buu-Mɔɔ nikasemɔ kɛha otsi lɛ naamuamɔ lɛ naagbee lɛ, atsirɛ Nyɔŋmɔ wiemɔ lɛ tsɔɔlɔi fɛɛ ni amɛba kpee lɛ shishi lɛ koni amɛfee nii kɛtsɔ naagbee wiemɔ, ni ji, “Hehiamɔ Henumɔ ni Wɔkɛaatsu Wɔ Nitsɔɔmɔ Nitsumɔ lɛ He Nii” lɛ nɔ. Wiemɔ gbɛjianɔtoo muu lɛ fɛɛ mlitii fioo lɛ ma bɔ ni ehe hiaa ni akɛ Ŋmalɛi lɛ atsu nii yɛ nitsɔɔmɔ mli, gbɛ̀i ni wɔɔtsɔ nɔ wɔtsɔmɔ tsɔɔlɔi ni he esa, kɛ bɔ ni ehe hiaa ni wɔná hekɛnɔfɔɔ yɛ anɔkwale ni wɔtsɔɔ mɛi krokomɛi lɛ mli lɛ anɔ mi. Wielɔ lɛ wo wɔ ŋaa akɛ ‘wɔha ana wɔshweremɔ lɛ faŋŋ’ ni ‘wɔha wɔhiɛ ahi wɔhe nɔ kɛ wɔ tsɔɔmɔ lɛ nɔ be fɛɛ be.’—1 Timoteo 4:15, 16.

Mɛɛ mumɔŋ okpɔlɔŋmɛɛ po wɔná mli ŋɔɔmɔ yɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ shishi nɛkɛ! Eba akɛ wɔɔkase Yehowa, wɔ Tsɔɔlɔ ni Fe Fɛɛ lɛ, kɛ Yesu Kristo, wɔ Tsɔɔlɔ Kpeteŋkpele lɛ, yɛ Nyɔŋmɔ wiemɔ lɛ ni wɔtsɔɔ mɛi krokomɛi lɛ mli.

Akrabatsa/Mfonirii ni yɔɔ baafa 28]

Woji Heei Ni Akɛbaatsu Hiamɔi Krɛdɛɛi Ahe Nii

Mɛi ni tee “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ shishi lɛ anine shɛ woji enyɔ komɛi anɔ kɛ miishɛɛ, ní esa akɛ eye ebua amɛ waa yɛ Ŋmalɛ mli anɔkwalei ni amɛbaatsɔɔ gbɔmɛi ni yɔɔ shikpɔŋ lɛ nɔ hei komɛi lɛ. Dɛhiɛmɔ wolo ni egbɛi ji, Ani Oyɛ Mumɔ ko ni Gbooo? lɛ baafee dɛŋdade ni sɛɛnamɔ yɔɔ he ni akɛbaaje sanegbaa shishi yɛ mɛi ni yɔɔ hei ni maŋ lɛ wiemɔ kɛ srɔtofeemɔ ko baaa “susuma” kɛ “mumɔ” teŋ lɛ ateŋ. Dɛhiɛmɔ wolo hee lɛ tsɔɔ faŋŋ akɛ mumɔ hewalɛ yɛ srɔto yɛ mumɔŋ bɔɔ nɔ he, ni ákɛ gbɔmɛi tsɔmɔɔɔ mumɔŋ bɔɔ nii kɛ́ amɛgboi.

Ajie wolo bibioo, ni ji, Shihilɛ ni Yɔɔ Miishɛɛ—Bɔ ni Aaafee Aná lɛ kpo yɛ kpee lɛ gbi ni ji enyɔ lɛ naagbee. Yiŋtoo ni akɛfee wolo bibioo nɛɛ ji, ni akɛ mɛi ni leee Bɔlɔ ko ni yɔɔ su kɛ baŋ diɛŋtsɛ lɛ, kɛ wolo ko ni ajɛ Nyɔŋmɔ mumɔ mli aŋma lɛ he nɔ ko lɛ aje Biblia mli nikasemɔi ashishi. Ani onyɛ okɛ nɛkɛ woji heei nɛɛ etsu nii yɛ osɔɔmɔ nitsumɔ lɛ mli?

[Mfonirii ni yɔɔ baafa 26]

Abaptisi mɛi ohai abɔ yɛ Milan, Italy kɛ kpokpaa wulu nɔ kpeei ni afee yɛ jeŋ fɛɛ lɛ shishi

[Mfoniri ni yɔɔ baafa 29]

Drama, ni ji “Ná Bulɛ Kɛha Yehowa Nɔyeli Hegbɛ” lɛ kanya toibolɔi waa