‘Aha Wɔsuɔmɔ lɛ Mli Ewa’

YƐ Sohaa, March 31, 2000 lɛ, Usu Gɔŋ ni yɔɔ Hokkaido, Japan lɛ fɛ́ beni ehi shi afii 23 sɛɛ ní nɔ ko baaa. Anyɛ mɛi akpei abɔ ni yɔɔ jɛmɛ lɛ anɔ koni amɛshi he ni oshara lɛ eba yɛ lɛ. Mɛi pii ashiai kɛ amɛnitsumɔi ŋmɛɛ amɛ, shi heniianaa lɛ amɛteŋ mɔ ko mɔ ko gbooo. Yehowa Odasefoi 46 fata mɛi ni ehe ebahia koni amɛshi nɛɛ ahe, shi ashiii amɛ efolo ni yelikɛbuamɔ ko bɛ.

Kɛtsɔ Kristofonyo gbɛfalɔ sɔɔlɔ ko ni miisɔmɔ yɛ nakai akutso lɛ mli lɛ yelikɛbuamɔ nɔ lɛ, ato gbɛjianɔ kɛha yelikɛbuamɔ nibii yɛ gbi pɔtɛɛ ni gɔŋ lɛ fɛ́ lɛ nɔ. Etsɛɛɛ kɛkɛ ni yelikɛbuamɔ nibii lɛ bɔi baa kɛjɛ asafoi ni bɛŋkɛ jɛmɛ lɛ amli. Ato yelikɛbuamɔ ajinafoi akuu shishi oya yɛ Japan nitsumɔhe nine lɛ kwɛmɔ shishi, ni tooyelii kɛ nibii ni fa kɛha yelikɛbuamɔ fotro lɛ jɛ Yehowa Odasefoi ni yɔɔ Japan hei srɔtoi lɛ fɛɛ kɛba. Bɔni afee ni afĩ mumɔŋ nitsumɔi lɛ asɛɛ lɛ, atsu Yehowa Odasefoi abe-fɛɛ sɔɔlɔi kɛtee asafoi ni esa amɛhe lɛ ateŋ babaoo amli, ni kpokpaa nɔkwɛlɔ lɛ yasara he nɛɛ nɔtonɔto koni ekɛ henumɔŋ kɛ mumɔŋ sɛɛfimɔ aha.

Odasefoi ni yɔɔ he ni oshara lɛ eba yɛ lɛ tee nɔ amɛfee amɛ Kristofoi akpeei yɛ nakai shihilɛ ni mli wa lɛ mli kɛtsɔ aŋkroaŋkroi ashiai ni yɔɔ shweshweeshwe yɛ akutso lɛ mli ni amɛkɛtsu nii lɛ anɔ. Beni afo famɔ ni akɛha akɛ ashi he ni Maŋtsɛyeli Asa lɛ yɔɔ lɛ mli lɛ, nyɛmimɛi lɛ ku amɛsɛɛ amɛba ni amɛbana tsũ ni ekpa afã, ní egbá, ní hiɛ ekpata. Bu voo ni lasu gɔŋ lɛ etsa lɛ ehee lɛ miifɛ̃ lasu ni mli ti lolo, yɛ he ko ni kɛ Maŋtsɛyeli Asa lɛ jɛkɛɛɛ. Odasefoi lɛ susu sane he nɛkɛ akɛ, ‘Eji nɔ ni nilee yɔɔ mli akɛ aaaya nɔ afee kpeei yɛ nɛkɛ he nɛɛ? Ani abaanyɛ asaa Maŋtsɛyeli Asa lɛ?’

Akpɛ yiŋ koni ama Maŋtsɛyeli Asa hee yɛ he ko ni bɛŋkɛ ni yɔɔ shweshweeshwe. Kpokpaa nɔ Tsũmaa He Ajinafoi Akuu lɛ kɛ yelikɛbuamɔ ni he hiaa lɛ ha. Akɛ shika ni Odasefoi ni yɔɔ maŋ lɛŋ hei srɔtoi fɛɛ lɛ kɛha lɛ tsu tsumaa nɛɛ he nii. Nine shɛ shikpɔŋ nɔ oya, ni kɛtsɔ nitsulɔi ohai abɔ ni kɛ amɛhe ha lɛ ayelikɛbuamɔ nɔ lɛ, agbe Maŋtsɛyeli Asa hee lɛ naa yɛ be kukuoo mli. Yɛ Hɔgbaa, July 23, 2000 lɛ, mɛi 75 ba klɛŋklɛŋ kpee ni afee yɛ Maŋtsɛyeli Asa hee ni ama nɛɛ mli. Miishɛɛ yaafonui ho kɛjɛ mɛi ni ba lɛ ateŋ mɛi pii ahiŋmɛiiaŋ. Beni ajɔɔ Maŋtsɛyeli Asa lɛ nɔ yɛ October yɛ nakai afi lɛ nɔŋŋ mli lɛ, enɛ tsirɛ onukpai ni yɔɔ asafo ni yɔɔ jɛmɛ lɛ ateŋ mɔ kome ni ewie akɛ: “Gɔŋ lɛ fɛ́mɔ kɛ jaramɔ shihilɛi kɛ amanehulu ba. Ni kɛlɛ, tsumaa nɛɛ etsake wɔ gbeyeishemɔ lɛ efee lɛ miishɛɛ nɔ̃. Aha suɔmɔ ni wɔyɔɔ kɛha Yehowa kɛ wɔnyɛmimɛi Kristofoi lɛ mli ewa!”

[He ni Mfoniri ni yɔɔ baafa 19 lɛ Jɛ]

Usu Gɔŋ lɛ Fɛ́mɔ: AP Photo/Koji Sasahara