“Nyɛbaa Miŋɔɔ . . . ni Maha Nyɛ Hejɔɔmɔ”

‘Wiemɔ lɛ Shiɛmɔ’ kɛ Miishɛɛ Baa

EJI nuu ni yeɔ emuu ní akɛ nitsumɔ ko ni he hiaa ewo edɛŋ. Akɛni enitsɔɔmɔ gbɛ̀i lɛ mɔɔ shi jogbaŋŋ hewɔ lɛ, “mɛi lɛ ahe jɔ̃ amɛhe yɛ enitsɔɔmɔ lɛ hewɔ.” (Mateo 7:28) Agbɛnɛ hu eji shiɛlɔ ni yɔɔ ekãa. Ekɛ ebe, ehewalɛ, kɛ nii ni eyɔɔ lɛ tsu nii titri kɛha Nyɔŋmɔ Maŋtsɛyeli lɛ jajemɔ. Yɛ anɔkwale mli lɛ, Yesu Kristo fã gbɛ kɛtee maŋ ni ejɛ mli lɛ mli he fɛɛ he ákɛ shiɛlɔ kɛ tsɔɔlɔ ni anyɛŋ akɛ lɛ ato mɔ ko he.—Mateo 9:35.

Yesu nitsumɔ ni he hiaa lɛ ji ní eshiɛ “maŋtsɛyeli lɛ he sanekpakpa lɛ” etsɔɔ eyinɔbii lɛ, ni etsɔse ekaselɔi lɛ kɛha nakai jeŋ fɛɛ nitsumɔ kome too lɛ nɔŋŋ. (Mateo 4:23; 24:14; 28:19, 20) Ani gbɛnaa nii ni tsii ni yɔɔ amɛshiɛmɔ nitsumɔ lɛ mli kɛ hiamɔ ni yɔɔ he kɛ agbɛnɛ hu bɔ ni nakai nitsumɔ lɛ je agbo ha lɛ baagbɔjɔ esɛɛnyiɛlɔi ni yeee emuu, ni yɔɔ fatɔɔ lɛ?

Dabida! Beni Yesu kɛɛ ekaselɔi lɛ koni amɛsɔle kɛha “nikpamɔ nuntsɔ,” ni ji Yehowa Nyɔŋmɔ kɛha nitsulɔi babaoo lɛ sɛɛ lɛ, etsu amɛ koni amɛtsɔɔ gbɔmɛi lɛ anii. (Mateo 9:38; 10:1) Kɛkɛ ni ema nɔ mi eha amɛ akɛ, gbɛnaa nii ni yɔɔ esɛɛnyiɛlɔ ní aaatsɔ—ni shiɛmɔ nitsumɔ lɛ fata he—lɛ baanyɛ ekɛ anɔkwa heyeli kɛ miishɛjemɔ aba. Yesu kɛɛ akɛ: “Nyɛbaa miŋɔɔ . . . ni maha nyɛ hejɔɔmɔ.”—Mateo 11:28.

Miishɛɛ Jɛɛhe Ko

Kwɛ bɔ ni musuŋtsɔlɛ, suɔmɔ, kɛ mlihilɛ yɔɔ nakai ninefɔɔ lɛ mli! Etsɔɔ bɔ ni Yesu susuɔ esɛɛnyiɛlɔi lɛ ahe ehaa. Ekaselɔi lɛ náa miishɛɛ akɛ amɛmiitsu amɛgbɛnaa nii ákɛ amɛshiɛ Nyɔŋmɔ Maŋtsɛyeli lɛ he “sanekpakpa lɛ” he nii. Enɛ haa amɛnáa miishɛɛ kɛ tsui ni nyɔɔ mɔ mli diɛŋtsɛ.—Yohane 4:36.

Dani Yesu baaba shikpɔŋ lɛ nɔ beebe lɛ, Ŋmalɛi lɛ ma nɔ mi akɛ miishɛɛ ni eyɔɔ lɛ baafee sɔɔmɔ krɔŋkrɔŋ ko ni ekɛhaa Nyɔŋmɔ lɛ hewɔ. Afee enɛ faŋŋ beni lalatsɛ lɛ lá akɛ: “Shikpɔŋ lɛ fɛɛ, nyɛbɔa oshe nyɛhaa Yehowa! Nyɛsɔmɔa Yehowa kɛ miishɛɛ, nyɛbaa ehiɛ kɛ nyamɔ lala!” (Lala 100:1, 2) Ŋmɛnɛ, gbɔmɛi ni yɔɔ maji fɛɛ mli lɛ nyaa yɛ Yehowa mli, ni yijiemɔ ni amɛkɛhaa lɛ tamɔ asraafoi akunimyeli mli oshebɔɔ ko. Mɛi ni amɛtuu amɛhe amɛha Nyɔŋmɔ yɛ anɔkwale mli lɛ baa ehiɛ “kɛ nyamɔ lala.” Ni eji anɔkwale akɛ enɛ ja, ejaakɛ Yehowa ji ‘miishɛɛ Nyɔŋmɔ,’ mɔ ni taoɔ ni etsuji aná miishɛɛ beni amɛtsuɔ amɛhenɔjɔɔmɔ kɛha lɛ lɛ he nii lɛ.—1 Timoteo 1:11.

Sɔɔlɔi ni Yɔɔ Miishɛɛ

Te enyɛɔ ebaa lɛ tɛŋŋ ni nitsumɔ dɛŋdɛŋ ni atsuɔ yɛ shiɛmɔ nitsumɔ lɛ mli lɛ haaa etɔ wɔ, shi moŋ ehaa wɔnáa miishɛɛ diɛŋtsɛ lɛ? Ojogbaŋŋ, kɛha Yesu lɛ, Yehowa nitsumɔ lɛ tamɔ niyenii ni kanyaa mɔ. Ekɛɛ akɛ: “Miŋmãa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.”—Yohane 4:34.

Nakai nɔŋŋ hu Kristofoi shiɛlɔi ni yɔɔ ekãa lɛ náa miishɛɛ yɛ be mli ni ‘amɛshiɛɔ wiemɔ lɛ.’ (2 Timoteo 4:2) Connie, ni ji Kristofonyo yoo ni hiɛ efa, ni kɛ ŋmɛlɛtswai ni fe 70 tsuɔ nii daa nyɔŋ nɔ yɛ shiɛmɔ nitsumɔ lɛ mli lɛ kɛɛ akɛ: “Kɛ́ mikɛ mihe wo shiɛmɔ nitsumɔ lɛ mli lɛ, minuɔ he akɛ mitsui enyɔ mimli ni miyɛ miishɛɛ, kɛji etɔ mi yɛ gbi lɛ mli po.”

Ni kɛ́ abooo Maŋtsɛyeli shɛɛ sane lɛ toi hu? Connie tsa nɔ akɛ: “Ekɔɔɔ he eko bɔ ni abaakpɛlɛ sane lɛ nɔ aha lɛ, gbi ko bako ni mishwa mihe akɛ mikɛ mihe wo shiɛmɔ nitsumɔ lɛ mli kɔkɔɔkɔ. Kɛfata le ni mile akɛ miifee nɔ ni saa Yehowa hiɛ lɛ he lɛ, misusuɔ he akɛ eji miishɛɛ akɛ mawie anɔkwale lɛ he ejaakɛ yɛ be mli ni mifeɔ nakai lɛ, hiɛnɔkamɔ ni yɔɔ naakpɛɛ ni yɔɔ Biblia lɛ mli lɛ wajeɔ mitsui.”

 Mɛi krokomɛi hu naa akɛ, ye ni amɛaaye amɛbua mɛi koni amɛná Nyɔŋmɔ he anɔkwale nilee lɛ haa shishinumɔ baa amɛ diɛŋtsɛ amɛshihilɛ mli. Meloney, ni ji oblayoo ko ni kɛ ŋmɛlɛtswai 50 tsuɔ nii daa nyɔŋ nɔ yɛ shiɛmɔ nitsumɔ lɛ mli lɛ wie akɛ: “Shiɛmɔ nitsumɔ lɛ haa mináa miishɛɛ ejaakɛ ehaa migbalaa mijwɛŋmɔ mimaa mishihilɛ kɛ miyiŋtoo nɔ. Naagbai ni miyɔɔ kɛ haomɔi ni baa gbi fɛɛ gbi lɛ he ehiaaa kɛji mikɛ mihe wo sɔɔmɔ nitsumɔ lɛ mli.”

Millicent, ni ji Yehowa Odasefonyo sɔɔlɔ ko ni yɔɔ ekãa lɛ wie akɛ: “Shiɛmɔ nitsumɔ lɛ haa mináa gbi fɛɛ gbi ni mikɛgbaa mɛi krokomɛi yiŋtoo ni Nyɔŋmɔ yɔɔ kɛha adesai lɛ, kɛ bɔ ni mitsɔɔ bɔ ni abaaku sɛɛ akɛ Paradeiso lɛ aba ekoŋŋ lɛ mli mihaa amɛ lɛ he sɛɛ. Ehaa Yehowa feɔ mɔ ko ni yɔɔ diɛŋtsɛ kɛha mi gbi fɛɛ gbi, ni ehaa mináa toiŋjɔlɛ kɛ mligbɛ miishɛɛ falɛ ko ni anyɛŋ aná kɛtsɔ gbɛ kroko ko nɔ.”

Mɛi ni Nine Shɛɔ Nɔ lɛ Náa Miishɛɛ

Eka shi faŋŋ akɛ, Kristofoi asɔɔmɔ nitsumɔ lɛ haa Maŋtsɛyeli shiɛlɔi lɛ náa miishɛɛ, ni eshɛjeɔ mɛi ni kpɛlɛɔ shɛɛ sane ni haa wala lɛ nɔ lɛ amii. Eyɛ mli akɛ mɔ kome shihilɔi kɛ osɔfoi etsɔse skul tsɔɔlɔ ko ni yɔɔ Portugal lɛ moŋ, shi enu he akɛ sɔlemɔ ni eyaa lɛ tsuko emumɔŋ hiamɔ nii lɛ ahe nii. Ahako e-Biblia mli sanebimɔi lɛ ahetoo. Biblia mli nikasemɔ ni Yehowa Odasefoi lɛ ateŋ mɔ kome kɛ lɛ fee daa lɛ ha ebanu Ŋmalɛi lɛ ashishi fiofio. Skul tsɔɔlɔ lɛ ná miishɛɛ. Ekɛɛ akɛ: “Mikɛ miishɛɛ shweɔ minikasemɔ lɛ daa Shɔ, akɛni akɛ Biblia mli odaseyelii ni kɔneɔ mɔ yiŋ haa misanebimɔi lɛ ahetoo fiofio lɛ hewɔ.” Ŋmɛnɛ, nɛkɛ yoo nɛɛ ji Yehowa tsulɔ ni ejɔɔ ehe nɔ, ni lɛ hu ekɛ Biblia lɛ mli anɔkwale lɛ miiha mɛi krokomɛi miiná miishɛɛ.

Belɛ, eyɛ faŋŋ akɛ, Yehowa Odasefoi haaa hiɛdɔɔ ni yɔɔ shiɛmɔ nitsumɔ ni akɛwo amɛdɛŋ lɛ, loo bɔ ni amɛjeŋ muu fɛɛ shikpɔŋkuku lɛ da ha lɛ aye amɛnɔ. Ni shikpilikpii-feemɔ loo shitee-kɛ-woo haaa amɛmumɔ he ajɔ. Amɛkɛ ekãa miitsu amɛ Maŋtsɛyeli shiɛmɔ nitsumɔ lɛ he nii. Amɛgbaa mɛi sanekpakpa lɛ he sane yɛ he fɛɛ he ni amɛbaana amɛ yɛ—yɛ tsɔji wuji amaamɔhe yɛ United States (1), yɛ Korea kɔɔyɔŋ lɛjiadaamɔhe ko (2), yɛ Andes (3), loo yɛ London jara ko nɔ (4). Yesu ŋmɛnɛŋmɛnɛ beaŋ sɛɛnyiɛlɔi lɛ kɛ miishɛɛ tsuɔ amɛjeŋ muu fɛɛ nitsumɔ ni haa mɔ miishɛɛ lɛ he nii. Ni taakɛ ewo shi lɛ, eha amɛná miishɛɛ ni ekɛ amɛ etsu nii koni eha mɛi babaoo aná miishɛɛ.—Kpojiemɔ 22:17.