Ni Aaadamɔ ‘Ŋmeii ko ni Yɔɔ Heloo lɛ Mli’ lɛ Naa
Ni Aaadamɔ ‘Ŋmeii ko ni Yɔɔ Heloo lɛ Mli’ lɛ Naa
“Miduromɔ [ní osaaa] lɛ fá hao.”—2 KORINTOBII 12:9.
1, 2. (a) Mɛni hewɔ esaaa akɛ wɔhiɛ feɔ wɔ yaa yɛ anɔkwale ni eji akɛ wɔkɛ kaai kɛ naagbai kpeɔ lɛ? (b) Mɛni hewɔ wɔbaanyɛ wɔná nɔmimaa yɛ kaai ni wɔkɛkpeɔ lɛ fɛɛ sɛɛ lɛ?
“MƐI fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.” (2 Timoteo 3:12) Mɛni hewɔ eyɔɔ nakai lɛ? Ejaakɛ Satan kɛ nɔmimaa ejaje akɛ gbɔmɔ sɔmɔɔ Nyɔŋmɔ kɛha pɛsɛmkunya yiŋtoi komɛi kɛkɛ ahewɔ, ni egiri naakpa akɛ ebaama ewiemɔ lɛ nɔ mi. Be ko lɛ Yesu bɔ ebɔfoi anɔkwafoi lɛ kɔkɔ akɛ: “Satan etao nyɛhe gbɛ, koni esha nyɛmli taakɛ ŋmãa.” (Luka 22:31) Yesu le jogbaŋŋ akɛ Nyɔŋmɔ ŋmɛɔ Satan gbɛ koni eka wɔ kɛtsɔ naagbai ni mli wa waa lɛ anɔ. Yɛ anɔkwale mli lɛ, no etsɔɔɔ akɛ shihilɛ fɛɛ shihilɛ ni mli wa ni wɔkɛkpeɔ yɛ shihilɛ mli lɛ jɛ Satan loo edaimonioi lɛ aŋɔɔ tɛɛ. (Jajelɔ 9:11) Shi Satan etswa efai shi akɛ ekɛ nɔ fɛɛ nɔ ni yɔɔ ehewalɛ mli lɛ baatsu nii koni ekɛku wɔ emuuyeli lɛ mli.
2 Biblia lɛ kɛɔ wɔ akɛ wɔhiɛ akafee wɔ yaa yɛ wɔkaai lɛ ahewɔ. Nɔ fɛɛ nɔ ni baaba wɔnɔ lɛ, ejeee nɔ ni efɔɔɔ kaa loo akpaaa gbɛ. (1 Petro 4:12) Yɛ anɔkwale mli lɛ, “nakai amanehului lɛ nɔŋŋ [wɔ]nyɛmimɛi ni yɔɔ je lɛŋ lɛ hu náa.” (1 Petro 5:9) Ŋmɛnɛ, Satan kɛ nɔnyɛɛ ni naa wa waa baa Nyɔŋmɔ tsulɔ fɛɛ tsulɔ nɔ. Abonsam náa he miishɛɛ akɛ eeena ni akɛ piŋmɔi kɛ naagbai babaoo ni tamɔ ŋmei miiba wɔnɔ bɔ ni aaanyɛ. Bɔni afee ni enyɛ etsu enɛ he nii lɛ, ekɛ enibii agbɛjianɔtoo lɛ tsuɔ nii yɛ gbɛ ko ni eka shi faŋŋ akɛ ebaanyɛ ekɛ eko afata ‘ŋmeii ni yɔɔ wɔheloo mli’ lɛ he loo ebaaha emli awo wu lɛ nɔ. (2 Korintobii 12:7) Shi kɛlɛ, esaaa akɛ tutuamɔi ni Satan kɛbaa lɛ fiteɔ wɔ emuuyeli lɛ. Taakɛ bɔ ni Yehowa “aaaje gbɛ” aha wɔ koni wɔto wɔtsui shi yɛ kaa mli lɛ, nakai nɔŋŋ ebaaje gbɛ eha wɔ beni wɔkɛ haomɔi ni tamɔ ŋmeii ni yɔɔ wɔheloo mli lɛ kpeɔ lɛ.—1 Korintobii 10:13.
Bɔ ni Abaafee Adamɔ Ŋmei ko Naa
3. Te Yehowa ha hetoo eha tɛŋŋ beni Paulo bi koni ejie ŋmei ni yɔɔ eheloo mli lɛ?
3 Bɔfo Paulo kpa Nyɔŋmɔ fai koni ejie ŋmei lɛ kɛjɛ eheloo mli. “Enɛ hewɔ lɛ mikpa Nuntsɔ lɛ fai shii etɛ sɔŋŋ, koni eje minɔ.” Mɛni ji hetoo ni Yehowa kɛha Paulo nibimɔ ni hiɛdɔɔ yɔɔ mli lɛ? “Miduromɔ [ní osaaa] ni asaaa lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.” (2 Korintobii 12:8, 9) Nyɛhaa wɔpɛia hetoo nɛɛ mli wɔkwɛa koni wɔkwɛ bɔ ni ebaanyɛ eye ebua wɔ koni wɔdamɔ naagbai ni tamɔ ŋmei ni waa wɔhe lɛ naa.
4. Mɛɛ gbɛ̀i anɔ Paulo ná Yehowa duromɔ ní esaaa lɛ he sɛɛ yɛ?
4 Kadimɔ akɛ Nyɔŋmɔ wo Paulo hewalɛ koni ehiɛ asɔ duromɔ ní esaaa ni atsɔ hiɛ akpã mli aha lɛ kɛtsɔ Kristo nɔ lɛ. Lɛɛlɛŋ, ajɔɔ Paulo yɛ gbɛ̀i babaoo nɔ. Eyɛ mli akɛ kulɛ eji Yesu sɛɛnyiɛlɔi lɛ ashitee-kɛ-wolɔ ni yɔɔ shiŋŋ moŋ, shi Yehowa jɛ suɔmɔ mli eha ená hegbɛ akɛ kaselɔ. (Bɔfoi lɛ Asaji 7:58; 8:3; 9:1-4) No sɛɛ lɛ, Yehowa jɛ mlihilɛ mli eha Paulo nitsumɔi kɛ sɔɔmɔ hegbɛi babaoo ni miishɛɛ yɔɔ mli. Nɔ ni wɔbaakase kɛjɛ mli lɛ yɛ faŋŋ. Yɛ bei ni ehiii kwraa po amli lɛ, wɔkã he wɔyɛ jɔɔmɔi babaoo ni esa akɛ wɔhiɛ asɔ. Ekaba kɔkɔɔkɔ akɛ, kaai ni wɔkɛkpeɔ lɛ aaaha wɔhiɛ akpa ekpakpa babaoo ni Yehowa feɔ ehaa wɔ lɛ nɔ.—Lala 31:20.
5, 6. (a) Mɛɛ gbɛ nɔ Yehowa tsɔɔ Paulo yɛ akɛ E-hewalɛ lɛ “gbedeefeemɔ mli eyeɔ emuu yɛ”? (b) Mɛɛ gbɛ nɔ Paulo nɔkwɛmɔnɔ lɛ haa anaa Satan akɛ eji amalelɔ yɛ?
5 Yehowa duromɔ ní wɔsaaa lɛ bafee nɔ ni fa yɛ gbɛ kroko hu nɔ. Nyɔŋmɔ hewalɛ lɛ fa babaoo koni eye ebua wɔ kɛtsɔ wɔkaai amli. (Efesobii 3:20) Yehowa tsɔɔ Paulo akɛ E-hewalɛ lɛ “gbedeefeemɔ mli eyeɔ emuu yɛ.” Yɛ mɛɛ gbɛ nɔ? Ejɛ suɔmɔ mli ekɛ hewalɛ fɛɛ ni he hiaa Paulo lɛ ha lɛ bɔni afee ni edamɔ ekaa lɛ naa. Enɛ hewɔ lɛ, Paulo tsuishiŋmɛɛ kɛ hekɛnɔfɔɔ ni mli wa ni eyɔɔ yɛ Yehowa mli lɛ jie lɛ kpo etsɔɔ mɛi fɛɛ akɛ Nyɔŋmɔ hewalɛ lɛ miiye kunim yɛ nɛkɛ nuu eshafeelɔ ni egbede nɛɛ gbɛfaŋ. Agbɛnɛ susumɔ hewalɛ ni enáa yɛ Abonsam, mɔ ni kɛɛ gbɔmɛi sɔmɔɔ Nyɔŋmɔ be mli ni shihilɛ mli yɔɔ miishɛɛ ni naagbai bɛ mli pɛ lɛ nɔ lɛ he okwɛ. Emuuyeli mli ni Paulo hiɛ lɛ tsɔ ehiɛ ma ni nakai heguɔgbelɔ lɛ gbá!
6 Naa Paulo, ni ji Satan tsutsu hefatalɔ yɛ ta ni efãa eshiɔ Nyɔŋmɔ lɛ mli, Kristofoi ayiwalɔ ni woɔ ehe nɔ, Farisifonyo ni yɔɔ ekãa, ni ŋwanejee ko bɛ he akɛ, yɛ be ko ni eho lɛ mli lɛ ená shihilɛ mli miishɛɛ babaoo ejaakɛ afɔ lɛ awo shihilɛ ni tamɔ odehei ashihilɛ mli lɛ mli. Amrɔ nɛɛ Paulo miisɔmɔ Yehowa kɛ Kristo akɛ ‘bɔfoi lɛ ateŋ mɔ bibioo fe fɛɛ.’ (1 Korintobii 15:9) No hewɔ lɛ, ebaa ehe shi ehaa hegbɛ ni klɛŋklɛŋ afii oha lɛ mli Kristofoi anɔyeli kuu lɛ yɔɔ lɛ. Ni eeŋmɛ etsui shi yɛ anɔkwayeli mli yɛ ŋmei ni yɔɔ eheloo mli lɛ fɛɛ sɛɛ. Yɛ naagba babaoo ni Satan kɛbaa lɛ fɛɛ sɛɛ lɛ, shihilɛ lɛ mli kaai lɛ haaa ekãa ni Paulo yɔɔ lɛ nɔ agbɔ. Paulo hiɛ kpaaa hiɛnɔkamɔ ni eyɔɔ akɛ ekɛ Kristo baaná ŋwɛi Maŋtsɛyeli lɛ mli gbɛfaŋnɔ lɛ nɔ kɔkɔɔkɔ. (2 Timoteo 2:12; 4:18) Shi kɛlɛ, ŋmei ni piŋɔ mɔ ko bɛ ni baanyɛ aba ekãa ni eyɔɔ lɛ shi. Eba akɛ ekãa ni wɔyɔɔ lɛ hu mli baawa kɛya hiɛ be fɛɛ be! Kɛtsɔ wajemɔ ni ewajeɔ wɔ kɛtsɔɔ wɔkaai lɛ amli lɛ nɔ lɛ, Yehowa kɛ hegbɛ ni wɔná akɛ wɔɔye wɔbua koni akɛna Satan akɛ amalelɔ lɛ woɔ wɔhiɛ nyam.—Abɛi 27:11.
Yehowa Gbɛjianɔtoi lɛ Ahe Miihia
7, 8. (a) Mɛɛ gbɛ̀i anɔ Yehowa tsɔɔ ehaa etsuji hewalɛ yɛ ŋmɛnɛ? (b) Mɛni hewɔ daa Biblia kanemɔ kɛ ekasemɔ he hiaa waa koni wɔnyɛ wɔdamɔ ŋmei ni yɔɔ wɔheloo mli lɛ naa lɛ?
7 Ŋmɛnɛ, Yehowa haa Kristofoi anɔkwafoi hewalɛ kɛtsɔ emumɔ krɔŋkrɔŋ lɛ, e-Wiemɔ lɛ, kɛ wɔ Kristofoi anyɛmifeemɔ lɛ nɔ. Taakɛ bɔfo Paulo ji lɛ, wɔbaanyɛ wɔshɛ wɔjatsui lɛ wɔfɔ Yehowa nɔ yɛ sɔlemɔ mli. (Lala 55:23) Eyɛ mli akɛ ekolɛ Nyɔŋmɔ ejieŋ wɔkaai lɛ kɛyaŋ moŋ, shi ebaanyɛ eha wɔ nilee koni wɔdamɔ naa, titri lɛ kaai lɛ ateŋ nɔ ni mli wa waa lɛ po. Yehowa baanyɛ eha wɔ ekãa hu—ni no aha wɔ “hewalɛ ní fá kɛteke nɔ”—koni eye ebua wɔ ni wɔŋmɛ wɔtsui shi.—2 Korintobii 4:7.
8 Mɛɛ gbɛ nɔ wɔnine shɛɔ yelikɛbuamɔ ni tamɔ nɛkɛ nɔ? Esa akɛ wɔkase Nyɔŋmɔ Wiemɔ lɛ kɛ ekãa, ejaakɛ no mli wɔbaana emiishɛjemɔ wiemɔi ni hi jogbaŋŋ lɛ yɛ. (Lala 94:19) Wɔkaneɔ Nyɔŋmɔ tsuji lɛ awiemɔi ni yɔɔ awerɛho lɛ he sane yɛ Biblia lɛ mli, be mli ni amɛkpa fai kɛha E-yelikɛbuamɔ lɛ. Hetooi ni Yehowa kɛhaa, ni yɛ bei pii amli lɛ nɔ ni fata he ji miishɛjemɔ wiemɔi lɛ, ji nɔ ni sa nɔjwɛŋmɔ. Nyɔŋmɔ Wiemɔ lɛ kasemɔ baawaje wɔ koni “hewalɛ ní fá kɛteke nɔ afee Nyɔŋmɔ nɔ ni jeee wɔnɔ.” Taakɛ bɔ ni ebiɔ ni wɔye heloonaa niyenii daa gbi kɛha hewalɛnamɔ lɛ, nakai nɔŋŋ esa akɛ wɔkase Nyɔŋmɔ wiemɔi lɛ daa. Ani wɔfeɔ nakai? Kɛji wɔfeɔ nakai lɛ, no lɛ wɔbaana akɛ “hewalɛ ní fá kɛteke nɔ” ni wɔnine shɛɔ nɔ lɛ yeɔ buaa wɔ koni wɔŋmɛ wɔtsui shi yɛ mfonirifeemɔŋ ŋmeii fɛɛ ŋmeii ni aaahao wɔ amrɔ nɛɛ lɛ mli.
9. Te onukpai aaafee tɛŋŋ amɛfi mɛi ni kɛ naagbai kpeɔ lɛ asɛɛ?
9 Kristofoi onukpai ni sheɔ Nyɔŋmɔ gbeyei lɛ baanyɛ ‘atsɔ tamɔ abobaahe yɛ kɔɔyɔɔ’ ni ji nɔnyɛɛ “naa,” kɛ “teemɔhe yɛ nugbɔnɛmɔ” ni ji naagbai ‘anaa.’ Onukpai ni sumɔɔ koni amɛhi shi yɛ nakai sane mlitsɔɔmɔ ni jɛ mumɔŋ lɛ naa lɛ jɛɔ heshibaa kɛ anɔkwayeli mli amɛbiɔ Yehowa koni eha amɛ “nikaselɔi alilɛi” bɔni afee ni amɛnyɛ amɛkɛ wiemɔi ni ja aha mɛi ni piŋɔ lɛ hetoo. Onukpai lɛ awiemɔi baanyɛ atamɔ nugbɔnɛmɔ ni shwãa ŋwɛtɛŋwɛtɛ ni shɛjeɔ wɔmumɔ mii yɛ shihilɛ mli jaramɔ bei amli. Kɛtsɔ wiemɔ ni ‘amɛkɛbaashɛje mɛi ni tsui faa lɛ amii’ lɛ nɔ lɛ, onukpai lɛ kɛ anɔkwayeli fiɔ amɛmumɔŋ nyɛmimɛi hii kɛ yei ni ekolɛ etɔ amɛ loo amɛnijiaŋ eje wui yɛ ŋmei ko ni yɔɔ amɛheloo mli lɛ sɛɛ.—Yesaia 32:2; 50:4; 1 Tesalonikabii 5:14.
10, 11. Te Nyɔŋmɔ tsuji aaafee tɛŋŋ amɛwo mɛi krokomɛi ni kɛ kaai ni mli wawai kpeɔ lɛ hewalɛ?
10 Yehowa tsuji fɛɛ ji e-Kristofoi aweku ni efee ekome lɛ fã. Hɛɛ, “wɔteŋ mɔ fɛɛ mɔ lɛ enaanyo henɔ̃ ji lɛ,” ni “esa akɛ . . . wɔsumɔsumɔɔ wɔhe.” (Romabii 12:5; 1 Yohane 4:11) Mɛɛ gbɛ nɔ wɔtsɔɔ wɔtsuɔ gbɛnaa nii nɛɛ he nii yɛ? Taakɛ 1 Petro 3:8 lɛ tsɔɔ lɛ, wɔfeɔ nakai kɛtsɔ ‘wɔhe ni wɔbaananaa wɔha wɔhe, wɔdɔ wɔhe akɛ nyɛmimɛi, kɛ wɔmli ni aaajɔ’ aha mɛi fɛɛ ni wɔkɛ amɛ yɔɔ hemɔkɛyeli lɛ mli lɛ. Yɛ mɛi ni kɛ heloo mli ŋmei ko ni piŋɔ mɔ kpeɔ lɛ agbɛfaŋ lɛ, wɔ fɛɛ wɔbaanyɛ wɔsusu amɛhe yɛ gbɛ krɛdɛɛ nɔ, kɛji amɛji gbekɛbii loo onukpai. Yɛ mɛɛ gbɛ nɔ?
11 Esa akɛ wɔbɔ mɔdɛŋ akɛ wɔbaale amɛpiŋmɔi lɛ jogbaŋŋ. Kɛji wɔnaaa mɔbɔ, wɔnuuu nii ahe, loo sane ko kɔɔɔ wɔhe lɛ, ekolɛ wɔbaaha amɛpiŋmɔ lɛ mli awo wu ni wɔleee. Esa akɛ wɔhiɛ ni baahi amɛkaai lɛ anɔ lɛ atsirɛ wɔ koni wɔkwɛ wɔhe nɔ jogbaŋŋ yɛ nɔ ni wɔwieɔ he, bɔ ni wɔwieɔ he wɔhaa, kɛ bɔ ni wɔfeɔ wɔnii wɔhaa lɛ he. Ni wɔɔfee mɛi ni hiɛ jwɛŋmɔ kpakpa kɛ mɛi in woɔ hewalɛ lɛ baanyɛ aye abua kɛba ŋmei fɛɛ ŋmei ni haoɔ amɛ ni ji piŋmɔ ni naa wa waa lɛ ekomɛi ashi. Ekolɛ wɔkɛ nakai feemɔ baama nɔ mi akɛ wɔji hewalɛwoo nɔ̃ kɛha amɛ.—Kolosebii 4:11.
Bɔ ni Mɛi Komɛi Edamɔ Naa yɛ Omanyeyeli Mli
12-14. (a) Mɛni Kristofonyo ko fee koni enyɛ edamɔ kansa naa? (b) Mɛɛ gbɛ nɔ nɛkɛ yoo nɛɛ mumɔŋ nyɛmimɛi hii kɛ yei lɛ ye bua ni amɛwo lɛ hewalɛ yɛ?
12 Be mli ni wɔbɛŋkɛɔ naagbee gbii nɛɛ anaagbee lɛ, daa nɛɛ “kɔɔmɔi” lɛ miifa. (Mateo 24:8) No hewɔ lɛ, eeenyɛ efee akɛ kaai baaba mɔ fɛɛ mɔ nɔ yɛ shikpɔŋ lɛ nɔ, titri lɛ Yehowa anɔkwa tsuji, ni miisumɔ ni amɛfee esuɔmɔnaa nii lɛ. Ákɛ nɔkwɛmɔnɔ lɛ, susumɔ Kristofonyo ko ni miisɔmɔ yɛ be-fɛɛ sɔɔmɔ nitsumɔ lɛ mli lɛ he okwɛ. Ayɔse akɛ ená kansa ni ehe bahia ni ajie ewala yibii ni feɔ lajɔ lɛ kɛ gbɔmɔtsoŋ nii ni feɔ wala yibii ni wuɔ shiɔ hela lɛ kɛtsɔ opireshɛn feemɔ nɔ. Beni lɛ kɛ ewu ná amɛle akɛ ená nɛkɛ hela nɛɛ lɛ, amrɔ nɔŋŋ ni amɛtsi amɛbɛŋkɛ Yehowa yɛ faikpamɔ sɔlemɔ kakadaŋŋ mli. Sɛɛ mli lɛ ekɛɛ akɛ amɛná toiŋjɔlɛ ko ni naa wa waa diɛŋtsɛ. Shi kɛlɛ, eŋmɛ etsui shi yɛ bei kpakpai kɛ jaramɔ bei amli, titri lɛ beni edamɔɔ naagbai ni ji nibii ni jɛ ehelatsamɔ lɛ mli kɛba lɛ anaa lɛ.
13 Bɔni afee ni nyɛmi yoo nɛɛ atsu shihilɛ ni ekɛkpeɔ nɛɛ he nii lɛ, ebɔ mɔdɛŋ koni ekase kansa he nii babaoo bɔ ni eeenyɛ. Ekɛ datrɛfoi ni kwɛɔ lɛ lɛ tee ajina. Ena wala shihilɛ mli saji ni miitsɔɔ bɔ ni aŋkroaŋkroi komɛi edamɔ hela nɛɛ naa yɛ henumɔŋ gbɛfaŋ lɛ yɛ Buu-Mɔɔ, Awake! lɛ kɛ Kristofoi awoji ni kɔɔ he lɛ amli. Agbɛnɛ hu ekane Biblia mli saji ni kɔɔ he, ni miitsɔɔ nyɛmɔ ni Yehowa yɔɔ ni ekɛaawaje ewebii yɛ shihilɛi ni wawai amli, kɛ saji krokomɛi ni yeɔ buaa.
14 Sane kome ko ni tsɔɔ bɔ ni aaafee adamɔ nijiaŋwujee naa lɛ tsɛ nilee wiemɔi nɛɛ asɛɛ, nɔ ni kɛɛ: “Mɔ ni etse ehe lɛ, akɔnɔ nii etaoɔ.” (Abɛi 18:1) No hewɔ lɛ sane lɛ kɛ ŋaawoo nɛɛ ha akɛ: “Tee shi oshi he ni atseɔ banee.” * Nyɛmi yoo lɛ gba akɛ: “Mɛi babaoo kɛɛ mi akɛ amɛmiisɔle amɛmiiha mi; mɛi krokomɛi tswa mi tɛlifoŋ. Onukpai enyɔ komɛi tswaa mi tɛlifoŋ daa koni amɛkɛkwɛ bɔ ni miyɔɔ. Minine shɛ fɔfɔii kɛ ŋamɔ woji babaoo anɔ. Mɛi komɛi po hoo niyenii amɛha mi. Kɛfata he lɛ, mɛi babaoo kɛ amɛhe ha akɛ amɛkɛ mi baaya helatsamɔhe lɛ.”
15-17. (a) Te Kristofonyo ko damɔ naagbai ni mli wawai ni jɛ osharai ni ená lɛ mli ba lɛ anaa eha tɛŋŋ? (b) Mɛɛ yelikɛbuamɔ mɛi ni yɔɔ asafo lɛ mli lɛ kɛha?
15 Yehowa tsulɔ ko ni kɛ be kakadaŋŋ esɔmɔ yɛ New Mexico, U.S.A. lɛ, ná tsɔne mli osharai enyɔ. Nyɛmi yoo lɛ pila ekuɛ kɛ ekɔ̃ji, ni enɛ wo hela ko ni haa mɔ talɔi amli woɔ nu ni ekɛkpeɔ nɔ ni fe afii 25 nɛ lɛ mli wu. Egba akɛ: “Ewa kɛha mi akɛ matere nɔ ko ni tsiimɔ fe kilogram enyɔ yɛ miyitso nɔ. Shi sɔlemɔ ni hiɛdɔɔ yɔɔ mli ni misɔle miha Yehowa lɛ ewaje mi babaoo. Nakai pɛpɛɛpɛ saji ni wɔkase yɛ Buu-Mɔɔ lɛ mli lɛ efee. Ekome wie Mika 6:8 lɛ he, ni etsɔɔ akɛ ní akɛ Nyɔŋmɔ aaanyiɛ yɛ heshibaa mli lɛ tsɔɔ yɔsemɔ ni mɔ aaayɔse he ni enyɛmɔ shɛɔ. Enɛ ye ebua mi ni miyɔse akɛ yɛ mishihilɛ lɛ fɛɛ sɛɛ lɛ, esaaa akɛ minijiaŋ jeɔ wui, eyɛ mli akɛ be ni miyeɔ yɛ sɔɔmɔ nitsumɔ lɛ mli lɛ eba shi fe bɔ ni mishweɔ. Ní masɔmɔ lɛ kɛ jwɛŋmɔ ni mli tse lɛ ji nɔ ni he hiaa titri.”
16 Ebɔ amaniɛ hu akɛ: “Onukpai lɛ jieɔ miyi daa yɛ mɔdɛŋ ni mibɔɔ koni maba kpeei kɛ agbɛnɛ koni maya shiɛmɔ lɛ hewɔ. Oblahii kɛ oblayei lɛ fuaa mi ni amɛŋaa mi. Sɔɔlɔi gbɛgbalɔi lɛ toɔ amɛtsui shi amɛhaa mi ni bei pii lɛ amɛtoɔ amɛ gbɛjianɔ yɛ bei ni minaaa hewalɛ mikɛya shiɛmɔ lɛ mli. Be mli ni kɔɔyɔŋ tsakemɔ lɛ mli ehiii lɛ, amɛkɛ mi fataa amɛhe kɛyaa sɛɛsaramɔi loo amɛfɔɔ mi nine koni mibafata amɛhe yɛ amɛ Biblia mli nikasemɔi lɛ amli. Ni akɛni minyɛɛɛ mahiɛ baagi ni akɛ woji woɔ mli hewɔ lɛ, shiɛlɔi krokomɛi kɛ miwoji lɛ woɔ amɛ baagi lɛ mli kɛji mitee shiɛmɔ.”
17 Kadimɔ bɔ ni asafo mli onukpai kɛ nanemɛi heyelilɔi ye bua nɛkɛ nyɛmimɛi yei enyɔ nɛɛ koni amɛdamɔ amɛ gbɔjɔmɔi ni tamɔ ŋmei nɛɛ anaa. Amɛkɛ mlihilɛ yelikɛbuamɔ ni ato he gbɛjianɔ koni etsu mumɔŋ, gbɔmɔtsoŋ, kɛ henumɔŋ hiamɔ nii pɔtɛɛ ko he nii lɛ ha. Ani no wooo bo hewalɛ koni oye obua nyɛmimɛi hii kɛ yei krokomɛi ni kɛ naagbai kpeɔ lɛ? Oblahii kɛ oblayei, nyɛ hu nyɛbaanyɛ nyɛfee yelikɛbuamɔ nɔ kɛha mɛi ni yɔɔ nyɛ asafo lɛ mli ni wuɔ shiɔ amɛheloo mli ŋmeii lɛ.—Abɛi 20:29.
18. Mɛɛ hewalɛwoo wɔbaaná yɛ wala shihilɛ he saji ni akalaa yɛ Buu-Mɔɔ kɛ Awake! woji tɛtrɛbii lɛ mli?
18 Buu-Mɔɔ kɛ Awake! woji tɛtrɛbii lɛ ekala Odasefoi ni edamɔ shihilɛ mli naagbai anaa ní amɛkã he amɛmiidamɔ naa lolo lɛ awala shihilɛ mli saji kɛ niiashikpamɔi babaoo. Be mli ni okaneɔ saji ni tamɔ nɛkɛ daa nɛɛ lɛ, obaana akɛ omumɔŋ nyɛmimɛi hii kɛ yei lɛ babaoo ni yɔɔ je lɛŋ fɛɛ lɛ eŋmɛ amɛtsui shi yɛ shika helɛtemɔ mli naagbai, suɔlɔi ni egboi yɛ osharai amli, kɛ ta mli shihilɛi ni yɔɔ oshara mli. Mɛi krokomɛi hu yeɔ helai ni haaa amɛnyɛ amɛfee nɔ ko kwraa. Mɛi babaoo nyɛɛɛ amɛfee nibii bibii komɛi ni afeɔ yɛ shihilɛ mli ni mɛi ni yɔɔ hewalɛ lɛ ebuuu akɛ eji nɔ ko ni he hiaa lɛ po. Amɛhelai lɛ kaa amɛ waa diɛŋtsɛ, titri lɛ yɛ be mli ni amɛnyɛɛɛ amɛná gbɛfaŋnɔ babaoo bɔ ni kulɛ amɛbaanyɛ amɛfee yɛ Kristofoi anitsumɔi amli. Kwɛ bɔ ni amɛhiɛ sɔɔ yelikɛbuamɔ kɛ sɛɛfimɔ ni amɛnyɛmimɛi hii kɛ yei, onukpai kɛ gbekɛbii, kɛhaa amɛ lɛ waa!
Tsuishiŋmɛɛ kɛ Miishɛɛ Baa
19. Mɛni hewɔ Paulo nyɛ ená miishɛɛ yɛ ekaai ni tamɔ ŋmei ni ekɛkpe kɛ gbedeefeemɔi lɛ fɛɛ sɛɛ lɛ?
19 Paulo ná miishɛɛ akɛ eeena bɔ ni Nyɔŋmɔ wo lɛ hewalɛ lɛ. Ekɛɛ akɛ: “Misumɔɔ titri akɛ mashwã mafɔ migbedeefeemɔi lɛ anɔ moŋ, koni Kristo hewalɛ lɛ abu mihe. No hewɔ lɛ yɛ Kristo hewɔ lɛ mimii shɛɔ yɛ gbedeefeemɔi amli, yɛ hiɛnaanɔnii namɔi amli, yɛ haomɔi amli, yɛ yiwalɛi amli, yɛ fimɔi amli; ejaakɛ kɛ mifee gbedee lɛ, no moŋ mináa hewalɛ.” (2 Korintobii 12:9, 10) Yɛ niiashikpamɔ ni Paulo diɛŋtsɛ ná hewɔ lɛ, ebaanyɛ ejaje kɛ nɔmimaa akɛ: “Jeee akɛ fimɔ naa miwieɔ nɛɛ; ejaakɛ mi lɛ mikase akɛ shihilɛ fɛɛ shihilɛ ni miyɔɔ mli lɛ mimii ashɛ he. Mile ohia mli shihilɛ, ni mile nii amli shihilɛ hu; mihe ehomɔ yɛ nɔ fɛɛ nɔ kɛ nii fɛɛ mli: tɔɔ jio, hɔmɔ jio, ninámɔ jio, ohia jio. Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.”—Filipibii 4:11-13.
20, 21. (a) Mɛni hewɔ wɔbaaná miishɛɛ yɛ “nii ni anaaa” lɛ nɔ ni wɔbaajwɛŋ he lɛ? (b) Mɛni ji “nii ni anaaa” lɛ ekomɛi ni obaasumɔ ni ona yɛ shikpɔŋ nɔ Paradeiso lɛ mli?
20 No hewɔ lɛ, kɛtsɔ wɔtsui shi ni wɔbaaŋmɛ yɛ mfonirifeemɔŋ ŋmei fɛɛ ŋmei ni yɔɔ wɔheloo mli lɛ nɔ lɛ, wɔbaanyɛ wɔná miishɛɛ kpele yɛ mɛi fɛɛ ni wɔɔha amɛle akɛ Yehowa hewalɛ lɛ, gbedeefeemɔ mli eyeɔ emuu yɛ lɛ mli. Paulo ŋma akɛ: “Wɔtsui efãaa . . . Kɛlɛ wɔmli gbɔmɔ lɛ tsɔ̃ɔ ehee gbi fɛɛ gbi. Ejaakɛ wɔmrɔmrɔ amanehulu, ní jaraaa nɛɛ, miitsu naanɔ anunyam babaoo ní teke nɔ ní jara wa aahu eha wɔ. Wɔ ní . . . nii ni anaaa lɛ wɔkwɛɔ; ejaakɛ nii ni . . . anaaa lɛ hiɔ shi kɛyashiɔ naanɔ.”—2 Korintobii 4:16-18.
21 Ŋmɛnɛ Yehowa webii lɛ ateŋ mɛi babaoo hiɛ kã nɔ akɛ amɛbaahi eshikpɔŋ nɔ Paradeiso lɛ mli koni amɛná jɔɔmɔi ni ewo shi yɛ he lɛ mli ŋɔɔmɔ. Abaanyɛ akpɛlɛ nɛkɛ jɔɔmɔi nɛɛ anɔ akɛ eji nɔ ni ‘wɔnaaa’ ŋmɛnɛ. Shi kɛlɛ, be lɛ miibɛŋkɛ oyayaayai be mli ni wɔbaana nakai jɔɔmɔi lɛ kɛ wɔ diɛŋtsɛ wɔhiŋmɛii, hɛɛ, ni wɔbaaná amɛmli miishɛɛ kɛya naanɔ. Jɔɔmɔi nɛɛ ateŋ ekome baafee jiemɔ ni abaajie naagbai ni tamɔ ŋmei lɛ kɛya kwraa ni mɔ ko mɔ ko kɛ eko ehiŋ shi dɔŋŋ lɛ! Nyɔŋmɔ Bi lɛ ‘baafite Abonsam nitsumɔi lɛ’ ni ‘ebaakpata mɔ ni yɔɔ gbele nɔ hewalɛ lɛ hiɛ.’—1 Yohane 3:8; Hebribii 2:14.
22. Mɛɛ hekɛnɔfɔɔ kɛ faishitswaa esa akɛ efee wɔnɔ?
22 No hewɔ lɛ, ŋmei fɛɛ ŋmei ni yɔɔ wɔheloo mli ni yeɔ wɔ awui ŋmɛnɛ lɛ, nyɛhaa wɔyaa nɔ wɔdamɔa naa. Taakɛ Paulo ji lɛ, wɔbaaná hewalɛ kɛfee nakai kɛtsɔ Yehowa, mɔ ni jɛɔ mlihilɛ mli ewajeɔ wɔ lɛ nɔ. Be mli ni wɔyɔɔ shikpɔŋ nɔ Paradeiso lɛ mli lɛ, wɔbaakafo Yehowa wɔ-Nyɔŋmɔ lɛ daa yɛ enaakpɛɛ nibii fɛɛ ni efeɔ ehaa wɔ lɛ hewɔ.—Lala 103:2.
[Shishigbɛ niŋmaa]
^ kk. 14 Kwɛmɔ sane ni ji “The Bible’s Viewpoint: How to Cope With Despair,” ni yɔɔ May 8, 2000 Awake! lɛ mli lɛ.
Te Obaaha Hetoo Oha Tɛŋŋ?
• Mɛni hewɔ, ni yɛ mɛɛ gbɛ nɔ Abonsam bɔɔ mɔdɛŋ koni efite emuuyeli mli ni anɔkwa Kristofoi hiɛ lɛ?
• Mɛɛ gbɛ nɔ Yehowa hewalɛ lɛ “gbedeefeemɔ mli eyeɔ emuu yɛ”?
• Te onukpai kɛ mɛi krokomɛi baanyɛ afee tɛŋŋ amɛwo mɛi ni piŋɔ kɛ naagbai lɛ hewalɛ?
[Nikasemɔ lɛ he Sanebimɔi]
[Mfoniri ni yɔɔ baafa 18]
Paulo sɔle shii etɛ koni Nyɔŋmɔ ajie ŋmei ni yɔɔ eheloo mli lɛ