Okɛ Ohiɛ Afɔ̃ Yehowa—Nyɔŋmɔ ni Yɔɔ Diɛŋtsɛ lɛ Nɔ

Ani eshɛ gbɛkɛ ko ni ŋwɛi tse ni okwɛ atatu lɛ ní ona ŋulamii ohai abɔ dã? Te ooofee tɛŋŋ otsɔɔ bɔ ni fee ni amɛba shihilɛ mli lɛ mli?

ŊULAMII lɛ kɛ blema Israel Maŋtsɛ David wie yɛ mfonirifeemɔŋ gbɛ nɔ, gbi gbɛkɛ ko ni jeŋ ejɔ lɛ mli, ni no tsirɛ lɛ ni eŋma akɛ: “Ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.” (Lala 19:2) Hɛɛ, Bɔlɔ lɛ moŋ sa “anunyam kɛ agbojee kɛ hewalɛ lɛ,” shi jeee bɔɔ nɔ̃ lɛ.—Kpojiemɔ 4:11; Romabii 1:25.

Biblia lɛ kɛɔ akɛ: “Mɔ ni saa nii fiaa to ji Nyɔŋmɔ.” (Hebribii 3:4) Eji anɔkwale akɛ, anɔkwa Nyɔŋmɔ lɛ, ‘ni gbɛi ji Yehowa lɛ, ji Mɔ ni Kwɔ Fe Fɛɛ yɛ shikpɔŋ lɛ nɔ fɛɛ!’ (Lala 83:19) Ni ejeee mɔ ko ni lakaa mɔ—shishiulɔ ko. Yesu Kristo wie yɛ eŋwɛi Tsɛ, Yehowa he akɛ: “Anɔkwafo ji mɔ ni tsu mi . . . lɛ.”—Yohane 7:28.

Yehowa—Mɔ ni Haa Eyiŋtoi Baa Mli

Nyɔŋmɔ gbɛi ni yɔɔ srɔto, ni ji Yehowa lɛ pueɔ aaafee shii 7,000 yɛ Hebri Ŋmalɛi lɛ pɛ mli. Nakai gbɛi lɛ diɛŋtsɛ tsɔɔ anɔkwale ni eji akɛ eji mɔ ko ni yɔɔ diɛŋtsɛ. Nyɔŋmɔ gbɛi lɛ diɛŋtsɛ shishi ji, “Ehaa Ebaa Mli.” No hewɔ lɛ, Yehowa Nyɔŋmɔ wieɔ lɛ diɛŋtsɛ ehe akɛ Mɔ ni Haa eyiŋtoi Baa Mli. Beni Mose bi Nyɔŋmɔ egbɛi lɛ, Yehowa gbála shishinumɔ ni yɔɔ egbɛi lɛ mli lɛ mli lɛ etsɔɔ lɛ, yɛ nɛkɛ gbɛ nɔ akɛ: “Mi ji mɔ ni mi ji.” (2 Mose 3:14) Rotherham shishitsɔɔmɔ lɛ ŋma lɛ faŋŋ akɛ: “Mibatsɔ nɔ fɛɛ nɔ ni misumɔɔ.” Yehowa tsɔɔ, loo ehalaa akɛ ebaatsɔ nɔ fɛɛ nɔ ni he hiaa bɔni afee ni eha ejalɛ yiŋtoi kɛ eshiwoi lɛ aba mli. No hewɔ lɛ, ehiɛ gbɛi babaoo loo sablãi ni kanyaa mɔ, tamɔ Bɔlɔ, Tsɛ, Nuntsɔ Maŋtsɛ, Tookwɛlɔ, Yehowa Zebaot, sɔlemɔ Toibolɔ, Kojolɔ, Tsɔɔlɔ Kpeteŋkpele, Kpɔ̃lɔ.—Kojolɔi 11:27; Lala 23:1; 65:3; 73:28; 89:27; Yesaia 8:13; 30:20; 40:28; 41:14.

Anɔkwa Nyɔŋmɔ lɛ pɛ ji mɔ ni baanyɛ ahiɛ gbɛi ni ji Yehowa lɛ, ejaakɛ adesai nyɛŋ aná nɔmimaa akɛ amɛyiŋtoi baanyɛ aye omanye kɔkɔɔkɔ. (Yakobo 4:13, 14) Yehowa pɛ baanyɛ akɛɛ akɛ: “Tamɔ bɔ ni nugbɔnɛmɔ kɛ snoo jɛɔ ŋwɛi shwieɔ shi, ní ekuuu esɛɛ kɛyaaa jɛi dɔŋŋ, akɛ ja eha shikpɔŋ lɛ nu, ní eha eba nii ní ewo yibii, ní ekɛ dumɔ nii eha nidulɔ ní ekɛ niyenii hu eha mɔ ni yeɔ lɛ: nakai miwiemɔi ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yesaia 55:10, 11.

Yehowa tsuɔ eyiŋtoi ahe nii kɛ nɔmimaa ni tamɔ nɛkɛ akɛ nɔ ni feɔ tamɔ ebɛ faŋŋ yɛ adesai ahiɛ po lɛ feɔ nɔ ni yɔɔ diɛŋtsɛ kɛha lɛ. Beni Abraham, Isak, kɛ Yakob egbo sɛɛ be kpalaŋŋ lɛ, Yesu tsĩ amɛ tã ni ekɛɛ akɛ: “Shi  [Yehowa] Nyɔŋmɔ lɛ, ejeee gbohii a-Nyɔŋmɔ, shi moŋ hiɛkalɔi a-Nyɔŋmɔ; ejaakɛ ehiɛ lɛ mɛi fɛɛ hiɛ kamɔ.” (Luka 20:37, 38) Blematsɛmɛi anɔkwafoi etɛ lɛ egboi, shi Nyɔŋmɔ yiŋtoo ákɛ ebaatee amɛ shi lɛ baaba mli anɔkwale aahu akɛ, yɛ ehiɛ lɛ amɛtamɔ mɛi ni hiɛ kamɔ momo po. Nɛkɛ blema tsuji anɔkwafoi nɛɛ ní Yehowa kɛ amɛ aaaba wala mli ekoŋŋ lɛ jeee nɔ ko ni wa ha lɛ, tamɔ beni ebɔ klɛŋklɛŋ adesa lɛ kɛjɛ shikpɔŋ su mli lɛ.—1 Mose 2:7.

Bɔfo Paulo kɛ nɔkwɛmɔnɔ kroko haa ni tsɔɔ anɔkwale ni eji akɛ Nyɔŋmɔ haa nɔ ni etoɔ eyiŋ yɛ he lɛ baa mli. Yɛ Ŋmalɛi lɛ amli lɛ, atsɛ Abraham akɛ “jeŋmaji pii atsɛ.” (Romabii 4:16, 17) Beni Abram bɛ bi beebe lɛ, Yehowa tsake egbɛi lɛ ni efee lɛ Abraham, ni shishi ji “Asafo Babaoo Tsɛ (Mɛi Babaoo).” Yehowa ha shishinumɔ ni yɔɔ nakai gbɛi lɛ mli lɛ bafee nɔ ni yɔɔ diɛŋtsɛ kɛtsɔ naakpɛɛ gbɛ nɔ ni etsɔ esaa Abraham kɛ eŋa Sarai ni amɛgbɔlɔ lɛ afɔmɔ hewalɛi lɛ nɔ.—Hebribii 11:11, 12.

Akɛni akɛ hewalɛ kɛ hegbɛi babaoo ewo Yesu Kristo dɛŋ hewɔ lɛ, ewie shihilɛ mli nibii diɛŋtsɛ ahe kɛjɛ hegbɛ ni nɔ kwɔ fe adesai anɔ he. Eyɛ mli akɛ Yesu naanyo Lazaro ni esumɔ esane lɛ egbo moŋ, shi ekɛɛ ekaselɔi lɛ akɛ: “Wɔshieŋtsɛ Lazaro ewɔ̀; shi miiya ni mayatsĩɛ lɛ yɛ wɔ̀ lɛ mli.” (Yohane 11:11) Mɛni hewɔ Yesu wie mɔ ko ni egbo lɛ he ákɛ mɔ ko ni ewɔ̀ kɛkɛ lɛ?

Beni Yesu shɛ Lazaro maŋ ni ji Betania lɛ mli lɛ, etee gbonyobu lɛ naa ni efã akɛ ajie tɛ ni akɛtsĩ bu lɛ naa lɛ. Beni esɔle waa sɛɛ lɛ, efã akɛ: “Lazaro ee, jee kpo!” Ni beni mɛi ni kwɛɔ nii lɛ kwɛɔ gbonyobu lɛ naa gaa lɛ, “gbonyo lɛ je kpo, fũu mamai lɛ fĩmɔ enaji kɛ eniji, ni duku fĩ ehiɛ.” Kɛkɛ ni Yesu kɛɛ akɛ: “Nyɛfɛ̃nea lɛ, ni nyɛhaa eyaa.” (Yohane 11:43, 44) Yesu tée Lazaro shi—esaa ekɛ nuu ni egbo gbii ejwɛ lɛ ba wala mli ekoŋŋ! Kristo maleee beni ekɛɛ akɛ enaanyo lɛ miiwɔ̀ lɛ. Yɛ Yehowa kɛ Yesu hiɛ lɛ, Lazaro ní egbo lɛ tamɔ mɔ ko ni ewɔ̀ nɔŋŋ. Hɛɛ, Yesu kɛ eŋwɛi Tsɛ lɛ tsuɔ saji ni eba mli diɛŋtsɛ lɛ ahe nii.

Yehowa Baanyɛ Eha Wɔhiɛnɔkamɔi lɛ Aba Mli Diɛŋtsɛ

Mɛɛ srɔtofeemɔ yɔɔ amagai ni lakaa mɔ kɛ Nyɔŋmɔ ni yɔɔ diɛŋtsɛ lɛ teŋ nɛkɛ! Amaga jálɔi lɛ kɛɔ yɛ gbɛ ni ejaaa nɔ akɛ nibii ni amɛkɛ woo haa amɛ lɛ yɛ hewalɛ ni fe adesai anɔ̃. Shi kɛlɛ, nɛkɛ woo nifeemɔi ni akɛhaa nɛɛ eko kwraa nyɛŋ ekɛ nyɛmɔi ni yɔɔ naakpɛɛ aha amagai nɛɛ. Nɔ ni tamɔɔɔ nakai lɛ, Yehowa Nyɔŋmɔ baanyɛ akɛɛ yɛ etsuji ní egboi jeeŋmɔ lɛ ahe akɛ amɛhiɛ kã ejaakɛ ebaanyɛ ekɛ amɛ aba wala mli ekoŋŋ. “Yehowa ji anɔkwa Nyɔŋmɔ lɛ,” ni elakaaa ewebii lɛ.—Yeremia 10:10.

Kwɛ bɔ ni eji miishɛɛ akɛ wɔɔle akɛ yɛ Yehowa be ni sa mli lɛ, ebaatee gbohii ni yɔɔ ekaimɔ mli lɛ shi—ekɛ amɛ baaba wala mli ekoŋŋ! (Bɔfoi lɛ Asaji 24:15) Hɛɛ, nɔ ni fata gbohiiashitee lɛ he ji mɔ aŋkro lɛ shihilɛ su ni eyɔɔ lɛ ní aaaku sɛɛ akɛba ekoŋŋ. Ejeee naagba kɛha Bɔlɔ lɛ ní enilee kɛ hewalɛ bɛ naagbee lɛ akɛ eeekai mɛi ni egboi lɛ ashihilɛ sui ní etee amɛ shi. (Hiob 12:13; Yesaia 40:26) Akɛni Yehowa eyi obɔ kɛ suɔmɔ hewɔ lɛ, ekɛ ejwɛŋmɔ ni yeɔ emuu lɛ baatsu nii koni etee gbohii lɛ ashi kɛba wala mli ekoŋŋ yɛ shikpɔŋ nɔ paradeiso  mli kɛ sui ni amɛyɔɔ dani amɛgboi lɛ.—1 Yohane 4:8.

Yɛ be mli ni Satan je lɛ bɛŋkɛɔ enaagbee lɛ, mɛi ni kɛ amɛhiɛ fɔ̃ɔ anɔkwa Nyɔŋmɔ lɛ nɔ lɛ baaye omanye yɛ wɔsɛɛ be mli kɛ̃. (Abɛi 2:21, 22; Daniel 2:44; 1 Yohane 5:19) Lalatsɛ lɛ maa nɔ mi ehaa wɔ akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, . . . Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” (Lala 37:10, 11) Awuiyeli kɛ basabasafeemɔ baafee nibii ni akaiŋ dɔŋŋ. Jalɛsaneyeli baahe shi, ni shika helɛtemɔ he naagbai ehiŋ shi dɔŋŋ. (Lala 37:6; 72:12, 13; Yesaia 65:21-23) Abaajie nɔ fɛɛ nɔ ni kɛ niiamlijiemɔ baa yɛ nɔ ni kɔɔ adesai ashihilɛ, hewolonɔ su, wiemɔ kɛ weku he lɛ fɛɛ kɛya. (Bɔfoi lɛ Asaji 10:34, 35) Tai kɛ tawuu nibii sɛɛ baafo. (Lala 46:10) Yɛ nakai beaŋ lɛ, “maŋbii lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24) Mɔ fɛɛ mɔ baaná gbɔmɔtsoŋ hewalɛnamɔ ni yeɔ emuu mli ŋɔɔmɔ. (Kpojiemɔ 21:3, 4) Etsɛŋ ni Paradeiso yɛ shikpɔŋ nɔ baafee nii ni yɔɔ diɛŋtsɛ. Yehowa eto eyiŋ yɛ he!

Hɛɛ, etsɛŋ ni hiɛnɔkamɔi ni damɔ Biblia lɛ nɔ lɛ fɛɛ baaba mli. Mɛni hewɔ esa akɛ wɔŋmɛ gbɛ ni nibii ni ajáa yɛ je lɛŋ lɛ alaka wɔ yɛ be mli ni wɔbaanyɛ wɔkɛ wɔhiɛ afɔ̃ Yehowa nɔ kwraa kɛmɔ shi lɛ? Esuɔmɔnaa nii ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:3, 4) Yɛ nɔ najiaŋ ni wɔɔfite wɔbe kɛ nii ni wɔyɔɔ kɛha lakamɔ nibii ni ji nibii agbɛjianɔtoo nɛɛ kɛ enyɔŋmɔi lɛ, nyɛhaa wɔdaa yɛ Nyɔŋmɔ ni yɔɔ diɛŋtsɛ lɛ he nilee lɛ mli, ní wɔkɛ wɔhiɛ afɔ̃ enɔ kɛ wɔtsui fɛɛ.—Abɛi 3:1-6; Yohane 17:3.

[Mfoniri ni yɔɔ baafa 6]

Yɛ Yehowa kɛ Yesu hiɛ lɛ, wɔ̀ kɛkɛ Lazaro ewɔ̀

[Mfonirii ni yɔɔ baafa 7]

Etsɛŋ ni shikpɔŋ lɛ baatsɔ Paradeiso diɛŋtsɛ