Tso ni Mli “Nu Tsereɔ” kɛ Nibii Srɔtoi ni Akɛ “Nui” lɛ Feɔ

Yeremia 51:8 kɛɔ akɛ: ‘Nyɛkɛ tsofa atoa pilamɔ nɔ.’ Hei ni wɔbaaná tsofa nɛɛ ni haa hewaa naa baa shi ni etsaa pilamɔ lɛ waa diɛŋtsɛ lɛ kɛaajɛ lɛ ateŋ ekome taomɔ lɛ kɛ wɔ yaa Chios ŋshɔkpɔ, ni yɔɔ Aegea Ŋshɔ lɛ naa lɛ nɔ.

YƐ LATSAA be lɛ shishijee mli lɛ, okwaafoi ni yɔɔ Chios lɛ saa amɛhe kɛhaa nikpamɔ yɛ gbɛ ni yɔɔ srɔto kwraa nɔ. Beni amɛsaa shikpɔŋ lɛ nɔ amɛgbe naa lɛ, amɛkɛ nishɔɔ sũ yɛŋ feɔ nɔ ko tamɔ faneshi kɛbɔleɔ baaŋmɔŋ tsei bibii ni atsɛɔ amɛ tsei ni nu jɛɔ mli lɛ he. Kɛkɛ lɛ, okwaafoi lɛ folɔɔ tso lɛ he ni emli “nu tsereɔ.” “Nui” ni su tamɔ eyɛŋ tsereɔ kɛjɛɔ tso lɛ mli agbɛnɛ. Yɛ otsii enyɔ loo etɛ sɛɛ lɛ, nui lɛ fimɔɔ kpɔikpɔi, ni okwaafoi lɛ batitiɔ, amɛtitiɔ kɛjɛɔ tso lɛ he loo kɛjɛɔ nishɔɔ sũ ni tamɔ faneshi lɛ nɔ. Akɛ nɛkɛ “nui,” ni atsɛɔ lɛ amã nɛɛ feɔ mu ni akɛgbɔleɔ loo akɛtoɔ pilamɔ nɔ.

Shi kɛlɛ, dani nikpamɔ be lɛ aaashɛ lɛ, ehe miihia ni ato tsui shi ni atsu nii dɛŋdɛŋ. Tso ni he yɛɔ fioo ni etsɔmɔ lɛ edaaa oya. Eheɔ afii 40 kɛyashi 50 dani tso lɛ daa agbo—bei pii lɛ ekɛlɛ feɔ mitai enyɔ kɛyashi etɛ.

Yɛ nitsumɔ ni yɔɔ tso lɛ ni aaafo ni abua “nui” lɛ anaa lɛ sɛɛ lɛ, nitsumɔi krokomɛi hu yɛ ni esa akɛ atsu dani anyɛ aná emli nu lɛ. Kɛ́ okwaafoi lɛ bua tso lɛ mli “nui” ni efimɔ kpɔikpɔi lɛ anaa amɛgbe naa lɛ, amɛdoɔ nɔ, amɛfɔ́ɔ he, amɛjaraa mli bɔ ni amɛdaramɔ kɛ amɛsu yɔɔ ha. No sɛɛ lɛ, atsuuɔ tso mli nui lɛ ahe lolo ni anyɛɔ akɛfeɔ nibii babaoo.

Tso ni Jara Wa lɛ He Yinɔsane

Hela wiemɔ ni akɛtsu nii kɛha tso mli nu lɛ shishi ji “ní aaakpe nyanyɔji ashishi.” (Mateo 8:12; Kpojiemɔ 16:10) Nɛkɛ gbɛi nɛɛ tsɔɔ akɛ kɛjɛ blema beebe lɛ, akɛ nakai tso lɛ mli nu feɔ amã ni ataa koni eha daaŋ aje ŋma.

Tso mli nu he amaniɛbɔɔ ni etsɛ fe fɛɛ lɛ jɛ Herodotus, ni ji Hela yinɔsaneŋmalɔ ni hi shi yɛ afii ohai enumɔ D.Ŋ.B. lɛ ŋɔɔ. Woloŋmalɔi kɛ tsofafeelɔi krokomɛi—ní Apollodorus, Dioscorides, Theophrastus, kɛ Hippocrates fata he lɛ—tsĩ nɔ ni akɛ tso mli nu lɛ feɔ yɛ tsofafeemɔi amli lɛ tã. Eyɛ mli akɛ tsei ni nu jɛɔ mli lɛ fɛɛ daa yɛ Mediteranea Ŋshɔ lɛ naa fɛɛ kɛjɛ aaafee afi 50 Ŋ.B. kɛbaa nɛɛ moŋ, shi etamɔ nɔ ni atsĩ tso mli nu lɛ he nitsumɔ naa awo Chios titri. Ni tso mli nu lɛ ji nɔ̃ titri hewɔ ni mɛi ni baye Chios nɔ kunim lɛ fee nakai, kɛjɛ Romabii anɔ kɛyashi Genoabii anɔ kɛtee Ottomanbii lɛ anɔ.

Nibii Srɔtoi ni Akɛ Tso Mli Nu lɛ Feɔ

Blema Mizraimbii tsofafeelɔi lɛ kɛ tso mli nu lɛ tsaa helai srɔtoi, ni nɔ ni fata he ji musuŋtsɔmɔ  kɛ hela ni haa mɔ talɔi amli woɔ nu. Amɛkɛtsuɔ nii hu akɛ tsofa-kɛ-ŋma kɛ tsofa ni amɛkɛwoɔ gbohii. Eeenyɛ efee akɛ tso ni nu jɛɔ mli lɛ ji tsei ní anáa ‘tsofa ni yɔɔ Gilead’ ni wɔle yɛ Biblia lɛ mli akɛ akɛfee tsofai kɛ hesaamɔ mui kɛ nɔ ni akɛwoɔ gbohii lɛ ateŋ ekome. (Yeremia 8:22; 46:11) Nɔ ni awie po ji akɛ tso ni woɔ yibii kɛ ŋma ko, ni ji nibii lɛ ateŋ eko ni akɛfeɔ tsofa-kɛ-ŋma krɔŋkrɔŋ ni akɛtsuɔ krɔŋkrɔŋ nibii pɛ lɛ baanyɛ afee nɔ ni jɛ tsei ni nu jɛɔ mli nɛɛ weku lɛ mli.—2 Mose 30:34, 35.

Ŋmɛnɛ, akɛ tso mli nu lɛ feɔ tsofai ni akɛkpaa nii ahe ni akɛbɛjeɔ nitɛŋmɔ nii, sɛi, kɛ miji ahe. Akɛtsuɔ nii ni akɛbalaa nii ahe ni akɛkpaa nibii ahe koni nu akaya mli, ni asaa awie he akɛ eji tsofai ni nɔ bɛ lɛ ateŋ eko ni akɛfutuɔ tsofa ni akɛwoɔ mama kɛ nitɛŋlɔ pɛnte mli koni ekafite. Akɛ tso mli lɛ nu lɛ hu tsuɔ nii ákɛ amã ní akɛtsaa nii, ni akɛtsakeɔ kooloo he wolo hiɛ. Akɛni tso mli nu lɛ jeɔ ŋma kɛ ehe sɛɛnamɔi krokomɛi hu hewɔ lɛ, akɛfeɔ samala, hesaamɔ mu, kɛ anowatrɛ.

Awie tso mli nu lɛ he afata tsofai 25 ni aye he odase yɛ jeŋ fɛɛ lɛ he. Arabiabii kã he amɛkɛfeɔ shikpɔŋ tsofa lolo. Agbɛnɛ hu, akɛ tso mli nu lɛ tsuɔ nii ni akɛtsimɔɔ bui ni yɔɔ nyanyɔji amli ni akɛhàa tsofai ahe.

Ákɛ tsofa jɛɛhe lɛ, akɛ tso ni nu jɛɔ mli lɛ mli “nui” lɛ ni “tsereɔ” ni akɛfeɔ nibii srɔtoi lɛ eba hewaa shi ni akɛtsa helai afii ohai abɔ. Belɛ, yiŋtoo kpakpa ko hewɔ mɔ ni Yeremia gba akɛ: ‘Nyɛkɛ tsofa atoa pilamɔ nɔ’ lɛ.

[Mfonirii ni yɔɔ baafa 31]

Chios

Tso mli nu lɛ sɔɔmɔ

Akɛ henɔkwɛmɔ jogbaŋŋ buaa tso mli “nui” lɛ anaa

[He ni Sane lɛ Jɛ]

Chios and harvest line art: Courtesy of Korais Library; all others: Kostas Stamoulis