Mɛni Ebiɔ Dani Mɔ ko Ahiɛ Henilee ni Mli Tse Mli?

“AFÃ Nɔyelɔ lɛ ni Ebahe R$ 20,000.” Nɛkɛ saneyitso ni efɔɔɔ kaa nɛɛ je kpo yɛ Brazil adafitswaa wolo ko ni gbɛi ji Correio do Povo lɛ mli. Amaniɛbɔɔ lɛ gba sane ko ni kɔɔ Luiz Alvo de Araújo, ni ji nuu ko ni tsuɔ nii yɛ wojiamajemɔhe lɛ, ní hɔɔ shikpɔŋ ko eha maŋ lɛ nɔyeli lɛ he. Beni Luiz etsake eshikpɔŋ lɛ nɔ woji ewo maŋ lɛ nɔyelɔi lɛ gbɛi amli sɛɛ lɛ, enaa kpɛ ehe beni ena akɛ awo lɛ nyɔmɔ ni fa fe R$20,000 (eehe eshɛ U.S. dɔla 8,000) fe bɔ ni amɛba gbeekpamɔ lɛ!

Shika ní eteke nɔ nɛɛ kɛ sɛɛkuu batsɔ sane ni agbala mli shii abɔ. Beni Luiz etee nɔyeli lɛ nitsumɔhe lɛ shii abɔ ní eyeee omanye sɛɛ lɛ, awo lɛ hewalɛ ni eyana mlalelɔ koni ayagbe sane lɛ naa yɛ saneyelihe. Kojolɔ ni kojo sane lɛ jaje akɛ: “Eyɛ faŋŋ akɛ mɔ ko etɔ̃ yɛ he ko, ni akɛni nitsumɔ gbɛjianɔtoo lɛ yɛ hwanyaŋŋ hewɔ lɛ, mɔ ko mɔ ko leee bɔ ni ebaafee etsu naagba lɛ he nii. Enɛ ji klɛŋklɛŋ kwraa ni mina sane ko ni tamɔ nɛkɛ.”

Luiz, ni eji Yehowa Odasefoi ateŋ mɔ kome lɛ tsɔɔ mli akɛ: “Mihenilee ni Biblia lɛ etsɔse lɛ lɛ eŋmɛŋ mi gbɛ ni makɔ nɔ ko ni jeee mi nɔ. Esa akɛ mabɔ mɔdɛŋ ni mikɛ shika lɛ aku sɛɛ kɛya.”

Mɛi babaoo baana su ni tamɔ nɛkɛ ákɛ nɔ ko ni efɔɔɔ kaa, loo ebaawa akɛ amɛbaanu shishi. Shi Nyɔŋmɔ Wiemɔ lɛ tsɔɔ akɛ, esa akɛ anɔkwa Kristofoi abu henilee ni mli tse ní amɛaahiɛ mli yɛ amɛkɛ jeŋ nɛɛ nɔyelɔi lɛ asharamɔ mli lɛ akɛ eji nɔ ko ni he hiaa waa. (Romabii 13:5) Yehowa Odasefoi etswa amɛ fai shi akɛ ‘amɛbaahiɛ henilee kpakpa mli, ni amɛba amɛjeŋ jogbaŋŋ yɛ nii fɛɛ mli.’—Hebribii 13:18.