Asaa Wɔ Jogbaŋŋ Kɛmɔ Shi akɛ Nyɔŋmɔ Wiemɔ lɛ Tsɔɔlɔi
Asaa Wɔ Jogbaŋŋ Kɛmɔ Shi akɛ Nyɔŋmɔ Wiemɔ lɛ Tsɔɔlɔi
“Nyɔŋmɔ . . . eha wɔsa ní wɔtsɔmɔ . . . sɔɔlɔi.”—2 KORINTOBII 3:5, 6.
1, 2. Mɛɛ mɔdɛŋ abɔ yɛ bei komɛi amli koni anyɛ ashiɛ, shi mɛni hewɔ bei pii lɛ amɛyeee omanye lɛ?
TE OBAANU he oha tɛŋŋ kɛji aha bo nitsumɔ ko ni ohe esako kɛha etsumɔ? Susumɔ he okwɛ: Akɛ nibii ni he baahia bo lɛ ebashwie shi yɛ ohiɛ, ni nitsumɔ dadei lɛ hu efee klalo. Shi oleee bɔ ni obaatsu nitsumɔ lɛ he nii oha. Nɔ ni ehiii fe fɛɛ ji akɛ, nɛkɛ nitsumɔ nɛɛ he miihia waa diɛŋtsɛ. Mɛi ahiɛ kã onɔ. Kwɛ bɔ ni ebaafee nijiaŋwujee eha!
2 Shihilɛ ni tamɔ nɛkɛ ni ehe nitsumɔ wa lɛ jeee yiŋsusumɔ folo ko kwraa. Susumɔ nɔkwɛmɔnɔ ko he okwɛ. Kristendom sɔlemɔi lɛ eko eka yɛ bei komɛi amli akɛ amɛbaato gbɛjianɔ koni amɛtsu shia-kɛ-shia sɔɔmɔ nitsumɔ lɛ. Yɛ bei pii amli lɛ mɔdɛŋbɔi nɛɛ yeee omanye, esɛɛ foɔ yɛ otsii loo nyɔji fioo komɛi amli. Mɛni hewɔ? Kristendom kɛ yelikɛbuamɔ ko hako mɛi ni kɛ amɛhe ekpɛtɛ ehe lɛ koni amɛhe asa kɛha nitsumɔ lɛ. Bei pii lɛ, osɔfoi lɛ tete po ahe esako kɛha nakai shiɛmɔ nitsumɔ lɛ yɛ afii abɔ ní amɛkɛná tsɔsemɔ yɛ je lɛŋ skul srɔtoi kɛ osɔfoi askul lɛ fɛɛ sɛɛ. Mɛni hewɔ wɔbaanyɛ wɔkɛɛ nakai?
3. Mɛɛ wiemɔ akɛtsu nii shii etɛ sɔŋŋ yɛ 2 Korintobii 3:5, 6 lɛ, ni mɛni etsɔɔ?
3 Nyɔŋmɔ Wiemɔ lɛ tsɔɔ nɔ ni haa Kristofoi asanekpakpa lɛ he anɔkwa shiɛlɔ lɛ feɔ mɔ ni sa lɛ mli. Akɛ mumɔ tsirɛ bɔfo Paulo ni eŋma akɛ: “Jeee akɛ wɔ diɛŋtsɛ lɛ wɔsa, ni wɔjwɛŋ akɛ nɔ ko jɛ wɔ diɛŋtsɛ wɔmli, shi wɔsalɛ lɛ Nyɔŋmɔ mli ejɛ; lɛ nɔŋŋ eha wɔsa ní wɔtsɔmɔ . . . sɔɔlɔi.” (2 Korintobii 3:5, 6) Kadimɔ wiemɔ ni akɛtsu nii shii etɛ sɔŋŋ yɛ biɛ lɛ—“wɔsa.” Mɛni etsɔɔ? Vine’s Expository Dictionary of Biblical Words lɛ kɛɛ akɛ: “Kɛji aawie nibii ahe lɛ [shishijee Hela wiemɔ lɛ] tsɔɔ ‘nɔ ni fa’ . . . ; kɛji akɛtsu nii yɛ gbɔmɛi ahe lɛ, etsɔɔ ‘yɛ nyɛmɔ,’ ‘sa ni asa.’” No hewɔ lɛ, mɔ ni ‘sa’ lɛ yɛ nyɛmɔ ni esa akɛ mɔ ni tsuɔ nitsumɔ ko ni akɛwo edɛŋ. Hɛɛ, sanekpakpa lɛ he anɔkwa sɔɔlɔi lɛ ji mɛi ni sa ni baatsu nitsumɔ nɛɛ. Amɛyɛ nyɛmɔ, akpɛlɛɔ amɛnɔ, loo amɛsa akɛ mɛi ni shiɛɔ.
4. (a) Mɛɛ gbɛ nɔ Paulo nɔkwɛmɔnɔ lɛ tsɔɔ yɛ akɛ he ni aaasa kɛha Kristofoi asɔɔmɔ nitsumɔ lɛ bɛ kɛha mɛi fioo ko pɛ ni ahala? (b) Mɛɛ gbɛ̀i etɛ anɔ Yehowa tsɔɔ ehaa wɔhe saa akɛ sɔɔlɔi?
4 Kɛlɛ, nɛgbɛ nakai hesaa lɛ jɛɔ kɛbaa? Kɛjɛ mɔ diɛŋtsɛ nyɛmɔi amli? Kɛjɛ nilee ko ni nɔ kwɔ waa mli? Kɛjɛ wolokasemɔ krɛdɛɛ ni anáa yɛ skul srɔtoi komɛi ni yɔɔ bulɛ waa mli? Eka shi faŋŋ akɛ bɔfo Paulo ná nɛkɛ nibii nɛɛ fɛɛ eko. (Bɔfoi lɛ Asaji 22:3; Filipibii 3:4, 5) Ni kɛlɛ, ekɛ heshibaa kpɛlɛ nɔ akɛ ehesaai akɛ sɔɔlɔ lɛ, baaa kɛjɛɛɛ skul wuji srɔtoi amli, shi moŋ ejɛ Yehowa Nyɔŋmɔ mli. Ani nakai hesaai lɛ yɛ kɛha mɛi fioo ko pɛ ni ahala? Paulo ŋma kɛyaha Korintobii asafo lɛ yɛ nɔ ni kɔɔ “wɔsalɛ lɛ” he. (Wɔma efã ko nɔ mi.) No tsɔɔ yɛ faŋŋ mli akɛ Yehowa kwɛɔ koni enɔkwa tsuji fɛɛ afee mɛi ni yɔɔ nyɛmɔ, ni baanyɛ amɛtsu nitsumɔ ni ekɛwo amɛdɛŋ akɛ amɛtsu lɛ. Mɛɛ gbɛ nɔ Yehowa haa anɔkwa Kristofoi ahe saa yɛ ŋmɛnɛ? Nyɛhaa wɔsusua gbɛ̀i etɛ ni etsɔɔ nɔ efeɔ nakai lɛ he: (1) e-Wiemɔ lɛ, (2) emumɔ krɔŋkrɔŋ lɛ, kɛ (3) eshikpɔŋ nɔ gbɛjianɔtoo lɛ.
Yehowa Wiemɔ lɛ Haa Wɔhe Saa
5, 6. Mɛɛ hewalɛ Ŋmalɛ Krɔŋkrɔŋ lɛ náa yɛ anɔkwa Kristofoi anɔ?
5 Klɛŋklɛŋ kwraa lɛ, mɛɛ gbɛ nɔ Nyɔŋmɔ Wiemɔ lɛ yeɔ buaa wɔ yɛ koni wɔhe asa akɛ sɔɔlɔi? Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 3:16, 17) No hewɔ lɛ Ŋmalɛ Krɔŋkrɔŋ lɛ yeɔ ebuaa kɛfeɔ wɔ ‘mɛi ni eye emuu, ni asaa pɛpɛɛpɛ’ koni wɔtsu “nitsumɔ kpakpa” ni ji Nyɔŋmɔ Wiemɔ lɛ ni wɔɔtsɔɔ gbɔmɛi. Shi mɛi fɛɛ ni kɛ amɛhe ekpɛtɛ Kristendom sɔlemɔi lɛ ahe lɛ hu? Amɛyɛ Biblia lɛ eko. Te aaafee tɛŋŋ ni wolo kome aaaye abua mɛi komɛi koni amɛbafee sɔɔlɔi ni he esa ni yɛ nakai beaŋ nɔŋŋ lɛ eyeee ebuaaa mɛi krokomɛi nakai lɛ? Anaa hetoo lɛ yɛ su ni wɔjieɔ lɛ kpo yɛ Biblia lɛ he lɛ mli.
6 Dɔlɛ sane ji akɛ, mɛi babaoo ni yaa sɔlemɔ lɛ ekpɛlɛɛɛ Biblia lɛ mli shɛɛ nane lɛ nɔ “akɛ Nyɔŋmɔ wiemɔ, taakɛ bɔ ni eji hu lɛɛlɛŋ lɛ.” (1 Tesalonikabii 2:13) Nɔ ni Kristendom efee efɔ̃ shi yɛ enɛ gbɛfaŋ lɛ yɛ hiɛgbele. Ani osɔfoi lɛ ahe saa akɛ Nyɔŋmɔ Wiemɔ lɛ tsɔɔlɔi, beni amɛkɛ afii babaoo ekase nii yɛ Nyɔŋmɔ jamɔ he nikasemɔhei lɛ sɛɛ? Dabi kwraa. No hewɔ ni nikaselɔi komɛi jeɔ osɔfoi anikasemɔhe wulu ko mli nikasemɔi ashishi akɛ mɛi ni heɔ Biblia lɛ amɛyeɔ shi amɛgbeɔ nikasemɔ lɛ naa akɛ mɛi ni yiŋ feɔ amɛ kɔshikɔshi yɛ jamɔŋ tsɔɔmɔi ahe! No sɛɛ lɛ, yɛ nɔ najiaŋ ni esa akɛ amɛshiɛ Nyɔŋmɔ Wiemɔ lɛ—ni amɛteŋ mɛi babaoo heee amɛyeee dɔŋŋ lɛ—amɛtsuɔ amɛshiɛmɔ nitsumɔ lɛ yɛ gbɛ̀i krokomɛi anɔ, amɛfiɔ fã kome sɛɛ amɛshiɔ fã kroko yɛ maŋkwramɔŋ naataamɔi amli, amɛwoɔ sanekpakpa shiɛmɔ lɛ mli hewalɛ kɛtsɔ heloonaa yelikɛbuamɔ nɔ, loo amɛmaa adesai ajeŋ nileei anɔ mi yɛ amɛshiɛmɔ wiemɔi amli. (2 Timoteo 4:3) Nɔ ni tamɔɔɔ nakai lɛ, anɔkwa Kristofoi nyiɛɔ Yesu Kristo nɔkwɛmɔnɔ lɛ sɛɛ.
7, 8. Mɛɛ gbɛ nɔ Yesu subaŋ yɛ Nyɔŋmɔ Wiemɔ lɛ he lɛ yɔɔ srɔto yɛ jamɔŋ hiɛnyiɛlɔi ni hi shi yɛ egbii lɛ amli lɛ anɔ he yɛ?
7 Yesu eŋmɛɛɛ gbɛ ni jamɔ mli hiɛnyiɛlɔi ni hi shi yɛ egbii lɛ amli lɛ aná esusumɔ nɔ hewalɛ. Yesu kɛ niŋmaa krɔŋkrɔŋ lɛ tsuɔ nii jogbaŋŋ kɛmɔɔ shi kɛji eetsɔɔ kuu bibioo ko, tamɔ ebɔfoi lɛ loo asafo babaoo anii. (Mateo 13:10-17; 15:1-11) Nifeemɔ nɛɛ ha ebasoro lɛ yɛ jamɔŋ hiɛnyiɛlɔi ni hi shi yɛ egbii lɛ amli lɛ ahe. Amɛje gbɔmɛi foji lɛ anijiaŋ wui kwraa koni amɛkapɛi Nyɔŋmɔ nibii ni mli kwɔlɔ lɛ amli. Yɛ anɔkwale mli lɛ, eji nɔ ni fɔɔ kaa yɛ nakai gbii lɛ amli akɛ tsɔɔlɔ ko aaahe aye akɛ, Biblia lɛ mli shɛɛ saji lɛ ekomɛi ashishinumɔ wa tsɔ aahu akɛ, nikaselɔ ni esumɔɔ esane fe fɛɛ lɛ pɛ ebaanyɛ ekɛ lɛ asusu he—ni yɛ no gbɛfaŋ po lɛ, ja yɛ gbee ni baa shi mli ni ekɛ nɔ ko eha eyiteŋ. Nakai jamɔŋ hiɛnyiɛlɔi lɛ tamɔ mɛi ni hiɛ apasa hemɔkɛyeli yɛ bɔ ni amɛgbaa Biblia lɛ fãi komɛi ahe sane amɛhaa tamɔ bɔ ni amɛyɔɔ kɛji amɛmiitsɛ Nyɔŋmɔ gbɛi lɛ!
8 Kristo bɛ nakai. Eheɔ eyeɔ akɛ jeee mɛi fioo ko ni ahala pɛ ehe hiaa akɛ amɛsusu “wiemɔ fɛɛ wiemɔ ni jɛɔ Nyɔŋmɔ daaŋ lɛ” he, shi moŋ gbɔmɛi fɛɛ. (Wɔma efã ko nɔ mi.) Yesu bɛ he miishɛɛ akɛ ekɛ hegbɛ ni haa anuɔ Ŋmalɛi lɛ ashishi lɛ aaaha nilelɔi akuu fioo ko pɛ ni ahala. Ekɛɛ ekaselɔi lɛ akɛ: “Nɔ ni mikɛɔ nyɛ yɛ duŋ mli lɛ, nyɛwiea yɛ la hiɛ; ni nɔ ni miwoɔ nyɛtoiŋ mikɛɔ nyɛ lɛ, nyɛshiɛa yɛ tsũi ayiteaŋ.” (Mateo 4:4; 10:27) Yesu kɛ ekãa miishwe waa koni egba mɛi babaoo Nyɔŋmɔ he nilee lɛ bɔ ni ebaanyɛ.
9. Mɛɛ gbɛ nɔ anɔkwa Kristofoi kɛ Biblia lɛ tsuɔ nii yɛ?
9 Esa akɛ Nyɔŋmɔ Wiemɔ lɛ afee nɔ titri ni wɔsusuɔ he yɛ wɔ nitsɔɔmɔ mli. Ákɛ nɔkwɛmɔnɔ lɛ, kɛji wɔmiiha wiemɔ yɛ Yehowa Odasefoi a-Maŋtsɛyeli Asa ko nɔ lɛ, bei pii lɛ efaaa akɛ wɔbaakane ŋmalɛi kukuji ni wɔhala kɛjɛ Biblia lɛ mli lɛ kɛkɛ. Ehe baahia ni wɔtsɔɔ mli, wɔfee he nɔkwɛmɔnɔ, ni wɔkɛ shishinumɔ ni yɔɔ ŋmalɛi lɛ amli lɛ atsu nii. Oti ni ma wɔhiɛ ji ni wɔha Biblia lɛ mli shɛɛ sane lɛ ajɛ wolo ni akala lɛ mli yɛ mfonirifeemɔŋ gbɛ nɔ koni wɔnyɛ nɔ wɔwo wɔtoibolɔi lɛ atsuii amli. (Nehemia 8:8, 12) Esa akɛ akɛ Biblia lɛ atsu nii hu ni akɛwo ŋaa loo ni akɛ tsɔsemɔ ni akɛjajeɔ mɔ aha be mli ni ehe miihia ni afee nakai. Eyɛ mli akɛ Yehowa webii wieɔ wiemɔi srɔtoi ni amɛjɛ shihilɛi srɔtoisrɔtoi amli moŋ, shi amɛ fɛɛ amɛkɛ bulɛ haa Wolo ni fe woji fɛɛ—ni ji Biblia lɛ.
10. Mɛɛ hewalɛ Biblia lɛ mli shɛɛ sane ni jɛ mumɔŋ lɛ baanyɛ aná yɛ wɔnɔ?
10 Kɛji akɛ Biblia lɛ tsu nii yɛ bulɛ ni tamɔ nakai mli lɛ, emli shɛɛ sane lɛ yɛ hewalɛ. (Hebribii 4:12) Etsirɛɔ gbɔmɛi koni amɛfee tsakemɔi yɛ amɛshihilɛi amli, tamɔ he ni abaatsi kɛjɛ nifeemɔi ni ŋmalɛ fiii sɛɛ lɛ he, tamɔ ajwamaŋbɔɔ, gbalafitemɔ, wɔŋjamɔ, dãatɔɔ, kɛ juu nɛkɛ. Eye ebua mɛi babaoo diɛŋtsɛ ni amɛjie gbɔmɔtso momo lɛ ni amɛwo gbɔmɔtso hee lɛ. (Efesobii 4:20-24) Hɛɛ, kɛji wɔbuɔ Biblia lɛ fe adesai asusumɔ fɛɛ susumɔ loo kusum ni wɔkɛtsuɔ nii yɛ anɔkwayeli mli lɛ, ebaanyɛ eye ebua kɛfee wɔ mɛi ni he esa, mɛi ni asaa pɛpɛɛpɛ akɛ Nyɔŋmɔ Wiemɔ lɛ tsɔɔlɔi.
Yehowa Mumɔ lɛ Haa Wɔhe Saa
11. Mɛni hewɔ atsɛɔ Yehowa mumɔ krɔŋkrɔŋ lɛ yɛ gbɛ ni ja nɔ akɛ “hefatalɔ” loo ‘yelikɛbualɔ lɛ’?
11 Nɔ ni ji enyɔ lɛ, nyɛhaa wɔsusua nɔ ni Yehowa mumɔ krɔŋkrɔŋ loo enitsumɔ hewalɛ lɛ tsuɔ koni efee wɔ mɛi ni asaa wɔ pɛpɛɛpɛ lɛ he wɔkwɛa. Esaaa akɛ wɔhiɛ kpaa nɔ kɔkɔɔkɔ akɛ Yehowa mumɔ lɛ ji hewalɛ ni fe fɛɛ ni yɔɔ. Yehowa kɛ hewalɛ eha esuɔmɔ Bi lɛ koni ekɛ nakai hewalɛ kpeteŋkpele lɛ atsu nii yɛ anɔkwa Kristofoi fɛɛ agbɛfaŋ. Belɛ, eja gbɛ jogbaŋŋ akɛ Yesu tsɛ mumɔ krɔŋkrɔŋ lɛ akɛ “hefatalɔ lɛ” loo ‘yelikɛbualɔ lɛ.’ (Yohane 16:7) Ewo esɛɛnyiɛlɔi lɛ hewalɛ koni amɛbi Yehowa ní eha amɛ nakai mumɔ lɛ, ni ema nɔ mi eha amɛ akɛ Yehowa baajɛ mlihilɛ mli ekɛha amɛ aahu.—Luka 11:10-13; Yakobo 1:17.
12, 13. (a) Mɛni hewɔ ehe hiaa ni wɔsɔle wɔbi mumɔ krɔŋkrɔŋ lɛ koni eye ebua wɔ yɛ wɔsɔɔmɔ nitsumɔ lɛ mli lɛ? (b) Mɛɛ gbɛ nɔ Farisifoi lɛ tsɔɔ yɛ akɛ mumɔ krɔŋkrɔŋ lɛ tsuuu nii yɛ amɛmli?
12 Esa akɛ wɔsɔle wɔbi mumɔ krɔŋkrɔŋ lɛ yelikɛbuamɔ daa gbi, titri lɛ koni eye ebua wɔ yɛ wɔsɔɔmɔ nitsumɔ lɛ mli. Mɛɛ hewalɛ nakai Nyɔŋmɔ nifeemɔ hewalɛ lɛ baanyɛ aná yɛ wɔnɔ? Ebaanyɛ ená hewalɛ yɛ wɔjwɛŋmɔ kɛ tsui nɔ, ní eye ebua wɔ ni wɔtsake, ni wɔdara yɛ mumɔŋ, koni agbɛnɛ wɔkɛ gbɔmɔtso hee lɛ abaye gbɔmɔtso momo lɛ najiaŋ. (Kolosebii 3:9, 10) Ebaanyɛ eye ebua wɔ ni wɔná sui ni jara wa ni tamɔ Kristo nɔ̃ lɛ eko. Wɔteŋ mɛi babaoo baanyɛ akɛɛ Galatabii 5:22, 23 lɛ mli saji kɛjɛ wɔyitsoŋ. Nakai ŋmalɛi kukuji lɛ eto Nyɔŋmɔ mumɔ lɛ yibii lɛ anaa. Klɛŋklɛŋ nɔ lɛ ji suɔmɔ. Nakai su lɛ he miihia waa yɛ wɔsɔɔmɔ nitsumɔ lɛ mli. Mɛni hewɔ?
13 Suɔmɔ ji kanyalɔ kpeteŋkpele lɛ. Suɔmɔ ni anɔkwa Kristofoi yɔɔ kɛha Yehowa kɛ naanyo gbɔmɔ lɛ tsirɛɔ amɛ koni amɛshiɛ sanekpakpa lɛ. (Marko 12:28-31) Eji suɔmɔ ni tamɔ nakai bɛ kulɛ, wɔhe nyɛŋ asa lɛɛlɛŋ akɛ Nyɔŋmɔ Wiemɔ lɛ tsɔɔlɔi. Kadimɔ srɔtofeemɔ ni yɔɔ Yesu kɛ Farisifoi lɛ ateŋ lɛ. Mateo 9:36 lɛ wie yɛ Yesu he akɛ: “Shi beni ena mɛi babaoo lɛ, emusuŋ tsɔ̃ lɛ yɛ amɛhewɔ, akɛni etɔ amɛ ni amɛfee yuyaa tamɔ tooi ni bɛ kwɛlɔ lɛ.” Te Farisifoi lɛ nu he ha gbɔmɛi foji lɛ amɛha tɛŋŋ? Amɛkɛɛ: “Asafo ní leee mla nɛɛ, alomɔ amɛ.” (Yohane 7:49, wɔma efã ko nɔ mi.) Nakai Farisifoi lɛ bɛ suɔmɔ ko kwraa kɛha gbɔmɛi lɛ shi nyɛ̃ɛ babaoo moŋ amɛnáa kɛhaa amɛ. Eyɛ faŋŋ akɛ, Yehowa mumɔ lɛ tsuuu nii yɛ amɛmli.
14. Mɛɛ gbɛ nɔ esa akɛ suɔmɔ he nɔkwɛmɔnɔ ni Yesu jie lɛ kpo yɛ esɔɔmɔ nitsumɔ lɛ mli lɛ atsirɛ wɔ yɛ?
14 Yesu ná musuŋtsɔlɛ eha gbɔmɛi. Ele amɛpiŋmɔ lɛ. Ele akɛ afee amɛ niseniianii, etɔ amɛ, ni amɛfee yuyaa tamɔ tooi ni bɛ kwɛlɔ. Yohane 2:25 lɛ kɛɔ wɔ akɛ Yesu ‘le nɔ ni yɔɔ gbɔmɔ mli.’ Akɛni Yesu hi shi akɛ Yehowa Nitsulɔ Ŋaalɔ yɛ nibɔɔ be lɛ mli hewɔ lɛ, Yesu yɛ bɔ ni adesai abɔɔ su ji lɛ he shishinumɔ ni mli kwɔ. (Abɛi 8:30, 31) Nakai shishinumɔ lɛ ha esuɔmɔ lɛ mli kwɔ. Eba akɛ nakai suɔmɔ lɛ baafee hewalɛ ni kanyaa wɔ yɛ wɔshiɛmɔ nitsumɔ lɛ mli be fɛɛ be! Kɛji wɔnuɔ he akɛ wɔbaanyɛ wɔya wɔhiɛ yɛ enɛ gbɛfaŋ lɛ, nyɛhaa wɔsɔlea wɔbia Yehowa mumɔ krɔŋkrɔŋ lɛ koni agbɛnɛ wɔtsu he nii yɛ wɔsɔlemɔi lɛ kɛ gbeekpãmɔ naa. Yehowa baaha wɔ hetoo. Ebaatsu hewalɛ ni anyɛɛɛ naa atsi nɛɛ koni ebaye ebua wɔ koni wɔtamɔ Kristo, mɔ ni he esa jogbaŋŋ akɛ eshiɛɔ sanekpakpa lɛ.
15. Mɛɛ gbɛ nɔ wiemɔi ni yɔɔ Yesaia 61:1-3 lɛ kɔɔ Yesu he yɛ ni yɛ nakai beaŋ nɔŋŋ lɛ ekpaa woloŋmalɔi kɛ Farisifoi lɛ ahe mama lɛ?
15 Nɛgbɛ Yesu hesaai lɛ jɛ kɛba? Ekɛɛ akɛ: ‘Yehowa mumɔ lɛ yɛ minɔ.’ (Luka 4:17-21) Hɛɛ, Yehowa diɛŋtsɛ hala Yesu kɛtsɔ mumɔ krɔŋkrɔŋ lɛ nɔ. Wolokasemɔ he yijiemɔ wolo kroko ko he ehiaaa Yesu. Ani mumɔ krɔŋkrɔŋ lɛ ji nɔ ni hala jamɔ mli hiɛnyiɛlɔi ni hi shi yɛ egbii lɛ amli lɛ? Dabi. Loo ani ásaa amɛ koni amɛha Yesaia 61:1-3 lɛ, ni Yesu kane lɛ waa ni ekɛkɔ lɛ diɛŋtsɛ ehe lɛ aba mli. Ofainɛ kanemɔ nakai ŋmalɛi kukuji lɛ bo diɛŋtsɛ koni ona akɛ woloŋmalɔi kɛ Farisifoi osatofoi lɛ shɛɛɛ. Amɛbɛ sanekpakpa ko ni amɛbaajaje amɛtsɔɔ ohiafoi lɛ. Ni te amɛaafee tɛŋŋ amɛshiɛ heyeli amɛtsɔɔ nomii lɛ kɛ hiŋmɛigbelemɔ amɛha shwilafoi lɛ? Yɛ mumɔŋ shishinumɔ naa lɛ, amɛ diɛŋtsɛ lɛ amɛshwila ni amɛyɛ gbɔmɛi ablemasaji anyɔŋyeli mli! Akɛ mɛi ni tamɔɔɔ nakai hii lɛ, ani wɔji mɛi ni sa akɛ wɔtsɔɔ gbɔmɛi lɛ anii?
16. Mɛɛ hekɛnɔfɔɔ Yehowa webii ni yɔɔ ŋmɛnɛ lɛ baanyɛ anu he yɛ nɔ ni kɔɔ amɛ hesaa akɛ sɔɔlɔi lɛ he?
16 Eji anɔkwale akɛ, wɔkaseko nii yɛ Kristendom skul wuji lɛ amli. Ahalako wɔ akɛ tsɔɔlɔi kɛjɛko Nyɔŋmɔjamɔ osɔfoi anikasemɔhe wulu ko mli. Belɛ ani nɔ ko he miihia wɔ yɛ hesaai amli? Eka shi faŋŋ akɛ dabi! Wɔ halamɔ akɛ e-Dasefoi lɛ jɛ Yehowa ŋɔɔ. (Yesaia 43:10-12) Kɛji wɔsɔle wɔbi emumɔ lɛ ni wɔtsu nii ni kɛ wɔsɔlemɔ lɛ kpãa gbee lɛ, wɔnáa hesaai ni nɔ kwɔ fe fɛɛ lɛ. Eji anɔkwale akɛ, wɔyeee emuu ni wɔshɛɛɛ nɔkwɛmɔnɔ ni Tsɔɔlɔ Kpele lɛ, Yesu fee efɔ shi lɛ he. Fɛɛ sɛɛ lɛ, ani wɔdaaa shi akɛ Yehowa kɛ emumɔ lɛ tsuɔ nii koni eha wɔhe asa ni esaa wɔ pɛpɛɛpɛ akɛ e-Wiemɔ lɛ he tsɔɔlɔi?
Yehowa Gbɛjianɔtoo lɛ Haa Wɔhe Saa
17-19. Mɛɛ gbɛ nɔ otsi lɛ mli kpeei enumɔ ni Yehowa gbɛjianɔtoo lɛ kɛhaa lɛ yeɔ ebuaa wɔ koni wɔhe asa akɛ sɔɔlɔi yɛ?
17 Amrɔ nɛɛ nyɛhaa wɔsusua gbɛ ni ji etɛ nɔ ni Yehowa tsɔɔ esaa wɔ akɛ e-Wiemɔ lɛ he tsɔɔlɔi—eshikpɔŋ nɔ asafo lɛ, loo gbɛjianɔtoo, ni tsɔseɔ wɔ koni wɔfee sɔɔlɔi lɛ. Yɛ mɛɛ gbɛ nɔ? Bo lɛ susumɔ tsɔsemɔ he gbɛjianɔtoo ní wɔnine shɛɔ nɔ lɛ he okwɛ! Yɛ otsi fɛɛ otsi mli lɛ, wɔyaa Kristofoi akpeei enumɔ. (Hebribii 10:24, 25) Wɔkpeɔ yɛ kui bibii amli yɛ Asafo Woloŋ Nikasemɔ lɛ shishi koni wɔná Biblia mli nikasemɔ ni mɔɔ shi kɛtsɔ nikasemɔ wolo ko ni akɛhaa kɛtsɔ Yehowa gbɛjianɔtoo lɛ nɔ lɛ nɔ. Kɛtsɔ sane toiboo kɛ hetoohamɔ nɔ lɛ, wɔkaseɔ nii kɛjɛɔ wɔhe, ni wɔwoɔ wɔhe hewalɛ. Wɔnine shɛɔ tsɔsemɔ kɛ toiboo nɔ akɛ aŋkroaŋkroi kɛjɛɔ woloŋ nikasemɔ nɔkwɛlɔ lɛ ŋɔɔ. Yɛ Maŋshiɛmɔ kɛ Buu-Mɔɔ Nikasemɔ lɛ shishi lɛ, wɔnine shɛɔ mumɔŋ niyenii kpakpa ni fa nɔ.
18 Ato wɔ Teokrase Sɔɔmɔ Skul lɛ he gbɛjianɔ koni etsɔɔ wɔ bɔ ni atsɔɔ nii ahaa. Kɛ wɔsaa wɔhe kɛha nikaselɔi awiemɔi lɛ, wɔkaseɔ bɔ ni akɛ Nyɔŋmɔ Wiemɔ lɛ tsuɔ nii koni akɛtsɔɔ nii yɛ saji pii amli. (1 Petro 3:15) Ani aha bo nifeemɔ pɛŋ koni obaha wiemɔ ni kɔɔ saneyitso ko ni tamɔ nɔ ni ole he nii jogbaŋŋ, shi sɛɛ mli lɛ ona akɛ ookase nɔ ko hee kwraa yɛ he? Eji niiashikpamɔ ni fɔɔ kaa. Nɔ ko nɔ ko bɛ ni haa nilee ni wɔyɔɔ yɛ sane ko he lɛ yaa hiɛ, fe ni wɔbaatsɔɔ mɛi krokomɛi. Kɛji wɔbɛ wiemɔ ko ní aha wɔ koni wɔbaha po lɛ, wɔbaanyɛ wɔkase nii kɛbatsɔmɔ tsɔɔlɔi kpakpai. Wɔyɔseɔ sui kpakpai komɛi yɛ nikaselɔ fɛɛ nikaselɔ he, ni wɔbaanyɛ wɔsusu bɔ ni wɔɔfee wɔkase nakai sui lɛ wɔha he.
19 Ato Sɔɔmɔ Kpee lɛ hu he gbɛjianɔ koni esaa wɔ akɛ Nyɔŋmɔ Wiemɔ lɛ tsɔɔlɔi. Daa otsi lɛ wɔnine shɛɔ wiemɔi ni ŋɔɔ, sanegbaai, kɛ nɔkwɛmɔnii ni ato he gbɛjianɔ kɛha wɔsɔɔmɔ nitsumɔ lɛ nɔ. Mɛɛ shiɛmɔ wiemɔ wɔkɛbaatsu nii? Te wɔbaafee tɛŋŋ wɔkpee naagbai krɛdɛɛi anaa yɛ wɔ maŋ shiɛmɔ nitsumɔ lɛ mli? Mɛɛ shiɛmɔ hegbɛi anaa gbeleɔ haa wɔ ni ekolɛ ehe baahia ni wɔpɛi mli kɛya hiɛ? Mɛni baaye abua wɔ koni wɔfee tsɔɔlɔi ni nitsɔɔmɔ mɔɔ shi babaoo kɛji wɔfee sɛɛsaramɔi kɛ Biblia mli nikasemɔi? (1 Korintobii 9:19-22) Awieɔ ni asusuɔ sanebimɔi ni tamɔ nɛkɛ he fitsofitso yɛ Sɔɔmɔ Kpee lɛ mli. Kpee lɛ fãi babaoo damɔ saneyitsei ni yɔɔ Wɔ Maŋtsɛyeli Sɔɔmɔ lɛ, ni ji dɛŋdade kroko hu ni akɛha koni esaa wɔ kɛha wɔnitsumɔ ni he hiaa lɛ.
20. Te wɔɔfee tɛŋŋ wɔná kpeei kɛ kpeei wuji ahe sɛɛ jogbaŋŋ kɛmɔ shi?
20 Kɛtsɔ wɔhe ni wɔbaasaa kɛha wɔkpeei lɛ kɛ ya ni wɔbaaya koni agbɛnɛ wɔkɛ nɔ ni wɔkase lɛ atsu nii yɛ wɔnitsumɔ akɛ tsɔɔlɔi lɛ nɔ lɛ, wɔnine shɛɔ tsɔsemɔ babaoo nɔ. Shi babaoo yɛ. Wɔyɛ kpeei wuji hu—kpokpai bibii anɔ kpeei kɛ kpokpaa wulu nɔ kpeei—ni ato he gbɛjianɔ koni akɛsaa wɔ akɛ Nyɔŋmɔ Wiemɔ lɛ tsɔɔlɔi. Ni kwɛ bɔ ni wɔkpaa gbɛ akɛ wɔɔbo sane toi jogbaŋŋ ni wɔkɛ ŋaawoo ni tamɔ nɛkɛ atsu nii!—Luka 8:18.
21. Mɛɛ odaseyeli tsɔɔ akɛ wɔ tsɔsemɔ lɛ emɔ shi, ni namɔ ŋɔɔ yijiemɔ lɛ yaa?
21 Ani tsɔsemɔ ni Yehowa kɛha lɛ efee nɔ ni mɔɔ shi? Nyɛhaa anɔkwalei lɛ diɛŋtsɛ awiea ahaa ehe. Ayeɔ abuaa mɛi akpei ohai abɔ daa afi koni amɛkase Biblia shishijee tsɔɔmɔi lɛ koni amɛhi shi yɛ nɔ ni Nyɔŋmɔ taoɔ yɛ amɛdɛŋ lɛ kɛ gbeekpãmɔ naa. Wɔ yibɔ lɛ miiya hiɛ, shi wɔteŋ mɔ ko mɔ ko nyɛŋ aŋɔ enɛ he yijiemɔ lɛ eha ehe. Esa akɛ wɔna saji lɛ yɛ faŋŋ mli taakɛ Yesu fee lɛ. Ekɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” Taakɛ bɔfoi ni hi shi yɛ blema beaŋ lɛ ji lɛ, wɔteŋ mɛi pii ji gbɔmɛi foji kɛ mɛi ni leee woloŋ. (Yohane 6:44; Bɔfoi lɛ Asaji 4:13) Omanye ni wɔyeɔ lɛ damɔ Yehowa, mɔ ni gbalaa mɛi ni hiɛ tsui ni ja lɛ kɛbaa anɔkwale lɛ he lɛ nɔ. Paulo wie he jogbaŋŋ akɛ: “Mi lɛ, mitɛo; Apolo shwie nɔ nu; shi Nyɔŋmɔ ha shwere.”—1 Korintobii 3:6.
22. Mɛni hewɔ esaaa akɛ wɔnijiaŋ jeɔ wui fe nine yɛ wɔhe ni wɔkɛaawo Kristofoi asɔɔmɔ nitsumɔ lɛ mli kɛmɔ shi lɛ he lɛ?
22 Hɛɛ, Yehowa Nyɔŋmɔ kɛ ehe ewo wɔnitsumɔ akɛ e-Wiemɔ lɛ he tsɔɔlɔi lɛ mli waa. Ekolɛ jeee be fɛɛ be wɔbaanu he akɛ wɔji tsɔɔlɔi ni he esa. Shi kaimɔ akɛ, Yehowa ji mɔ ni gbalaa gbɔmɛi kɛbaa lɛ diɛŋtsɛ kɛ e-Bi lɛ ŋɔɔ. Yehowa ji mɔ ni haa wɔhe saa koni wɔshiɛ wɔtsɔɔ mɛi heei lɛ kɛtsɔ e-Wiemɔ lɛ, emumɔ krɔŋkrɔŋ lɛ, kɛ eshikpɔŋ nɔ gbɛjianɔtoo lɛ nɔ. Nyɛhaa wɔfea toiboo wɔhaa Yehowa tsɔsemɔ lɛ kɛtsɔ nibii kpakpai ni ekɛhaa wɔ amrɔ nɛɛ koni eha wɔfee mɛi ni asaa amɛ pɛpɛɛpɛ akɛ Nyɔŋmɔ Wiemɔ lɛ tsɔɔlɔi lɛ ni wɔkɛaatsu nii lɛ nɔ!
Te Obaaha Hetoo Oha Tɛŋŋ?
• Mɛɛ gbɛ nɔ Biblia lɛ saa wɔ kɛha shiɛmɔ nitsumɔ lɛ?
• Mɛɛ nitsumɔ mumɔ krɔŋkrɔŋ lɛ tsuɔ koni eha wɔhe asa akɛ sɔɔlɔi?
• Mɛɛ gbɛ̀i anɔ Yehowa shikpɔŋ nɔ gbɛjianɔtoo lɛ eye ebua bo koni ohe asa akɛ mɔ ni shiɛɔ sanekpakpa lɛ yɛ?
• Mɛni hewɔ wɔbaanyɛ wɔná hekɛnɔfɔɔ be mli ni wɔkɛ wɔhe woɔ shiɛmɔ nitsumɔ lɛ mli lɛ?
[Nikasemɔ lɛ he Sanebimɔi]
[Mfoniri ni yɔɔ baafa 25]
Ákɛ Nyɔŋmɔ Wiemɔ lɛ tsɔɔlɔ lɛ, Yesu jie suɔmɔ kpo etsɔɔ gbɔmɛi