Esoro Amɛ Nilee Kwraa

NIGERIABII abɛ ko kɛɛ akɛ: “Onukpai yɛ nilee, shi gbekɛbii lɛ, esoro amɛ hu amɛnilee kwraa.” Edwin, ni eji Kristofonyo onukpa ko yɛ Nigeria lɛ na akɛ enɛ ji anɔkwale.

Gbi ko lɛ, Edwin na dade adeka ko yɛ ekpɔlɔ ní yɔɔ shia ni eŋmaa nii yɛ nɔ lɛ shishi.

Edwin bi ebii etɛ lɛ akɛ: “Namɔ nii nɛ?”

Emmanuel ní eye afii kpaanyɔ lɛ ha hetoo akɛ: “Minɔ ni.” Kɛkɛ ni ekɛfata he oya nɔŋŋ akɛ, nɛkɛ dade adeka ni edalɛ ji sɛntimitai 12 koji ejwɛ ni ebɔ ŋkanale ní agbu fɔlɔ yɛ nɔ nɛɛ ji tooyeli adeka kɛha Yehowa Odasefoi jeŋ muu fɛɛ nitsumɔ lɛ. Etsɔɔ mli akɛ: “Akɛni miyaaa Maŋtsɛyeli Asa lɛ nɔ daa gbi hewɔ lɛ, mikpɛ miyiŋ akɛ makpɛ adeka ko koni be fɛɛ be ni mikɛ shika ni akɛhaa mi ní mikɛhe daaŋjiemɔ nɔ ko lɛ heee nii lɛ, manyɛ mikɛ shika lɛ awo mli.”

Emmanuel tsɛ yɛ adeka ko yɛ shia ní akɛtsuɔ susu kɛha daa afi kpokpaa wulu nɔ kpeei lɛ yaa. Shi yɛ naagbai komɛi ni te shi trukaa yɛ weku lɛ mli hewɔ lɛ, amɛkɛ shika ni yɔɔ mli lɛ fɛɛ emɔ naagba lɛ naa. Bɔni afee ni Emmanuel aná nɔmimaa ákɛ akɛ eshika ni ekɛtoɔ lɛ tsuŋ nɔ kroko he nii lɛ, ekɛ tsɛŋsi momo ko tee sɔlɔ ko ŋɔɔ koni ekɛfee adeka eha lɛ. Beni sɔlɔ lɛ ná ele nɔ ni Emmanuel taoɔ ni ekɛ tsɛŋsi lɛ afee aha lɛ lɛ sɛɛ lɛ, ekɔlɔ dadei kukuji ni eyɔɔ lɛ eko ni ekɛkpɛ adeka eha lɛ. Michael, ni ji Emmanuel nyɛmi nuu fioo ní eye afii enumɔ lɛ hu bi ni akpɛ adeka lɛ eko aha lɛ.

Bɔ ni Edwin naa ekpɛ ehe sɔŋŋ eha yɛ nɔ ni gbekɛbii lɛ efee hewɔ lɛ, ebi amɛ nɔ hewɔ ní amɛha akpɛ adekai lɛ. Michael ha hetoo akɛ: “Miitao ni maye too!”

Emmanuel, Michael, kɛ Uchei, ni ji amɛnyɛmi yoo ni eye afii nɛɛhu lɛ kɛ amɛ shwane niyeli shika lɛ fã woɔ adekai lɛ amli kɛmiitsu susu ní amɛfɔlɔi leee. Nɛgbɛ amɛná nilee nɛɛ kɛjɛ? Beni gbekɛbii lɛ da kɛshɛ he ko ni amɛbaanyɛ amɛhiɛ shika nɔŋŋ lɛ, amɛfɔlɔi tsɔɔ amɛ ní amɛkɛ shika awo tooyeli adeka lɛ mli yɛ Maŋtsɛyeli Asa lɛ nɔ. Eyɛ faŋŋ akɛ, gbekɛbii lɛ kɛ nɔ ni amɛkase lɛ tsu nii jogbaŋŋ.

Beni adekai lɛ yimɔ lɛ, agbele amɛnaa. Shika fɛɛ ni yɔɔ mli lɛ naa shɛ dɔlai 3.13 (U.S.)—enɛ jeee shika bibioo yɛ maŋ ni nitsulɔi adaa afi nyɔmɔwoo ji dɔlai ohai fioo ko kɛkɛ lɛ. Tooyeli ní tamɔ nɛkɛ ni ajɛɔ suɔmɔ mli akɛhaa lɛ yeɔ ebuaa Yehowa Odasefoi ashiɛmɔ nitsumɔ lɛ ní miiya nɔ amrɔ nɛɛ yɛ shikpɔji 235 nɔ yɛ jeŋ fɛɛ lɛ.