“Feemɔ Klalo, Enɛ Baanyɛ Awa Ohe”

ANI onu nakai wiemɔi lɛ pɛŋ? Ekolɛ datrɛfonyo ko loo helatsɛmɛi akwɛlɔ ko kɛɛ bo enɛ dani eha bo tsofa ni esa akɛ eha bo.

Ekolɛ, okpooo tsofafeemɔ lɛ akɛni oosumɔ ni ojo piŋmɔ ni ekolɛ ooopiŋ lɛ naa foi lɛ hewɔ. Yɛ no najiaŋ moŋ lɛ, oto otsui shi yɛ piŋmɔ lɛ mli bɔni afee ni oná gbɔmɔtsoŋ hewalɛ mli ŋɔɔmɔ wɔsɛɛ. Yɛ shihilɛi ni efɔɔɔ kaa amli lɛ, kpɛlɛmɔ ni aaakpɛlɛ tsofafeemɔ ko ni waa mɔ he lɛ nɔ loo kpoomɔ ni aaakpoo lɛ baanyɛ afee wala kɛ gbele sane.

Eyɛ mli akɛ, ekolɛ, jeee be fɛɛ be datrɛfonyo he baahia wɔ moŋ, shi akɛ adesai ni yeee emuu lɛ tsɔsemɔ loo jajemɔ he miihia wɔ fɛɛ, ní nɔ ni bei komɛi po lɛ ebaanyɛ epiŋ mɔ lɛ fata he lɛ. (Yeremia 10:23) Beni Biblia lɛ maa bɔ ni enɛ he hiaa yɛ gbekɛbii agbɛfaŋ lɛ anɔ mi lɛ, ekɛɛ akɛ: “Buulufeemɔ kpɛtɛ gbekɛ tsui he; shi tsɔsemɔ tso lɛ aaashwie lɛ kɛaajɛ ehe kɛaatee flooflo.”—Abɛi 22:15.

Tso lɛ, yɛ enɛ gbɛfaŋ lɛ feɔ fɔlɔi anɔyeli hegbɛ lɛ he mfoniri. Eji anɔkwale akɛ gbekɛbii fioo kpɛlɛɔ tsɔsemɔ nɔ. Kɛ́ ebiɔ ni akɛ toigbalamɔ ko aha lɛ, amɛbaate shi amɛwo enɛ. Shi kɛlɛ, fɔlɔi ni le nii ni yɔɔ suɔmɔ lɛ kwɛɛɛ gbekɛ lɛ henumɔ awui ni amɛaaye lɛ, shi moŋ amɛbi lɛ hilɛ-kɛhamɔ ni baaba naagbee mli lɛ. Fɔlɔi ni ji Kristofoi lɛ le akɛ Nyɔŋmɔ Wiemɔ lɛ ji anɔkwale beni ekɛɛ akɛ: “Tsɔsemɔ fɛɛ tsɔsemɔ lɛ, amrɔmrɔ lɛ efeee mɔ akɛ miishɛɛ nɔ̃ ni, shi dɔlɛ nɔ̃ moŋ; shi kɛ́ fee sɛɛ lɛ, ewoɔ hejɔlɛ yibii ní ji jalɛ lɛ ehaa mɛi ní etsɔ nɔ ekase nɔ ko lɛ.”—Hebribii 12:11; Abɛi 13:24.

Eji anɔkwale akɛ, jeee gbekɛbii pɛ tsɔsemɔ he hiaa amɛ. Ehe hiaa onukpai hu. Beni Biblia lɛ kɛɛ akɛ: “Mɔ tsɔsemɔ mli waa, kaaŋmɛɛ he! Okɛto jogbaŋŋ, shi no ji owala” lɛ, no mli lɛ ekɛ onukpai miiwie. (Abɛi 4:13) Hɛɛ, gbɔmɛi ni kɛ nilee tsuɔ nii—oblahii kɛ oblayei kɛ mɛi ni edara—lɛ baakpɛlɛ tsɔsemɔ ni damɔ Nyɔŋmɔ Wiemɔ, ni ji Biblia lɛ nɔ, ejaakɛ yɛ naagbee mli lɛ, no feemɔ baabaa amɛwala yi.