Yehowa—Ekpakpafeemɔ He Nɔkwɛmɔnɔ ni Fe Fɛɛ
Yehowa—Ekpakpafeemɔ He Nɔkwɛmɔnɔ ni Fe Fɛɛ
‘Nyɛjiea Yehowa Zebaot yi, ejaakɛ Yehowa hi!’—YEREMIA 33:11.
1. Mɛni hewɔ ni nɔ ko tsirɛɔ wɔ koni wɔjie Nyɔŋmɔ yi yɛ ekpakpa ni efeɔ lɛ hewɔ lɛ?
YEHOWA NYƆŊMƆ hi jogbaŋŋ kɛmɔ shi. Gbalɔ Zakaria jaje akɛ: “Oo, kwɛ bɔ ni ekpakpa ni efeɔ lɛ fá babaoo ha!” (Zakaria 9:17, NW) Yɛ anɔkwale mli lɛ, anaa ekpakpafeemɔ yɛ nɔ fɛɛ nɔ ni Nyɔŋmɔ fee kɛsaa shikpɔŋ lɛ koni wɔná mli miishɛɛ lɛ mli. (1 Mose 1:31) Wɔnyɛŋ wɔnu mlai ni yɔɔ hwanyaŋŋ ni Nyɔŋmɔ kɛtsu nii beni ebɔɔ jeŋ muu lɛ fɛɛ shishi. (Jajelɔ 3:11; 8:17) Ni kɛlɛ, fioo po ni wɔle lɛ tsirɛɔ wɔ koni wɔjie Nyɔŋmɔ yi yɛ ekpakpa ni efeɔ lɛ hewɔ.
2. Te oootsɔɔ ekpakpafeemɔ loo ejurɔfeemɔ shishi oha tɛŋŋ?
2 Mɛni ji ekpakpafeemɔ? No ji jeŋba ni nɔ kwɔ, loo jeŋba kpakpa. Ni kɛlɛ, enɔ kwɔ fe efɔŋfeemɔi fɛɛ ni sɛɛ efo. Ekpakpafeemɔ loo ejurɔfeemɔ ni ji mumɔ lɛ yibii lɛ eko lɛ ji su ko ni hi jogbaŋŋ. (Galatabii 5:22, 23) Wɔjieɔ ejurɔfeemɔ kpo, kɛ́ wɔfee mɛi krokomɛi nibii kpakpai ni sɛɛnamɔ yɔɔ he. Yɛ nɛkɛ nibii agbɛjianɔtoo nɛɛ mli lɛ, ekolɛ abaabu nɔ ni asusuɔ akɛ eji nɔ ni hi yɛ shihilɛi komɛi amli lɛ akɛ ejeee nɔ ni hi yɛ shihilɛi krokomɛi amli. Shi kɛlɛ, kɛ́ wɔɔná toiŋjɔlɛ kɛ miishɛɛ lɛ, belɛ esa akɛ aná ekpakpafeemɔ he tɛ kome ni afo afɔ shi. Namɔ baanyɛ afee mɔ ni sa jogbaŋŋ akɛ eeefo tɛ ni tamɔ nɛkɛ efɔ shi?
3. Mɛni ji nɔ ni 1 Mose 2:16, 17 lɛ tsɔɔ yɛ ekpakpafeemɔ he tɛ ni aaafo afɔ shi lɛ he?
3 Nyɔŋmɔ ji mɔ ni foɔ ekpakpafeemɔ he tɛ efɔɔ shi. Yɛ adesa yinɔsane shishijee mli lɛ, Yehowa ji mɔ ni wo klɛŋklɛŋ nuu lɛ kitã akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) Hɛɛ, ehe miihia ni adesai akwɛ amɛ Bɔlɔ lɛ gbɛ kɛha ekpakpa kɛ efɔŋ he nilee.
Ekpakpafeemɔ ni Esaaa Wɔ
4. Mɛni ji nɔ ni Nyɔŋmɔ efee eha adesai kɛjɛ beni Adam fee esha lɛ?
4 Gbɛkpamɔ ni adesai yɔɔ kɛha naanɔ miishɛɛ yɛ emuuyeli mli lɛ baje oshara mli beni Adam fee esha ni esumɔɔɔ ni ekpɛlɛɔ hegbɛ ni Nyɔŋmɔ yɔɔ akɛ efoɔ ekpakpafeemɔ he tɛ efɔɔ shi lɛ nɔ lɛ. (1 Mose 3:1-6) Shi kɛlɛ, dani akɛ esha kɛ gbele aaafɔ́ Adam shwiei lɛ, no mli lɛ Nyɔŋmɔ egba efɔ shi akɛ Seshi ko ni yeɔ emuu baaba. Yɛ anɔkwale mli lɛ, beni Yehowa kɛ “blema onufu lɛ” ni ji Satan Abonsam wieɔ lɛ, ejaje akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃, ni bo hu oootswa enanetsitsi nɔ̃.” (Kpojiemɔ 12:9; 1 Mose 3:15) Eji Yehowa yiŋtoo akɛ eeekpɔ̃ adesai eshafeelɔi lɛ. Yɛ anɔkwale mli lɛ, Yehowa eto gbɛjianɔ ko ni tamɔ nɛkɛ eha mɛi ni náa esuɔmɔ Bi lɛ kpɔmɔ afɔleshaa lɛ mli hemɔkɛyeli lɛ ayiwalaheremɔ, yɛ ekpakpafeemɔ ko ni esaaa wɔ lɛ mli.—Mateo 20:28; Romabii 5:8, 12.
5. Eyɛ mli akɛ wɔná tsuiŋ esha susumɔ kɛjɛ fɔmɔ mli moŋ, shi mɛni hewɔ wɔbaanyɛ wɔjie ekpakpafeemɔ ko kpo lɛ?
5 Shi yɛ esha ni Adam fee hewɔ lɛ, wɔná tsui mli susumɔ ni ejaaa kɛjɛ fɔmɔ mli. (1 Mose 8:21) Shi, Yehowa jɛɔ miishɛɛ mli eyeɔ ebuaa wɔ koni wɔjie ekpakpafeemɔ ko kpo. Jeee akɛ nibii ni wɔyaa nɔ wɔkaseɔ kɛjɛɔ eniŋmaai krɔŋkrɔŋi ni sɛɛnamɔ yɔɔ he babaoo lɛ mli lɛ ‘haa wɔleɔ nii kɛyaa yiwalaheremɔ mli’ ni ‘esaa wɔ kɛhaa nitsumɔ kpakpa fɛɛ nitsumɔ kpakpa’ kɛkɛ shi ehaa wɔfeɔ ekpakpa yɛ ehiɛ hu. (2 Timoteo 3:14-17) Shi, kɛji akɛ wɔɔná Ŋmalɛ naa nitsɔɔmɔ he sɛɛ ni wɔfee ekpakpa loo ejurɔ lɛ, esa akɛ wɔná su ni lalatsɛ lɛ hiɛ lɛ, mɔ ni lá akɛ: “[Yehowa] ohi ni ofeɔ ejurɔ; tsɔɔmɔ mi ogbɛnaai lɛ.”—Lala 119:68.
Ajie Yehowa Ekpakpafeemɔ lɛ Yi
6. Beni Maŋtsɛ David eha akɛ kpaŋmɔ adeka lɛ eba Yerusalem lɛ sɛɛ lɛ, Levibii lɛ lá lala ko ni mɛɛ wiemɔ fata he?
6 Maŋtsɛ David ni hi shi yɛ blema Israel lɛ kpɛlɛ Nyɔŋmɔ ekpakpafeemɔ lɛ nɔ, ni etao Egbɛtsɔɔmɔ sɛɛgbɛ. David kɛɛ akɛ: “Yehowa hi ni eja hewɔ lɛ etsɔɔ eshafeelɔi gbɛ ni ja.” (Lala 25:8) Mlai nyɔŋma ni he hiaa—Kitãi Nyɔŋma lɛ—ni aŋmala yɛ tɛi tɛtrɛbii enyɔ lɛ nɔ ni akɛto adeka krɔŋkrɔŋ ko ni atsɛɔ lɛ kpaŋmɔ adeka lɛ mli lɛ fata gbɛtsɔɔmɔ ni jɛ Nyɔŋmɔ ŋɔɔ ni ekɛha Israelbii lɛ he. Beni David eha akɛ Adeka lɛ eba Israel maŋtiase Yerusalem mli lɛ sɛɛ lɛ, Levibii lɛ lá lala ko ni nɔ ni fata he ji wiemɔ nɛɛ: “Nyɛdaa Yehowa shi, ejaakɛ ehi; ejaakɛ naanɔ emɔbɔnalɛ hiɔ shi kɛyaa!” (1 Kronika 16:34, 37-41) Kwɛ bɔ ni eeefee miishɛɛ sane akɛ aaanu nakai wiemɔi lɛ kɛaajɛ Levibii lálɔi anaa!
7. Mɛni ba beni akɛ Adeka lɛ eba Hekrɔŋkrɔŋ Fe Fɛɛ lɛ kɛ agbɛnɛ yɛ Salomo nɔjɔɔmɔ sɔlemɔ lɛ sɛɛ?
7 Ama nakai yijiemɔ wiemɔi lɛ nɔŋŋ nɔ mi beni Yehowa sɔlemɔwe ni David binuu Salomo ma lɛ nɔjɔɔmɔ yaa nɔ lɛ. Beni akɛ kpaŋmɔ adeka lɛ ema sɔlemɔwe ni áma lɛ ehee lɛ mli Hekrɔŋkrɔŋ Fe Fɛɛ lɛ, Levibii lɛ bɔi Yehowa yijiemɔ, “ejaakɛ ehi; ejaakɛ naanɔ emɔbɔnalɛ hiɔ shi kɛyaa!” Yɛ nakai be lɛ mli lɛ, sɔlemɔwe lɛ mli eyi obɔ kɛ atatu yɛ naakpɛɛ gbɛ nɔ ní tsɔɔ akɛ Yehowa yɛ jɛmɛ yɛ anunyam mli. (2 Kronika 5:13, 14) Yɛ Salomo nɔjɔɔmɔ sɔlemɔ lɛ sɛɛ lɛ, “la jɛ ŋwɛi ba ni ebashã shãa afɔle lɛ kɛ afɔlei krokomɛi lɛ.” Kɛkɛ ni beni anaa ni enɛ yaa nɔ lɛ, “Israelbii lɛ fɛɛ . . . [kɛ] amɛhiɛaŋ bumɔ shi yɛ he ni aka jɛi tɛ lɛ, ni amɛjá Yehowa ni amɛda lɛ shi, ejaakɛ ehi, ejaakɛ naanɔ emɔbɔnalɛ hiɔ shi kɛyaa!” (2 Kronika 7:1-3) Beni gbii 14 gbijurɔyeli lɛ eba naagbee lɛ, Israelbii lɛ ku amɛsɛɛ kɛtee amɛshiai “ni amɛnya ni amɛná tsuijurɔ yɛ ejurɔ ní Yehowa efee David kɛ Salomo kɛ emaŋ Israel lɛ hewɔ.”—2 Kronika 7:10.
8, 9. (a) Eyɛ mli akɛ Israelbii lɛ jie Yehowa yi yɛ ekpakpa ni efeɔ hewɔ moŋ, shi mɛɛ gbɛ amɛtiu sɛɛ yɛ naagbee mli? (b) Mɛni ji nɔ ni atsɔ Yeremia nɔ agba afɔ shi aha Yerusalem, ni nakai gbalɛ lɛ ba mli yɛ mɛɛ gbɛ nɔ?
8 Mɔbɔ sane ji akɛ, Israelbii lɛ eyaaa nɔ amɛhiii shi yɛ yijiemɔ lalai ni amɛkɛha Nyɔŋmɔ lɛ kɛ gbeekpamɔ naa. Yɛ sɛɛ mli lɛ, Yudabii lɛ ‘kɛ amɛnaabu kɛkɛ woɔ Yehowa.’ (Yesaia 29:13) Yɛ nɔ najiaŋ ni amɛaafee nii yɛ ekpakpafeemɔ he tɛi ni Nyɔŋmɔ efolɔ eshwie shi lɛ kɛ gbeekpamɔ naa lɛ, amɛkɛ amɛhe bɔi efɔŋ mli woo. Ni mɛni ji efɔŋ ni amɛfeɔ lɛ? No ji akɛ, amɛfee mɛi ni yeɔ wɔŋjamɔ, jeŋba shara, ohiafoi lɛ ayiwaa kɛ eshai krokomɛi ni hiɛdɔɔ yɔɔ mli lɛ he fɔ́! Nɔ ni jɛ mli ba ji akɛ, akpata Yerusalem hiɛ ni akɛ Yuda maŋ lɛŋ bii tee nomŋɔɔ mli yɛ Babilon yɛ afi 607 D.Ŋ.B.
9 No hewɔ lɛ, Nyɔŋmɔ kɛ toigbalamɔ ba ewebii lɛ anɔ. Shi kɛlɛ, egba kɛtsɔ gbalɔ Yeremia nɔ akɛ, mɛi yɛ Yerusalem lolo ni abaanu amɛgbee, mɛi ni aaakɛɛ akɛ: ‘Nyɛjiea Yehowa Zebaot yi, ejaakɛ Yehowa hi; ejaakɛ naanɔ emɔbɔnalɛ hiɔ shi kɛyaa!’ (Yeremia 33:10, 11) Ni nakai pɛpɛɛpɛ ebalɛ. Beni akɛ afii 70 efee shikpɔŋ lɛ amaŋfɔ yɛ afi 537 D.Ŋ.B. lɛ, Yudafoi shwɛɛnɔ ko ku amɛsɛɛ kɛtee Yerusalem. (Yeremia 25:11; Daniel 9:1, 2) Amɛma afɔleshaa latɛ ni yɔɔ he ni sɔlemɔwe lɛ yɔɔ yɛ Moria Gɔŋ lɛ nɔ lɛ ekoŋŋ ni amɛbɔi afɔleshaai yɛ jɛmɛ. Ato sɔlemɔwe lɛ shishi yɛ amɛsɛɛkuu lɛ sɛɛ afi ni ji enyɔ lɛ mli. Mɛɛ mlifilimɔ be nɛ! Ezra kɛɛ akɛ: “Ni beni tsumalɔi lɛ to Yehowa sɔlemɔwe lɛ shishi lɛ, osɔfoi ní ewowoo amɛtadei lɛ hiɛ tɛtrɛmantɛrɛi kɛdamɔ shi, ni Levibii lɛ ní ji Asaf bii lɛ hu hiɛ ŋoŋoi, koni amɛkafo Yehowa, taakɛ bɔ ni Israel maŋtsɛ David to gbɛjianɔ lɛ. Ni amɛlá ni amɛhereheree nɔ amɛkɛkafo Yehowa ni amɛkɛda lɛ shi, ejaakɛ ehi, ejaakɛ naanɔ emɔbɔnalɛ hiɔ shi kɛyaa yɛ Israel nɔ.”—Ezra 3:1-11.
10. Mɛɛ wiemɔ ni sa kadimɔ Lala 118 kɛjeɔ shishi ni ekɛgbeɔ naa?
10 Yijiemɔ wiemɔ ko ni tamɔ nakai ni kɔɔ Yehowa ekpakpafeemɔ he lɛ jeɔ kpo yɛ lalai lɛ ekomɛi amli. Eko ji Lala 118 ni Israel shiabii lɛ lá kɛgbe Hehoo lɛ yeli naa lɛ. Nakai lala lɛ jeɔ shishi ni ebaa naagbee kɛ wiemɔi ni ji: “Nyɛdaa Yehowa shi, ejaakɛ ehĩ; ejaakɛ naanɔ emɔbɔnalɛ hiɔ shi kɛyaa!” (Lala 118:1, 29) Ekolɛ enɛɛmɛi ji yijiemɔ lɛ naagbee wiemɔi ni Yesu Kristo kɛ ebɔfoi anɔkwafoi lɛ lá gbɛkɛ dani egbo yɛ afi 33 Ŋ.B. lɛ.—Mateo 26:30.
“Belɛ Ha Mana Onunyam Lɛ”
11, 12. Beni Mose na Nyɔŋmɔ anunyam lɛ he nɔ ko fioo ko pɛ lɛ, mɛɛ sanejajemɔ enu?
11 Ana tsakpaa ni yɔɔ Yehowa ekpakpafeemɔ lɛ kɛ emɔbɔnalɛ lɛ teŋ lɛ klɛŋklɛŋ kwraa afii ohai abɔ dani Ezra be lɛ shɛ. Beni Israelbii lɛ já shika tsina bi lɛ yɛ ŋã lɛ nɔ ni agbe efɔŋfeelɔi lɛ, etsɛɛɛ kwraa ni Mose bi Yehowa akɛ: “Belɛ ha mana onunyam lɛ.” Beni Yehowa na akɛ Mose nyɛŋ ana Ehiɛ ni kɛlɛ ehi shi lɛ, ekɛɛ akɛ: “Mi lɛ maha minikpakpai anii lɛ fɛɛ abaho yɛ ohiɛ.”—2 Mose 33:13-20.
12 Yehowa nikpakpai lɛ baho yɛ Mose hiɛ enɔjetsɛremɔ yɛ Sinai Gɔŋ lɛ nɔ. Yɛ no be lɛ mli lɛ, Mose na Nyɔŋmɔ anunyam lɛ he nɔ ko fioo pɛ ni enu sanejajemɔ nɛɛ: “Yehowa, Yehowa, Nyɔŋmɔ musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fá pii, ní hiɛɔ mɔbɔnalɛ mli ehaa mɛi akpei abɔ, ní ŋɔɔ tɔmɔ kɛ efɔŋ kɛ esha efaa, ni ehaaa mɔ ko mɔ ko aŋɔ ehe aye kwraa; mɔ ni woɔ tsɛmɛi atɔmɔi anyɔmɔ kɛtsɔɔ bii kɛ nabii anɔ kɛyashiɔ yinɔbii ni ji etɛ kɛ nɔ ni ji ejwɛ lɛ nɔ lɛ.” (2 Mose 34:6, 7) Nɛkɛ wiemɔi nɛɛ tsɔɔ akɛ Yehowa ekpakpafeemɔ lɛ kɛ emɔbɔnalɛ lɛ kɛ esui lɛ fãi krokomɛi lɛ yɛ tsakpaa. Enɛɛmɛi ahe ni wɔɔsusu lɛ baaye ebua wɔ koni wɔjie ekpakpafeemɔ kpo. Klɛŋklɛŋ lɛ nyɛhaa wɔsusua su ni atsĩ tã shii enyɔ yɛ nɛkɛ Nyɔŋmɔ ekpakpafeemɔ he sanejajemɔ ni yɔɔ naakpɛɛ nɛɛ mli.
“Nyɔŋmɔ . . . ní Mɔbɔnalɛ . . . Fá Pii”
13. Yɛ Nyɔŋmɔ ekpakpafeemɔ sanejajemɔ lɛ mli lɛ, mɛɛ su atsĩ tã shii enyɔ, ni mɛni hewɔ enɛ ji nɔ ni sa?
13 “Yehowa [ji] Nyɔŋmɔ . . . ní mɔbɔnalɛ . . . fá pii, ní hiɛɔ mɔbɔnalɛ mli ehaa mɛi akpei abɔ.” Hebri wiemɔ ni atsɔɔ shishi akɛ “mɔbɔnalɛ” lɛ hu tsɔɔ “anɔkwa suɔmɔ.” No pɛ ji su ni ato naa shii enyɔ yɛ sane ni Nyɔŋmɔ jaje etsɔɔ Mose lɛ mli. Kwɛ bɔ ni eji nɔ ni sa, ejaakɛ Yehowa su ni fe fɛɛ ji suɔmɔ! (1 Yohane 4:8) Yijiemɔ wiemɔ ni ale jogbaŋŋ ni akɛhaa Yehowa akɛ “ejaakɛ ehĩ; ejaakɛ naanɔ emɔbɔnalɛ hiɔ shi kɛyaa” lɛ maa su nɛɛ nɔ mi.
14. Namɛi titri náa Nyɔŋmɔ ekpakpafeemɔ kɛ mɔbɔnalɛ lɛ mli ŋɔɔmɔ?
14 Yehowa ekpakpafeemɔ lɛ ekome ji akɛ ‘emɔbɔnalɛ fá pii.’ Enɛ yɛ faŋŋ, titri lɛ yɛ suɔmɔ kwɛmɔ ni ekɛhaa enɔkwa sɔɔlɔi ni ji adesai ni ejɔɔ amɛhe nɔ lɛ mli. (1 Petro 5:6, 7) Taakɛ Yehowa Odasefoi baanyɛ aye he odase lɛ, ‘ehiɛɔ mɔbɔnalɛ mli’ ehaa mɛi ni sumɔɔ lɛ, ní amɛsɔmɔɔ lɛ lɛ. (2 Mose 20:6) Heloonaa Israel maŋ lɛ náaa Yehowa mɔbɔnalɛ, loo anɔkwa suɔmɔ lɛ dɔŋŋ, ejaakɛ amɛkpoo e-Bi lɛ. Shi ekpakpa ni Nyɔŋmɔ feɔ ehaa anɔkwa Kristofoi ni yɔɔ maji fɛɛ mli kɛ anɔkwa suɔmɔ ni ejieɔ lɛ kpo etsɔɔ amɛ lɛ baaya nɔ kɛya naanɔ.—Yohane 3:36.
Yehowa—Musuŋtsɔlɔ kɛ Durolɔ
15. (a) Sanejajemɔ ni Mose nu yɛ Sinai Gɔŋ lɛ nɔ lɛ je shishi kɛ mɛɛ wiemɔ? (b) Mɛni ji nɔ ni musuŋtsɔlɛ loo mɔbɔnalɛ tsɔɔ?
15 Sanejajemɔ ni Mose nu yɛ Sinai Gɔŋ lɛ nɔ lɛ jeɔ shishi kɛ wiemɔ nɛɛ: “Yehowa, Yehowa, Nyɔŋmɔ musuŋtsɔlɔ kɛ durolɔ.” Hebri wiemɔ ni atsɔɔ shishi akɛ ‘musuŋtsɔlɛ’ loo mɔbɔnalɛ lɛ baanyɛ atsɔɔ “mlinii” ni ekɛ wiemɔ ni ji “fɔmɔ kotoku” yɛ tsakpaa ni mli wa. No hewɔ lɛ, nɔ ni musuŋtsɔlɛ tsɔɔ hu ji suɔmɔ mlihilɛ ni yɔɔ gbɔmɔ mligbɛ tɔ̃ɔ. Shi musuŋtsɔlɛ tsɔɔ babaoo fe awerɛho diɛŋtsɛ ni ayeɔ mɔ ko. Esa akɛ ekanya wɔ koni wɔfee nɔ ko ni baajie mɛi krokomɛi apiŋmɔ kɛya. Ákɛ nɔkwɛmɔnɔ lɛ, Kristofoi onukpai ni yɔɔ suɔmɔ lɛ naa bɔ ni ehe hiaa ni amɛjie musuŋtsɔlɛ loo mɔbɔnalɛ kpo amɛtsɔɔ nanemɛi heyelilɔi, ni ‘amɛkɛ tsuijurɔ ana mɔ mɔbɔ’ be mli ni enɛ feemɔ sa.—Romabii 12:8; Yakobo 2:13; Yuda 22, 23.
16. Mɛni hewɔ abaanyɛ akɛɛ akɛ Yehowa mli hi ni eji durolɔ lɛ?
16 Nyɔŋmɔ ekpakpafeemɔ lɛ jeɔ kpo hu yɛ duromɔ loo emlihilɛ lɛ mli. Mɔ ni jieɔ duromɔ kpo lɛ “susuɔ mɛi krokomɛi ahenumɔi ahe waa diɛŋtsɛ” ni ejieɔ ‘mlihilɛ ni suɔmɔ yɔɔ mli lɛ kpo etsɔɔ mɛi ni baa shi lɛ titri.’ Yehowa ji duromɔ kɛ mlihilɛ ni ajieɔ lɛ kpo lɛ he nɔkwɛmɔnɔ ni fe fɛɛ yɛ bɔ ni ekɛ enɔkwa sɔɔlɔi yeɔ ehaa lɛ mli. Ákɛ nɔkwɛmɔnɔ lɛ, Nyɔŋmɔ tsɔ ŋwɛibɔfoi anɔ ekɛ duromɔ kɛ mlihilɛ waje gbalɔ Daniel ni egbɔ lɛ, ni eha oblayoo fro Maria le hegbɛ ni ená akɛ eeefɔ́ Yesu lɛ. (Daniel 10:19; Luka 1:26-38) Ákɛ Yehowa webii lɛ, eka shi faŋŋ akɛ wɔyɛ hiɛsɔɔ kɛha mlihilɛ gbɛ ni etsɔɔ nɔ ekɛ wɔ wieɔ kɛtsɔɔ saji ni yɔɔ Biblia lɛ mli lɛ nɔ. Wɔjieɔ eyi yɛ ekpakpafeemɔ ni ejieɔ lɛ kpo nɛɛ hewɔ, ni wɔsumɔɔ ni wɔjie mlihilɛ kpo yɛ be mli ni wɔkɛ mɛi krokomɛi yeɔ. Kɛ mɛi ni yɔɔ mumɔŋ hesaa lɛ miiwaje naanyo heyelilɔ “yɛ mlijɔlɛ mumɔ mli” lɛ, amɛbɔɔ mɔdɛŋ ni amɛfee blɛoo ni amɛjie mlihilɛ kpo.—Galatabii 6:1.
Nyɔŋmɔ ni Toɔ Tsui loo Emli Fũuu Mra
17. Mɛni hewɔ ni wɔyɔɔ hiɛsɔɔ akɛ Yehowa ‘toɔ tsui’ loo emli fũuu mra lɛ?
17 “Nyɔŋmɔ . . . ni toɔ tsui [emli fũuu mra].” Nakai wiemɔi lɛ gbalaa wɔjwɛŋmɔ kɛyaa Yehowa ekpakpafeemɔ lɛ kpojiemɔ kroko hu nɔ. Yehowa kɛ tsuishitoo tsuɔ wɔfatɔi ahe nii ni ehaa wɔ be koni wɔkɛye gbɔjɔmɔi ni hiɛdɔɔ yɔɔ mli lɛ nɔ ní wɔya hiɛ yɛ mumɔŋ. (Hebribii 5:12–6:3; Yakobo 5:14, 15) Nyɔŋmɔ tsuishitoo lɛ he baa sɛɛnamɔ ehaa mɛi ni tsɔmɔko ejálɔi lolo lɛ. Amɛyɛ be lolo ni amɛkɛaakpɛlɛ Maŋtsɛyeli he shɛɛ sane lɛ nɔ ní amɛtsake amɛtsui. (Romabii 2:4) Shi kɛlɛ, eyɛ mli akɛ Yehowa toɔ etsui shi moŋ, shi bei komɛi lɛ ekpakpa ni efeɔ lɛ tsirɛɔ lɛ koni ejie emlifu kpo, taakɛ efee beni Israelbii lɛ já shika tsinabi lɛ yɛ Sinai Gɔŋ lɛ nɔ lɛ. Etsɛŋ ni Nyɔŋmɔ baajie emlifu kpo yɛ gbɛ ni da waa nɔ be mli ni ekɛ Satan gbɛjianɔtoo fɔŋ lɛ baa naagbee lɛ.—Ezekiel 38:19, 21-23.
18. Yɛ nɔ ni kɔɔ anɔkwale he lɛ, mɛɛ srɔtofeemɔ yɔɔ Yehowa kɛ adesai hiɛnyiɛlɔi ateŋ?
18 “Yehowa [ji] Nyɔŋmɔ . . . ní . . . anɔkwale fá pii.” Kwɛ bɔ ni esoro Yehowa kwraa yɛ adesai hiɛnyiɛlɔi ni kɛ shiwoi wuji haa ni no sɛɛ lɛ amɛyeee nɔ lɛ ahe! Nɔ ni tamɔɔɔ nakai lɛ, Yehowa jálɔi baanyɛ amɛkɛ amɛhe afɔ nɔ fɛɛ nɔ ní ekɛɔ yɛ e-Wiemɔ ni jɛ mumɔŋ lɛ mli lɛ nɔ. Akɛni Nyɔŋmɔ anɔkwale fá pii hewɔ lɛ, wɔbaanyɛ wɔkɛ wɔhe afɔ eshiwoi anɔ be fɛɛ be. Wɔŋwɛi Tsɛ lɛ jɛɔ ekpakpa ni efeɔ lɛ mli ehaa wɔsɔlemɔi lɛ ahetoo kɛ̃ koni wɔná mumɔŋ anɔkwale kɛtsɔ babaoo ni ekɛhaa wɔ lɛ nɔ.—Lala 43:3; 65:3.
19. Mɛɛ ekpakpafeemɔ ni nɔ kwɔ Yehowa ejie lɛ kpo etsɔɔ eshafeelɔi ni tsakeɔ amɛtsui lɛ?
19 “Yehowa [ji] Nyɔŋmɔ . . . ní ŋɔɔ tɔmɔ kɛ efɔŋ kɛ esha efaa.” Yehowa ekpakpafeemɔ lɛ hewɔ lɛ, efee klalo akɛ eeeŋɔ eshafeelɔi ni amɛtsake amɛtsui lɛ ahe eke amɛ. Ekã shi faŋŋ akɛ, wɔhiɛ sɔɔ babaoo akɛ wɔŋwɛi Tsɛ ni yɔɔ suɔmɔ lɛ eto gbɛjianɔ kɛha eshaifaa kɛtsɔ Yesu afɔleshaa lɛ nɔ. (1 Yohane 2:1, 2) Yɛ anɔkwale mli lɛ, wɔyɛ miishɛɛ akɛ mɛi fɛɛ ni náa kpɔmɔnɔ lɛ mli hemɔkɛyeli lɛ nyɛɔ amɛnáa amɛkɛ Yehowa teŋ wekukpaa kpakpa kɛ naanɔ wala yɛ jeŋ hee ni ewo he shi lɛ mli lɛ he hiɛnɔkamɔ. Kwɛ bɔ ni wɔyɔɔ yiŋtoi ni nɔ kwɔlɔ ni wɔɔdamɔ nɔ wɔjie Yehowa yi yɛ ekpakpa ni efeɔ ehaa adesai lɛ hewɔ!—2 Petro 3:13.
20. Mɛɛ odaseyeli wɔyɔɔ ni tsɔɔ akɛ Nyɔŋmɔ fĩii efɔŋfeemɔ sɛɛ?
20 “[Yehowa] ehaaa mɔ ko mɔ ko aŋɔ ehe aye kwraa.” Enɛ ji yiŋtoo kroko hu diɛŋtsɛ ni esa akɛ ajie Yehowa yi yɛ ekpakpa ni efeɔ lɛ hewɔ. Mɛni hewɔ? Ejaakɛ ekpakpafeemɔ su ko ni he hiaa waa ji akɛ ekpakpafeemɔ fĩii efɔŋfeemɔ sɛɛ kwraa. Kɛfata he lɛ, “beni aaajie Nuntsɔ Yesu kpo kɛaajɛ ŋwɛi kɛ ehewalɛ bɔfoi lɛ,” akɛ oweletɔɔ baaba “mɛi ni leee Nyɔŋmɔ kɛ mɛi ni booo wɔ-Nuntsɔ Yesu Kristo sanekpakpa lɛ toi lɛ anɔ.” Amɛbaafee mɛi ni “aaana nyɔmɔwoo ni ji naanɔ hiɛkpatamɔ.” (2 Tesalonikabii 1:6-9) Kɛkɛ lɛ Yehowa jálɔi ni yi baaná wala lɛ baanyɛ amɛná wala mli ŋɔɔmɔ jogbaŋŋ kɛmɔ shi yɛ be mli ni gbɔmɛi ni jaaa Nyɔŋmɔ ni amɛji “mɛi ni sumɔɔɔ ekpakpa” lɛ gbaŋ amɛnaa.—2 Timoteo 3:1-3.
Kasemɔ Yehowa Ekpakpafeemɔ Lɛ
21. Mɛni hewɔ esa akɛ wɔjie ekpakpafeemɔ kpo?
21 Eka shi faŋŋ akɛ wɔyɛ yiŋtoi babaoo ni wɔkɛaajie Yehowa yi ni wɔda lɛ shi yɛ ekpakpa ni efeɔ lɛ hewɔ. Ákɛ esɔɔlɔi lɛ, ani esa akɛ wɔfee bɔ fɛɛ bɔ ni wɔɔnyɛ ni wɔjie nɛkɛ su nɛɛ kpo? Hɛɛ, ejaakɛ bɔfo Paulo wo nanemɛi Kristofoi hewalɛ akɛ: “Nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) Wɔŋwɛi Tsɛ lɛ jieɔ ekpakpafeemɔ kpo be fɛɛ be, ni nakai esa akɛ wɔ hu wɔfee.
22. Mɛni ji nɔ ni wɔbaasusu he yɛ nikasemɔ ni nyiɛ sɛɛ lɛ mli?
22 Kɛ wɔji mɛi ni ejɔɔ amɛhe nɔ amɛha Yehowa kɛ amɛtsui fɛɛ lɛ, ŋwanejee ko kwraa bɛ he akɛ, wɔsumɔɔ jogbaŋŋ akɛ wɔɔkase ekpakpa ni efeɔ lɛ. Akɛni wɔji eshafeelɔ Adam shwiei hewɔ lɛ, wɔnáaa lɛ mlɛo akɛ wɔɔfee nɔ ni hi. Shi kɛlɛ, wɔbaana nɔ hewɔ ni wɔbaanyɛ wɔjie ekpakpafeemɔ kpo lɛ, yɛ nikasemɔ ni nyiɛ sɛɛ lɛ mli. Wɔbaasusu gbɛ̀i srɔtoi hu ni wɔbaanyɛ wɔtsɔ nɔ wɔkase Yehowa—ekpakpafeemɔ he nɔkwɛmɔnɔ ni fe fɛɛ lɛ—kɛ gbɛ ni esa akɛ wɔtsɔ nɔ wɔfee nakai.
Te Obaaha Hetoo Oha Tɛŋŋ?
• Mɛni ji ekpakpafeemɔ?
• Mɛɛ Ŋmalɛ naa wiemɔ maa Nyɔŋmɔ ekpakpafeemɔ lɛ nɔ mi?
• Mɛni ji Yehowa ekpakpafeemɔ lɛ he kpojiemɔi komɛi?
• Mɛni hewɔ esa akɛ wɔkase Yehowa ekpakpafeemɔ he nɔkwɛmɔnɔ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 12]
Yehowa gbala ewebii ni hi shi yɛ blema lɛ atoi akɛni amɛhiii shi yɛ amɛyijiemɔ wiemɔi lɛ anaa lɛ hewɔ
[Mfoniri ni yɔɔ baafa 12]
Shwɛɛnɔ anɔkwafoi komɛi ku amɛsɛɛ kɛtee Yerusalem
[Mfoniri ni yɔɔ baafa 13]
Mose nu Nyɔŋmɔ ekpakpafeemɔ lɛ he sanejajemɔ ko ni yɔɔ naakpɛɛ
[Mfoniri ni yɔɔ baafa 15]
Anaa Yehowa ekpakpafeemɔ lɛ yɛ gbɛ ni etsɔɔ nɔ ekɛ wɔ wieɔ kɛtsɔɔ saji ni yɔɔ Biblia lɛ mli lɛ nɔ