Mɛni Hã Nakai Blema Je lɛ Hiɛ Kpata?

NU AFUA ni ba yɛ jeŋ fɛɛ lɛ jeee adebɔɔ naa oshara ko ni ba trukaa. Eji kojomɔ ni jɛ Nyɔŋmɔ ŋɔɔ. Akɛ kɔkɔbɔɔ ha, shi aku hiɛ ashwie nɔ kwraa. Mɛni hewɔ? Yesu tsɔɔ mli akɛ: “Yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee.”—Mateo 24:38, 39, wɔma efã ko nɔ mi.

Hiŋmɛigbelemɔ ko ni Etee Hiɛ

Yɛ shihilɛi komɛi amli lɛ, hiŋmɛigbelemɔ shihilɛ ní tsɔ Nu Afua lɛ hiɛ lɛ ná nibii komɛi amli ŋɔɔmɔ ní wɔbɛ eko ŋmɛnɛ. Ákɛ nɔkwɛmɔnɔ lɛ, adesai aweku lɛ fɛɛ wie wiemɔ kome. (1 Mose 11:1) Kulɛ enɛ baawo mɔdɛŋbɔɔ yɛ ŋaa nitsumɔi kɛ jeŋ nileei ni ebiɔ mɛi babaoo amɔdɛŋbɔɔ kɛ hesaai srɔtoi lɛ mli hewalɛ. Agbɛnɛ, wala sɛɛkɛlɛ be kakadaŋŋ ni gbɔmɛi babaoo ná mli miishɛɛ yɛ nakai beaŋ lɛ hu tsɔɔ akɛ kulɛ amɛbaanyɛ amɛya nɔ amɛbua nɔ ni amɛkase yɛ afii ohai abɔ lɛ mli lɛ anaa.

Mɛi komɛi kɛɔ akɛ adesai awala sɛɛkɛlɛ lɛ jeee nɔ ko ni sɛɛ kɛ diɛŋtsɛ yɛ nakai beaŋ ni akɛ afii ni atsĩ tã yɛ Biblia amaniɛbɔɔ lɛ mli lɛ ji nyɔji diɛŋtsɛ. Ani eji anɔkwale? Ojogbaŋŋ, susumɔ Mahalalel sane lɛ he okwɛ. Biblia lɛ kɛɔ akɛ: “Mahalalel ye afii nyɔŋmai ekpaa kɛ enumɔ, ni efɔ Yared. . . . Gbii fɛɛ ni Mahalalel ye ji afii ohai kpaanyɔ kɛ nyɔŋmai nɛɛhu  kɛ enumɔ, ni egbo.” (1 Mose 5:15-17) Kɛji afi damɔ shi hã nyɔŋ kome lɛ, no lɛ Mahalalel fɔ ebinuu lɛ beni eye afii enumɔ pɛ! Afi damɔɔɔ shi kɛha nyɔŋ kome, ejaakɛ gbɔmɛi ni hi shi yɛ nakai beaŋ lɛ bɛŋkɛ emuuyeli hewalɛ ni klɛŋklɛŋ nuu, Adam yɔɔ mli lɛ he. Amɛhi shi afii ohai abɔ lɛɛlɛŋ. Mɛni amɛnine shɛ nɔ?

Afii ohai abɔ dani Nu Afua lɛ baaba lɛ, no mli lɛ shikpɔŋ lɛ nɔ bii ayifalɛ eda kɛyashɛ he ko ákɛ, Adam binuu Kain nyɛ eto maŋ ko, ni etsɛ lɛ Enok lɛ shishi. (1 Mose 4:17) Yɛ be ni tsɔ Nu Afua lɛ hiɛ lɛ mli lɛ, nitsumɔi srɔtoi shwere. Sɔ̃ŋmɛtsui yɛ kɛha “akɔɔble kɛ dade nii fɛɛ.” (1 Mose 4:22) Ŋwanejee ko bɛ he akɛ akɛ nɛkɛ dadei nɛɛ tsu nii kɛha tsumaa, kapintɛ nitsumɔ, níkpɛɛ, kɛ okwaayeli. Awieɔ nitsumɔi nɛɛ fɛɛ ahe yɛ amaniɛbɔɔ ni akɛha ni kɔɔ adesai ni hi shikpɔŋ lɛ nɔ yɛ mra be mli lɛ ahe lɛ mli.

Kulɛ nilee ni abua naa lɛ baaha yinɔi ni baanyiɛ sɛɛ aba lɛ he asa akɛ mɛi ni yɔɔ jeŋ nilee kɛ tsɔji ahe nilee yɛ dadei ahe nitsumɔ mli, okwaayeli nitsumɔi ahe nilee, tooi kɛ tsinai alɛɛ, niŋmaa mli hesaa, kɛ nibii atɛŋmɔ loo yɛ amɛ gbɔɔ mli. Ákɛ nɔkwɛmɔnɔ lɛ, Yubal ji “saŋkutswalɔi kɛ bɛlɛkpalɔi fɛɛ atsɛ.” (1 Mose 4:21) Hiŋmɛigbelemɔ tee hiɛ waa diɛŋtsɛ. Kɛlɛ, nɔ fɛɛ nɔ ba naagbee trukaa. Mɛni ba?

Mɛni kɛ Tɔ̃tɔ̃mɔ lɛ Ba?

Yɛ sɛɛnamɔi babaoo ní gbɔmɛi akuu ni hi shi dani Nu Afua lɛ ba lɛ ná lɛ fɛɛ sɛɛ lɛ, amɛnáaa shishijee kpakpa. Adam ni ji mɔ ni to amɛ shishi lɛ te shi ewo Nyɔŋmɔ. Kain, ni ji mɔ ni to klɛŋklɛŋ maŋ ni aŋma he sane afɔ̃ shi lɛ shishi lɛ, gbe lɛ diɛŋtsɛ enyɛmi nuu. Ebɛ naakpɛɛ mɔ akɛ efɔŋfeemɔ hé shi oyayaayai! Nɔ jɛ gboshinii ni kpa yɔɔ he ni Adam shi ha eshwiei lɛ mli kɛba lɛ fa babaoo.—Romabii 5:12.

Eka shi faŋŋ akɛ nibii amli miiwo wu beni Yehowa tswa efai shi akɛ ebaaŋmɛ gbɛ koni shihilɛ lɛ akã he aya nɔ afii 120 kroko kɛfata he. (1 Mose 6:3) Biblia lɛ kɛɔ akɛ: “Gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ. . . . Awo shikpɔŋ lɛ nɔ obɔ kɛ yiwalɛ.”—1 Mose 6:5, 11.

Yɛ be ni sa mli lɛ, akɛɛ Noa tɛ̃ɛ akɛ Nyɔŋmɔ baakpata heloo fɛɛ hiɛ yɛ nu afua ko mli. (1 Mose 6:13, 17) Eyɛ mli akɛ Noa batsɔ ‘mɔ ni shiɛɔ jalɛ’ moŋ, shi eyɛ faŋŋ akɛ eji nɔ ni wa kɛha gbɔmɛi lɛ akɛ amɛaahe amɛye akɛ nibii fɛɛ ni ebɔle amɛhe kɛkpe lɛ miiya enaagbee. (2 Petro 2:5) Mɛi kpaanyɔ pɛ fee toiboo kɛha kɔkɔbɔɔ lɛ ni ahere amɛyiwala. (1 Petro 3:20) Mɛni hewɔ enɛ he yɔɔ sɛɛnamɔ kɛha wɔ ŋmɛnɛ?

Te Enɛ Kɔɔ Wɔhe Ehaa Tɛŋŋ?

Wɔyɛ bei ni tamɔ Noa beaŋ nɔ lɛ pɛpɛɛpɛ mli. Wɔnuɔ yiwalɛ nifeemɔi ni yɔɔ gbeyei ahe daa, gbɔmɛi akuu shishibulemɔ ahe tafaai, gbɔmɛi babaoo ni agbeɔ kɛ tui ni ekolɛ yiŋtoo pɔtɛɛ ko bɛ sɛɛ, kɛ yiwalɛ nifeemɔ ni yaa nɔ yɛ shia lɛ eshɛ he ko ni haa mɔ he jɔ̃ɔ ehe. Shikpɔŋ lɛ eyi ekoŋŋ kɛ yiwalɛ nifeemɔ, ni taakɛ eji tsutsu lɛ, aha je lɛ ele kojomɔ ni baa lɛ he sane. Yesu diɛŋtsɛ kɛɛ akɛ ebaaba ákɛ kojolɔ ni Nyɔŋmɔ ehala lɛ ni ebaagbála gbɔmɛi amli tamɔ tookwɛlɔ gbálaa gwaŋtɛŋi kɛ abotiai amli lɛ. Yesu kɛɛ akɛ, mɛi ni abaana akɛ amɛsaaa lɛ, “amɛaatee naanɔ hejaramɔ mli.” (Mateo 25:31-33, 46) Shi kɛlɛ, yɛ be nɛɛ mli lɛ, Biblia lɛ kɛɔ akɛ mɛi akpekpei abɔ yi baaná wala—asafo kuu babaoo ko ni jáa anɔkwa Nyɔŋmɔ koome lɛ. Mɛnɛɛmɛi baaná wala mli ŋɔɔmɔ yɛ toiŋjɔlɛ kɛ shweshweeshwe shihilɛ ni hiɔ shi daa ni anáko eko pɛŋ mli, yɛ jeŋ ni baaba lɛ mli.—Mika 4:3, 4; Kpojiemɔ 7:9-17.

Mɛi babaoo kɛ Biblia mli wiemɔi ni tamɔ enɛ kɛ kɔkɔbɔi ni kɔɔ kojomɔ nifeemɔ ní baatsɔɔ akɛ wiemɔi nɛɛ ji anɔkwale lɛ yeɔ fɛo. Shi bɔfo Petro tsɔɔ mli akɛ yiŋkɔshikɔshifeelɔi ni tamɔ nakai miikpoo anɔkwalei lɛ. Eŋma akɛ: “Naagbee gbii lɛ anɔ lɛ hefɛoyelɔi aaaba . . . amɛaakɛɛ: Nɛgbɛ ebaa lɛ he shiwoo lɛ yɔɔ? . . . Ejaakɛ kwa amɛkwaa amɛjieɔ amɛhiɛ yɛ enɛ nɔ akɛ ŋwɛi yɛ kɛjɛ blema beebe, ni shikpɔŋ hu jɛ nu mli, ni etsɔ nu mli ebama shi yɛ Nyɔŋmɔ wiemɔ naa; nomɛi nɔŋŋ nɔ etsɔ ni nu ŋɔ no be lɛŋ je lɛ ni ehiɛ kpata lɛ. Shi ŋwɛi kɛ shikpɔŋ ní yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyashi kojomɔ kɛ gbɔmɛi  ní kwá Nyɔŋmɔ lɛ ahiɛkpatamɔ gbi lɛ nɔ.”—2 Petro 3:3-7.

Yɛ Yesu gbalɛ mli famɔ lɛ toiboo mli lɛ, ŋmɛnɛ akɛ ekãa miishiɛ jeŋ muu fɛɛ kɔkɔbɔɔ ni kɔɔ kojomɔ gbi ni baa nɛɛ he, kɛ sanekpakpa ni kɔɔ toiŋjɔlɛ ni baanyiɛ sɛɛ aba lɛ he lɛ he shɛɛ sane. (Mateo 24:14) Esaaa akɛ abuɔ kɔkɔbɔɔ nɛɛ akɛ eji nɔ ko ni yɔɔ fɛlɛfɛlɛ. Nyɔŋmɔ Ofe lɛ yeɔ ewiemɔ nɔ.

Jeŋ ni Baaba Lɛ

Te adesai awɔsɛɛ shihilɛ baafee aha tɛŋŋ, beni wɔsusuɔ tsakemɔ ni he hiaa waa ni baa lɛ he lɛ? Yesu wo shi yɛ e-Gɔŋ nɔ Shiɛmɔ ni ehe gbɛi waa lɛ hiɛkpamɔ wiemɔ lɛ mli akɛ: “Miishɛɛ ji mɛi ni he jɔ lɛ, ejaakɛ amɛaahi shikpɔŋ lɛ nɔ.” Kɛkɛ ni etee nɔ etsɔɔ ekaselɔi lɛ koni amɛsɔle amɛha Nyɔŋmɔ akɛ: “Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” (Mateo 5:5; 6:10, NW) Hɛɛ, Yesu diɛŋtsɛ tsɔɔ akɛ wɔsɛɛ shihilɛ ni yɔɔ naakpɛɛ kã shi kɛha adesai ni yeɔ anɔkwa lɛ yɛ biɛ yɛ shikpɔŋ nɛɛ nɔ. Etsɛ lɛ akɛ “jeŋ hee lɛ.”—Mateo 19:28.

No hewɔ lɛ be mli ni osusuɔ wɔsɛɛ shihilɛ he lɛ, kaaŋmɛ gbɛ ni hefɛoyelɔi ha oyiŋ fee bo kɔshikɔshi yɛ Nyɔŋmɔ kɔkɔbɔɔ lɛ he. Eji anɔkwale akɛ, ekolɛ etamɔ nɔ ni shihilɛi ni ebɔle wɔhe kɛkpe lɛ hi ni ŋmɛnɛŋmɛnɛ je lɛ ehi shihilɛ mli bei babaoo. Shi kɛlɛ, esaaa akɛ wɔkɛ wɔhe fɔ̃ɔ nɔ. Abu adesai aje lɛ fɔ. No hewɔ lɛ, ná tsui kɛjɛ bɔfo Petro wolo lɛ naamuu wiemɔ lɛ mli akɛ:

“Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? mɛi ni kwɛɔ gbɛ ni amɛshweɔ Nyɔŋmɔ gbi lɛ baa lɛ . . . Akɛni nyɛkwɛɔ nii nɛɛ agbɛ nɛɛ, nyɛbɔa mɔdɛŋ, koni ana nyɛ ní muji loo kpa ko bɛ nyɛhe yɛ ehiɛ, yɛ hejɔlɛ mli. . . . Nyɛshwerea yɛ wɔ-Nuntsɔ kɛ yiwalaherelɔ Yesu Kristo duromɔ kɛ nilee lɛ mli.” (2 Petro 3:11, 12, 14, 18) No hewɔ lɛ, kasemɔ nii kɛjɛ nɔ ni ba be ko ní eho yɛ Noa gbii lɛ amli lɛ mli. Tsi obɛŋkɛ Nyɔŋmɔ. Hã nilee ni oyɔɔ yɛ Yesu Kristo he lɛ aya hiɛ. Ná Nyɔŋmɔ jamɔ hetuu-kɛhamɔ, fatamɔ mɛi akpekpei abɔ ni ehala akɛ amɛbaaje je nɛɛ naagbee lɛ mli shweshweeshwe kɛbote toiŋjɔlɛ jeŋ ni baaba lɛ mli lɛ ahe.

[Mfoniri ni yɔɔ baafa 5]

Ale dadei ahe nitsumɔ waa dani Nu Afua lɛ ba

[Mfoniri ni yɔɔ baafa 7]

Ato wɔsɛɛ be kpakpa ko he gbɛjianɔ